केंद्रीय ग्रामीण विकास मंत्री शिवराज सिंह चौहान ह किहीन हे कि मनरेगा ह भ्रष्टाचार के पर्याय बन गे रिहीस, जिंहा मजदूर मन ल तिरियाके उंखर शोषन करे जात रिहीस। आज नई दिल्ली म संवाददाता मनले गोठबात करत श्री चौहान ह किहीन कि कांग्रेस ह विकसित भारत रोजगार अउ आजीविका गारंटी मिसन ग्रामीण जी राम जी कानून ल लेके जनता ल गुमराह करत हे। ओमन आरोप लगइन कि पार्टी ह मनरेगा के नही भलूक एमा होवत भ्रष्टाचार ल बचाना चाहत हे। श्री चौहान ह किहीन कि बड़का बजट के बाद घलो मनरेगा ह कोनो स्थाई संपत्ति बनाना या फेर गंवई के लंबा दूरी के विकास ल बढ़ावा नइ देहे। ओमन किहीन कि नवा विधेयक ले मजदूर मनके आर्थिक हालत ह सुघ्घर होही अउ ओमन गंवई म अउ बने योगदान दे सकही।
शिवराज सिंह चौहान-चावल
केंद्रीय कृषि अउ किसान कल्याण मंत्री शिवराज सिंह चौहान ह किहीन कि बछर दू हजार पच्चीस म भारत के चांउर पैदावार ह डेढ़ सौ मिलियन टन ले जादा रिहीस। भारतीय कृषि अनुसंधान परिषद डहार ले विकसित सुघ्घर गुणवत्ता वाले पचीस ठिन फसल के एक सौ चौरासी नवा कीसम मनके उद्घाटन मउका म श्री चौहान ह किहीन कि भारत ह चांउर पैदावार के मामला म चीन ल पाछू छोड़ देहे। ओमन किहीन कि भारत ह जम्मो विश्व म अव्वल चांउर निर्यातक याने चांउर बेचइया देस बन गेहे।
जी राम जी योजना-जांजगीर
जांजगीर-चांपा जिला के ग्राम पंचायत तरौद के पूर्व सरपंच गुरू दयाल पाटले ह विकसित भारत-जी राम जी योजना ह सबो मजदूर अउ किसान मनके हित म हे। आकाशवाणी समाचार ले गोठबात करत ओमन किहीन कि ए अधिनियम ले मजदूर अउ किसनहा मनके आर्थिक स्थिति म सुधार आही।
पुलिस भर्ती परीक्षा
छत्तीसगढ़ लोकसेवा आयोग ह पुलिस विभाग म सुबेदार, उपनिरीक्षक संवर्ग अउ प्लाटून कमांडर के भर्ती परीक्षा के चलत उम्मीदवार मनके दस्तावेज सत्यापन अउ फिजीकल टेस्ट के तारीख घोसित कर देहे। आयोग डहार ले निकले सूचना मुताबिक ए प्रक्रिया ह छै जनवरी ले छै फरवरी तक पूरा होही। दस्तावेज सत्यापन अउ शारीरिक माप परीक्षण परीक्षा ल सरगुजा, बिलासपुर, दुरूग, बस्तर, रईपुर अउ राजनांदगांव जिला म राखे जाही।
आयोग के अधिकारी मन बतइन कि उम्मीदवार मन ल बिहनिया सात बजे राखे गे जघा म उपस्थित होना रइही। शारीरिक माप परीक्षण बिहनिया आठ बजे ले सुरू होही। ए परीक्षा बर बीते छब्बीस दिसंबर के प्रवेस पत्र जारी कर दे गेहे।
अग्निवीर भर्ती रैली-प्रवेस पत्र
धमतरी के इंडोर स्टेडियम म दस ले चौबीस जनवरी तक अग्निवीर भर्ती रैली राखे जाही। ए रैली म छत्तीसगढ़ के सबो जिला के पुरूष उम्मीदवार मन भाग लीन। एखर बर भारतीय सेना ह प्रवेस पत्र जारी कर देहे। सेना भर्ती कार्यालय रईपुर डहार ले मिले जानकारी मुताबिक ए भर्ती रैली म जनरल ड्यूटी, तकनीकी, कलर्क, स्टोर कीपर अउ अग्निवीर ट्रेड्स मेन के पद बर चयन होही। भर्ती रैली म भाग लेबर उम्मीदवार मन ल प्रवेस पत्र, सबो जरूरी दस्तावेज अउ आधार कार्ड ले लिंक मोबाइल फोन संग म लाना जरूरी रइही।
इंहा ए बतादन कि भारतीय सेना डहार ले बीते तीस जून ले दस जुलाई तक ऑनलाइन सामान्य प्रवेस परीक्षा राखे गे रिहीस। ए परीक्षा म सफल उम्मीदवार मन फिजिकल टेस्ट समेत आने भर्ती प्रक्रिया म भाग लेके पात्र होही।
धमतरी-मिलेट्स महोत्सव
पोषण सुरक्षा किसान समृध्दि अउ खेती ल बढ़ावा देबर धमतरी म काली पांच जनवरी के पहिली बेर मिलेट्स महोत्सव होही। एखर उद्देस्य किसान, महिला स्व-सहायता समूह अउ आम लोगन ल मिलेट्स याने मोटा अनाज के खेती, पोषण मूल्य, स्वास्थ्य लाभ अउ एखर मार्केटिंग संभावना बारे म बताना हे। महोत्सव बेरा जिला म कोदो, कुटकी अउ रागी के पैदावार समेत कई तरह के मिलेट्स अउ ओखर ले तियार पोषक, स्वादिष्ट अउ पारंपरिक पकवान के प्रदर्सनी लगाय जाही।
एसआईआर
प्रदेस म विशेष गहन पुनरीक्षण अभियान-एसआईआर के तहत ड्राफ्ट मतदाता सूची के प्रकासन होय के बाद लोगन मन ले दावा-आपत्ति मंगाय जात हे। संबंधित विधानसभा क्षेत्र के निर्वाचक रजिस्ट्रीकरण अधिकारी मन डहार ले अइसन मतदाता मन ल नोटिस जारी करे जात हे, जिखर मनके नांव मतदाता सूची ले मिलान नइ होय हे या फेर अंतर पाय गेहे। दावा आपत्ति ले जुड़े काम बाईस जनवरी तक ले चलही। उहें, चौदह फरवरी तक पेस करे गे दस्तावेज मनके जांच के बाद मतदाता सूची म नाव जोड़े या घुचाय के काम करे जाही। सुनवाई अउ सत्यापन के काम पूरा होय के बाद इक्कीस फरवरी के मतदाता सूची के आखिरी प्रकासन करे जाही।
राज्य मुख्य निर्वाचन पदाधिकारी यशवंत कुमार ह मान्यता प्राप्त राजनीतिक दल मन ले निर्वाचन आयोग के ए पूरा प्रक्रिया म सहयोग खातिर अपील करे हे।
दुघर्टना
बिलासपुर जिला म बीते रतिहा एक ठिन तेज रफ्तार कार ह अंतेतंते होके बड़का रूख ले टकरा गे। ए हादसा म दू झन मनखे के मउकाच म मउत होगे। उहें, तीन झिन मन गंभीर रूप ले घायल हो गेहे। मिले जानकारी मुताबिक रईपुर ले एक झिन परिवार ह अमरकंटक सोज जात रिहीस, तभे उंखर कार ह बेलगहना चौकी तीर हादसा के सिकार हो गेहे। घायल मन ल सिम्स अस्पताल म भर्ती कराय गेहे।
उहें, बालोद जिला के गांव लिमहाटोला म आज बिहनिया सड़क तीर खड़े एक ठिन बस ल तेज रफ्तार ट्रक ह ठोकर मार दीस। संगे ट्रक तीरे म खड़े दू ठिन मोटरसाइकिल ल घलो अपन चपेट म ले लीस। ए घटना म बस म सवार चार झिन मनखे घायल हो गेहे।
इही बीच, दुरूग रेलवे टेसन म आज बिहनिया ड्यूटी म तैनात एक झिन रेलवे कर्मचारी के मालगाड़ी के चपेट म आय ले मउत होगे। ए मउत होय मनखे के चिनहारी अजय कुमार के रूप म होय हे।
खेलो इंडिया ट्राइबल गेम्स
छत्तीसगढ़ के मेजबानी म देस म पहिली घांव होवत खेलो इंडिया राष्ट्रीय जनजाती खेल प्रतियोगिता म राज्य डहार ले खेलइया टीम मनके चयन बर ट्रायल अवइया छै जनवरी ले आठ जनवरी तक रईपुर अउ बिलासपुर म राखे जाही। एमा सात ठिन खेल ल सामिल करे गेहे, जेमा वेट लिफि्ंटग, कुश्ती, फुटबॉल अउ हॉकी के खिलाड़ी मनके ट्रायल रईपुर म होही। उहें, तीरंदाजी, एथलेटिक्स अउ तैराकी के खिलाड़ी मनके ट्रायल बिलासपुर म होही।
माओवादी-शिनाख्त
सुकमा जिला म काली होय मुठभेड़ म मारे गे बारह झिन माओवादी के चिन्हारी कर ले गेहे, जेमा पांच झिन माईलोगिन माओवादी सामिल हे। जिला के पुलिस अधीक्षक किरण चव्हान ह बतइन कि मारे गे माओवादी मन म कोंटा एरिया कमेटी इंचार्ज वेट्टी मंगडू उर्फ मुक्का अउ कोंटा एरिया कमेटी सचिव माड़वी हितेश घलो सामिल हे। सबो माओवादी मन उपर कुल साठ लाख रूपिया के इनाम घोसित रिहीस। ए माओवादी मन शहीद होय अतिरिक्त पुलिस अधीक्षक आकाश राव गिरिपुंजे के हत्या के साजिस म सामिल रिहीन।
राष्ट्रीय मीडिया अवॉर्ड
भारत निर्वाचन आयोग ह मतदाता शिक्षा अउ जागरूकता के क्षेत्र म सुघ्घर काम करइया मीडिया संस्थान मन ल सम्मानित करे खातिर राष्ट्रीय मीडिया अवॉर्ड दू हजार पचीस बर एंट्री मंगाय हे। इच्छुक मीडिया संस्थान मन अवइया सात जनवरी तक अपन एंट्री नई दिल्ली स्थित भारत निर्वाचन आयोग के कार्यालय म पठो सकत हे।
ईसीआई नेट ऐप
भारत निर्वाचन आयोग ह ई.सी.आई.नेट ऐप म सुधार बर लोगन मनले सुझाव मांगे हे। एमा दस जनवरी तक सुझाव दे जा सकत हे। आयोग ह वोटर मन ल सुघ्घर सेवा अउ चुनाव संबंधित जानकारी दे खातिर ए डिजीटल मंच बनाय हे।