केंद्रीय सड़क परिवहन अउ राजमार्ग मंत्रालय ह छत्तीसगढ़ म चार सड़क खंड के मजबूतीकरण, चौड़ीकरण अउ उन्नयन बर छै सौ चौसठ करोड़ सड़सठ लाख रूपिया मंजूर करे हे। ए रासि ले राज्य के पांच जिला म करीबन एक सौ चौहत्तर किलोेमीटर सड़क के विकास अउ उन्नयन के काम करे जाही। एमा मुंगेली जिला के कोटा-लोरमी-पंडरिया मार्ग के इक्कीस किलोमीटर हिस्सा ल फोरलेन करे जाही। इंखर उपर एक सौ छप्पन करोड़ रूपिया के रासि खरचा होही। उहें, कांकेर जिला म कांकेर- भानूप्रतापपुर-संबलपुर मार्ग के अड़तालीस किलोमीटर टू-लेन मजबूतीकरण के काम करे जाही। एमा एक सौ तीस करोड़ रूपिया ले जादा खरचा करे जाही।
अइसने, सुकमा-दंतेवाड़ा रद्दा के अड़सठ किलोमीटर टू-लेन सड़क के चौड़ीकरण बर लगभग दू सौ इकतीस करोड़ रूपिया मंजूर करे गेहे। जबकि गरियाबंद जिला म राजिम-फिंगेश्वर-महासमुंद रद्दा म साढ़े पैंतीस किलोमीटर सड़क मजबूती बर एक सौ सैंतालीस करोड़ रूपिया के रासि मंजूर करे गेहे।
मुख्यमंत्री विष्णुदेव साय अउ उपमुख्यमंत्री अरूण साव राज्य ल अतका बड़का रासि दे बर प्रधानमंत्री नरेंद्र मोदी अउ केंद्रिय सड़क परिवहन मंत्री नितिन गडकरी के प्रति आभार जतइन हे।
बुलेट ट्रेन
रेल मंत्री अश्विनी वैष्णव ह किहीन कि भारत के पहिली बुलेट ट्रेन पंद्रह अगस्त दू हजार सत्ताईस ले सुरू होय के संभावना हे। श्री वैष्णव ह किहीन कि ए बुलेट ट्रेन अहमदाबाद अउ मुंबई के बीच चलही। ओमन किहीन कि सबले पहिली एखर सूरत ले बिलिमोरा तक अउ फेर वापी ले सूरत तक के खंड सुरू होही।
केंद्रीय मंत्री-भोरमदेव कॉरीडोर
केंद्रीय संस्कृति अउ पर्यटन मंत्री गजेन्द्र सिंह शेखावत ह किहीन कि उज्जैन अउ वाराणसी के तर्ज म कबीरधाम जिला म भोरमदेव कॉरीडोर के विकास करे जाही। श्री शेखावत ह भोरमदेव महोत्सव स्थल म कॉरीडोर के भूमिपूजन के बाद सभा ल संबोधित करत किहीन कि छत्तीसगढ़ भारत के विकास के ग्रोथ इंजन बनत जात हे। श्री शेखावत ह किहीन कि ए कॉरीडोर भोरमदेव ल राष्ट्रीय ही नही बल्कि अंतर्राष्ट्रीय पर्यटन पटल म विशिष्ट पहिचान दिलाय म मील के पत्थर साबित होही।
केंद्रीय मंत्री ह किहीन कि पाछू दू बछर म छत्तीसगढ़ सरकार ह प्रधानमंत्री नरेंद्र मोदी के संकल्प ल जमीन म उतारत विकसित छत्तीसगढ़ के परिकल्पना ल साकार करे के काम करीन हे। ओमन किहीन कि नक्सलवाद प्रदेस के विकास म सबले बड़का बाधा रिहीस, जेला खतम करे के बेरा राज्य सरकार ह उठाय हे अउ आज प्रदेस नक्सलवाद के समाप्ति के दिसा म निर्णायक रूप ले आगू बढ़त हे। ओमन किहीन कि एखर ले न केवल छत्तीसगढ़ बल्कि पूरा देस के नागरिक म एक बिस्वास मजबूत होय हे कि भारत ल कमजोर करइया कोनो भी ताकत या षड़यंत्र ल बर्दास्त नइ करे जाही।
कारीकरम ल मुख्यमंत्री विष्णुदेव साय, उपमुख्यमंत्री अरूण साव अउ विजय शर्मा अउ पर्यटन मंत्री राजेश अग्रवाल ल घलो संबोधित करीन।
मोहन भागवत-बैठक
राष्ट्रीय स्वयं सेवक संघ के प्रमुख अउ सरसंघचालक डॉक्टर मोहन भागवत अपन छत्तीसगढ़ प्रवास के दउरान काली रईपुर म राखे गे सामाजिक सद्भाव बइठका म सामिल होइन। बइठका म आने-आने जाति, समाज, पंथ के पांच सौ ले जादा प्रतिनिधि मौजूद रिहीन।
बइठका ल संबोधित करत संघ प्रमुख श्री भागवत ह किहीन कि भारत म सब लोगन मन अपन-अपन आस्था अउ आचरण के संग सद्भाव के सेति एक संग रहिथे। ए सद्भाव कई बछर ले चले आत हे। ओमन किहीन कि सामाजिक सद्भाव ले हरेक चुनौती के समाधान संभव हे। ओमन किहीन कि अपन-अपन विशिष्टता के संग आगू बढ़े के भारत म पूरा स्वतंत्रता हरय। जिंहा सद्भावना पक्का हे, उंहा बिगाड़ करइया वाला मनके नइ चलही। तोड़े वाला सक्ति असफल हो एखर बर हमन ल परयास करना हे। हमन समाज अउ राष्ट्र के रूप म एकहन ओखर पिछू सामाजिक सद्भाव हरय। ओमन किहीन कि समाज म आपस म सहयोग बाढ़य एखर परयास हरेक समाज ल करना चाही।
चैतन्य बघेल-जमानत
छत्तीसगढ़ के सराब घोटाला मामला म पूर्व मुख्यमंत्री भूपेश बघेल के बेटा चैतन्य बघेल के जमानत याचिका छत्तीसगढ़ उच्च न्यायालय ह मंजूर कर लेहे। चैतन्य बघेल ल प्रवर्तन निदेशालय-ईडी ह पाछू बछर जुलाई म मनी लॉन्ड्रिंग के आरोप म गिरफ्तार करे रिहीस। गिरफ्तारी के बाद ले ओहा न्यायिक हिरासत म जेल म बंद रिहीन।
एखर पहिली, पूर्व मुख्यमंत्री भूपेश बघेल अउ उंखर बेटा चैतन्य बघेल ह उच्चतम न्यायालय म जमानत याचिका दायर करे रिहीन। उच्चतम न्यायालय ह एखर उपर सुनवाई ले मना करत उच्च न्यायालय जाय के सलाह दे हे।
मुख्यमंत्री-साहित्य उत्सव
मुख्यमंत्री विष्णुदेव साय ह मंत्रालय म रईपुर साहित्य उत्सव के वेबसाइट के लोकार्पण करीन। ए मउका म मुख्यमंत्री ह किहीन कि रईपुर साहित्य उत्सव छत्तीसगढ़ के साहित्यिक अउ सांस्कृतिक पहिचान ल नवा ऊंचाई दिही। ओमन किहीन कि ए उत्सव लेखक अउ पाठक के बीच नवा संवाद के सशक्त मंच बनही अउ युवा पीढ़ी म पढ़े अउ लिखे के प्रेरणा जागृत करही।
बतादन कि रईपुर साहित्य उत्सव अवइया तेईस ले पच्चीस जनवरी तक आयोजित करे जाही। साहित्य उत्सव म देसभर के प्रख्यात साहित्यकार, लेखक, कवि, पत्रकार, समीक्षक अउ पाठक के सहभागिता होही।
राज्यपाल-ई-रिक्शा/कम्प्यूटर
राज्यपाल रमेन डेका ह आज लोक भवन परिसर म आयोजित कारीकरम म सरस्वती शिक्षा संस्थान रईपुर ल चार ठिन ई-रिक्शा प्रदान करीन। ए दउरान ओमन ई-रिक्सा के चाबी वाहन चालक मन ल सौंपिन अउ हरा झंडा दिखाके वाहन ल रवाना करीन। ए वाहन के उपयोग सरस्वती शिक्षा संस्थान म करे जाही।
उहें, राज्यपाल ह सरगुजा जिला के राजपुर कला स्थित कस्तूरबा गांधी बालिका आवासीय विद्यालय के छात्रा मन बर स्वेच्दानुदान मद ले पांच ठन कम्प्यूटर दीन हे। बतादन कि राज्यपाल ह पादू दिन म सरगुजा जिला के प्रवास के दउरान ए विद्यालय के निरीक्षण करे रिहीस अउ विद्यालय बर अतिरिक्त कम्प्यूटर उपलब्ध कराय के मंजूरी दे रिहीन।
उपमुख्यमंत्री-खिलाड़ी किट
उपमुख्यमंत्री अरूण साव ह बेंगलुरू स्थित साई के नेशनल सेंटर ऑफ एक्सीलेंस म परफॉर्मेंस असेसमेंट बर चयनित खिलाड़ी मन ल हॉकी किट प्रदान करीन। ओमन नवा रईपुर म गोल कीपर अल्फाज खान ल गोल कीपिंग के संपूर्ण कीट अउ फॉरवर्ड पोजिसन म खेलइया मधु सिदार अउ दामिनी खुसरो ल हॉकी स्टीक प्रदान करीन। ए तीनो खिलाड़ी बिलासपुर स्थित स्वर्गीय बी.आर. यादव राज्य प्रसिक्षण केंद्र बहतराई म पाछू तीन साल ले हॉकी के प्रसिक्षण लेवत हे।
बतादन कि रईपुर के अल्फाज खान हाले म बारह दिसंबर ले उन्नीस दिसंबर तक बेंगलूरू के नेशनल सेंटर ऑफ एक्सीलेंस म परफॉर्मेंस असेसमेंट कैम्प म सामिल होय रिहीन। उहें, जशपुर के मधु सिदार अउ कबीरधाम के दामिनी खुसरो अवइया सोलह ले तेईस जनवरी तक आयोजित परफॉर्मेंस असेसमेंट कैम्प म सामिल होही।
विशेष कार्यक्रम
श्रोता मन, बछर दू हजार पच्चीस भारत के वैज्ञानिक तकनीकी यात्रा म ऐतिहासिक मोड़ बनके उभरे हे। ए साल भारत ह नवा आत्म विस्वास के संग उभरत तकनीक म अपन मजबूत पहिचान बनाय हे अउ वैश्विक स्तर म सम्मान बढ़ाय हे। प्रधानमंत्री नरेंद्र मोदी के अगुवई म भारत ह बछर दू हजार पच्चीस म तकनीकी आत्मनिर्भरता के दिसा म तेज कदम बढ़ाय हे। ए बछर भारत ल केवल तकनीक के उपभोक्ता नही बल्कि वैश्विक तकनीकी नेतृत्वकर्ता के रूप म स्थापित करइया साबित होय हे।
छत्तीसगढ़ स्वामी विवेकानंद तकनीकी विश्वविद्यालय के कुलपति डॉक्टर अरूण अरोरा ह किहीन कि बछर दू हजार पच्चीस म भारत ह स्पेस तकनीकी म बहुत तरक्की करे हे।
सुनइया मन ल बतादन के ए पूरा गोठबात ल आकाशवाणी रईपुर डहार ले आज रतिहा नौ बजके पंद्रह मिनट ले नौ बजके तीन मिनट तक प्रसारित करे जाही। एला छत्तीसगढ़ स्थित आकाशवाणी के जम्मो केंद्र रिले करही।
चावल उत्सव
रईपुर जिला के जम्मों शासकीय उचित मूल्य दुकान मन म आज ले नौ जनवरी तक चंउर उत्सव अउ उपभोक्ता जागरूकता सप्ताह मनाय जात हे। ए आयोजन शासकीय उचित मूल्य दुकान म स्थानीय जनप्रतिनिधि, निगरानी समिति के सदस्य, दुकान संचालक अउ हितग्राही मनके उपस्थिति म करे जात हे। ए दउरान शासन के आने-आने जन कल्याणकारी योजना के जानकारी उपभोक्ता मन ल दे जाही। संघरा पात्र हितग्राही मन ल योजना के लाभ लेबर जागरूक करे जाही। जिला खाद्य नियंत्रक भूपेन्द्र कुमार मिश्रा ह आज ए संबंध म समीक्षा बइठका लेके दुकान संचालक मन ल जम्मों राशन कार्ड धारी के ई-केवाईसी प्रक्रिया जल्दी पूरा करे के निरदेस दीन।