अरूण साव-पत्रकारवार्ता
उपमुख्यमंत्री अउ लोक निर्माण मंत्री अरूण साव ह किहीन कि राज्य के जम्मों सड़क मनके मरम्मत के काम ल पन्द्रह जनवरी तक पूरा कर ले जाही। श्री साव ह आज रईपुर म एक ठिन पत्रकारवार्ता म लोक निर्माण विभाग के दू बछर के काम अउ अवइया बछर के रूपरेखा प्रस्तुत करीन। ओमन यहू किहीन कि सड़क सुधार के काम ह प्रदेस म तेज गति ले चलत हे। अउ पन्द्रह जनवरी तक जम्मों सड़क के गढ्ढा मन ल पाटे जाही।
श्री साव ह बतईन कि राज्य सरकार ह दिसंबर दू हजार तेईस ले अब तक एक हजार एक सौ छब्बीस ठन काम के निर्माण करे खातिर आठ हजार बयानवे करोड़ रूपिया के मंजूरी जारी करे हे। अभी वर्तमान म तीन हजार छह सौ इकचालीस किलोमीटर सड़क ल बनाय जात हे।
उहेंं, श्री साव ह बतईन कि नक्सल प्रभावित जिला मन म लोक निर्माण विभाग डहार ले सड़क ल आपस म जोड़े के काम करे जावत हे। दिसंबर दू हजार तेईस ले नवंबर दू हजार पच्चीस तक अस्सी ठन सड़क अउ तेईस ठन पुलिया के निर्माण पूरा कर ले गेहे।
मोहन भागवत-छत्तीसगढ़
राष्ट्रीय स्वंयसेवक संघ-आरएसएस के प्रमुख मोहन भागवत ह आज ले तीन के दउरा म छत्तीसगढ़ प्रवास म रइही। ओमन आज रतिहा करीबन आठ बजे रईपुर पहुंचही। अपन प्रवास के दउरान श्री भागवत ह हिन्दू सम्मेलन, युवा संवाद अउ सद्भावना बइठका म सामिल होही। ए दउरान संगठन के विचारधारा, सामाजिक जिम्मेवारी अउ युवा मनके भूमिका उपर चर्चा करे जाही।
काली इकतीस दिसंबर के बिहनिया ओमन अखिल भारतीय आयुर्विज्ञान संस्थान-एम्स रईपुर म युवा संवाद कार्यक्रम म सामिल होही। इही दिन ओमन अभनपुर के सोनपैरी गांव म असंग देव कबीर आश्रम म हिन्दू सम्मेलन म सामिल होही। ए कार्यक्रम के माईपहुना राष्ट्रीय संत गुरूदेव असंग ल बनाय गेहे।
उहें, एक जनवरी के ओमन सामाजिक सद्भावना बइठका म सामिल होही। ए दउरान समाज के जम्मों प्रदेस प्रमुख मन ल बलाय जाही।
राष्ट्रीय सड़क सुरक्षा माह
सड़क सुरक्षा के गंभीरता अउ नियम के प्रति लोगन मन ल जागरूक करे खातिर छत्तीसगढ़ के संगेसंग देसभर म एक तारीख ले इकतीस जनवरी तक राष्ट्रीय सड़क सुरक्षा माह मनाय जाही। ए दउरान राज्य के जम्मों जिला मन म सड़क सुरक्षा ल लेके जन-जागरूकता कार्यक्रम राखे जाही।
खबर के मुताबिक एक जरवरी के रईपुर म संझा पांच बजे उच्चतम न्यायालय के सड़क सुरक्षा समिति के अध्यक्ष अभय मनोहर सप्रे के मौजूदगी म हेलमेट अउ बाईक रैली के आयोजन करे जाही। ए रैली के माध्यम ले सड़क सुरक्षा नियम के पालन, हेलमेट के उपयोग अउ गाड़ी चलावत बेरा का सावधानी रखना चाहिए, ओखर बारे म बताय जाही।
सड़क सुरक्षा माह के अंतर्गत जिला मन म सड़क सुरक्षा म प्रसिक्षण कार्यक्रम, स्वास्थ्य परीक्षण, नेत्र जांच सिविर, स्कूली लइका मन बर स्लोगन, निबंध, चित्रकला के संगेसंग प्रश्नउत्तरी के कार्यक्रम घलो राखे जाही।
कलम बंद-हड़ताल
छत्तीसगढ़ कर्मचारी-अधिकारी फेडरेशन डहार ले काली ले अपन ग्यारह सूत्रीय मांग ल लेके राज्यभर म कलम बंद हड़ताल करे जावत हे। हड़ताल के दूसरइया दिन आज इंद्रावती भवन समेत आने-आने सरकारी कार्यालय मन म कामकाज नइ होइस। ए हड़ताल के नगरीय निकाय के कर्मचारी के संगेसंग विश्वविद्यालय अउ स्कूल के गुरूजी मन घलो समर्थन करे हे। राज्य म आज कई ठिन जिला मन म रैली निकाले गीस।
फेडरेशन के पदाधिकारी मनके कहना हे कि कहूं सरकार ह झटकुन गोठबात नइ करही, त फेडरेशन ह अनिश्चितकालीन हड़ताल बर सोचही। फेडरेशन के प्रमुख मांग हे कि केन्द्रीय कर्मचारी मनके समान उहू मन ल महंगाई भत्ता, डीए एरियर्स के रासि ल जीपीएफ खाता म मिलाना हे अउ जम्मों कर्मचारी मन ल चार स्तरीय समयमान वेतनमान देना अउ आने-आने संवर्ग के वेतन विसंगति ल दूर करे के संगेसंग ग्यारह ठन मांग सामिल हे।
भाजपा-पत्रकारवार्ता
भारतीय जनता पार्टी के राष्ट्रीय महासचिव अरूण सिंह ह आज रईपुर के भाजपा कार्यालय म एक ठन पत्रकारवार्ता म कांग्रेस अउ टीएमसी उपर निसाना साधीन। ओमन किहीन कि संसद के सीतकालीन सत्र ल विपक्ष के नेता मन म ह चलन नइ दीन अउ विकसित भारत – जी राम जी योजना ल लेके लगातार जनता ल गुमराह करे के प्रयास करीन। श्री सिंह ह किहीन कि पहिली मनरेगा म सौ दिन के काम होवत रिहीन, फेर ए नवा योजना के तहत अब गांव वाले मन ल एक सौ पच्चीस दिन के काम मिलही।
विशेष कार्यक्रम
बछर दू हजार पच्चीस सिरिफ वैश्विक राजनीति के एक ठन साल नइ रिहीस, भलूक ए ह दुनिया के मंच म भारत के उभार के एक ठिन बिसेस दउर रिहीन। आर्थिक अनिश्चितिता, बदलत भू-राजनीतिक हालात अउ शक्ति संतुलन के बीच म प्रधानमंत्री नरेन्द्र मोदी ह एक ठन मजबूत अउ स्थिर नेतृत्व के रूप म आगू आय हे।
राज्य के जाने-माने सामाजिक, राजनीतिक विश्लेषक अउ छत्तीसगढ़ के पूर्व राज्य निर्वाचन आयुक्त डॉक्टर सुशील त्रिवेदी ह किहीन कि जम्मों वैश्विक अउ आर्थिक अनिश्तिता के बीच प्रधानमंत्री श्री मोदी ह एक ठन मजबूत नेता आगू आय हे।
सुनइया मन ल बतादन कि ए जम्मों गोठबात ल आकाशवाणी रायपुर डहार ले आज रतिहा नौ बजके पन्द्रह मिनट ले नौ बजके तीस मिनट तक प्रसारित करे जाही। ए कार्यक्रम ल छत्तीसगढ़ के जम्मों आकाशवाणी केन्द्र ह एके संघरा प्रसारित करही।
बीएससी नर्सिंग पाठ्यक्रम
चिकित्सा शिक्षा विभाग ह बीएससी नर्सिंग पाठ्यक्रम के प्रवेस नियम ल सरल करत दस परसेंट या ओखर ले जादा अंक मिलइया अभ्यर्थी मन ल घलो प्रवेस बर पात्र घोषित करे हे।
ए फइसला भारतीय उपचर्या परिषद डहार ले जारी दिसा-निर्देस के संदर्भ म ले गेहे। प्रवेस के नर्सिंग महाविद्यालय के खाली सीट ल भरे के उद्देश्य ले परिषद डहार ले पात्रता मानदंड म छूट देके मंजूरी दे गेहे। ए छूट सिरिफ चालू सैक्षणिक सत्र बर प्रभावी रिही। प्रवेस के आखिरी तारीख ल काली इकतीस दिसंबर राखे गेहे।
प्राचार्य/सहायक प्राध्यापक-निलंबित
उच्च शिक्षा विभाग ह महासमुंद जिला के लोहराकोट महाविद्यालय के प्राचार्य डॉक्टर एस.एस. तिवारी अउ पिथौरा के चार झन सहायक प्राध्यापक मन ल पीएम-उषा मद के अंतर्गत आवंटित रासि म गड़बड़ी पाय के सेती निलंबित कर देहे।
जारी आदेस के मुताबिक प्राचार्य डॉक्टर एस.एस. तिवारी अउ पिथौरा महाविद्यालय के सहायक प्राध्यापक – डॉक्टर सीमा अग्रवाल, डॉक्टर बृहस्पतु सिंह विशाल, पीठी सिंह ठाकुर अउ डॉक्टर एस.एस. दीवान ह पीएम-उषा मद के अंतर्गत जेम पोर्टल के माध्यम ले करे गे खरीदी म छत्तीसगढ़ भंडार क्रय नियम के प्रावधान के पालन नइ करीन। निलंबन अवधि के दउरान ए जम्मों झन ल मुख्यालय रईपुर म निर्धारित करे गेहे।
उहें, बलरामपुर जिला के रामचंद्रपुर तहसील म पदस्थ पटवारी विवेक शुभम वैभव ल फसल गिरदावरी काम म लापरवाही करे के आरोप म निलंबित कर दे गेहे।
विधायक पत्नी-हमला
बस्तर विधायक लखेश्वर बघेल के गोसईन उपर आज बिहनिया अनजान मनखे मन हमला कर देहे। बताय के जात हे कि उंखर दू ठन हाथ के नस ह कट गे हवय अउ गला म घलो चोट के निसान पाय गेहे। श्रीमती बघेल ल जगदलपुर के महारानी अस्पताल म भर्ती कराय गेहे, जहां उंखर हालात ल गंभीर बताय जात हे। घटना के सूचना मिलतेच पुलिस के बड़का अधिकारी मन ह मउका म पहुंच के जांच सुरू कर देहे।