समारोह ल संबोधित करत राष्ट्रपति ह किहीन कि ए पुरस्कार ह दूसर लइका मन ल आगू आय म प्रेरित करही। पुरस्कार पवइया लइका मन ह वीरता, कला अउ संस्कृति, पर्यावरण, नवाचार के संगेसंग विज्ञान प्रौद्योगिकी अउ आने क्षेत्र मन म बड़का योगदान देहे। राष्ट्रपति ह किहीन कि ए दिन हर साल श्री गुरू गोबिंद सिंह जी के पुत्र साहिबजादा बाबा जुरावर सिंह जी अउ बाबा फतेह सिंह जी के सहादत के सुरता म मनाय जाथे।
प्रधानमंत्री-वीर बाल दिवस
प्रधानमंत्री नरेंद्र मोदी ह किहीन हे कि देस आज साहिबजादा मन के साहस अउ बलिदान ल सुरता करत हे जउन ह देस के गौरव हरय। ओमन किहीन कि पाछू चार साल म वीर बाल दिवस ह साहिबजादा मनके प्रेरणा अउ बलिदान ल युवा पीढ़ी तक पहुंचाय हे। आज नई दिल्ली के भारत मंडपम म वीर बाल दिवस उपर राष्ट्रीय कारीकरम ल संबोधित करत प्रधानमंत्री ह ए बात किहीन।
वीर बाल दिवस म साहसी अउ हुसियार युवा मन ल एक जघा लाय बर ए मंच ल तियार करे गेहे। हर साल जउन लइका मन आने-आने क्षेत्र म देस बर कुछ कर दिखाथे ओमन ल प्रधानमंत्री राष्ट्रीय बाल पुरस्कार ले सम्मानित करे जाथे। प्रधानमंत्री ह किहीन कि माता गुजरी जी, श्री गुरू गोबिंद सिंह जी अउ चारों साहिबजादा मनके हिम्मत अउ आदर्स ह हरेक भारतीय मन ल ताकत देथे। ए मउका म प्रधानमंत्री ह राष्ट्रीय बाल पुरस्कार के बीस विजेता मन ल गोठबात करीन।
जी राम जी अधिनियम
विकसित भारत-जी राम जी अधिनियम के विसेसता ल बताय बर आज प्रदेस के कतकोन जिला के ग्राम पंचायत मन म विसेस ग्रामसभा लगाय गीस। अंबिकापुर जिला म राखे गे ग्रामसभा म बताय गीस कि मनरेगा के नवा स्वरूप विकसित भारत-जी राम जी अधिनियम ल अवइया सत्र ले सुरू करे जाही। विकसित भारत जी राम जी अधिनियम म अब अकुसल सारिरीक श्रम करे के इच्छुक परिवार मन ल एक सौ पच्चीस दिन के रोजगार मिलही। योजना म बेरोजगारी भत्ता के अधिकार घलो दे गेहे। जेखर ले काम के मांग करे उपर काम नइ मिलही, त ओला बेरोजगारी भत्ता दे जाही। ए योजना म काम ल चार परमुख श्रेणी म बांटे गेहे। जेमा जल सुरक्षा अउ जल संरक्षण, ग्रामीण अधोसंरचना ले जुड़े काम, आजीविका संवर्धन के काम, जलवायु परिवर्तन अउ प्रतिकूल मौसम ले निपटे जइसन काम ल प्राथमिकता दे जाही।
वीबी-जी राम जी के अंतर्गत ग्राम पंचायत स्तर म विकसित पंचायत के रूप-रेखा के आधार उपर कार्ययोजना ल तियार करे जाही।
मुख्य सविव-सम्मेलन
मुख्य सचिव मनके पांचवां राष्ट्रीय सम्मेलन आज नई दिल्ली म सुरू हो गेहे। प्रधानमंत्री नरेंद्र मोदी ह काली अउ ईतवार के सम्मेलन के अध्यक्षता करही। तीन दिन तक चलइया ए सम्मेलन के उद्देस्य राष्ट्रीय प्राथमिकता अउ सरलग गोठबात के माध्यम ले केंद्र-राज्य साझेदारी ल मजबूत करना हे।
प्रधानमंत्री के सहकारी संघवाद के परिकल्पना उपर आधारित ए सम्मेलन अइसन मंच के रूप म काम करथे, जिंहा केंद्र अउ राज्य मिलके काम करत हे। अवइया बेरा बर पांच ठिन क्षेत्र मन म विकास उपर जोर दे जाही, जेमा बचपन के शिक्षा, स्कूली शिक्षा, कौशल विकास, उच्च शिक्षा, खेल अउ पाठ्योत्तर गतिविधि।
सड़क सुरक्षा माह
केंद्रीय सड़क परिवहन अउ राजमार्ग मंत्रालय के निरदेस के मुताबिक प्रदेस के लोगन मन ल सड़क सुरक्षा के गंभीरता अउ चुनौती के बारे म जागरूक करे बर एक ले इकतीस जनवरी तक राष्ट्रीय सड़क सुरक्षा माह के आयोजन करे जाही। अंतर्विभागीय लीड एजेंसी सड़क सुरक्षा के अध्यक्ष संजय शर्मा ह बतइन कि राष्ट्रीय सड़क सुरक्षा माह के औपचारिक सुभारंभ प्रदेस म एक जनवरी ले करे जाही। ए दउरान लोगन मनल हेलमेट के परयोग करे, सीट बेल्ट लगाय बर जागरूक करे जाही। संगेसंग आटो अउ ई-रिक्सा चलइया मन ल सड़क यातायात ले जुड़े प्रसिक्षण दे जाही। एखर अलावा नसा लेके गाड़ी चलइया मन उपर कड़ा कार्रवाई करे जाही।
उचित मूल्य दुकान-कार्रवाई
खाद्य, नागरिक आपूर्ति अउ उपभोक्ता संरक्षण संचालनालय डहार ले उचित मूल्य दुकान मनके रोजे देखरेख बर अधिकारी मनके टीम बनाय गेहे। ए टीम डहार ले कतकोन उचित मूल्य दुकान मनके जांच करे गीस। जांच के दउरान कोनो-कोनो दुकान म गड़बड़ी पाय गीस। रईपुर के खाद्य नियंत्रक ह ई-पास आधारित वितरण म अनियमितता पाय जाय उपर दू ठिन उचित मूल्य के दुकान के संचालन ल समाप्त करे अउ ओला आने उचित मूल्य दुकान म संलग्न करे गेहे। एखर अलावा एक ठिन आने दुकान उपर सात हजार रूपिया के अर्थदंड लगाके चेतावनी दे गेहे।
खाद्य सचिव रीना बाबा साहेब कंगाले ह किहीन कि सार्वजनिक वितरण प्रणाली म राज्य के कोनो भी उचित मूल्य के दुकान म गड़बड़ी पाय जाही, त उंखर उपर कड़ा कार्रवाई करे जाही।
बातों बातों-में
प्रादेशिक समाचार एकांश के समसामयिक बिसय उपर आधारित कारीकरम ‘‘बातों-बातों-में‘‘ म ए दारी जाने माने साहित्यकार अउ ज्ञानपीठ पुरस्कार ले सम्मानित विनोद कुमार शुक्ल ले लेगे भेंटवार्ता के पुनः प्रसारण करे जाही। श्री शुक्ल के हालेच म निधन होय हे। उंखर सुरता म ए भेंटवार्ता के एक घांव फेर प्रसारण काली सत्ताईस दिसंबर के एफ.एम. अउ प्रायमरी चैनल म बिहनिया नौ बजे ले करे जाही। एला छत्तीसगढ़ स्थित आकाशवाणी के जम्मों केंद्र रिले करही।
रेलवे-किराया
रेलवे ह उपनगरीय सेवा अउ सीजन टिकट मनके किराया म कोनो बदलाव नइ करे हे। सामान्य द्वितीय श्रेणी म दू सौ पंद्रह किलोमीटर तक के यात्रा बर किराया म कोनो बढोत्तरी नइ करे गेहे। दू सौ किलोमीटर ले साढ़े सात सौ किलोमीटर तक के दूरी बर किराया म पांच रूपिया के बढ़ोत्तरी करे गेहे। एखर अलावा सात सौ इंक्यावन ले बारह सौ पचास किलोमीटर तक के दूरिहा बर दस रूपिया बारह सौ इंक्यावन ले सत्रह सौ पचास किलोमीटर के दूरी बर पंद्रह रूपिया अउ एखर ले जादा किलोमीटर बर बीस रूपिया के बढ़ोत्तरी करे गेहे।
मेल अउ एक्सप्रेस रेलगाड़ी मन म, गैर वातानुकूलित अउ वतानुकूलित श्रेणी मन म किराया म दू पइसा प्रति किलोमीटर के दर ले बढ़ोत्तरी ल तर्कसंगत बनाय गेहे।
मुख्यमंत्री माओवादी उन्मूलन
मुख्यमंत्री ह ओडिसा के कंधमाल-गंजाम सीमावर्ती वन क्षेत्र म चलाय जात संयुक्त सुरक्षा अभियान म सामिल जवान मन ल ओखर बढ़िया काम बर बधई दीन। जानबा के मुताबिक काली कंधमाल स्थित राम्पा के जंगल म होय मुठभेड़ म माओवादी संगठन के शीर्ष नेतृत्व म सामिल गणेश उइके के संगेसंग छै झिन माओवादी मारे गे रिहीस।
ओमन किहीन कि ए कार्रवाई नक्सल तंत्र के रीढ़ उपर सोज्झे प्रहार हरय। अब नक्सल हिंसा बर देस म कोनो जघा बांचे नइ हे। मुख्यमंत्री ह अभियान म सामिल जम्मो सुरक्षा बल के जवान अउ अधिकारी मनके, साहस, पराक्रम ल नमन करीन।
मुख्यमंत्री-गौ विज्ञान परीक्षा
मुख्यमंत्री विष्णुदेव साय ह आज रईपुर म छत्तीसगढ़ राज्य गौ संरक्षण अउ संवर्धन समिति डहार ले राखे गे गौ विज्ञान परीक्षा बर तियार करे गे संदर्भ गं्रथ ‘‘गाय धर्म एवं विज्ञान‘‘ के नवा संस्करण के विमोचन करीन। मुख्यमंत्री ह ग्रंथ ल गौ विज्ञान के क्षेत्र म छात्र अउ समाज बर सुघ्घर बतावत समिति के प्रयास के प्रसंसा करीन।
ए मउका म गं्रथ के संपादक सुबोध राठी ह बतइन कि पुस्तक म गौ के उपत्ति ले जुड़े पौरानिक तथ्य के संगेसंग गाय के दूध, दही, घी, गोबर अउ गौ मूत्र उपर होय कतकोन वैज्ञानिक सोध ल प्रमाण के संग लइका मनके पढ़ई बर सरल अउ व्यवस्थित रूप म बनाय गेहे।