श्री साव ह बतईन कि बइठका म कोदो-कुटकी अउ रागी के खरीदी प्रसंस्करण अउ बेचे बर छत्तीसगढ़ राज्य लघु वनोपज संघ ल कार्यसील पूंजी प्रदान करे के संगेसंग अराष्ट्रीयकृत लघु वनोपज के खरीदी, भंडारण, प्रसंस्करण, मूल्य संवर्धन अउ विपणन बर तीस करोड़ रूपिया के ब्याज मुक्त ऋण एक घांव बर देके निर्णय लेहे। ओमन बतईन कि मंत्रिपरिषद ह छत्तीसगढ़ राज्य अंत्यावसायी सहकारी वित्त अउ विकास निगम डहार ले राज्य सासन के गारंटी उपर ले गे ऋण ल पचपन करोड़ उनहत्तर लाख रूपिया के बजट प्रावधान कर पांच ठन राष्ट्रीय निगम मन ले लेगे ऋण के पूरा रासि वापस करे के अनुमोदन करे हे।
एक ठिन दूसर फइसला म मंत्रिपरिषद ह उसना मिलिंग उपर प्रोत्साहन रासि बीस रूपिया प्रति क्विंटल ले बढ़ाके चालीस रूपिया कर देहे। उहें, औद्योगिक विकास नीति म संसोधन कर विसंगति मन ल दूर करे के प्रयास करे गेहे।
मंत्रिपरिषद ह रायपुर के साईंस कॉलेज मैदान म बीस जनवरी ले पांच फरवरी तक आयोजित नौवां ऑटो एक्सपो के दउरान बिकने वाला वाहन मन उपर लाइफ टाइम रोड टैक्स म पचास प्रतिशत छूट देके के निर्णय लेहे। बइठका म प्रदेस म राइस मिलर्स डहार ले दे जाने वाला बैंक गारंटी उपर दे जाने वाला स्टाम्प सुल्क ल घटाके दशमलव शून्य पांच प्रतिशत कर दे हे। मंत्रिपरिषद ह रायपुर जिला म पुलिस आयुक्त प्रणाली ल तेईस जनवरी ले लागू करे के निर्णय लेहे।
निमेसुलाइड-प्रतिबंध
केंद्र सरकार ह सौ मिलीग्राम ले जादा निमेसुलाइड युक्त सबो दवा मनके निर्माण, बिक्री अउ वितरण उपर प्रतिबंध लगा देहे। स्वास्थ्य अउ परिवार कल्याण मंत्रालय ह राजपत्र अधिसूचना म केहे हे कि ए कदम औषधि तकनीकी सलाहकार बोर्ड के परामर्स ले उठाय गेहे। अधिसूचना म बताय गेहे कि निमेसुलाइड युक्त सबो दवा के उपयोग स्वास्थ्य बर जोखिम भरे हो सकत हे। एमा कहे गेहे कि निमेसुलाइड के सुरक्षित विकल्प बाजार म उपलब्ध हे।
बतादन कि निमेसुलाइड एक नॉन स्टेरॉइडल सूजनरोधी दवा हरया, जेखर उपयोग तेज पीरा के उपचार म करे जाथे।
आरएसएस प्रमुख-युवा संवाद
राष्ट्रीय स्वयंसेवक संघ-आरएसएस के प्रमुख अउ सर संघचालक डॉक्टर मोहन भागवत आज अखिल भारतीय आयुर्विज्ञान संस्थान-एम्स रायपुर म आयोजित युवा संवाद कारीकरम म सामिल होइन। ए मउका म ओमन युवा मन ले अपील करीन कि रोजगार अउ करियर के संगेसंग ओमन पर्यावरण के जिम्मेदारी घलो समझय। डॉक्टर भागवत ह युवा मन म बाढ़त नशा के प्रवृत्ति ल गंभीर चिंता के बिसय बतइन।
एखर बाद डॉक्टर भागवत अभनपुर करा सोनपैरी गांव म आयोजित हिन्दू सम्मेलन म घलो सामिल होइन। ओमन किहीन कि राष्ट्रीय स्वयंसेवक संघ ल काम करत हुए सौ साल पूरा हो गेहे, एखर सेति पूरा देस म हिन्दू सम्मेलन के आयोजन करे जात हे। ए कारीकरम म मुख्य अतिथि के रूप म राष्ट्रीय संत असंग देव जी घलो मौजूद रिहीन।
उहें, काली एक जनवरी के डॉक्टर भागवत सामाजिक सद्भावना बइठका म हिस्सा लिही। ए बइठका म सबो समाज के प्रदेस प्रमुख मन ल आमंत्रित करे गेहे।
पुलिस विभाग-पदोन्नति
राज्य पुलिस सेवा के सोलह अधिकारी मन ल अतिरिक्त पुलिस अधीक्षक के पद म पदोन्नत करे गेहे। ए संबंध म गृह विभाग डहार ले आदेस जारी कर दे गेहे। ए अधिकारी मन म रितेश चौधरी, जितेन्द्र कुमार खुटे, अंजली नाग, कर्ण कुमार उके, मनोज कुमार ध्रुव, पुष्पेन्द्र नायक, मनोज तिर्की, सारिका वैद्य, निधि नाग, कपील चंद्रा, अविनाश कुमार मिश्रा, ईश्वर प्रसाद त्रिवेदी, योगेश कुमार साहू, मयंक तिवारी, रश्मीत कौर चांवला, अउ अनिल कुमार विश्वकर्मा सामिल हे।
सीबीएसई परीक्षा-तिथि संशोधन
केंद्रीय माध्यमिक शिक्षा बोर्ड-सीबीएसई ह कक्षा दसवीं-अउ बारहवीं के बोर्ड परीक्षा के संशोधित तिथि के घोसना करे हे। सीबीएसई के अनुसार कक्षा दसवीं के परीक्षा जउन ह पहिली तीन मार्च के निर्धारित रिहीस हे, ओहा अब ग्यारा मार्च के आयोजित करे जाही। उहें, कक्षा बारहवीं के परीक्षा तीन मार्च के जघा अब दस अप्रैल के होही। बोर्ड ह बतइन कि प्रशासनिक कारण मनके सेति तिथि मन म बदलाव करे गेहे।
राष्ट्रीय सड़क सुरक्षा माह
सड़क सुरक्षा के गंभीरता, चुनौती अउ नियम मनके प्रति लोगन मन ल जागरूक करे के उद्देस्य ले छत्तीसगढ़ समेत देसभर म काली एक जनवरी ले राष्ट्रीय सड़क सुरक्षा माह के आयोजन करे जाही। इकतीस जनवरी तक चलइया सड़क सुरक्षा माह के दउरान राज्य के सबो जिला म सड़क सुरक्षा ल लेके जन-जागरूकता कारीकरम आयोजित करे जाही।
काली संझा रायपुर म उच्चतम न्यायालय के सड़क सुरक्षा समिति के अध्यक्ष अभय मनोहर सप्रे के उपस्थिति म हेलमेट अउ बाइक रैली के आयोजन करे जाही। ए रैली के माध्यम ले सड़क सुरक्षा नियम मनके पालन करे, हेलमेट के उपयोग अउ सावधानी ले वाहन चलाय के संदेस दे जाही।
सीआरपीएफ भर्ती-परिणाम
केंद्रीय रिजर्व पुलिस बल-सीआरपीएफ ह सुकमा अउ बीजापुर जिला के युवा मन बर तीन सौ पद बर आयोजित भर्ती परीक्षा के परिणाम आज घोसित कर देहे। एमा दू सौ पचपन पद पुरूष अउ पैंतालीस पद महिला उम्मीदवार मन बर निर्धारित करे गेहे।
सीआरपीएफ के डीआईजी एस.पी. सिंह बतइन कि ए भर्ती परीक्षा आदिवासी युवा मन के रोजगार बर एक अच्छा अवसर साबित होही।
बतादन कि सीआरपीएफ भर्ती प्रक्रिया छै अक्टूबर ले सुरू होय रिहीस, जेन ह चौदह नवंबर तक चलिस। उहें, शारीरिक परीक्षा इक्कीस अक्टूबर ले छै नवंबर तक आयोजित करे गे रिहीस।
मोबाइल मेडिकल यूनिट वाहन
प्रधानमंत्री जनजातीय आदिवासी न्याय महाअभियान-‘‘पीएम जनमन‘‘ के तहत मुख्यमंत्री विष्णुदेव साय ह आज नवा रायपुर ले संतावन मोबाइल मेडिकल यूनिट वाहन मन ल हरी झंडी देखाके रवाना करीन। ए वाहन मन ले प्रदेस के अट्ठारा ठन जिला के इक्कीस सौ ले जादा गांव अउ बसाहट मन तक नियमित स्वास्थ्य सेवा पहुंचाय जाही। एखर ले दू लाख ले जादा बिसेस रूप ले कमजोर जनजातीय समूह मन ल प्रत्यक्ष लाभ मिल सकही।
ए अवसर म मुख्यमंत्री ह किहीन कि पहाड़ी अउ दुर्गम इलाका म रहइया परिवार मन बर अब इलाज अउ जांच के सुविधा गांव म ही उपलब्ध होही। ओमन ए पहल ल आदिवासी समुदाय मनके ‘‘सर्वांगीण भागीदारी अउ स्वास्थ्य सुरक्षा का ठोस आधार‘‘ बतइन।
माओवादी सामग्री-बरामद
सुकमा जिला के उरसांगल कैम्प करा गोंदपल्ली के जंगल ले सुरक्षा बल मन ह माओवादी मन डहार ले छिपा के रखे हथियार अउ भारी मात्रा म माओवादी सामग्री बरामद करे हे। एमा एक नग बोल्ड एक्शन रायफल, तीन भरमार बंदूक, एक ठन बारह बोर के बंदूक अउ करीब चार सौ नग कारतूस अउ मैग्जीन सामिल हे।
भोरमदेव कॉरिडोर-भूमिपूजन
स्वदेस दर्सन योजना के तहत काली एक जनवरी ले भोरमदेव कॉरिडोर विकास परियोजना के भूमिपूजन करे जाही। लगभग एक सौ छियालिस करोड़ रूपिया के लागत ले बनइया ए परियोजना के भूमिपूजन केंद्रीय पर्यटन मंत्री गजेन्द्र सिंह शेखावत अउ मुख्यमंत्री विष्णुदेव साय ह करही।
पर्यटन कॉरिडोर के निर्माण ले इंहा अवइया श्रध्दालु अउ पर्यटक मन ल बेहतर सुविधा मिलही। उहें, सड़क, पार्किंग, व्यू प्वाइंट पर्यटक सुविधा केंद्र, सौंदर्यीकरण अउ दूसर बुनियादी सुविधा मन म घलो इजाफा होही। ए परियोजना राज्य के ऐतिहासिक अउ धार्मिक पर्यटन ल राष्ट्रीय अउ अंतर्राष्ट्रीय पहिचान देवाय के दिसा म एक ठन महत्वपूर्ण कदम साबित होही।
विशेष कार्यक्रम
आकाशवाणी रायपुर ले बछर दू हजार पच्चीस म सांस्कृतिक उपलब्धि उपर छत्तीसगढ़ राज्य साहित्य अकादमी के अध्यक्ष शशांक शर्मा ले लेगे भेंटवार्ता के प्रसारण आकाशवाणी रायपुर डहार ले आज रतिहा नौ बजके पंद्रह मिनट ले नौ बजके तीस मिनट तक करे जाही। एला छत्तीसगढ़ स्थित आकाशवाणी के सबो केंद्र एके संग रिले करही।