प्रधानमंत्री-यंग लीडर्स डायलॉग
प्रधानमंत्री नरेन्द्र मोदी ह कहिन हे कि डिजिटल इंडिया, स्टार्टअप अउ युवा मनके भागीदारी देस के भविष्य ल नवा आकार देवत हे। ए बात ओमन नई दिल्ली म काली विकसित भारत यंग लीडर्स डायलॉग के समापन सत्र म कहिन। ओमन कहिन कि युवा अउ उद्यमी मनके कोसित ले ए देस रचनात्मक अउ प्रौद्योगिकी आधारित क्षेत्र म तेजी ले विकास करत हे। श्री मोदी ह किहिन कि डिजिटल इंडिया ले रचनाकार के एक नवा समुदाय तैयार होय हे, जेखर ले ऑरेंज इकोनॉमी ल सुघ्घर गति मिलत हे।
वीबी-जी राम जी कानून
केन्द्रीय कार्मिक, लोक शिकायत अउ पेंसन राज्यमंत्री डॉक्टर जितेन्द्र सिंह ह किहीन हे कि विकसित भारत- जी-राम-जी कानून ह वित्तीय बछर म हरेक ग्रामीण परिवार ल पहिली के सौ दिन के जघा म एक सौ पच्चीस दिन के पइसा वाले रोजगार गारंटी देथे। नई दिल्ली म आज विकसित भारत जी-राम-जी संवाददाता सम्मेलन ल संबोधित करत श्री सिंह ह कहिन कि ए योजना बोवाई अउ कटाई के मौसम के दउरान कृषि मजदूर मनके मौजूदगी सुनिश्चित करे बर कुल साठ दिन के बिना काम के बेरा घलो देथे।
मुख्यमंत्री-बैठक
मुख्यमंत्री विष्णुदेव साय के अगुवई म आज बस्तर संभाग के समग्र विकास म केन्द्रित उच्च स्तरीय समीक्षा बइठका आयोजित करे जावत हे। बइठका म बस्तर क्षेत्र म सांति, सुशासन अउ विकास ल लेके सासन के प्राथमिकता उपर चर्चा करे जावत हे। संगेसंग बस्तर ल मुख्यधारा ले जोड़े बर मूलभूत सुविधा जइसन – सड़क, बिजली, पानी, स्वास्थ्य, सिक्षा अउ संचार के तेजी ले विस्तार करे बर घलो गोठबात करे जावत हे। बइठका म मुख्य सचिव विकास शील, मुख्यमंत्री के प्रमुख सचिव सुबोध कुमार समेत बड़का अधिकारी मौजूद हे।
विवाह पंजीयन-अनिवार्य
विवाह संबंधी रिकॉर्ड ल विधि सम्मत बनाय अउ अवइया दिन म होय कानूनी विवाद ल रोके बर विधि अउ विधायी कार्य विभाग ह उनतीस जनवरी दू हजार सोलह अउ ओखर बाद होय जम्मों बिहाव के पंजीयन जरूरी कर देहे। ए बारे म राजपत्र म अधिसूचना प्रकासित कर दे गेहे। अधिसूचना के तहत तय प्रक्रिया के मुताबिक संबंधित पक्ष ल निर्धारित समय-सीमा म बिहाव के पंजीयन कराना होही।
केदारनाथ गुप्ता-प्रेसवार्ता
राज्य के सहकारी बैंक मन म नवाचार के संगेसंग भ्रष्टाचार म रोक लगाय बर सुरक्षा के कड़ा इंतजाम करे जावत हे। ए बात छत्तीसगढ़ राज्य सहकारी बैंक मर्यादित के अध्यक्ष केदारनाथ गुप्ता ह आज रायपुर म पत्रकार मन ले गोठबात करत कहिन। ओमन बतईन कि सहकारी बैंक मन म सुरक्षा बर समिति के केसीसी खाता मन ल सोझे नाम ले जोड़े के विकल्प सीबीएस म प्रतिबंधित कर दे गेहे। टू एफए दोहरा प्रमाणीकरण ल सीबीएस म लागू कर दे गेहे। आरबीआई के दिसा-निरदेस के मुताबिक सहकारी बैंक मन ल ‘‘डोमेन बैंक इन‘‘ म माइग्रेट कर ले गेहे।
एक ठिन प्रश्न के जवाब म श्री गुप्ता ह बतईन कि अंबिकापुर सहकारी बैंक म तिरालीस करोड़ अउ बरमकेला सहकारी बैंक म नौ करोड़ रूपिया के फर्जी लोन अउ गबन के जांच चलत हे। ओमन बतईन कि ए मामला मन ल जल्दीच ईओडब्ल्यू ल सौंपे जाही।
श्री गुप्ता ह बतईन कि प्रदेस म अब तक समर्थन मूल्य म सत्रह लाख सत्ताईस हजार किसान मन ले पंचानवे लाख मीटरिक टन ले जादा धान खरीदी गेहे। एखर एवज म किसान मन ल बाईस हजार तीन सौ उनहत्तर करोड़ रूपिया ले जाद के रासि के भुगतान करे जा चुके हे।
मुख्यमंत्री-बालोद
मुख्यमंत्री विष्णुदेव साय ह काली बालोद जिला के गुण्डरदेही म दू सौ तैंतीस करोड़ रूपिया के लागत के आने-आने विकास काम के भूमिपूजन अउ लोकार्पण करीन। ओमन गुण्डरदेही म सामुदायिक भवन अउ हरेक वार्ड म विकास काम बर एक-एक करोड़ रूपिया देके घलो घोसना करीन। कार्यक्रम म मुख्यमंत्री ह आने-आने योजना मनके पात्र हितग्राही मन ल प्रमाण पत्र दीन।
युवा रत्न सम्मान
राष्ट्रीय युवा दिवस म काली रायपुर म युवा रत्न सम्मान समारोह के आयोजन करे गीस। कार्यक्रम म मुख्यमंत्री विष्णुदेव साय ह आने-आने क्षेत्र म सुघ्घर काम करइया राज्य के आठ युवा अउ धमतरी जिला के खुरतुली के युवा स्टार सेवा समिति ल सम्मानित करीन। ओमन बेमेतरा के एस्ट्रोफिजिक्स म सबले कमती उम्र के वैज्ञानिक अउ पीएचडी छात्र अउ एनएएसओ ओलंपियाड म स्वर्ण पदक ले सम्मानित पीयूष जायसवाल ल छत्तीसगढ़ युवा रत्न सम्मान दीन। उहें, सामाजिक क्षेत्र म बढ़िया काम करइया कांकेर के शिल्पा साहू, साहित्य के क्षेत्र म सरगुजा के अमित यादव, नवाचार बर महासमुंद के मृणाल विदानी अउ शिक्षा के क्षेत्र म बढ़िया काम बर दुरूग के परिधि शर्मा ल सम्मानित करे गीस। मुख्यमंत्री ह बिलासपुर के अंतर्राष्ट्रीय कबड्डी खिलाड़ी संजू देवी ल खेल, कवर्धा के सचिव कुनहरे ल कला-संस्कृति अउ आरू साहू ल लोककला म सुघ्घर काम बर युवा रत्न सम्मान दीन।
बालोद जंबूरी-समापन
बालोद जिला के दुधली म राखे गे देस के पहिली राष्ट्रीय रोवर-रेंजर जंबूरी के आज समापन होगे। जंबूरी म काली मुख्यमंत्री विष्णुदेव साय सामिल होइन। ए मउका म ओमन बाल विवाह जइसन सामाजिक कुरीति ल रोके बर रोवर-रेंजर, स्काउट-गाइट अउ जनसमुदाय ल सपथ देवईन। ए मउका म बीस हजार ले जादा लोगन मन ह एक संग बाल विवाह रोकथाम सपथ लेके गोल्डन बुक ऑफ वर्ल्ड रिकॉर्ड्स म जिला के नाम दर्ज करईन। ए दउरान मुख्यमंत्री ह बालोद जिला के कलेक्टर दिव्या उमेश मिश्रा ल गोल्डन बुक ऑफ वर्ल्ड रिकॉर्ड्स के प्रमाण-पत्र दे गीस।
कार्यक्रम ल संबोधित करत मुख्यमंत्री ह कहिन कि बाल विवाह ह समाज बर एक ठिन गंभीर चुनौती हरय। एला रोके बर सासन के नइ, बल्कि समाज के हरेक मनखे के सक्रिय भूमिका जरूरी हवय।
वंदेमातरम-गायन
पन्द्रह जनवरी के सेना दिवस अउ वंदेमातरम के एक सौ पचासवां वर्षगांठ के मउका म रायपुर लोकसभा क्षेत्र के तीन हजार स्कूल-कॉलेज मनके पांच लाख ले जादा लइका मन संग विधायक, पार्षद, पंच अउ सरपंच मन ह वंदेमातरम के गायन करही। ए जानकारी रायपुर सांसद बृजमोहन अग्रवाल ह आज एक ठिन पत्रकारवार्ता म दीन। ओमन बतईन कि मुख्य कार्यक्रम रायपुर के सुभाष स्टेडियम म आयोजित करे जाही, जिहां बीस हजार युवा मन भाग लीहीं। ए मउका म डाक परिमंडल डहार ले वंदेमातरम के एक सौ पचासवां वर्षगांठ म पिक्चर पोस्टकार्ड घलो जारी करे जाही।
लोहड़ी/मकर संक्रांति
लोहड़ी तिहार आज मनाय जावत हे। राष्ट्रपति द्रौपदी मुर्मु ह लोहड़ी, मकर संक्रांति, पोंगल अउ माघ बिहू के देसवासी मन ल सुभकामना दीन हे।
काली मकर संक्रांति के तिहार मनाय जाही। ए मउका म मुख्यमंत्री विष्णुदेव साय ह प्रदेसवासी मन ल सुभकामना दीन हे। श्री साय ह प्रदेसवासी मनले पतंग उड़ाय के ए परब ल सुरक्षित, जिम्मेदार अउ पारंपरिक खुसी के संग मनाय के अपील करीन हे। ओमन किहीन कि चीनी मांझा ले होवत दुर्घटना ल देखत एखर बउरे म रोक लगाय गेहे। ओमन कहिन कि एखर पालन कड़़ाई ले होवय।
बीजापुर-चित्र प्रदर्शनी
केन्द्रीय संचार ब्यूरो रायपुर डहार ले बीजापुर म विकसित भारत दू हजार सैंतालीस विषय म दू दिन के जन-जागरूकता कार्यक्रम अउ चित्र प्रदर्शनी के आयोजन करे गीस। जिला पंचायत अध्यक्ष जानकी कोरसा अउ नगर पालिका अध्यक्ष गीता सोम पुजारी ह ए प्रदर्सनी के सुभारंभ करीन। ए मउका म ओमन किहीन कि विकसित भारत दू हजार सैंतालीस देस ल आत्मनिर्भर, समृद्ध अउ वैश्विक नेतृत्वकर्ता बनाय के राष्ट्रीय संकल्प हे, जेला जनभागीदारी के माध्यम ले साकार करे जा सकत हे।
रायपुर-लूट
राजधानी रायपुर के तेलीबांधा इलाका म काली अज्ञात आरोपी मन ह कार के कांच तोड़के दस लाख रूपिया नकद समेत लाखों रूपिया के इलेक्ट्रॉनिक सामान लूट लीन। मिले जानकारी के मुताबिक विधानसभा निवासी एक व्यवसायी के कार के कांच तोड़के आरोपी मन ह कार म रखे लैपटॉप, बैग अउ नगद पइसा ले भरे बैग ल लेके भगा गे। गंज थाना पुलिस ह सीसीटीवी फुटेज के आधार म आरोपी मन ल खोजत हे।