संसद के बजट सत्र ए महिना के अट्ठाईस तारीख ले सुरू होही। संसदीय कार्यमंत्री किरण रिजिजू ह सोशल मीडिया पोस्ट म बतइन कि सत्र के पहिली चरण तेरह फरवरी के सिराही अउ दूसर चरण नौ मार्च ले सुरू होही। ओमन बतइन कि राष्ट्रपति द्रौपदी मुर्मु ह बजट सत्र बर संसद के दूनो सदन के सत्र बलाय के मंजूरी दे देहे।
इंटरनेशनल राईस समिट
मुख्यमंत्री विष्णुदेव साय आज रईपुर म राखे गे इंडिया इंटरनेशनल राईस समिट म सामिल होइन। ए बेरा म ओमन चांवल निर्यात करइया मनके हित म मंडी सुल्क म छूट के अवधि बछर भर बर बढ़ाय के घोसना करीन। श्री साय ह किहीन कि मंडी सुल्क के बेरा बढ़ाय ले चांउर निर्यात करइया अउ किसान दूनो ल फायदा होही। ए समिट म बारह देस के बायर्स अउ छै देस के एम्बेसी प्रतिनिधी मंडल के मौजूदगी ले छत्तीसगढ़ ल अंतर्राष्ट्रीय पहिचान मिलही। संगेसंग छत्तीसगढ़ ले चांउर के निर्यात ल बढ़ावा मिलही। मुख्यमंत्री ह बतइन कि अभी छत्तीसगढ़ ले नब्बे ठिन देस ल करीबन एक लाख टन चांउर निर्यात करे जात हे। अेमन किहीन कि आज आर्गनिक उत्पाद के मांग बाढ़त हे। दंतेवाड़ा म आर्गनिक चांउर के खेती होवत हे, जेला अउ आगू बढ़ाय के जरूरत हे। ए मउका म श्री साय ह कृषि अउ कृषि अउ प्रसंस्कृत खाद्य उत्पाद निर्यात विकास प्राधिकरण-एपीडा के क्षेत्रीय कार्यालय के सुभारंभ करीन।
मुख्यमंत्री उत्कृष्टता पुरस्कार
रईपुर म राखे गे मुख्यमंत्री उत्कृष्टता पुरस्कार कारीकरम म मुख्यमंत्री ह आज ई-गर्वर्नेंस डिजीटल मॉनिटरिंग अउ एआई नवाचार बर बने काम करइया जिला अउ विभाग ल सम्मानित करीन। ए मउका म मुख्यमंत्री ह ई-प्रगति पोर्टल के सुभारंभ करीन।
बने काम अउ नवाचार खातिर दंतेवाड़ा, जशपुर, गरियाबंद, मोहला-मानपुर-अंबागढ़ चौकी अउ नारायणपुर जिला ल सम्मानित करे गीस।
कॉस्मो ट्रेड एक्स्पो
मुख्यमंत्री विष्णुदेव साय रईपुर म राखे गे कॉस्मो ट्रेड एंड बिल्डफेयर एक्स्पो कारीकरम म सामिल होइन। ए बेरा म ओमन किहीन कि विकसित छत्तीसगढ़ बनाय म उद्यमी मनके महत्ता के भूमिका होही। ओमन किहीन कि राज्य सरकार हर वरग के बढ़वार बर काम करत हे। व्यापार जगत के बेहतरीन अउ लोगन ल फायदा पहुंचाय बर जीएसटी दर म कटौती करे गीस, जेखर ले कतकोन जिनिस के कीमत म कमी आय हे। मुख्यमंत्री ह किहीन कि छत्तीसगढ़ के नवा उद्योग नीति म एक हजार ले जादा रोजगार देवइया उद्यमी मन ल बिसेस फायदा देके प्रावधान राखे गेहे। अभी तक आठ लाख करोड़ रूपिया ले जादा के निवेस प्रस्ताव मिले हे।
एनसीईआरटी-सुकमा दौरा
राष्ट्रीय शैक्षिक अनुसंधान अउ प्रसिक्षण परिसर एनसीईआरटी नई दिल्ली के टीम ह दू दिवसीय बस्तर दउरा के दउरान सुकमा जिल म चलाय जात उल्लास साक्षरता अभियान के जांच करीन। ए दउरान टीम के सदस्य मन ह जिला के आने-आने साक्षरता केंद्र के दउरा करके जमीनी स्तर म चलत काम ल देखिन अउ नवसाक्षर, जन प्रतिनिधि मनले गोठबात करके बस्तर संभाग बर बिसेस कार्ययोजना तियार करे के दिसा म सुझाव लीन। एखर ले बस्तर संभाग बर एक विशिष्ट सैक्षणिक रणनीति तियार करे जाही।
आदि लोकोत्सव
मुख्यमंत्री विष्णुदेव साय ह काली गोवा के आदर्श ग्राम अमोन, पोंगुइनिम म राखे गे आदि लोकोत्सव परब म संघरीन। ए मउका म ओमन किहीन कि ए लोकोत्सव देस के आदिम संस्कृति ले जुड़े के एक जीवंत उत्सव हरय, जउन भारत के लोक सांस्कृतिक चेतना के प्रतीक हे, जउन ल लोकगीत, लोक नृत्य, पारंपरिक वाद्ययंत्र अउ परंपरा ले जीवंत रखना जरूरी हे। कारीकरम म मुख्यमंत्री ह छत्तीसगढ़ के जनजातीय सेनानी मन के योगदान ल सुरता करत किहीन कि छत्तीसगढ़ म करीबन बत्तीस प्रतिसत जनजातीय आबादी रहिथे अउ इंहा के चौदह जनजातीय महापुरूष मन ह देस के आजादी बर अपन प्राण न्यौछावर करीन।
अग्निवीर भर्ती रैली
धमतरी के इंडोर स्टेडियम म आज ले अग्निवीर भर्ती रैली सुरू हो गेहे। पहिली दिन आज छै ठिन जिला सरगुजा, सूरजपुर, कोरिया, जशपुर, बलरामपुर अउ गौरेला-पेण्ड्रा-मरवाही ले आय चार सौ बारह झिन युवा मन ह भाग लीन। दउड़ परीक्षा म तीन सौ ग्यारा झिन सफल होइन, अब ओमन ल शारीरिक दक्षता परीक्षण, मेडिकल जांच अउ दस्तावेज सत्यापन कराय बर पड़ही। ए भर्ती रैली जनरल ड्यूटी, तकनीकी, क्लर्क, स्टोर कीपर अउ अग्निवीर ट्रेड्समेन के पद बर होय हे। भर्ती रैली म भाग लेवइया उम्मीदवार मन ल प्रवेस पत्र रैली अधिसूचना म बताय गे जरूरी दस्तावेज अउ आधार कारड ले जुड़े मोबाइल फोन लाना जरूरी होही। सेना भर्ती कार्यालय ह स्पष्ट करे हे कि भारतीय सेना म चयन सिरिफ योग्यता अउ प्रदर्सन के आधार म करे जात हे। उम्मीदवार दलाल अउ लालच देवइया लोगन ले दूरिहा रहय।
राष्ट्रव्यापी नशारोधी अभियान
एसो इकतीस मार्च ले राष्ट्र भर म नसा रोधी अभियान सुरू करे जाही। तीन बछर तक चलइया ए अभियान के उद्देस्य देस ल नसा मुक्त बनाना हे। केंद्रीय गृह मंत्री अमित शाह ह काली नई दिल्ली म नार्को समन्वय केंद्र के बइठका म ए बात किहीन। ओमन नसा के समस्या ले निपटे बर इकतीस मार्च तक मसौदा तियार करे के निरदेस दीन। गृहमंत्री ह बतइन कि बछर दू हजार चौदह ले दू हजार पच्चीस के बीच एक करोड़ ग्यारा लाख किलोग्राम नसीला जिनिस जब्त करे गेहे।
सूचना आयुक्त नियुक्ति
राज्य सरकार ह पूर्व मुख्य सचिव अमिताभ जैन ल सूचना आयोग म छत्तीसगढ़ के मुख्य सूचना आयुक्त बनाय हे। एखर संगेसंग आईएएस उमेश अग्रवाल अउ बड़का पत्रकार डॉक्टर शिरिश चंद्र मिश्रा ल राज्य सूचना आयुक्त के पद दे गेहे। ए संबंध म सामान्य प्रशासन विभाग कोति ले अधिसूचना जारी कर दे गेहे।
बलौदाबाजार कलेक्टर-केंद्रीय प्रतिनियुक्ति
केंद्र सरकार ह बलौदाबाजार कलेक्टर दीपक सोनी ल प्रतिनियुक्ति म स्वास्थ्य विभाग म डायरेक्टर के पद म नियुक्त करे हे। श्री सोनी ह दू हजार ग्यारा बैच के छत्तीसगढ़ कैडर के केंद्रीय प्रतिनियुक्ति म जवइया दूसर आईएएस अधिकारी हवय। एखर पहिली दू हजार ग्यारा बैच के ही डॉक्टर सर्वेश्वर नरेंद्र भूरे केंद्रीय प्रतिनियुक्ति म गेहे।
जिले की चिट्ठी
प्रादेशिक समाचार एकांश, आकाशवाणी रईपुर कोति ले प्रस्तुत कारीकरम जिले की चिट्ठी के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ स्थित आकाशवाणी के सबो केंद्र एक संघरा रिले करही। ए बखत के अंक म ‘‘सरगुजा‘‘ जिला के संबंध म जानकारी दे जाही।
दीदी के गोठ
छत्तीसगढ़ राज्य ग्रामीण आजीविका मिसन बिहान कोति ले चलाय जात रेडियो कारीकरम दीदी के गोठ के छठवां किस्त पाछू बिरसपत के प्रसारित करे गीस। एमा वित्तीय समावेसन म स्व-सहायता ले जुड़े गांव के माईलोगन मन ह अपन आर्थिक सशक्तिकरण ले जुड़े कही नइ सुनाइन। एमा दुरूग, बालोद अउ गरियाबंद जिला के दीदी मन ह अपन अनुभव साझा करीन।
रेलवे-पुरस्कार
भारतीय रेल कोति ले काली नई दिल्ली म सत्तरवां अतिविशिष्ट रेल सेवा पुरस्कार दे गीस। समारोह म रेल मंत्री अश्विनी वैष्णव ह दक्षिण पूर्व मध्य रेलवे के दू झिन रेल करमचारी मन ल अतिविशिष्ट रेल पुरस्कार अउ दक्षिण पूर्व मध्य रेलवे ल तीन प्रतिष्ठित सिल्ड ले सम्मानित करीन। उहें, नागपुर के वरिष्ठ मंडल वाणिज्य प्रबंधक दिलीप सिंह अउ रईपुर के स्टेसन अधीक्षक सांध्य प्रदीप चौबे ल सम्मानित करे गीस। समारोह म दक्षिण पूर्व मध्य रेलवे के महाप्रबंधक तरूण प्रकाश मौजूद रिहीन।
डाक समय विस्तार
डाक विभाग ह राजधानी रईपुर म डाक अउ आधार सेवा के समय म बढ़वार करे हे। रईपुर संभाग के प्रवर अधीक्षक हरीश कुमार महावर ह बतइन कि रईपुर प्रधान डाकघर म स्पीड पोस्ट बुकिंग के सुविधा अब रतिहा दस बजे तक रइही। उहें, आधार अपडेट के सुविधा ले सरल बनाय खातिर आने दिन के संगेसंग ईतवार के घलो रईपुर जनरल पोस्ट ऑफिस म ए सुविधा देवाय जाही।
श्रमिक कल्याण राशि वितरित
विधानसभा अध्यक्ष डॉक्टर रमन सिंह ह छत्तीसगढ़ श्रम कल्याण मंडल कोति ले चलाय जात छात्रवृत्ति, साइकिल सहायता अउ खेलकूद प्रोत्साहन योजना म काली रईपुर म छै हजार ले जादा श्रमिक परिवार ल करीबन ढाई करोड़ रूपिया बांटिन। ए बेरा म डॉक्टर सिंह ले किहीन कि अभी तक ए योजना के फायदा लाखों मजदूर ल मिल गेहे।
राजमार्ग कार्य पूर्ण
छत्तीसगढ़ म रईपुर-कोड़ेबोड़ खंड के राष्ट्रीय राजमार्ग क्रमांक तीस ल फोरलेन म उन्नत करे के काम पूरा कर ले गेहे। एखर ले रईपुर, धमतरी अउ तीर-तखार के क्षेत्र म अवई-जवई के संगेसंग समान लाने लेगे के सुविधा सरल होही। ए राष्ट्रीय राजमार्ग के निर्माण नौ सौ सत्यासी करोड़ रूपिया ले जादा के लागत ले करे गेहे।