प्रधानमंत्री नरेंद्र मोदी ह किहीन कि भारत ए बछर राष्ट्रीय सुरक्षा, खेल अउ विज्ञान ल लेके विश्व के सबले बड़का मंच तक हर जघा अपन मजबूत छाप छोडे़ हे। आकाशवाणी ले मन की बात कारीकरम म प्रधानमंत्री ह किहीन दू हजार पच्चीस ह हर भारतीय ल गौरावान्वित करने वाला कई क्षण दीस। श्री मोदी ह किहीन कि आपरेसन सिंदूर ए साल हर भारतीय बर गरब के प्रतीक बनगे।
श्री मोदी ह वंदे मातरम के एक सौ पचासवां वर्षगांठ उपर लोगन मनके उछाह अउ जज्बा के प्रसंसा करीन।
प्रधानमंत्री ह किहीन कि खेल बर बछर दू हजार पच्चीस स्मरणी रिहीस। श्री मोदी ह विश्व चैम्पियनशिप म कई पदक जीतइया पैरा एथलीट मनके घलो तारीफ करीन।
प्रधानमंत्री ह किहीन कि ए बछर विज्ञान समेत कई क्षेत्र म भारत ह कई ठन उपलब्धि हासिल करे हे। श्री मोदी ह किहीन कि प्रयागराज महाकुंभ ह पूरा दुनिया ल चकित कर देहे।
प्रधानमंत्री ह किहीन कि देस नवा आसा अउ नवा संकल्प के संग दू हजार छब्बीस म प्रवेस बर तियार हे। श्री मोदी ह आसा जतइन कि बछर दू हजार छब्बीस विकसित भारत के लक्ष्य पाय के दिसा म एक महत्वपूर्ण उपलब्धि साबित होही। ओमन जम्मो झन ल बछर दू हजार छब्बीस के सुभकामना दीन हे।
प्रधानमंत्री ह किहीन कि आज दुनिया बड़का आसा ले भारत कोति देखत हे अउ एखर सबले बड़ा कारण युवा सक्ति हरय। ओमन किहीन कि विज्ञान के क्षेत्र म भारत के उपलब्धि, नवाचार अउ प्रौद्योगिकी के विस्तार ह दुनिया ल बहुत प्रभावित करे हे।
प्रधानमंत्री ह बतइन कि ‘‘विकसित भारत युवा नेता संवाद‘‘ के दूसरा संस्करण जल्दी ही आयोजित करे जाही।
रेलवे-आधुनिकीकरण
भारतीय रेलवे डहार ले अवइया पांच बछर म रईपुर समेत देस के अड़तालिस परमुख सहर मन म रेलगाड़ी के संचालन क्षमता ल दुगुना करे जाही। एखर तहत मौजूदा टर्मिनल म अतिरिक्त प्लेटफार्म, सहरी क्षेत्र अउ तीर-तखार म नवा टर्मिनल के स्थापना, सिग्नलिंग, यार्ड आधुनिकीकरण, अनुभागीय क्षमता म वृध्दि अउ मेगा कोचिंग काम्प्लेक्स अउ आधुनिक रख-रखाव जइसे सुविधा के विकास करे जाही।
ए निर्णय के सुवागत करत मुख्यमंत्री विष्णुदेव साय ह किहीन कि ए छत्तीसगढ़ के करोड़ो यात्री मन बर बड़का उपहार हे अउ एखर ले राज्य के कनेक्टिविटी, व्यापार, उद्योग अउ पर्यटन गतिविधि ल नवा आयाम मिलही।
बस्तर पंडुम
बस्तर पंडुम के आयोजन अवइया दस जनवरी ले पांच फरवरी तक तीन चरण म करे जाही। एखर तहत दस ले बीस जनवरी तक जनपद स्तरीय कारीकरम, चौबीस ले तीस जनवरी तक जिला स्तरीय कारीकरम अउ एक ले पांच फरवरी तक संभाग स्तरीय कारीकरम आयोजित करे जाही। बस्तर पंडुम के तियारी ल लेके मुख्यमंत्री विष्णुदेव साय के अध्यक्षता म रईपुर म उच्च स्तरीय बइठका होइस, जेमा मुख्यमंत्री ह अधिकारी मन ल जरूरी दिसा निरदेस दीन।
बइठका म बताय गीस कि ए बछर बस्तर पंडुम म विधा मनके संख्या सात ले बढ़ाके बारह करे गेहे, जेमा बस्तर जनजातीय नृत्य, गीत, नाट्य, वाद्ययंत्र, वेशभूषा अउ आभूषण, पूजा पध्दति, सिल्प, चित्रकला, जनजातीय पेय पदार्थ, पारंपरिक व्यंजन, आंचलिक साहित्य अउ वन औषधि परमुख हरय। बइठका म बताय गीस कि बस्तर पंडुम के लोगो, थीम गीत अउ आधिकारिक वेबसाइट के विमोचन मां दंतेश्वरी के मंदिर के अंगना म मुख्यमंत्री कोति ले करे जाही। संघरा ए दारी बिसेस रूप ले भारत के आने-आने देस म कार्यरत भारतीय राजदूत मन ल नेवता दे जाय उपर भी चर्चा होइस, जेखर ले ओमन ल बस्तर के अद्वितीय सांस्कृतिक धरोहर, परंपरा अउ जनजातीय जीवन ले अवगत कराय जा सकय।
मुख्यमंत्री-तमनार घटना जांच
मुख्यमंत्री विष्णुदेव साय ह किहीन कि रायगढ़ जिला के तमनार म काली होय घटना के जांच करे जाही। ओमन किहीन कि जउन भी दोषी पाय जाही ओमन उपर कार्रवाई करे जाही।
बतादन कि तमनार ब्लॉक स्थित धौराभाठा म काली भू-अधिग्रहण अउ उत्खनन परियोजना के विरोध करे पहुंचे ग्रामीण अउ पुलिस के बीच झूमाझटकी होय रिहीस। ए दउरान ग्रामीण ह पुलिस पार्टी उपर पथरा करे रिहीस। संघरा बस समेत कई गाड़ी म तोड़फोड़ करके आगी बार दे रिहीस। पथराव म महिला थाना प्रभारी समेत कतकोन पुलिसकर्मी घायल होय हे। जिला म एक निजी उद्योग ल गारे-पेलमा सेक्टर-एक कोल ब्लॉक आवंटित करे गेहे, जेखर ग्रामीण विरोध करत हे।
आईईडी-बरामद
बीजापुर जिला के गंगालूर थाना क्षेत्र अंतर्गत एफओबी कोप्पागुड़ा ले सुरक्षा बल के टीम ह दू ठिन आईईडी बरामद करे हे। सुरक्षा बल के टीम एफओबी पीड़िया क्षेत्र म सर्चिंग अभियान बर निकले रिहीस। इही दउरान पीड़िया कैम्प ले थोर दूरी म बनत सड़क करा ले माओवादी डहार ले लगाय गे दू ठिन आईईडी बरामद करे गिस, जेला मउकच म नष्ट दे गीस।
एसआईआर-जांच दल
रईपुर ग्रामीण विधानसभा क्षेत्र अंतर्गत धरसींवा तहसील के गाजी नगर के मतदाता सूची म एसआईआर के दउरान गड़बड़ी के मामला आगू आय हे। एखर जांच बर जिला प्रशासन कोति ले तीन सदस्यीय जांच समिति के गठन करे गेहे। जांच दल म रईपुर के तहसीलदार राममूर्ति दीवान, बीरगांव नगर निगम के राजस्व उप निरीक्षक शैलेन्द्र निर्मलकर अउ महेश कुमार सोनवानी ल सामिल करे गेहे।
मुख्यमंत्री-कैलेंडर विमोचन
मुख्यमंत्री विष्णुदेव साय ह राजधानी रईपुर स्थित मुख्यमंत्री निवास कार्यालय म बछर दू हजार छब्बीस के शासकीय कैलेंडर के विमोचन करीन। राज्य सरकार बछर दू हजार छब्बीस ल ‘‘महतारी गौरव वर्ष‘‘ के रूप म मनाही। ए थीम म आधारित ए कैलेंडर सशक्त अउ समृध्द छत्तीसगढ़ के संकल्प ल अभिव्यक्त करथे। कैलेंडर के मुख्य पृष्ठ म छत्तीसगढ़ के पांच ठिन परमुख सक्तिपीठ ल प्रमुखता ले जघा दे गेहे। संघरा प्रधानमंत्री नरेंद्र मोदी अउ मुख्यमंत्री विष्णुदेव साय के छायाचित्र घलो अंकित हे। पृष्ठभूमि म सिरपुर अउ राजिम के मंदिर, आदिवासी संस्कृति, मधेश्वर पहाड़ अउ चित्रकोट जल प्रपात के आकर्षक ग्राफिकल प्रतिरूप सम्मिलित करे गेहे, जउन छत्तीसगढ़ के समृध्द सांस्कृतिक अउ प्राकृतिक धरोहर के प्रतीक हरय।
मुख्यमंत्री ह ए मउका म किहीन कि बछर दू हजार छब्बीस ल महतारी गौरव बछर के रूप म मनाय जात हे। इही भावना ल धियान म राखत तियार करे गे ए शासकीय कैलेंडर महिला सशक्तिकरण, राज्य के प्राथमिकता अउ हमर उपलब्धि के सशक्त प्रतीक हरय।
सड़क हादसा
जशपुर राष्ट्रीय राजमार्ग तिरालीस म काईकछार करा पाछू रतिहा दू ठिन भारी मालवाहक ट्रक के बीच आमने-सामने जोरदार भीडंत होगे, जेमा दूनों ट्रक चालक के मउकच म मउत होगे। पुलिस ले मिले जानकारी के मुताबिक एक ट्रक झारंखड ले कोरबा कोति जात रिहीस, उहें, दूसर ट्रक छत्तीसगढ़ ले झारखंड कोति जात रिहीस। ए दउरान दूनों के टक्कर होगे। टक्कर के बाद दूनों चालक के शव केबिन म ही फंसे रहिगे। जेला मउका म पहुंचे पुलिस अउ राहत दल म कटर मसीन के मदद ले बाहिर निकालिस। जानकारी के अनुसार हादसा के बेरा सड़क म घना कोहरा छाय रिहीस अउ तेज रफ्तार ल घलो दुर्घटना के एक बड़का कारण माने जाथे। हालांकि हादसा के वास्तविक कारण के पता जांच के बाद ही मिलही।
सायबर ठगी-आरोपी गिरफ्तार
दंतेवाड़ा पुलिस ह सायबर ठगी के मामला म दू आरोपी मन ल बिहार ले गिरफ्तार करे हे। दंतेवाड़ा के पुलिस अधीक्षक गौरव राय के निरदेस म दंतेवाड़ा, किरंदुल, गीदम अउ बचेली थाना म दरज प्रकरण के आधार म एक संयुक्त टीम बिहार रवाना करे गे रिहीस, जिहां फायनेंसियल ट्रांजेक्सन एनालिसिस अउ साइबर फॉरेंसिक टूल्स के मदद ले ए आरोपी मन ल गिरफ्तार करे गीस।
अउ अब थोरकुन समाचार सार म –
– मुख्यमंत्री विष्णुदेव साय आज बेमेतरा के नवागढ़ म लोक कला महोत्सव के तहत ओपन पंथी प्रतियोगिता अउ बाबा गुरूघासीदास जयंती समारोह म सामिल होइन। ए मउका म ओमन एक सौ पैंसठ करोड़ रूपिया के आने-आने विकास काम के भूमिपूजन अउ लोकार्पण करीन।
– मुख्यमंत्री विष्णुदेव साय ह प्रख्यात राजनेता कुशाभाऊ ठाकरे जी के पुण्यतिथि म उनला नमन करीन हे।
अउ
– बलरामपुर पुलिस ह अवैध धान बिक्री गिरोह के परदाफाश करत दू आरोपी ल गिरफ्तार करे हे। एखर करा ले बड़का मात्रा म दस्तावेज अउ नगद रासि बरामद करे गेहे।