केन्द्र सरकार ह एसो एक फरवरी ले तंबाकू उत्पाद उपर उपराहा उत्पाद सुल्क अउ पान मसाला मन उपर नवा उपकर लगाय के अधिसूचना जारी कर देहे। तंबाकू अउ पान मसाला मन उपर ए नवा सुल्क वस्तु अउ सेवा कर-जीएसटी दर के अतिरिक्त होही। ए बेरा, एखर मन उपर लगइया क्षतिपूर्ति ह उपकर के जघा लीहीं। एक फरवरी ले पान मसाला, सिगरेट, तंबाकू अउ अइसन उत्पाद मन उपर चालीस प्रतिसत अउ बीड़ी उपर अट्ठारह प्रतिसत जीएसटी लगही।
श्रम संहिता-अधिसूचित
केन्द्र सरकार ह चार ठिन नवा श्रम संहिता मन बर मसौदा नियम ल अधिसूचित कर देहे, जेमा मजदूरी संहिता, औद्योगिक संबंध संहिता, सामाजिक सुरक्षा संहिता अउ व्यावसायिक सुरक्षा के संगेसंग स्वास्थ्य कार्य परिस्थिति संहिता सामिल हे। ए संहिता मन म गिग वर्कर के संगेसंग आने श्रमिक, मजदूरी, रोजगार के प्रकार, ग्रेज्यूटी, बोनस अउ सामाजिक सुरक्षा ल परिभाषित करे गेहे। ए मसौदा नियम उपर पैंतालीस दिन के भीतर जम्मों हितधारक मन अपन आपत्ति अउ सुझाव दरज करा सकथे।
खेलो इंडिया-मशाल गौरव यात्रा
खेलो इंडिया राष्ट्रीय जनजातीय खेल प्रतियोगिता के जिम्मेवारी एसो छत्तीसगढ़ ल मिले हे। इही कड़ी म उपमुख्यमंत्री अउ खेल युवा कल्याण मंत्री अरूण साव ह आज रईपुर ले मसाल गौरव यात्रा वाले गाड़ी ल हरा झंडी दिखाके रवाना करीन। ए गाड़ी ह राज्य के जम्मों जिला मन म जाके खेलो इंडिया जनजातीय खेल प्रतियोगिता के प्रचार-प्रसार करही। संगेसंग आयोजन के शुभंकर ‘मोरवीर अउ थीम-सांग के बारे म घलो लोगन मन ल जानबा दीहीं।
ए मउका म उपमुख्यमंत्री श्री साव ह किहीन कि छत्तीसगढ़ बर ए गौरव के बात हे कि देस म पहिली घांव होवइया खेलो इंडिया राष्ट्रीय जनजातीय खेल प्रतियोगिता के जिम्मेवारी छत्तीसगढ़ ल मिले हे। ओमन एखर बर केन्द्रीय युवा कार्यक्रम अउ खेल मंत्री मनसुख मांडविया के प्रति आभार जताय हे। ए प्रतियोगिता फरवरी म होही। प्रतियोगिता म हॉकी, फुटबॉल, तीरंदाजी, तैराकी, कुश्ती, ऐथलेटिक्स अउ वेटलिफ्टिंग जइसन खेल ल सामिल करे गेहे। ए खेल मन म छत्तीसगढ़ ले भाग लेवइया खिलाड़ी मनके चुनई सात अउ आठ जनवरी के बिलासपुर के बहतराई स्थित राज्य प्रसिक्षण केन्द्र अउ रायपुर के कोटा स्थित स्वामी विवेकानंद स्टेडियम म ट्रायल के आयोजन करे जाही।
वीबी-जी राम जी योजना
केन्द्रीय कृषि अउ ग्रामीण विकास मंत्री शिवराज सिंह चौहान ह किहीन हे कि विकसित भारत – जी-राम-जी योजना मजूर मन बर रोजगार ल बढ़ावा दीहीं। ओमन किसान, मजूर, अउ लखपति दीदी मन ल नव वर्ष के सुभकामना देवत किहीन कि सरकार ह माईलोगिन अउ किसान मन ल मजबूत बनाही अउ गांव-गंवई के उद्यमशीलता ल आगू लाही।
राष्ट्रीय सड़क सुरक्षा माह
छत्तीसगढ़ के संगेसंग पूरा देस म आज ले राष्ट्रीय सड़क सुरक्षा माह सुरू होगे हे। जांजगीर-चांपा जिला म राष्ट्रीय सड़क सुरक्षा माह के सुभारंभ के मउका म पूर्व नेता प्रतिपक्ष नारायण चंदेल, कलेक्टर जन्मेजय महोबे अउ पुलिस अधीक्षक विजय पांडेय सामिल होइन। ए मउका म ओमन यातायात जागरूकता रथ ल हरा झंडी देखाके रवाना करीन।
ओति, दंतेवाड़ा जिला के सिटी कोतवाली परिसर म राष्ट्रीय सड़क सुरक्षा माह के सुभारंभ होगे। इकतीस जनवरी तक चलइया ए अभियान के दउरान जम्मों जिला मन म सड़क सुरक्षा ल लेके जन-जागरूकता कार्यक्रम चलही।
एमओयू
मुख्यमंत्री विष्णुदेव साय के अगुवई म आज मंत्रालय म छत्तीसगढ़ राज्य कौशल विकास प्राधिकरण अउ श्री सत्य सांई हेल्थ एंड एजुकेशन ट्रस्ट के बीच एक ठिन समझौता ज्ञापन उपर दस्तखत करे गीस। ए एमओयू राज्य म स्वास्थ्य के क्षेत्र के दायरा बढ़ाय के संगेसंग युवा मन बर नवा रोजगार के मउका देवाय के दिसा म बड़का कदम होही। एमओयू के तहत चार प्रकार के पाठ्यक्रम चलाय जाही, जेमा मेडिकल लेबोरेट्ररी टेक्नोलॉजी, कार्डियोलॉजी तकनीशियन, ईसीजी तकनीशियन, कार्डियक केयर तकनीशियन अउ इमरजेंसी मेडिकल तकनीशियन के प्रसिक्षण सामिल हे।
ए मउका म मुख्यमंत्री ह उम्मीद जतईन कि ए पहल स्वास्थ्य सेवा ल बढ़ाय के संगेसंग युवा मन बर रोजगार के संभावना पैदा करही।
भोरमदेव कॉरिडोर-भूमिपूजन
मुख्यमंत्री विष्णुदेव साय अउ केन्द्रीय पर्यटन मंत्री गजेन्द्र सिंह शेखावत ए बेरा कवर्धा जिला म आयोजित एक समारोह म भोरमदेव कॉरिडोर विकास परियोजना के भूमिपूजन करत हे। स्वदेस दर्सन योजना के तहत ए कॉरीडोर लगभग एक सौ छियालीस करोड़ रूपिया के लागत ले बनाय जाही।
पर्यटन कॉरिडोर के बने ले इहां अवइया श्रद्धालु अउ पर्यटक मन ल बने सुविधा मिलही। उहें, सड़क, पार्किंग, व्यू प्वाइंट, पर्यटक सुविधा केन्द्र, सौंदर्यीकरण अउ दूसर बुनियादी सुविधा म घलो बढ़ोतरी होही।
विशेष कार्यक्रम
बछर दू हजार पच्चीस ल भारत के राष्ट्रीय सुरक्षा नीति म एक ठिन बड़का बदलाव के रूप म सुरता करे जाही। प्रधानमंत्री नरेन्द्र मोदी के अगुवई म भारत ह ए संदेस दीन कि अब भारतीय लोगन मन उपर होवइया हमला के जवाब सिरिफ संयम ले नइ, भलूक तेज, सटीक अउ निर्णायक कार्रवाई ले दे जाही। प्रधानमंत्री ह आतंकवाद के खिलाफ भारत के नवा सोच ल ‘‘आतंकवाद पर पांच नये सामान्य सिद्धांत‘‘ के रूप म स्पष्ट करीन।
छत्तीसगढ़ राज्य सैनिक कल्याण बोर्ड के संचालक ब्रिगेडियर विवेक शर्मा ह किहीन कि ऑपरेसन सिंदूर ह पूरा दुनिया ल ए बता दीस कि जब भी राष्ट्रीय हित के रक्षा के बात आही, त भारतीय सेना ह कोनों भी चुनौती ले निपटे बर तैयार रइही।
सुनइया मन ल बतादन कि ए पूरा गोठबात आकाशवाणी रायपुर डहार ले आज रतिहा नौ बजके पन्द्रह मिनट ले नौ बजके तीस मिनट तक प्रसारित करे जाही। एला छत्तीसगढ़ स्थित आकाशवाणी के जम्मों केन्द्र रिले करही।
बस्तर पंडुम
बस्तर संभाग के लोक संस्कृति, उहां के परंपरा अउ विरासत ल राष्ट्रीय पहिचान देवाय बर एसो दस जनवरी ले छह फरवरी तक तीन चरण म बस्तर पंडुम होही। पहिली चरण म जनपद स्तर म प्रतियोगिता दस ले बीस जनवरी तक राखे जाही। त उहें, दूसर चरण म जिला स्तर म चौबीस ले उनतीस जनवरी तक अउ तीसर चरण म दू ले छह फरवरी तक जगदलपुर म संभाग स्तरीय प्रतियोगिता होही।
संस्कृति विभाग डहार ले होवइया ‘बस्तर पंडुम‘ बस्तर संभाग के लोक कला, शिल्प, नृत्य, गीत-संगीत, पारंपरिक व्यंजन, बोली-भाषा, पहिरावा, अभूषण, वाद्ययंत्र, नाट्य अउ जनजातीय जीवन पद्धति ल संजोय के एक ठन मंच बनही। एमा बस्तर संभाग के एक हजार आठ सौ पच्यासी ग्राम पंचायत ले जुड़े बत्तीस जनपद मुख्यालय मन म बारह विधा उपर आधारित प्रतियोगिता होही। ग्राम पंचायत स्तर ले चुने गे लोक कलाकार मन ल मुफत म ऑनलाइन अउ ऑफलाइन माध्यम ले जनपद स्तरीय प्रतियोगिता म बुलाय जाही। ए महोत्सव म उही कलाकार मन भाग ले सकही, जउन मन बस्तर संभाग रहइया हरय। हरेक स्तर म विजेता दल मन ल पुरस्कार के संग प्रमाण पत्र अउ स्मृति चिन्हा ले सम्मानित करे जाही।
केन्द्रीय संस्कृति मंत्री-सिरपुर
केन्द्रीय संस्कृति अउ पर्यटन मंत्री गजेन्द्र सिंह शेखावत ह आज महासमुंद जिला के सिरपुर स्थित ऐतिहासिक अउ पुरातात्विक वाले जगह मनके दउरान करीन। ए दउरान ओमन लक्ष्मण देवालय, आनंद प्रभु कुटी विहार, तीवरदेव विहार, सुरंग टीला अउ इहां के हाट-बाजार के निरीक्षण करीन। ओमन किहीन कि सिरपुर ह भारत के प्राचीन धरोहर के एक ठिन बड़का केन्द्र हरय, जेला राष्ट्रीय अउ अंतर्राष्ट्रीय स्तर म पहिचान देवाय के जरूरत हे। ओमन पर्यटक मनके सुविधा बर बढ़िया सड़क, साइन बोर्ड, सूचना केन्द्र, साफ-सफाई अउ जरूरी सुविधा मन ल ठीक करे उपर जोर दीन। ओमन किहीन कि सिरपुर ल वर्ल्ड हेरिटेज म सामिल करे के प्रयास जारी हे।