सुकमा जिला म आज छब्बीस झिन माओवादी मन ह आत्मसमर्पण करे हे। एमा ले तेरह झन उपर चौसठ लाख रूपिया के इनाम घोसित रिहीस। पुलिस अधीक्षक किरण चव्हाण ह बतइन कि सात महिला समेत ए माओवादी मन ह पुना मार्गेम पुनर्वास पहल के तहत वरिष्ठ पुलिस अउ सीआरपीएफ अधिकारी मनके आगू आत्मसमर्पण करीन हे। ओमन बतइन कि ए माओवादी पीपल्स लिबरेशन गुरिल्ला आर्मी- पीएलजीए बटालियन, दक्षिण बस्तर डिवीजन, माड़ डिवीजन , आंध्र-ओड़िसा सीमा डिवीजन म सक्रिय रिहीन अउ अबूझमाड़ सुकमा, ओडिसा के सीमावर्ती क्षेत्र म हिंसा के कई ठिन घटना म सामिल रिहीन। आत्मसमर्पण करइया सबो माओवादी मन ल पचास-पचास हजार रूपिया के सहायता रासि दे गीस अउ सरकार के नीति के मुताबिक उंखर आगू पुनर्वास करे जाही।
केंद्रीय स्वास्थ्य मंत्री-बधाई
केंद्रीय स्वास्थ्य मंत्री जगत प्रकाश नड्डा ह जिला अस्पताल रईपुर के इंटीग्रेटेड पब्लिक हेल्थ लेबोरेटरी ल नेशनल क्वालिटी इंस्योरेंस स्टैण्डर्स के प्रमाणन मिले म सार्वजनिक स्वास्थ्य सेवा के क्षेत्र म राष्ट्रीय उपलब्धि पाय बर बधई दीन हे। स्वास्थ्य मंत्री श्याम बिहारी जायसवाल ल लिखे चिट्ठी म श्री नड्डा ह बतइन कि रईपुर आईपीएचएल देस म अपन कीसम के पहिली प्रयोगशाला बन गेहे, जेला एक प्रतिष्ठित प्रमाणन मिले हे। केंद्रीय मंत्री ह राज्य सरकार ले केहे हे कि ओ रईपुर मॉडल ल श्रेष्ठ अभ्यास के रूप म अपनात राज्य के आने जिला अउ क्षेत्र म घलो बने गुणवत्ता वाले डायग्नोटिक सेवा के बढ़वार करय। मुख्यमंत्री विष्णुदेव साय अउ स्वास्थ्य मंत्री श्याम बिहारी जायसवाल ह ए उपलब्धि बर केंद्र सरकार कोति आभार जताय हे।
जनगणना-2027
छत्तीसगढ़ म जनगणना दू हजार सत्ताईस ल लेके राज्य स्तरीय जनगणना समन्वय समिति के पहिली बइठका काली मुख्य सचिव विकास शील के अगुवई म होइस। बइठका म गृह विभाग के अपर मुख्य सचिव मनोज पिंगुआ ह बतइन कि राज्य म गृह विभाग जनगणना बर नोडल विभाग हे जउन भारत सरकार जनगणना निदेशालय अउ राज्य सरकार के आने-आने विभाग के बीच समन्वय के काम करथे।
उहें, जनगणना कार्य निदेशालय के निदेशक कार्तिकेय गोयल ह जनगणना के रूपरेखा अउ डिजीटल रोड मैप के संबंध म जानकारी दीन। ओमन बतइन कि ए जनगणना देस के पहिली डिजीटल जनगणना होही, जेमा मोबाइल ऐप ले डेटा सकेले जाही अउ जम्मो काम के मॉनिटरिंग अउ प्रबंधन वैब पोर्टल ले करे जाही। जेमा आम लोगन अपन जानकारी खुदे भर सकत हे।
खबर के मुताबिक जनगणना के पहिली चरण म एसो मकान सूचीकरण अउ मकान के गणना के काम एक अपै्रल ले तीस सितंबर के बीच करे जाना प्रस्तावित हे। उहें, दूसर चरण अवइया बछर फरवरी महिना म देसभर म एक संघरा पूरा करे जाही। मुख्य सचिव विकास शील ह संबंधित विभाग ल स्कूल पढ़इया लइका मनके पढ़ई मानसून ल धियान म राखत तीस दिन के अवधि म तय करे के निरदेस दीन हे।
मुख्यमंत्री-बैठक
मुख्यमंत्री विष्णुदेव साय ह मंत्रालय म बिलासुपर नगर निगम अउ तीर-तखार के क्षेत्र के विकास ल लेके एक उच्च स्तरीय बइठका लीन। समीक्षा बइठका म बिलासपुर सहर अउ बाहरी क्षेत्र म चलत अउ प्रस्तावित विकास, मूलभुत सुविधा के बढ़वार अउ नवा बने परियोजना के संबंध म गोठबात करे गीस। मुख्यमंत्री ह अधिकारी मन ल किहीन कि सबो योजना ल तय बेरा म गुणवत्ता के संग पूरा करे जाय। ओमन यहू किहीन कि बिलासपुर ल उद्योग अउ पर्यटन के क्षेत्र म आगू रखत विकास के योजना बनाय जाय। बइठका म सिम्स के नवा अस्पताल भवन बर एएस जारी करे के काम म तेजी लाय अउ सुपर स्पेस्लिटी अस्पताल ल पीपीपी मोड म चलाय के फइसला ले गीस। बिलासपुर एयरपोर्ट के बढ़वार बर डिफेंस ल रकम दे जाय के जानकारी दे गीस। संगेसंग एयरपोर्ट के आने विकास काम अउ नाइट लैंडिग सुविधा ल जल्दी सुरू करे के निरदेस दीन।
सिंगल यूज प्लास्टिक-प्रतिबंध
राज्य सहरी विकास अभिकरण-सूडा ह सिंगल यूज प्लास्टिक म प्रतिबंध लगाय बर सबो नगरीय निकाय ल परिपत्र जारी करे हे। सूडा ह ए संबंध म केंद्र अउ राज्य कोति ले बेरा-बेरा म जारी दिसा निरदेस के कड़ाई ले पालन करे बर केहे हे। सूडा ह सबो नगर निगम के आयुक्त, नगर पालिका अउ नगर पंचायत के अधिकारी मन ल भेजे परिपत्र म स्वच्छता दीदी मन कोति ले डोर-टू-डोर िंसंगल यूज प्लास्टिक के आने उपाय के संबंध म लोगन मन ल जागरूक करे बर केहे हे।
जनदर्शन
रईपुर के मुख्यमंत्री निवास कार्यालय म काली आठ जनवरी बिरसपत के जनदर्सन राखे जाही। ए दउरान मुख्यमंत्री विष्णुदेव साय प्रदेस के लोगन संग सोज्झे गोठबात करही अउ उंखर समस्या ल सुलझाही। मुख्यमंत्री ह अधिकारी मन ल निरदेस देहे कि जनदर्सन म मिले हरेक अर्जी के तुरते निराकरण करे जाय, जेखर ले लोगन ल बेरा म समाधान मिल सकय।
राष्ट्रीय-जंबूरी
छत्तीसगढ़ भारत स्काउट्स गाइड्स म राष्ट्रीय रोवर-रेंजर जंबूरी के आयोजन नौ ले तेरह जनवरी तक बालोद के दुधली म करे जाही। ए राष्ट्रीय स्तर के आयोजन के मेजबानी छत्तीसगढ़ ल पहिली घांव मिले हे। ए जंबूरी म देस के आने-आने राज्य ले करीबन बारह ले पंद्रह हजार रोवर रेंजर मनके सामिल होय के संभावना हे। इही बीच जिला प्रशासन ह सोशल मीडिया म आयोजन स्थगित करे के खबर ल गलत अउ निराधार बताय हे। अधिकारी मन ह किहीन हे कि राष्ट्रीय रोवर रेंजर जंबूरी अपन तय तारीख अउ कारीकरम के मुताबिक ही होही।
दीदी के गोठ
लोक प्रिय रेडियो कारीकरम दीदी के गोठ छठवां किस्त के प्रसारण आकाशवाणी केंद्र रईपुर ले काली आठ जनवरी के मंझनिया दू बजे ले करे जाही। इही कारीकरम बस्तरिया भाषा म आकाशवाणी केंद्र जगदलपुर अउ सरगुजिहा भाषा म आकाशवाणी केंद्र अंबिकापुर ले मंझनिया ढाई बजे ले प्रसारित होही। ए कारीकरम म दुरूग, बालोद अउ गरियाबंद जिला के दीदी मन अपन जिनगी के अनुभव साझा करही। कारीकरम उपमुख्यमंत्री अउ पंचायत मंत्री विजय शर्मा संदेश घलो प्रसारित होही।
गांजा-बरामद
महासमुंद जिला म पुलिस ह एक एंबुलेंस ले दू करोड़ साठ लाख रूपिया कीमत के पांच सौ बीस किलो ग्राम गांजा जब्त करे हे। ए मामला म पुलिस ह तीन झिन आरोपी ल गिरफ्तार करे गेहे। खबर के मुताबिक तीनो आरोपी ओडिसा के भवानी पटना ले गांजा लेके नागपुर-महाराष्ट्र जावत रिहीस। इही दउरान पुलिस ह टेमरी चेकपोस्ट म तलासी अभियान के दउरान एमन ल पकड़े हे। तीनो आरोपी महाराष्ट्र म रहइया बताय जावत हे। कोमाखान पुलिस तीनो आरोपी के खिलाफ नार्कोटिक्स एक्ट म मामला दरज करके कार्रवाई करत हे।
प्रदेस म सीतलहरा के स्थिति बने हे लोगन जाड़ ले बांचे बर गरम कपड़ा बउरत हे। उहें, संझा कुन जघा-जघा भुर्री तापत हे। मौसम विभाग के मुताबिक अवइया दू दिन तक उत्तर अउ मध्य छत्तीसगढ़ म सीतलहरा चले के संभावना हवय। उत्तरीय छत्तीसगढ़ के कुछेक जघा म कोहरा छाय रेहे के चेतावनी दे गेहे। प्रदेस म पाछू चौबीस घंटा के दउरान सबले कमती न्यूनतम तापमान तीन डिग्री सेल्सियस अंबिकापुर म दरज करे गीस। मौसम विभाग ह उत्तर ले अवइया ठंडा अउ सुष्क हवा के सेति चौबीस घंटा म न्यूनतम तापमान म एक ले दू डिग्री सेल्सियस तक कमी होय के बात केहे हे।
मुख्यमंत्री-जी राम जी
मुख्यमंत्री विष्णुदेव साय ह किहीन हे कि विकसित भारत-जी राम जी अधिनियम हर रूप म मनरेगा ले जादा परभावी अउ बने हे। पत्रकार मन ले गोठबात करत ओमन किहीन कि ए योजना म अब ग्रामीण मजदूर मन ल एक सौ पच्चीस दिन के रोजगार मिलही। एमा मजदूरी के भुगतान हफ्ता बर के भीतरी करे जाही। कहूं भुगतान बेरा म नइ होही, त अतिरिक्त रकम दे बर पड़ही।