प्रधानमंत्री नरेंद्र मोदी ह सबो राज्य ले सेवा क्षेत्र ल मजबूती देके भारत ल वैश्विक सेवा केंद्र बनाय बर आह्वान करे हे। नई दिल्ली म मुख्य सचिव मन के संग पांचवां राष्ट्रीय सम्मेलन ल संबोधित करत हुए श्री मोदी ह किहीन कि भारत ह जल्दी ही राष्ट्रीय विनिर्माण मिशन के शुभारंभ करइया हे। ओमन ह हरेक राज्य ले वैश्विक कंपनी ल आकर्षित करे बर बुनियादी ढांचा ल सृजित करे के आग्रह करीन।
नई दिल्ली के भारत मंडपम म चलत मुख्य सचिव मनके तीन दिन के कारीकरम ह काली खतम होइस। प्रधानमंत्री ह सरलग दू दिन तक ए कारीकरम के अध्यक्षता करीन। अपन संबोधन म काली ओमन ह भारत के जनसांख्यिकी उपलब्धि के उल्लेख करत हुए किहीन कि देस के लगभग सत्तर प्रतिसत आबादी ह कार्यसील वर्ग म हवय। एखर ले आर्थिक प्रगति बर अच्छा अवसर म उपलब्ध होय के संगेसंग विकसित भारत के निर्माण म गति मिलही।
छत्तीसगढ़ झांकी
रक्षा मंत्रालय के बिसेसज्ञ समिति ह दिल्ली म गणतंत्र दिवस म होवइया। मुख्य समारोह बर छत्तीसगढ़ के झांकी के चयन करे हे। गणतंत्र दिवस समारोह म ए दारी कर्तव्य पथ म जनजातीय वीर नायक मन ल समर्पित देस के पहिली डिजीटल संग्रहालय के झलक देखे बर मिलही। ए डिजीटल संग्रहालय के लोकार्पण प्रधानमंत्री नरेंद्र मोदी ह नवा रईपुर अटल नगर म करे रिहीन। ऐति, झांकी के चयन बर मुख्यमंत्री विष्णुदेव साय ह बधई दीन हे। ओमन ह किहीन हे कि छत्तीसगढ़ के झांकी के माध्यम ले आदिवासी समाज के देसभक्ति, अद्भुत वीरता अउ अपन सिध्दांत बर प्राण दे के परंपरा पूरा देस ल देखे बर मिलही।
मुख्यमंत्री बाल विवाह मुक्त अभियान/डिजीटल शिक्षा एमओयू
मुख्यमंत्री विष्णुदेव साय ह जशपुर जिला के दउरा के चलत कतकोन बड़का सौगात दीन हे। मुख्यमंत्री ह सरकारी स्कूल मन म डिजीटल शिक्षा ल बढ़ावा देबर जिला प्रशासना, एसईसीएल अउ ईडीसीआईएल के बीच त्रिपक्षीय समझौता ज्ञापन म हस्ताक्षर करे हे। ए परियोजना बर शासन ह पांच करोड़ रूपिया के रासि स्वीकृत करीन हे।
ऐति, श्री साय ह फरसाबहार के सामुदायिक स्वास्थ्य केंद्र परिसर ले बाल विवाह मुक्त जशपुर अभियान रथ ल हरा झंडा दिखाके रवाना करीन। ए जागरूकता रथ ह जिला के सहरी क्षेत्र के संगेसंग दूरदराज के गांव म घूमत हुए लोगन मन ल बाल विवाह के दुष्परिणाम ल लेके जागरूक करही। ए बेरा म मुख्यमंत्री ह किहीन कि बाल विवाह ल रोकना समाज के सामूहिक जिम्मेदारी हरय। ओमन ह लोगन मनले अपील करीन हे कि अगर कहू भी बाल विवाह के जानकारी मिलही, त टोल फ्री नंबर-एक-सून्य नौ-आठ म सूचना देवय।
मुख्यमंत्री-बेमेतरा
मुख्यमंत्री विष्णुदेव साय ह काली बेमेतरा जिला म होय गुरू घासीदास लोककला महोत्सव अउ राज्य स्तरीय ओपन पंथी नृत्य प्रतियोगिता म सामिल होइन। कारीकरम म मुख्यमंत्री ह नवागढ़ क्षेत्र के विकास बर एक सौ पैंसठ करोड़ चौव्वन लाख रूपिया के चवालीस ठिन विकास कार्य के लोकार्पण अउ भूमिपूजन करीन। संगेसंग ओमन ह प्रधानमंत्री आवास योजना के नौ सौ पचास हितग्राही मन ल घर के चाबी भेंट करीन। ओमन ह बेमेतरा जिला म सिंचाई परियोजना के विस्तार बर चालीस करोड़ रूपिया अउ नवागढ़ के दस ग्राम पंचायत ल सीसी रोड निर्माण बर पांच-पांच लाख रूपिया देय के घलो घोसना करीन।
मुख्यमंत्री-पोषण पुनर्वास केंद्र
मुख्यमंत्री विष्णुदेव साय ह जशपुर जिला के फरसाबहार स्थित सामुदायिक स्वास्थ्य केंद्र म होय कारीकरम के चलत फरसाबहार के संगेसंग कुनकुरी अउ मनोरा म बनाय गे पोषण पुनर्वास केंद्र के सुभारंभ करीन। ए तीनों पुर्नवास केंद्र ल दस-दस ठिक बिस्तर के सुविधा के संग सुरू करे गेहे। एखर सुभारंभ के संग अब जशपुर जिला म पोषण पुनर्वास केंद्र के संख्या छै हो गेहे। मुख्यमंत्री ह पुनर्वास केंद्र म भर्ती कुपोषित लइका मनके महतारी ले उंखर स्वास्थ्य अउ इलाज के बारे म जानकारी लीन। ओमन ह ए मउका म लइका मन बर पोषण कीट के संग खिलौना घलो बांटिन।
मुख्यमंत्री ह सीएचसी फरसाबहार म बनत श्री सत्य सांई मातृत्व शिशु चिकित्सालय के निरीक्षण करीन। एमा नान्हे लइका मन अउ गर्भवती माईलोगिन मन बर घलो आपरेसन समेत सबो जरूरी चिकित्सकीय सेवा उपलब्ध कराय जाही।
अरूण साव-पत्रकारवार्ता
नवा रईपुर म होय एक ठिन पत्रकारवार्ता म उपमुख्यमंत्री अउ नगरीय प्रशासन मंत्री अरूण साव ह पाछू दू बछर म होय नगरीय प्रशासन विभाग के कतकोन काम अउ अवइया कार्ययोजना के जानकारी दीन। श्री साव ह किहीन कि राज्य म प्रधानमंत्री आवास योजना-सहरी के दूसर चरण के चलत सबो सहर म डोर-टू-डोर सर्वेक्षण काम कराय जात हे। ए योजना के चलत कुल एक लाख बत्तीस हजार घर बनाय के लक्ष्य हवय।
ए बेरा म श्री साव ह स्वच्छ भारत मिसन सहरी, स्वच्छता सर्वेक्षण, अमृत मिसन योजना, पीएम स्व-निधि योजना, प्रधानमंत्री ई-बस सेवा योजना ल लेके घलो अपन बात रखिन।
अधिकारी कर्मचारी हड़ताल
अपन ग्यारह सूत्रीय मांग ल लेके प्रदेस के सरकारी अधिकारी, करमचारी मन ह आज ले तीन दिन बर हड़ताल म चले गेहे। पहिली दिन इंद्रावती भवन म करमचारी मनके हड़ताल के बड़का असर देखे बर मिलिस, फेर मंत्रालय म कामकाज सरलग चलत रिहीस। हालांकि छत्तीसगढ़ मंत्रालयीन करमचारी संघ ह छत्तीसगढ़ करमचारी अधिकारी फेडरेसन के ए हड़ताल के नैतिक समर्थन करीन हे। अवइया बेरा म करमचारी मनके ए हड़ताल के असर सरकारी विभाग के कामकाज म पड़ सकत हे। छत्तीसगढ़ करमचारी, अधिकारी फेडरेसन के बैनर म होवत ए हड़ताल के चलत रईपुर, दुरूग, कोरबा समेत आने जिला के करमचारी मन ह घलो आज अपन जिला मुख्यालय म धरना अउ प्रदर्सन करीन।
ईडी छापा
भारतमाला परियोजना मुआवजा घोटाला मामला म प्रवर्तन निदेशालय ईडी ह आज रईपुर अउ महासमुंद म नौ ठिक जघा म छापामार कार्रवाई करीन। जानबा के अनुसार ईडी के आने-आने टीम ह आज बिहनिया एके संघरा छापा मारिन ईडी के अधिकारी आरोपी हरमीत खनूजा समेत ओखर सहयोगी अउ संबंधित अधिकारी मनके ठिकाना म दस्तावेज के जांच करत हे। बताय जात हे कि महासमुंद म कारोबारी जसबीर सिंह बग्गा के बंसत कालोनी के घर म घलो ईडी ह छापा मारे हे।
साहित्य परिचर्चा
दिल्ली म चलत साहित्यिक परिचर्चा म ज्ञानपीठ पुरस्कार ले सम्मानित छत्तीसगढ़ के साहित्यकार विनोद कुमार शुक्ल के रचना-कर्म अउ साहित्य के क्षेत्र म ओखर योगदान ल सुरता करे गीस। ए बेरा म साहित्य उत्सव ल लेके गोठ होइस।
रईपुर म अवइया तेरह ले पच्चीस जनवरी तक होवइया साहित्य उत्सव ल लेके दिल्ली के कांस्टीट्यूसन क्लब म ए साहित्यिक परिचर्चा के आयोजन होय रिहीस, जेमा डॉक्टर सच्चिदानंद जोशी, छत्तीसगढ़ साहित्य अकादमी के अध्यक्ष शशांक शर्मा, साहित्यकार अल्का जोशी, अनिल जोशी अउ लेखक अनंत विजय ह घलो श्री शुक्ल ल सुरता करीन।
ए बेरा म रईपुर साहित्य उत्सव समिति के सदस्य अउ मुख्यमंत्री के मीडिया सलाहकार पंकज झा, रईपुर साहित्य उत्सव समिति के सदस्य संजीव सिन्हा समेत देसभर के प्रतिष्ठित साहित्यकार अउ विचारक मन सामिल होइन।
आईईडी-बरामद
बीजापुर जिला के कांडलापर्ती क्षेत्र म तालासी अभियान के बेरा सुरक्षा बल ह माओवादी मन डहार ले लुका के राखे गे माओवादी जिनिस अउ पांच किलो के एक आईईडी बरामद करे हे। ए आईईडी ल बम निरोधक दस्ता ह मउका म ही नष्ट कर दीन।
विशेष कार्यक्रम
आकाशवाणी केंद्र, रईपुर डहार ले आज रतिहा नौ बजके पंद्रह मिनट म वर्ष दू हजार पच्चीस म मोदी सरकार कोति ले करे गे कर सुधार उपर बिसेस कारीकरम के प्रसारण करे जाही। एला छत्तीसगढ़ स्थित आकाशवाणी के जम्मो केंद्र रिले करही।