केन्द्र सरकार ह जनगणना के पहिली चरण बर अधिसूचना जारी कर देहे। जनगणना के पहिली चरण एसो एक अप्रैल ले सुरू होही, जउन ह तीस सितंबर तक चलही। ए चरण म हरेक घर के गिनती करे जाही। एखर बर हर राज्य अउ केन्द्रसासित प्रदेस म तीस दिन के अवधि तय होही। गृह मंत्रलाय के अधिसूचना म ए कहे गेहे कि ए अवधि के अनुसार घर के गिनती सुरू होय ले पन्द्रह दिन पहिली तक लोगन मन ल खुदे ए जानकारी दरज कराय के सुविधा उपलब्ध होही।
विकसित भारत युवा नेता संवाद
विकसित भारत युवा नेता संवाद कार्यक्रम ह काली नई दिल्ली के भारत मंडपम म होवइया हे। केन्द्रीय खेल मंत्री डॉक्टर मनसुख मांडविया ह कहिन हे कि ए कार्यक्रम ह जवान लइका मन ल आगू बाढ़के नेतृत्व करे, चुनौती के सामना करे अउ देस के भविष्य के निर्माण के रूपरेखा म योगदान दे बर सशक्त बनाही। ओमन ह कहिन कि ए कार्यक्रम म देसभर के युवा नेता मन ह प्रधानमंत्री नरेन्द्र मोदी के संग विकसित भारत के दृष्टिकोण उपर अपन विचार साझा करही।
जनदर्शन
मुख्यमंत्री विष्णुदेव साय के रायपुर के निवास कार्यालय म आज जनदर्शन कार्यक्रम होइस। जनदर्शन म महासमुंद जिला के बड़े टेमरी गांव के बसंती साव ल मुख्यमंत्री आर्थिक सहायता योजना के चलत पांच लाख रूपिया के आर्थिक सहायता रासि के स्वीकृति दे गीस। उहें, दिव्यांगजन मन ल बैटरी ट्रायसायकल, व्हील चेयर अउ श्रवण यंत्र दे गीस।
अपार आईडी
राष्ट्रीय शिक्षा नीति के चलत अभी देसभर म पढ़ईया लइका मनके अपार आईडी बनाय जात हे, जेमा अभू तक छत्तीसगढ़ ह अच्छा प्रदर्सन करे हे। राज्य के संतावन हजार ले जादा स्कूल म पढ़त संतावन लाख दस हजार ले जादा लइका मन ले करीबन पचास लाख इकसठ हजार लइका मनके अपार आईडी बनाय जा चुके हे, जउन के लक्ष्य ले अठासी प्रतिसत ले जादा हरय। बेमेतरा जिला म सबले जादा छियानवे दशमलव चार-शून्य प्रतिशत अउ राजनांदगांव म छियानवे दशमलव तीन-आठ प्रतिशत लइका मनके अपार आईडी बन चुके हे। एला डिजिटल शैक्षणिक संरचना के दिसा म एक ठिन महत्वपूर्ण अउ बड़का उपलब्धि माने जात हे।
जानबा के अनुसार केन्द्र सरकार ह इकतीस जनवरी तक सबो पढ़ईया लइका मनके अपार आईडी ल बनाय के निरदेस दीन हे।
ईडी संपत्ति-अटैच
महादेव सट्टा ऐप मामला म प्रवर्तन निदेशालय-ईडी ह सौरभ चंद्राकर समेत पांच झिन आरोपी के लगभग बयानवे करोड़ रूपिया के संपत्ति ल अटैच कर लेहे। ए मामला म ईडी ह अभू तक चौहत्तर झिन लोगन मन ल आरोपी बनाय हे, जेमा ले तेरह झिन गिरफ्तार हो चुके हे। ए कार्रवाई के चलत ईडी ह एक सौ पचहत्तर ठिन जघा म छापामारी करीन अउ अभू तक छब्बीस सौ करोड़ रूपिया के संपत्ति ल अटैच करे जा चुके हे।
प्रगति-विशेष कार्यक्रम
भारत सरकार के ‘‘प्रगति पोर्टल‘‘ म प्रादेशिक समाचार एकांश, रायपुर कोति ले तैयार करे गे विशेष कार्यक्रम के प्रसारण आज रतिहा आठ बजे ले आठ बजके पांच मिनट तक करे जाही। एला छत्तीसगढ़ के आकाशवाणी के सबो केन्द्र ह एक संघरा रिले करही।
प्राध्यापक-वरिष्ठता सूची
उच्च शिक्षा विभाग ह प्रदेस के सरकारी कॉलेज के पदोन्नत होय प्राध्यापक मनके आखिरी संशोधित वरिष्ठता सूची ल जारी कर देहे। ए सूची म लोक सेवा आयोग ले चयन, विषयवार नियुक्ति, कार्यभार ग्रहण करे के तारीख, संविलियन अउ नियमितीकरण के तारीख जइसे मापदंड ल सामिल करे गेहे। ए सूची ह छत्तीसगढ़ उच्च न्यायालय के निर्णय अउ सासन कोति ले जारी करे गे पदोन्नति आदेस के परिपालन म प्रकासित करे गेहे। पदोन्नत होय प्राध्यापक मनके वरिष्ठता के निर्धारण ल एक अप्रैल दू हजार सत्रह अउ एक अप्रैल दू हजार तेईस के स्थिति के आधार म करे गेहे। अब आखिरी वरिष्ठता सूची म अगर कोनों पदोन्नत प्राध्यापक ल कुछु आपत्ति होही, त ओमन ह बीस जनवरी तक निर्धारित प्रारूप म अपन आपत्ति ल प्रस्तुत कर सकत हे।
प्राथमिक स्वास्थ्य केन्द्र-स्वीकृति
प्रदेस म बारह ठिन नवा प्राथमिक स्वास्थ्य केन्द्र खोले जाही। ए संबंध म स्वास्थ्य विभाग ह आदेस जारी करे हे। हरेक स्वास्थ्य केन्द्र म एक झिन चिकित्सा अधिकारी समेत बारह झिन चिकित्सा कर्मी के नियुक्ति करे जाही। एमा ग्रामीण चिकित्सा सहायक, फार्मासिस्ट ग्रेड-टू, महिला स्वास्थ्य कार्यकर्ता, स्टाफ नर्स, लैब, टैक्नीशियन, सहायक ग्रेड-तीन, वार्ड बॉय अउ आया के पद ह सामिल हरय।
स्वास्थ्य मंत्री श्यामबिहारी जायसवाल ह कहिन हे कि नवा स्वास्थ्य केन्द्र बने ले लोगन मन ल ग्रामीण स्तर म घलो अच्छा स्वास्थ्य सुविधा मिल पाही।
विजय शर्मा-बीजापुर
उपमुख्यमंत्री विजय शर्मा ह अपन बीजापुर प्रवास के बेरा म काली अधिकारी मनके बइठका लेके नियद नेल्लानार योजना के चलत विकास कार्य के समीक्षा करीन। ओमन ह कहिन कि माओवादी के उन्मूलन के बाद लोगन मन म विश्वास जगाना अउ विकास कार्य म तेजी लाना सरकार के प्राथमिकता हरय। उपमुख्यमंत्री ह बतईन कि माओवादी मुक्त ग्राम पंचायत ल विशेष परियोजना के चलत ‘‘इलवद पंचायत‘‘ के रूप म एक करोड़ रूपिया के विकास कार्य के सौगात दे जाही। ओमन कहिन कि बीजापुर के दूरदराज वाले जघा म रद्दा, बिजली, पानी, स्कूल, अस्पताल अउ आंगनबाड़ी समेत सरकार के हितग्राही मूलक योजना ल हरेक मनखे ल जोड़े जाही।
उपमुख्यमंत्री श्री शर्मा ह कुटरू गांव म नियद नेल्लानार योजना म सामिल पंचायत के विकास बर उहां के रहइया जनप्रतिनिधि अउ समाज के प्रमुख मनके संग बइठका घलो करीन, जेमा जिला के कतकोन ग्राम पंचायत ले आय ग्रामीण जनप्रतिनिधि अउ समाज प्रमुख गायता, सिरहा, पुजारी अउ बैगा सामिल होइन। ए कार्यक्रम ल संबोधित करत हुए श्री शर्मा ह कहिन कि बस्तर के हरेक गांव म सांति अउ खुसहाली लाय बर राज्य सरकार ह प्रतिबद्धता के संग काम करत हे। ओमन ह समाज प्रमुख मन ले अपील करीन हे कि ओमन ह माओवादी गतिविधि म सामिल अपन-अपन गांव के जवान लइका मन के पुनर्वास करावयं। कार्यक्रम म बीजापुर के ग्रामीण महिला स्व-सहायता समूह कोति ले लगाय गे प्रदर्सनी ल उपमुख्यमंत्री ह देखीन।
राष्ट्रीय-जंबूरी
छत्तीसगढ़ भारत स्काउट्स गाइड्स म राष्ट्रीय रोवर-रेंजर जंबूरी के आयोजन काली नौ ले तेरह जनवरी तक बालोद के दुधली म करे जाही। ए राष्ट्रीय स्तर के आयोजन के मेजबानी छत्तीसगढ़ ल पहिली घांव मिले हे। ए जंबूरी म देस के आने-आने राज्य ले करीबन बारह ले पंद्रह हजार रोवर रेंजर मनके सामिल होय के संभावना हे।
न्यायाधीश धमकी-न्यायालय सुरक्षा
मद्रास न्यायालय के न्यायाधीश ल बम ले उड़ाय के धमकी मिले के बाद छत्तीसगढ़ के जिला न्यायालय मन म घलो सुरक्षा बढ़ा दे गेहे। बिलासपुर जिला के वरिष्ठ पुलिस अधीक्षक रजनेश सिंह ह बतईन कि धमकी मिले के बाद जिला न्यायालय समेत आने अदालत म सुरक्षा बल ल तैनात कर दे गेहे। संगेसंग अधिकारी मनके घलो तैनाती करे गेहे।
एमओयू
राज्य सरकार ह आवास अउ शहरी विकास निगम-हुडको के संग एक ठिन समझौता ज्ञापन म हस्ताक्षर करीन हे। ए समझौता के मुख्य उद्देश्य छत्तीसगढ़ म प्रमुख आवास परियोजना अउ बुनियादी ढांचा के विकास बर वित्त पोषण के सुविधा प्रदान करना हे। ए समझौता ह हुडको कोति ले राज्य सरकार के कतकोन विकास योजना बर वित्तीय सहायता अउ तकनीकी सहयोग प्रदान करे बर एक रूपरेखा बनाही। बतादन कि हुडको ह एक केन्द्रीय सार्वजनिक क्षेत्र के उद्यम हरय, जउन कि घर बनाय या फेर आवास अउ सहरी विकास कार्यक्रम के वित्त पोषण बर दीर्घकालिक वित्त प्रदान करना हे।
सड़क सुरक्षा माह
सड़क सुरक्षा माह के चलत अभी अंतर्विभागीय लीड एजेंसी कोति ले कतकोन जनजागरूकता कार्यक्रम चलाय जात हे। ए बेरा म गाड़ी चलइया मन ल हेलमेट अउ सीट बेल्ट के उपयोग करे अउ मोबाइल फोन म गोठ करत हुए या फेर नशा करके गाड़ी झन चलाय के समझाईश दे जात हे। संगेसंग यातायात नियम के पालन करइया लोगन मन ल सम्मानित घलो करे जात हे।