बइठका म श्री नड्डा ह बतइन कि केंद्र सरकार, छत्तीसगढ़ ल जरूरी तकनीकी सहयोग, प्रसिक्षण अउ हैण्ड होल्डिंग प्रदान करे बर प्रतिबध्द हे, ताकि बिसेस रूप ले कुष्ठ रोग प्रबंधन ल सर्वोच्च प्राथमिकता के संग प्रभावी ढंग ले लागू करे जा सकय।
बइठका म छत्तीसगढ़ के स्वास्थ्य मंत्री श्याम बिहारी जायसवाल ह आश्वस्त करीन कि राज्य सरकार केंद्रीय स्वास्थ्य मंत्रालय के संग मिल के योजना मन के प्रभावी क्रियान्वयन कर बेहतर परिणाम सुनिश्चित करही।
नगरीय निकाय-संपत्तिकर
राज्य सरकार ह तिरपन नगरीय निकाय मन म ऑनलाइन संपत्तिकर जमा करे के सुविधा प्रदान करे हे। एखर ले लोगन मन अपन घर या कार्यस्थल ले कोनो भी समय अपन संपत्ति कर के भुगतान कर सकत हे। पहिली राज्य के केवल सात ठन नगरीय निकाय-रायपुर, दुर्ग, रिसाली, भिलाई, बिलासपुर, कोरबा अउ रायगढ़ म ही आनलाइन संपत्ति कर जमा करे के सुविधा रिहीस। बाद म तीन ठन अउ नगर निगम-बीरगांव, भिलाई-चरौदा अउ धमतरी के संगेसंग ही तिरालीस ठन नगर पालिका मन म घलो ए सुविधा के सुरूआत करे गेहे। जीआईएस आधारित प्रापर्टी टैक्स लाइव पोर्टल के जरिया अब प्रदेसभर के तिरपन नगरीय निकाय मन म आनलाइन संपत्ति कर जमा करे जा सकही।
मुख्यमंत्री विष्णुदेव साय ह किहीन कि राज्य सरकार के लक्ष्य सहरी सेवा मन ल पूरी तरह ले आनलाइन अउ नागरिक केंद्रित बनाना हरय, ताकि हरेक परिवार ल सुविधा, पारदर्सिता अउ समय के बचत तीनों के फायदा मिल सकय।
वीर बाल दिवस
मुख्यमंत्री विष्णुदेव साय काली वीर बाल दिवस के मउका म रायपुर म छत्तीसगढ़ सिविल सोसायटी डहार ले आयोजित वीरता सम्मान समारोह म सामिल होइन। ए मउका म ओमन प्रदेस के चार झन वीर साहसी बालक मन ल सम्मानित करीन। एमा साहिब फतेह सिंह वीरता पुरस्कार प्रेमचंद साहू, साहिबजादा जोरावार सिंह वीरता पुरस्कार कुमारी अंशिका साहू, साहिबजादा जुझार सिंह वीरता पुरस्कार कुमारी कांति सिंह अउ साहिबजादा अजीत सिंह वीरता पुरस्कार ओम उपाध्याय ल दे गीस।
कार्यक्रम ल संबोधित करत हुए मुख्यमंत्री ह किहीन कि साहिबजादा मनके बलिदान हमेसा लोगन मन ल प्रेरित करत रइही। ओमन किहीन कि देस के इतिहास म धम,र् आस्था अउ देस के रक्षा बर सिक्ख समुदाय के योगदान अतुलनीय हे।
उहें, मुख्यमंत्री ह राजधानी स्थित रेलवे स्टेसन गुरूद्वारा म साहिबजादा मनके सहादत ल नमन करीन अउ मत्था टेकिन। श्री साय ह किहीन कि सिक्ख समाज के मांग उपर राज्य सरकार ह साहिबजादा मनके बलिदान के गाथा ल कक्षा तीसरी के पाठ्यक्रम म सामिल करही।
जनजातीय गौरव दिवस
मुख्यमंत्री विष्णुदेव साय काली राजनांदगांव जिला के गोड़लवाही म अखिल भारतीय हल्बा-हल्बी महासभा डहार ले आयोजित भगवान बिरसामुंडा के एक सौ पचासवीं जयंती के उपलक्ष्य म आयोजित कार्यक्रम म सामिल होइन। ए मउका म श्री साय ह किहीन कि जनजातीय समाज के इतिहास केवल समृध्द नइ हे, बल्कि प्रेरणादायी घलो रेहे हे। एखर ले अन्याय के विरूध्द डट के खड़े होय अउ विकास के नवा राह बनाय के सिख मिलथे। ओमन किहीन कि पाछू दू बछर म केंद्र अउ राज्य सरकार के प्रयास ले नक्सलवाद अब आखिरी सांस गिनत हे। मार्च दू हजार छब्बीस तक देस ले नक्सलवाद खत्म हो जही।
श्री साय ह किहीन कि नक्सल प्रभावित क्षेत्र मन म नियद नेल्लानार योजना के माध्यम ले चार सौ ले जादा गांव शिक्षा, स्वास्थ्य, सड़क, बिजली, पानी अधोसंरचना अउ विकास कार्य ले जुड़त हे। ए मउका म मुख्यमंत्री ह शहीद गैंद सिंह नायक के मूर्ति के अनावरण घलो करीन।
कार्यक्रम म विधानसभा अध्यक्ष डॉक्टर रमन सिंह अउ सांसद संतोष पाण्डेय उपस्थित रिहीन।
मन की बात
प्रधानमंत्री नरेंद्र मोदी काली बिहनिया ग्यारा बजे आकाशवाणी ले ‘‘मन की बात‘‘ कार्यक्रम म अपन विचार साझा करही। ए हा मासिक रेडियो कार्यक्रम के एक सौ उनतीसवीं कड़ी होही। कार्यक्रम आकाशवाणी अउ दूरदर्शन के सबो नेटवर्क, एआईआर न्यूज वेबसाइट अउ न्यूज ऑन एआईआर मोबाइल ऐप म प्रसारित होही। आकाशवाणी समाचार, दूरदर्शन समाचार, प्रधानमंत्री कार्यालय अउ सूचना अउ प्रसारण मंत्रालय के युट्यूब मन म घलो ए कार्यक्रम सीधा प्रसारित होही। आकाशवाणी ले हिंदी प्रसारण के तुरते बाद कार्यक्रम के क्षेत्रीय भाषा मन म घलो प्रसारण होही।
जिले की चिट्ठी
आकाशवाणी रईपुर के प्रादेशिक समाचार एकांश कोति ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ स्थित आकाशवाणी के सबो केंद्र एके संग रिले करही। ए दारी के अंक म ‘‘गरियाबंद‘‘ जिला के गतिविधि के बारे म जानकारी दे जाही।
यूपीएससी-प्राक्चयन परीक्षा
राजीव युवा उत्थान योजना के तहत संघ लोक सेवा आयोग डहार ले आयोजित सिविल सेवा परीक्षा मनके तैयारी बर काली प्राक्चयन परीक्षा के आयोजन करे जाही। एखर बर राजधानी रायपुर म दू ठन परीक्षा केंद्र बनाय गेहे।
आदिमजाति विकास विभाग ह बतइन कि ए परीक्षा म एक हजार सतयासी परीक्षार्थी मनके सामिल होय के संभावना हे। राजधानी के गुढ़ियारी स्थित प्रयास कन्या आवासीय विद्यालय म तीन सौ छियासी अउ सढ्ढू स्थित प्रयास बालक आवासीय विद्यालय म सात सौ एक विद्यार्थी सामिल होही। परीक्षा मंझनिया बारह बजे ले दू बजे तक आयोजित करे जाही।
भू-अधिग्रहण-झूमाझटकी
रायगढ़ जिला के तमनार ब्लाक स्थित धौराभाठा म आज भू-अधिग्रहण अउ उत्खनन परियोजना के विरोध बर पहुंचे ग्रामीण अउ पुलिस मन के बीच झूमाझटकी होइस। ए दउरान ग्रामीण मन पुलिस पार्टी उपर पथराव करीन। उहें, बस समेत कई ठन गाड़ी मन म तोड़फोड़ कर आग लगा दीन। पथराव म महिला थाना प्रभारी समेत कई झन पुलिस कर्मी घायल होइन। गांव म तनाव के माहौल बने हुए हे। मउका म अतिरिक्त पुलिस बल भेजे गेहे।
बतादन कि जिला म एक ठन निजी उद्योग को गारे-पेलमा सेक्टर-एक कोल ब्लॉक आवंटित करे गेहे, जेखर ग्रामीण मन विरोध करत हे।
महिला सम्मेलन
मुंगेली जिला म लोरमी डिंडौरी मंडल के साल्हेघोरी म विधानसभा स्तरीय महिला सम्मेलन के आयोजन करे गीस। ए सम्मेलन म केंद्रीय राज्य मंत्री तोखन साहू अउ उपमुख्यमंत्री अरूण साव सामिल होइन।
ए मउका म केंद्रीय राज्य मंत्री ह किहीन कि केंद्र सरकार ह बेटी बचाओ, बेटी पढा़ओं जइसे अभियान चलाके बेटी मनके भविष्य ल सुरक्षित करे हे। सरस्वती साइकिल योजना के माध्यम ले छात्रा मन ल शिक्षा ले जोड़े के काम करे गेहे। ओमन किहीन कि आत्मनिर्भर भारत केवल एक योजना नोहय, बल्कि सामाजिक अउ सांस्कृतिक गर्व ले जुड़े आंदोलन हरय।
उहें, उपमुख्यमंत्री अरूण साव ह किहीन कि केंद्र सरकार के उज्जवला योजना, स्वच्छ भारत अभियान अउ लखपति दीदी योजना जइसे महिला सशक्तिकरण कार्यक्रम मन ह महिला मन म नवा उत्साह, आत्मविश्वास अउ ऊर्जा के संचार करे हे। केंद्र सरकार के योजना मन ह महिला मन ल आत्मनिर्भर अउ स्वावलंबी बनाय के दिसा म मील के पत्थर हरय।