बढ़िया सुशासन अउ योजना मनके बेरा म कामकाज बर प्रधानमंत्री के प्रमुख तंत्र ‘प्रगति‘ ह अपन पचासवां बइठका के संग बड़का सफलता पाय हे। प्रधानमंत्री नरेन्द्र मोदी ह बछर दू हजार पन्द्रह म ए तंत्र के सुभारंभ करे रिहीन। एखर माध्यम ले प्रधानमंत्री के सोझे समीक्षा के सेती बुनियादी ढांचागत परियोजना मनके बेरा म निगरानी अउ मुद्दा मनके समाधान संभव होइस। प्रगति ले फइसला लेके के काम, परियोजना म देरी के समाधान अउ जवाबदेही तय होय म मदद मिलही। ए सिरिफ निगरानी नइ हरय, भलूक प्रशासनिक सुधार मनके घलो माध्यम साबित होवत हे।
छत्तीसगढ़ के मुख्यमंत्री विष्णुदेव साय ह ‘प्रगति‘ के पचासवां बइठका ल प्रदेस बर दूरगामी महत्ता बताय हे। ओमन किहीन कि एखर ले भिलाई इस्पात संयंत्र के आधुनिकीकरण अउ रायगढ़ स्थित लारा सुपर थर्मल पावर जइसन परियोजना ल नवा गति मिलही। मुख्यमंत्री ह किहीन कि ए परियोजना के पूरा होय ले प्रदेस के औद्योगिक विकास, ऊर्जा क्षमता, निवेस अउ रोजगार म बढ़ोतरी होही।
राष्ट्रीय मीडिया अवॉर्ड
भारत निर्वाचन आयोग ह मतदाता शिक्षा अउ जागरूकता के क्षेत्र म बने काम करइया मीडिया संस्थान मन ल सम्मानित करे बर राष्ट्रीय मीडिया अवार्ड दू हजार पच्चीस बर अर्जी मंगाय हे। मीडिया संस्थान काली सात जनवरी तक अपन प्रविष्टि नई दिल्ली के भारत निर्वाचन आयोग के कार्यालय म भेज सकत हे। संगेसंग ईमेल ले घलो प्रविष्टि भेजे जा सकत हे। राष्ट्रीय मीडिया अवार्ड म चार श्रेणी म इनाम दे जाही। जेमा प्रिंट मीडिया, इलेक्ट्रानिक मीडिया-टेलीविजन, इलेक्ट्रानिक मीडिया-रेडियो, ऑनलाइन-इंटरनेट अउ सोशल मीडिया सामिल हे। चुने गे मीडिया संस्थान ल राष्ट्रीय मतदाता दिवस के मउका म अवइया पच्चीस जनवरी के सम्मानित करे जाही।
माओवादी-आत्मसमर्पण
धमतरी जिला म आज पांच लाख रूपिया के एक झिन इनामी महिला माओवादी ह आत्मसमर्पण करे हे। ए माओवादी ह पुलिस अधीक्षक सूरज सिंह परिहार अउ अतिरिक्त पुलिस अधीक्षक शैलेंद्र कुमार पांडेय के आगू आत्मसमर्पण करीन। ए माओवादी नगरी एरिया कमेटी के सदस्य अउ गोबरा एलओएस कमांडर के रूप म अब्बड़ बेरा ले सक्रिय रिहीन। आत्मसमर्पण करइया माईलोगिन माओवादी ल राज्य सरकार के पुनर्वास नीति के तहत पचास हजार रूपिया के प्रोत्साहन रासि दे गीस।
दुर्घटना
बस्तर जिला म आज होय एक ठिन सड़क दुर्घटना म तीन झिन लोगन के मउत होगे अउ चार झिन आने मनखे मन गंभीर रूप ले घायल होगे हे। पुलिस ले मिले जानबा के मुताबिक एक ठिन पिकअप गाड़ी म बइठ के लोगन मन पखनार के साप्ताहिक बाजार जावत रिहीन। इही दउरान दरभा थाना क्षेत्र के तीर राष्ट्रीय राजमार्ग क्रमांक-तीस म एक ठिन ट्रक ह पिकअप गाड़ी ल टक्कर मार दीस, जेमा तीन झिन लोगन के मउकाच म परान छूट गे। पुलिस ह बतईन कि ट्रक के ब्रेक फेल होय के सेती ए घटना घटीस। जोरदरहा टक्कर के सेती पिकअप गाड़ी ह चेपट गे अउ ट्रक के आगू के हिस्सा म ट्रक डाईवर ह केबिन म फंस गे। पुलिस ह कटर मसीन के मदद ले बाहिर निकालीन।
शौचालय निर्माण-समय सीमा
नगरीय प्रशासन विभाग ह स्वच्छ भारत मिशन-शहरी के तहत प्रदेस के अठहत्तर ठिन नगरीय निकाय मन म मंजूर होय एक सौ इकचालीस आकांक्षी सौचालय मन ल बनाय के काम बेरा म पूरा करे के बात केहे हे। एमा रूफ स्तर वाले सौचालय मन ल इकतीस जनवरी अउ लिंटल स्तर के सौचालय मन ल अट्ठाईस फरवरी तक पूरा करे जाही। उहें, जउन सौचालय मनके बने के काम पूरा नइ होय पाय हे, वहू मन ल इकतीस मार्च तक पूरा करे के निरदेस दे गेहे। ए बारे म राज्य सासन ह नगर निगम के आयुक्त अउ नगर पालिका के संगेसंग नगर पंचायत के मुख्य नगर पालिका अधिकारी मन ल चिट्ठी जारी कर देहे। विभाग ह स्पष्ट केहे हे कि बेरा म सौचालय मनके काम पूरा नइ होय उपर निगम आयुक्त अउ मुख्य नगर पालिका अधिकारी मन उपर कार्रवाई करे जाही।
टंकराम वर्मा-प्रेसवार्ता
राजस्व अउ उच्च सिक्षा मंत्री टंकराम वर्मा ह आज अपन विभाग मनके दू साल के कामकाज के उपलब्धि के जानबा दीन। नवा रायपुर म पत्रकार मन ले गोठबात करत ओमन बतईन कि एग्रीस्टेक के तहत जिओ रिफ्रेंसिंग, फार्मर रजिस्ट्रेशन अउ डिजिटल क्रॉप सर्वें सुरू करे गेहे। संगेसंग नक्सा के जियो रिफ्रेंसिंग बर पच्चीस करोड़ रूपिया के प्रावधान करे गेहे। राजस्व मंत्री ह किहीन कि जमीन ले जुड़े विवाद मनके निपटारा जल्दी हो सकय, एखर बर जमीन के जम्मों दस्तावेज ल सिविल न्यायालय ले डिजिटलाइज करत जोड़ दे गेहे।
बिलासपुर-विमानतल
उपमुख्यमंत्री अरूण साव अउ केन्द्रीय राज्यमंत्री तोखन साहू ह किहीन हे कि बिलासपुर स्थित चकरभाठा के बिलासा देवी केंवट वितानतल के रनवे विस्तार के काम तेजी ले करे जाही। ओमन बतईन कि राज्य सरकार ह रनवे के विस्तार बर रक्षा मंत्रालय ले जुड़े दू सौ नब्बे एकड़ भूमि के अधिग्रहण बर पचास करोड़ रूपिया के मुआवजा जमा कर देहे। ओमन बतईन कि एयरपोर्ट के विस्तार ले बिलासपुर संभाग म निवेस, पर्यटन अउ रोजगार के मउका खुलही। संगेसंग इहां के लोगन मन ल हवाई सेवा के फायदा मिलही।
स्त्री परियोजना
वैज्ञानिक अउ औद्योगिक अनुसंधान विभाग-डीएसआईआर ह धमतरी जिला के गांव के माईलोगिन मन ल योजना म मजबूत बनाय बर राष्ट्रीय प्रौद्योगिकी संस्थान-एनआईटी रायपुर ल ‘‘स्त्री परियोजना‘‘ के मंजूरी देहे। ए परियोजना म तीन साल बर नब्बे लाख रूपिया के वित्तीय सहायता मंजूर करे गेहे। परियोजना के उद्देश्य धमतरी जिला म महिला कौशल उपग्रह केन्द्र बनाना हे, जेखर माध्यम ले तीन सौ गांव के माईलोगिन मन ल प्रसिक्षण देके लक्ष्य राखे गेहे। ए काम एनआईटी रायपुर फाउंडेशन फॉर इनोवेशन एंड एंटरप्रेन्योशिप के माध्यम ले काम करे जाही।
मुख्यमंत्री ह किहीन हे कि ए परियोजना छत्तीसगढ़ म माईलोगिन मनके अगुवई म विकास अउ समावेशी प्रगति के दृष्टि के मुताबिक हे। ओमन ए परियोजना ल जरूरी बतावत किहीन कि अवइया तीन बछर म तीन सौ गांव के माईलोगिन मन ल कोसा रेशम फाइबर निकाले, आधुनिक बुनाई, उत्पाद डिजाइन, उद्यमिता अउ बाजार संपर्क जइसन क्षेत्र म प्रसिक्षण दे जाही।
मुख्यमंत्री-भर्ती परीक्षा
मुख्यमंत्री ह काली मंत्रालय म उच्च स्तरीय बइठका लेके प्रदेस म होवत कतकोन भर्ती परीक्षा मनके समीक्षा करीन। बइठका म ओमन अधिकारी मन ल निरदेस दीन कि जम्मों भर्ती परीक्षा म कोनों प्रकार के गड़बड़ी नइ होना चाही। मुख्यमंत्री ह किहीन कि भर्ती प्रक्रिया म सुधार सरकार के प्राथमिकता म सामिल हे। बइठका म पुलिस बल के संगेसंग कतकोन विभाग मन म चलत भर्ती के काम के समीक्षा करे गीस अउ चयन प्रणाली ल अउ जादा प्रभावी बनाय के निरदेस दे गीस। त उहें, पीएससी के परीक्षा प्रणाली ल अउ जादा समकालीन, पारदर्सी अउ अभ्यर्थी मन बर सरल बनाय के बारे म गोठबात करे गीस।
धान खरीदी केन्द्र-अनियमितता
जशपुर जिला के कोनपारा धान खरीदी उप केन्द्र म छह करोड़ रूपिया ले जादा के गड़बड़ी के मामला आगू आय हे। पुलिस ह ए मामला म खरीदी केन्द्र के प्राधिकृत अधिकारी के संगेसंग छह झिन लोगन मनके खिलाफ एफआईआर दरज करे हे। एमा ले फड़ प्रभारी ल गिरफ्तार कर ले गेहे। पुलिस ह आने आरोपी मनके तलास करत हे।
जानबा के मुताबिक अपेक्स बैंक के नोडल अधिकारी ह धान खरीदी उप केन्द्र म छह करोड़ पचपन लाख रूपिया ले जादा के गड़बड़ी के रिपोर्ट पुलिस म दरज कराय रिहीन, जेखर बाद पुलिस ह कार्रवाई सुरू करीन।
सरगुजा ठंड-स्कूल बंद
उत्तरी छत्तीसगढ़ म ए बेरा जोरदरहा जाड़ा पड़त हे। एला देखत सरगुजा जिला म कक्षा पहली ले पांचवीं तक के जम्मों सरकारी अउ प्राईवेट स्कूल मन ल दस जनवरी तक बंद कर दे गेहे। ए बारे म जिला सिक्षा अधिकारी ह आदेस जारी कर देहे। ओमन स्पष्ट करे हे कि ए बेरा म जम्मों सिक्षक अउ आने स्टाफ कर्मचारी मन स्कूल खुले के बेरा म स्कूल पहुंचही।