उहें, मुख्यमंत्री विष्णुदेव साय ह किहीन कि बालोद जिला म राखे जात ए ऐतिहासिक जंबूरी छत्तीसगढ़ के युवा सक्ति ल राष्ट्रीय मंच म लाय के सुनहरा अवसर हे। ओमन किहीन कि राज्य सरकार युवा मनके खेल, कौशल विकास अउ नेतृत्व क्षमता ल सुदृढ़ करे बर पूरा प्रतिबध्दता ले काम करत हे।
माओवादी-आत्मसमर्पण
दंतेवाड़ा जिला म आज तिरसठ माओवादी मन आत्मसमर्पण करे हे। एमा ले छत्तीस माओवादी मन उपर एक करोड़ उन्नीस लाख पचास हजार रूपिया के इनाम घोसित रिहीस। ए माओवादी मन जिला के पुलिस अधीक्षक गौरव राय के आगू आत्मसमर्पण करे हे।
पत्रकार मनले चर्चा करत पुलिस अधीक्षक श्री राय ह बतइन कि आत्मसमर्पण करइया माओवादी म अट्ठारा महिला माओवादी घलो सामिल हे। ए जम्मों माओवादी दरभा डिवीजन, दक्षिण बस्तर, पश्चिम बस्तर, माड़ क्षेत्र अउ ओडिसा राज्य म सक्रिय रिहीन। पुलिस अधीक्षक ह बतइन कि इनामी माओवादी म आठ लाख के अउ पांच लाख के सात, दू लाख के आठ, एक लाख के ग्यारा अउ पचास हजार के तीन माओवादी सामिल हे।
पुलिस अधीक्षक ह बतइन कि आत्मसमर्पित माआवेदी मन उपर पुलिस मुठभेड़, आईईडी विस्फोट, एम्बुस, आगजनी, हत्या अउ गोलीबारी समेत गंभीर माओवादी घटना म सामिल रहय के आरोप हे। एमा डीवीसीएम, पीपीसीएम, प्लाटून सदस्य अउ गार्ड कमांडर स्तर के माओवादी सामिल हे। ए जम्मो माओवादी मन न सरकार के पुनर्वास नीति के तहत पचास-पचास हजार रूपिया के प्रोत्साहन रासि प्रदान करे गेहे।
प्रसार-भारती क्रिएटर्स कॉर्नर
केद्रीय सूचना अउ प्रसारण मंत्री अश्विनी वैष्णव अउ सूचना अउ प्रसारण राज्य मंत्री डॉक्टर एल. मुरूगन ह आज नई दिल्ली म क्रिएटर्स कॉर्नर के सुभारंभ करीन। प्रसार भारती डहार ले सुरू करे गे ए पहल के उद्देस्य डिजीटल प्लेटफार्म म रचनात्मक सामग्री ल प्रदर्सित करना अउ एला बढ़ावा देना हे। कारीकरम ल संबोधित करत श्री वैष्णव ह किहीन कि सरकार के लक्ष्य एक करोड़ युवा ल अर्थव्यवस्था ले जोड़ना हे।
अग्निवीर भर्ती-रैली
धमतरी के इंडोर स्टेडियम म काली दस जनवरी ले चौबीस जनवरी तक अग्निवीर भर्ती रैली के आयोजन करे जाही। सेना भर्ती कार्यालय रईपुर डहार ले मिले जानकारी अनुसार ए भर्ती रैली के अंतर्गत जनरल ड्यूटी, तकनीकी, कलर्क स्टोर कीपर अउ अग्निवीर ट्रेड्समेन के पद बर चयन प्रक्रिया संपन्न होही। भर्ती रैली म भाग लेबर अभ्यर्थी मन ल प्रवेस पत्र, रैली अधिसूचना म उल्लेखित जम्मो जरूरी दस्तावेज अउ आधार कार्ड ले लिंक मोबाइल फोन संग म लाना अनिवार्य होही। सेना भर्ती कार्यालय ह स्पष्ट करे हे कि भारतीय सेना म चयन केवल योग्यता अउ प्रदर्सन के आधार म करे जात हे। अभ्यर्थी दलाल अउ प्रलोभन देवइया मन ले दूर रहय।
ऑनलाइन सट्टा आरोपी गिरफ्तार
रईपुर पुलिस ह ऑनलाइन सट्टा गिरो के मास्टर माइंड समेत चार आरोपी मन ल गिरफ्तार करे हे। ए आरोपी मन करा ले पचास लाख रूपिया नगद, मोबाइल अउ लैपटाप घलो बरामद होय हे। पुलिस ह बतइन कि ए आरोपी मन करा कई ठिन म्यूल अकाउंट घलो मिले हे। ए पूरा मामला गंज थाना क्षेत्र के बताय जात हे।
बस्तर पंडुम
बस्तर की लोक-संस्कृति, परंपरा अउ विरासत ल राष्ट्रीय पहिचान दिलाय बर काली दस जनवरी ले बस्तर पंडुम के आयोजन करे जाही। पहिली चरण म काली ले जनपद स्तर म प्रतियोगिता सुरू होही जउन बीस जनवरी तक चलही। पहिली चरण म हरेक विधा ले एक-एक विजेता दल के चयन करे जाही जेमन ल दस हजार रूपिया के प्रोत्साहन रासि दे जाही।
उहें, दूसरइया चरण म जिला स्तर म चौबीस ले उनतीस जनवरी अउ तीसरइया अउ आखिरी चरण म दू ले छै फरवरी तक जगदलपुर म संभाग स्तरीय प्रतियोगिता होही। बस्तर पंडुम म लोक नृत्य, लोकगीत, पारंपरिक वाद्ययंत्र, हस्त सिल्प, जनजातीय व्यंजन, वेशभूषा समेत आने-आने सांस्कृतिक विधा के प्रदर्सन करे जाही।
खेलो इंडिया नेशनल ट्राइबल गेम्स ट्रायल
नेशनल ट्राइबल गेम्स म खिलाड़ी मनके चयन बर छै ले आठ जनवरी तक रईपुर अउ बिलासपुर म ट्रायल होइस। अगल महिना आयोजित होवइया एक खेल बर प्रदेस भर के एक हजार ले जादा जनजातीय खिलाड़ी मन हिस्सा लीन। नेशनल ट्राइबल गेम्स के तहत कुश्ती, फुटबाल, वेटलिफ्टिंग, हॉकी, तीरंदाजी, तैराकी अउ एथेलेटिक्स समेत सात खेल स्पर्धा बर छत्तीसगढ़ के टीम के चयन करे गीस।
रईपुर के स्वामी विवेकानंद स्टेडियम कोटा म कुश्ती, फुटबॉल अउ वेटलिफ्टिंग बर राज्य स्तरीय चयन ट्रायल के आयोजन करे गे रिहीस। उहें, सरदार वल्लभ भाई पटेल अंतर्राष्ट्रीय हॉकी स्टेडियम म हॉकी के ट्रायल होइस। बिलासपुर के राज्य खेल प्रसिक्षण केंद्र बहतराई म तीरंदाजी के संघरा एथलेटिक्स अउ सरकंडा स्थित जिला खेल परिसर म तैराकी खिलाड़ी मनके चयन बर ट्रायल होइस।
रईपुर म संपन्न चार ठिन खेल के चयन ट्रायल म कुल पांच सौ अंठावन अउ बिलासपुर म तीन ठिन खेल के ट्रायल बर चार सौ सत्तर खिलाड़ी सामिल होइन।
आवासीय विद्यालय आवेदन
प्रदेस म संचालित पचहत्तर ठिन एकलव्य आदर्श आवासीय विद्यालय म शिक्षण सत्र दू हजार छब्बीस सत्ताईस म कक्षा छटवीं म प्रवेस बर आठ जनवरी ले ऑनलाइन आवेदन के प्रक्रिया सुरू होगे। छात्र एकलव्य विद्यालय के वेबसाइट म ऑनलाइन आवेदन कर सकत हे। आवेदन करे के आखिरी तारीख सात फरवरी निर्धारित करे गेहे। ऑनलाइन आवेदन म त्रुटि सुधार आठ ले दस फरवरी तक करे जाही। प्रवेस परीक्षा के संभावित तिथि एक मार्च निर्धारित करे गेहे।
प्रधान पाठक-बर्खास्त
धमतरी जिला प्रशासन ह साल दू हजार सात म होय शिक्षाकर्मी भर्ती घोटाला म कार्रवाई करत आठ प्रधान पाठक ल बर्खास्त कर देहे। प्रशासन ह केहे हे कि एमन जम्मो फर्जी दस्तावेज के सहारे नौकरी पा के बरसो ले शिक्षा विभाग म पदस्थ रिहीन। प्रशासन ह स्पष्ट करे हे कि ए मामला म जांच अभी जारी हे अउ करीबन दस झिन दूसर लोगन मन घलो जांच के दायरा म हे, जेमन उपर जल्दी ही कार्रवाई करे जा सकत हे।
दंतेवाड़ा-कॉमन सर्विस सेंटर
दंतेवाड़ा जिला म अनियमितता पाय जाय के बाद तैंतीस ठिन कॉमन सर्विस सेंटर-सीएससी ल बंद कर दे गेहे। ए कार्रवाई सीएससी के दिल्ली मुख्यालय ह करे हे। जांच के दउरान पाय गीस कि कई ठिन कॉमन सर्विस सेंटर बिना स्थायी केंद्र के संचालित करे जात रिहीस। कुछेक केंद्र म निर्धारित कॉमन ब्रांडिंग नइ रिहीस या बैनर बिना फ्रेम के लगाय गे रिहीस। कई जघा म दर सूची घलो प्रदर्सित नइ करे गे रिहीस। एखर अलावा कुछ ग्राम स्तरीय उद्यमी अपन अधिकृत सीएससी पहिचान संख्या बजाय दूसर माध्यम ले लेन देन करत रिहीन, जउन नियम के उल्लंघन के दायरा म आथे। सीएससी मुख्यालय ह केहे हे कि अवइया दिन म जिला प्रशासन अउ सीएससी टीम डहार ले फिर से निरीक्षण करे जाही। यदि दूसर केंद्र म घलो अनियमितता मिलही त ओखर पहिचान संख्या रद्द करे जा सकत हे।
कांग्रेस-प्रदर्शन
कांग्रेस के प्रदेस प्रभारी सचिन पायलट ह काली रईपुर स्थित राजीव भवन म पॉलिटिकल अफेयर्स कमेटी अउ नवनियुक्त जिला अध्यक्ष मनके संयुक्त बठका लीन। बइठका म दस जनवरी ले पच्चीस फरवरी तक प्रदेसभर म जी-राम-जी योजना के खिलाफ ‘‘मनरेगा बचाओ संग्राम‘‘ अभियान चलाय के निर्णय ले गीस। एखर तहत काली दस जनवरी के जम्मो जिला मुख्यालय म प्रेसवार्ता आयोजित करे जाही।