केंद्र सरकार ह छत्तीसगढ़ म दलहन अउ तिलहन फसल के खरीद बर मूल्य समर्थन योजना लागू करे के राज्य सरकार के प्रस्ताव ल मंजूरी देहे। केंद्रीय कृषि मंत्री शिवराज सिंह चौहान ह मुख्यमंत्री विष्णुदेव साय ल चिट्ठी लिखे हे , जेमा छत्तीसगढ़ न्यूनतम समर्थन मूल्य म राहेर, उरीद, मुंग, सोयाबीन अउ मुंगफली बिसाय ल मंजूरी देहे। ए योजना ले किसान मन ल अपन फसल के सही कीमत मिलही। मुख्यमंत्री विष्णुदेव साय ह केंद्र सरकार के ए फइसला बर आभार जतात किहीन कि एखर ले राज्य के किसान मन ल आर्थिक सुरक्षा मिलही। संगेसंग दलहन-तिलहन उत्पादन ल बढ़ावा मिलही, जेखर ले गांव के अर्थव्यवस्था मजबूत होही।
भारत उत्पादक देश
भारत ह चीन ल पाछू छोड़त विश्व के सबले बड़े धान उत्पादक बने के गौरव हासिल करे हे। केंद्रीय कृषि मंत्री शिवराज सिंह चौहान ह काली नई दिल्ली म ए घोसना करीन। चांउर के उत्पादन म भारत ह चीन ल पाछू छोड़ देहे। ऐसो हमर उत्पादन एक सौ पचास दसमलव एक-आठ मिलियन टन अउ चीन के एक सौ पैंतालीस दसमलव दो-आठ मिलियन टन हे।
श्री चौहान ह किहीन कि जादा उपज वाले फसल के बिकास म देस ल बड़ सफलता मिले हे। ओमन अधिकारी मन ल ए सुनिश्चित करे के निरदेस दीन कि ए नवा प्रजाति जल्दीच किसान मन तक पहुंचय। कृषि मंत्री ह किहीन कि एखर ले किसान मन ल बने उपज अउ बने गुणवत्ता के फसल मिले म मदद मिलही।
जी राम जी-योजना
केंद्रीय कृषि मंत्री शिवराज सिंह चौहान ह किहीन हे कि मनरेगा योजना म साफगोई लाय बर विकसित भारत-जी राम जी अधिनियम लाय गेहे। श्री चौहान ह तमिलनाडु म किसान मन संग गोठबात करत किहीन कि योजना म लाभार्थी मन बर रोजगार के अवधि सौ दिन ले बढ़ाके एक सौ पच्चीस दिन कर दे गेहे। ओमन किहीन कि योजना म लाभार्थी मन ल भुगतान बेरा म मिलही। कृषि मंत्री ह किहीन कि रोजगार मिले के पंद्रह दिन म लाभार्थी मन ल भुगतान नइ होय म कानूनी कार्रवाई करे जाही। ओमन किहीन कि ग्रामीण बुनियादी ढांचा ल मजबूत करे जाही, जेखर ले किसान मन ल फायदा मिलय।
ऐति, छत्तीसगढ़ के बालोद जिला के गांव तरौद के जयप्रकाश यादव ह किहीन कि विकसित भारत- जी राम जी योजना बहुते बने योजना हे। एमा मांग पत्र भरइया मजदूर ल कहू काम नइ मिलही, तभो भत्ता के प्रावधान हरय।
धमतरी-स्किल सैटेलाइट सेंटर
विज्ञान अउ औद्योगिक अनुसंधान विभाग कोति ले धमतरी म गांव के माईलोगिन मन बर स्किल सैटेलाइट सेंटर बनाय जाही। एखर बर आज आने-आने साझेदार संस्था संग समझौता ज्ञापन म दस्तखत करे गीस। धमतरी म प्रस्तावित स्किल सैटेलाइट सेंटर के उद्देस्य ग्रामीण अउ आदिवासी माईलोगिन मन ल प्रौद्योगिकीय आधारित कौशल विकास, उद्यमिता प्रसिक्षण अउ आजीविका के स्थायी अवसर ले जोड़ना हे। इंहा महिला मन तकनीक के प्रसिक्षण बाजार ले जोड़े के मउका अउ उद्योग लगाय बर मार्गदर्सन दे जाही। संगेसंग प्राथमिक क्षेत्र म फूड प्रोसेसिंग, वन आधारित उत्पाद, वस्त हस्तसिल्प नवीकरणीय ऊर्जा उपकरण अउ डिजीटल सेवा सामिल होही।
मुख्यमंत्री विष्णुदेव साय ह ए फइसला के सुवागत करत किहीन कि छत्तीसगढ़ म महिला स्व-सहायता समूह, लखपति दीदी योजना, वन धन विकास, केंद्र अउ राज्य आजीविका मिसन जइसन प्लेटफार्म ल ए स्किल सैटेलाइट सेंटर के संग एकीकृत करे जाही। एमा प्रसिक्षण ले माईलोगन ल उद्यम लगाय, कर्जा मिले के संग विपणन सहयोग मिलही।
महिला बाल विकास मंत्री-पत्रकारवार्ता
महिला बाल विकास मंत्री लक्ष्मी राजवाड़े ह किहीन हे कि पाछू दू बछर म राज्य सरकार ह माईलोगिन अउ लइका मनके पोषण स्तर म सुधार करे के संगेसंग सामाजिक कल्याण बर कतकोन उदीम करे हे। आज नवा रईपुर म पत्रकार मनले गोठबात करत ओमन किहीन कि महतारी वंदन योजना म प्रदेस के उनहत्तर लाख ले जादा माईलोगिन मन ल अभी तक चौदह हजार तीन सौ सात करोड़ रूपिया दे गेहे। श्रीमती राजवाड़े ह किहीन कि सरकार कोति ले चलाय जात योजना के सेति कुपोषण म कमी आय हे।
उहें, मुख्यमंत्री कन्या विवाह योजना म अभी तक पंद्रह हजार ले जादा युवती मनके बिहाव कराय गेहे।
राष्ट्रीय मीडिया अवॉर्ड
भारत निर्वाचन आयोग ह मतदाता शिक्षा अउ जागरूकता के क्षेत्र म बने काम करइया राष्ट्रीय मीडिया अवार्ड दू हजार पच्चीस बर अर्जी मंगाय हे। मीडिया संस्थान सात जनवरी तक अपन प्रविष्टि नई दिल्ली के भारत निर्वाचन आयोग के कार्यालय म भेज सकत हे। एखर संगेसंग ईमेल ले घलो प्रविष्टि भेजे जा सकत हे। राष्ट्रीय मीडिया अवार्ड म चार श्रेणी म इनाम दे जाही। एमा प्रिंट मीडिया, इलेक्ट्रानिक मीडिया-टेलीविजन, इलेक्ट्रानिक मीडिया-रेडियो, ऑनलाइन-इंटरनेट अउ सोशल मीडिया सामिल हे। चुने गे मीडिया संस्थान ल राष्ट्रीय मतदाता दिवस के मउका म अवइया पच्चीस जनवरी के सम्मानित करे जाही।
जनदर्शन
रईपुर के मुख्यमंत्री निवास कार्यालय म आठ जनवरी बिरसपत के जनदर्सन राखे जाही। ए दउरान मुख्यमंत्री विष्णुदेव साय प्रदेस के लोगन संग सोज्झे गोठबात करही अउ उंखर समस्या ल सुलझाही। मुख्यमंत्री ह अधिकारी मन ल निरदेस देहे कि जनदर्सन म मिले हरेक अर्जी के तुरते निराकरण करे जाय, जेखर ले लोगन ल बेरा म समाधान मिल सकय।
आईईडी-विस्फोट ग्रामीण घायल
बीजापुर जिला म आज माओवादी मन कोति ले लगाय गे आईईडी के चपेट म आय ले गांव के एक मनखे गंभीर रूप ले घायल होगे। विस्फोट म ए युवक के पांव म गंभीर चोट आय हे। घटना के बाद ओला केंद्रीय रिजर्व पुलिस बल के कोरचोली कैंप लाय गीस, जिंहा ओखर प्राथमिक उपचार करके बीजापुर जिला अस्पताल भेजे गेहे।
उपमुख्यमंत्री-साइबर थाना
उपमुख्यमंत्री अउ गृहमंत्री विजय शर्मा ह काली कबीरधाम जिला म राजनांदगांव रेंज अउ जिला के पहिली साइबर थाना के सुभारंभ करीन। ए थाना ल कवर्धा के पुराना पुलिस लाइन म बनाय गेहे। ए बेरा म उपमुख्यमंत्री ह किहीन कि डिजीटल सुविधा के संगेसंग साइबर अपराध के चुनौती बाढ़े हे, जेखर ले आम लोगन, माईलोगिन, सियान अउ युवा वर्ग प्रभावित होवत हे। अइसन म साइबर थाना बने ले लोगन ल तुरते न्याय सुरक्षा अउ भरोसा देके दिसा म एक मजबूत कदम हवय। ओमन किहीन कि ए थाना न सिरिफ अपराध रोके के केंद्र बनही, भलुक लोगन म डिजीटल जागरूकता अउ भरोसा बढ़ाही।
वन क्षेत्र-आरोपी गिरफ्तार
अचानकमार टाइगर रिजर्व के प्रतिबंधित कोर जोन क्षेत्र म हथियार लहराय अउ गोलीबारी करे के आरोप म पुलिस ह तीन झन ल गिरफ्तार करे हे। ए दउरान आरोपी मन तीर ले दू एयर रायफल अउ एक गाड़ी जब्त करे गेहे। उहें, ए मामला म वन विभाग ह विभागीय कार्रवाई करत बैरियर गार्ड ल हटा देहे अउ संबंधित वन परिक्षेत्र अधिकारी ल कारण बताओ नोटिस जारी करे हे।
खेलो इंडिया ट्राइबल गेम्स
छत्तीसगढ़ के मेजबानी म देस म पहिली घांव होवत खेलो इंडिया राष्ट्रीय जनजातीय खेल प्रतियोगिता म राज्य कोति ले खेलइया टीम ल चुने बर काली छै ले आठ जनवरी तक रईपुर अउ बिलासपुर म ट्रायल करे जाही। ए प्रतियोगिता म सात ठिन खेल ल सामिल करे गेहे। एमा वेट लिफ्टिंग, कुश्ती, फुटबॉल अउ हॉकी के खिलाड़ी मनके ट्रायल रईपुर म होही। उहें, तीरंदाजी, एथलेटिक्स अउ तैराकी के खिलाड़ी मनके ट्रायल बिलासपुर म राखे जाही।
ईडी-संपत्ति कुर्क
सराब घोटाला मामला म प्रवर्तन निदेशालय- ईडी ह आबकारी आयुक्त आईएएस अधिकारी निरंजन दास अउ तीस आने आबकारी अधिकारी मन के अड़तीस करोड़ रूपिया ले जादा के चल-अचल संपत्ति ल अस्थायी रूप ले कुर्क करे हे। धर शोधन निवारण अधिनियम म करे गे कार्रवाई सराब घोटाला के चलत जांच के हिस्सा हवय। ईडी के जांच म पाय गीस कि ए घोटाला म इकतीस अधिकारी आबकारी मन ह पचयासी करोड़ रूपिया के अवैध संपत्ति बनाय हे।