मुख्यमंत्री विष्णुदेव साय ह आज अपन दिल्ली प्रवास म राष्ट्रपति द्रौपदी मुर्मु ले भेंट करके ओमन ल नवा बछर के बधई दीन। ए मउका म मुख्यमंत्री ह राष्ट्रपति ल बस्तर पंडुम म मुख्य अतिथि के रूप म सामिल होय के नेवता दीन।
एखर पहिली, मुख्यमंत्री ह भाजपा के कार्यकारी अध्यक्ष नितिन नबीन ले भेंट करीन अउ ओमन ल नवा दायित्व के बधई दीन। ओमन विस्वास जतइन कि श्री नबीन के अगुवई अउ संगठनात्मक क्षमता के संग भारतीय जनता पार्टी ह अवइया बेरा म अउ जादा मजबूत होके राष्ट्र सेवा के रद्दा म नवा ऊंचाई तक पहुंचही।
माओवादी-मुठभेड़
बस्तर संभाग म आज सुरक्षाबल अउ माओवादी मनके बीच होय दू ठन आने-आने मुठभेड़ म चौदह झन माओवादी मन मारे गेहे। सबो माओवादी के शव बरामद हो गेहे। मुठभेड़ म माओवादी कमांडर सचिन मंगलू घलो मारे गेहे।
मिले जानकारी के अनुसार बीजापुर अउ सुकमा जिला के दक्षिणी क्षेत्र म सशस्त्र माओवादी मनके सूचना के आधार म डिस्ट्रिक्ट रिजर्व गार्ड-डीआरजी के टीम भेजे गे रिहीस। सुकमा जिला म तलासी अभियान के दउरान कोंटा के किस्टाराम जंगल म पहिली ले घात लगाके बइठे माओवादी मन ह सुरक्षाबल उपर फायरिंग सुरू कर दीन। जवाबी कार्रवाई म बारह झन माओवादी मन मारे गीन।
उहें, बीजापुर जिला के बासागुड़ा इलाका म होय मुठभेड़ म दू झन माओवादी मन मारे गेहे। दूनो जघा म मउका ले भारी मात्रा म एके सैंतालीस, इंसास अउ एसएलआर रायफल जइसन हथियार बरामद करे गेहे। क्षेत्र म तलासी अभियान चलत हे।
मुख्यमंत्री विष्णुदेव साय ह सुरक्षाबल के सफलता म ओमन ल बधई दीन हे अउ किहीन कि सुरक्षाबल के सटीक रणनीति, सतत दबाव अउ मजबूत जमीनी पकड़ के सेति माओवादी नेटवर्क तेजी ले खतम होवत हे। श्री साय ह किहीन कि बस्तर अब विकास अउ सुरक्षा के रद्दा म मजबूती ले आगू बाढ़त हे। मुख्यमंत्री ह फेर किहीन कि जउन नक्सली मन ह अभी घलो िंहंसा के रद्दा म हवय, ओमन ह आत्मसमर्पण करय, पुनर्वास नीति ल अपनाय अउ सम्मान के संग मुख्यधारा म लहुटय।
माओवादी-आत्मसमर्पण
शीर्ष माओवादी नेता बारसे देवा ह आज अपन बीस झन साथी मन संग हैदराबाद म तेलंगाना के पुलिस महानिदेशक शिवधर रेड्डी के आगू आत्मसमर्पण करीन हे। देवा उपर पचास लाख रूपिया के इनाम रिहीस। देवा ह छत्तीसगढ़-तेलंगाना के सीमा म सक्रिय रिहीस।
तेलंगाना के पुलिस महानिदेसक शिवधर रेड्डी ह बतइन कि आत्मसमर्पण करइया सबो माओवादी मन ल सरकारी पुनर्वास नीति के फायदा दे जाही। ओमन ह सबो आत्मसमर्पण करइया माओवादी मन ल तत्काल सहायता के रूप म पच्चीस-पच्चीस हजार रूपिया के चेक सौंपिन।
खेलो-इंडिया ट्राइबल गेम्स
छत्तीसगढ़ ल पहिली खेलो इंडिया ट्राइबल गेम्स-दू हजार छब्बीस के मेजबानी मिले हे। एखर उद्घाटन राजधानी रईपुर म चौदह फरवरी के करे जाही। उद्घाटन समारोह म केंद्रीय खेल मंत्री मनसुख मांडविया सामिल होही।
मुख्यमंत्री विष्णुदेव साय ह काली नई दिल्ली म खेल मंत्री मनसुख मांडविया ले भेंट करके खेलो इंडिया ट्राइबल गेम्स के आयोजन के बारे म चर्चा करीन। ओमन किहीन कि खेलो इंडिया ट्राइबल गेम्स के मेजबानी छत्तीसगढ़ ल मिलना राज्य बर गौरव के बात हे। ए मउका म राज्य के समृध्द जनजातीय परंपरा ल अउ खेल प्रतिभा ल राष्ट्रीय मंच मिलही।
उहें, केंद्रीय मंत्री श्री मांडविया ह किहीन कि जनजातीय क्षेत्र के युवा मन म खेल प्रतिभा के कोनो कमी नइ हे। छत्तीसगढ़ जइसन राज म ए प्रकार के आयोजन के होना खेल बर लोगन म उछाह अउ अवसर पैदा करही। ओमन मुख्यमंत्री श्री साय ल आयोजन के सबो तियारी म केंद्र सरकार डहार ले मदद दे जाय के भरोसा दीन।
खबर के मुताबिक खेलो इंडिया ट्राइबल गेम्स म एथलेटिक्स, तीरंदाजी, कुश्ती, वेटलिफ्टिंग, हॉकी, फुटबॉल अउ तैराकी संघरा सात ठन मुख्य खेल के प्रतियोगिता होही। प्रस्तावित कारीकरम के अनुसार सरगुजा संभाग म कुश्ती, तीरंदाजी अउ वेटलिफ्टिंग, रईपुर म हॉकी, फुटबॉल अउ तैराकी के संग बिलासपुर म एथलेटिक्स प्रतियोगिता के आयोजन करे जाही।
जी राम जी योजना
जांजगीर-चांपा जिला के ग्राम कुटराबोड़ के सरपंच पुष्कर दिनकर ह विकसित भारत-जी राम जी योजना ल सबो मजदूर अउ किसान मनके हित म करे गे एक ठन सुघ्घर पहल बतइन हे। आकाशवाणी समाचार ले बात करत ओमन किहीन कि पाछू कानून म हर बछर सिरिफ एक सौ दिन के रोजगार के प्रावधान रिहीस, फेर नवा कानून म एखर संख्या बाढ़के एक सौ पच्चीस दिन कर दे गेहे।
जिले की चिट्ठी
प्रादेशिक समाचार एकांश, आकाशवाणी रईपुर डहार ले प्रस्तुत कारीकरम जिले की चिट्ठी के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ के आकाशवाणी के सबो केंद्र मन ह रिले करही। ए बखत के अंक म ‘‘जशपुर‘‘ जिला के गतिविधि के बारे म जानकारी दे जाही।
पाठ्य पुस्तक निगम-स्पष्टीकरण
छत्तीसगढ़ पाठ्य पुस्तक निगम ह स्पष्ट करे हे कि शिक्षा सत्र दू हजार छब्बीस-सत्ताईस बर पाठ्य पुस्तक के मुद्रण ले जुड़े सबो फइसला नवा राष्ट्रीय शिक्षा नीति, एनसीईआरटी के मानक अउ राज्य शासन अउ एससीईआरटी के निरदेस के अनुसार ले गे हवय। निगम के अधिकारी मन ह बतइन कि कक्षा पहिली ले आठवीं तक के पुस्तक के पाठ्यक्रम एनसीईआरटी म आधारित हे। ओमन बतइन कि बिसय के संख्या म बढ़ोत्तरी करे गेहे। अवइया सत्र म एक सौ चौतीस बिसय के जघा म एक सौ चवालीस बिसय के पुस्तक के छपई प्रस्तावित हे। कक्षा चौथी अउ सातवीं म बिसय वृध्दि शासन अउ एससीईआरटी के फइसला के आधार म करे गेहे। अधिकारी मन ह लइका मनके बस्ता के वजन चौदह प्रतिसत बाढ़े के दावा के खंडन करत किहीन कि सिरिफ कागज के जीएसएम म बदलाव के आधार म प्रतिसत वृध्दि के अनुमान सही नइ हे। कतकोन कक्षा म डिजीटल शिक्षण सामग्री, वर्षवार वितरण प्रणाली अउ दूसर उपाय ले लइका मनके बस्ता के वजन ल धियान म राखे जावत हे।
सियादेवी-जलाशय एडवेंचर शुभारंभ
बालोद जिला के गुरूर विकासखंड के ग्राम नारागांव के सियादेवी जलाशय म एडवेंचर अउ बैम्बु राफ्टिंग सेंटर के सुरूआत करे गीस। ए मउका म जनपद पंचायत अध्यक्ष सुनीता साहू, उपसरपंच जगन्नाथ साहू संघरा जिला प्रशासन के बड़े अधिकारी मन मौजूद रिहीन।
कलेक्टर दिव्या मिश्रा ह बतइन कि ए सेंटर जल्दीच इको टूरिज्म के प्रमुख स्थल के रूप म विकसित होही अउ बालोद जिला के पर्यटन ल मजबूत करही। ओमन बतइन कि सेंटर के माध्यम ले स्थानीय ग्रामीण मन ल खास करके युवा मन बर रोजगार के नवा मउका मिलही।
छेरछेरा-पर्व
प्रदेसभर म अन्नदान के परब छेरछेरा आज बड़ उछाह के संग मनाय जावत हे। धान के नवा फसल आय के मउका म पूस महिना के पूर्णिमा के दिन ए परब ल मनाय जाथे। एमा धान के दान करे जाथे। बिहनियाच ले लइका अउ सियान अउ माईलोगिन मन टोली बनाके घूम-घूम के धान मांगत रिहीन। उहें, किसान अउ दूसर ग्रामीण मन ह घर के आगू टुकनी म धान रखके लोगन ल बांटिन।
सक्ति जिला के गांव म लोगन धान मांगे के बाद परंपरा अनुसार डंडा नृत्य के प्रदर्सन करीन।
मुख्यमंत्री विष्णुदेव साय ह लोगन ल छेरछेरा के बधई अउ सुभकामना दीन हे। ए मउका म ओमन ह प्रदेसवासी मनके सुख-समृध्दि अउ खुसहाली के कामना करीन हे।
ओति, राजस्व मंत्री टंकराम वर्मा ह धरसींवा विकासखंड के ग्राम तरपोंगी म पारंपरिक रूप ले घर-घर जाके अन्नदान ग्रहण करीन। ओमन ह किहीन कि छेरछेरा तिहार छत्तीसगढ़ के आत्मा ले जुड़े परब हे, जउन ह समाज म समानता, सहयोग अउ दान के भावना ल मजबूत बनाथे।
सड़क-मंजूरी
प्रधानमंत्री ग्राम सड़क योजना म राज्य म दू हजार दू सौ पच्चीस करोड़ रूपिया के लागत ले सात सौ चौहत्तर ग्रामीण सड़क निर्माण बर प्रशासकीय स्वीकृति दे गे हवय। एमा जनजातीय ग्राम उत्कर्ष अभियान म अवइया अनुसूचित जनजातीय बाहुल्य गांव मन ल प्राथमिकता दे गेहे। सबले जादा सत्यासी ठन सड़क बस्तर जिला म बनाय जाही।