पूर्व प्रधानमंत्री अटल बिहारी वाजेपयी के जयंती के मउका म काली मुख्यमंत्री विष्णुदेव साय ह नगरीय निकाय म नवा बने एक सौ पंद्रह अटल परिसर के वर्चुअल लोकार्पण करही। मुख्य कारीकरम राजधानी रईपुर के अटल परिसर म होही। आज पत्रकार मनले गोठबात करत उपमुख्यमंत्री अरूण साव ह किहीन कि दस नगर पालिक निगम, उनतीस नगर पालिका परिषद, छिहत्तर नगर पंचायत समेत एक सौ पंद्रह नगरीय निकाय म नवा बने अटल परिसर के लोकार्पण करे जाही। विधानसभा अध्यक्ष डॉ. रमन सिंह ए कारीकरम म माई पहुना के रूप म संघरही। श्री साव ह बतइन कि पाछू बछर भर म साठ नगरीय निकाय म अटल परिसर के लोकार्पण हो गेहे।
एलवीएम थ्री-एम सिक्स प्रक्षेपण
भारतीय अंतरिक्ष अनुसंधान संगठन-इसरो ह आज आंध्र प्रदेस के श्रीहरि कोटा ले अपन सबले भारी अंतरिक्ष यान एल वी एम थ्री-एम सिक्स ले अवइया पीढ़ी के अमरिकी संचार उपग्रह ब्लू बर्ड ब्लॉक- टू के सफल प्रक्षेपण करीन। ए प्रक्षेपण सतीश धवन अंतरिक्ष केंद्र ले भारतीय समय बिहनिया आठ बजके पंचपन मिनट म करे गीस। करीबन पंद्रह मिनट के उड़ान के बाद ब्लू बर्ड ब्लॉक- टू अंतरिक्ष यान ले अलग होगे अउ सफलता पूर्वक अपन कक्षा म स्थापित होगे। ए उपलब्धि म उपराष्ट्रपति सी.पी.राधाकृष्णन, प्रधानमंत्री नरेंद्र मोदी, गृहमंत्री अमित शाह, विज्ञान अउ प्रौद्योगिकीय मंत्री जितेन्द्र सिंह इसरो ल बधई दीन हे। प्रधानमंत्री मोदी ह सोसल मीडिया पोस्ट म किहीन कि ए भारत के अंतरिक्ष यात्रा म गौरवपूर्ण उपलब्धि हवय। ओमन किहीन कि एखर ले भारत के प्रक्षेपण क्षमता मजबूत होय हे।
जी-राम-जी योजना
केंद्रीय कृषि मंत्री शिवराज सिंह चौहान ह किहीन हे कि विकसित भारत जी-राम-जी म केंद्र सरकार के योगदान पंचानवे हजार करोड़ रूपिया होही जउन पहिली मनरेगा म छियासी हजार करोड़ रूपिया के तुलना ले जादा हे। एक अंग्रेजी दैनिक म प्रकासित लेख म श्री चौहान ह किहीन कि राष्ट्रपति ह विकसित भारत- रोजगार अउ आजीविका मिसन ग्रामीण अधिनियम दू हजार पच्चीस ल मंजूरी दे देहे। ओमन किहीन कि एमा राज्य ल विकास म भागीदार के रूप म माने जात हे जउन मन ल वैधानिक ढांचा के भीतरी अपन योजना ल अधिसूचित अउ कार्यान्वित करे के अधिकार दे गेहे।
विनोद कुमार शुक्ल-अंतिम संस्कार
जाने-माने साहित्यकार अउ ज्ञानपीठ पुरस्कार ले सम्मानित विनोद कुमार शुक्ल के आज रईपुर के मारवाड़ी मुक्तिधाम म राजकीय सम्मान के संग अंतिम संस्कार करे गीस। ए बेरा म साहित्य जगत के लोगन जनप्रतिनिधि अउ कतकोन लोगन मौजूद रिहीन। खबर के मुताबिक विनोद कुमार शुक्ल के काली अखिल भारतीय आयुर्विज्ञान संस्थान एम्स म निधन होगे रिहीस। पाछू कुछ दिन ले ओमन बीमार रिहीन हे।
एखर पहिली मुख्यमंत्री विष्णुदेव साय आज रईपुर स्थित विनोद कुमार शुक्ल जी के निवास पहुंच के ओखर अंतिम दर्सन कर श्रध्दांजलि दीन। मुख्यमंत्री ह स्वर्गीय श्री शुक्ल के पार्थिव सरीर ल कंधा देके ओमन ल अंतिम बिदाई दीन। मुख्यमंत्री ह किहीन कि साहित्यकार विनोद कुमार शुक्ल के निधन ले हिन्दी साहित्य जगत ल अपूरणीय क्षति पहुंचे हे। अंतिम संस्कार कारीकरम म देस के जाने माने कवि डॉ. कुमार विश्वास, मुख्यमंत्री के मीडिया सलाहकार पंकज झा, मुख्यमंत्री के प्रेस अधिकारी आलोक सिंह, छत्तीसगढ़ साहित्य अकादमी के अध्यक्ष शशांक शर्मा, वरिष्ठ साहित्यकार अउ जनप्रतिनिधि मौजूद रिहीन।
एखर पहिली बिलासपुर के पुलिस ग्राउंड म राखे गे राज्य युवा महोत्सव के दउरान कवि विनोद कुमार शुक्ल ल श्रध्दांजलि दे गीस। उंखर निधन के सूचना मिलतेच उपमुख्यमंत्री अउ खेल मंत्री अरूण साव ह कवि सम्मेलन कारीकरम ल स्थगित करे के घोसना करीन।
अरावली-भूपेन्द्र यादव साक्षात्कार
केंद्रीय पर्यावरण वन अउ जलवायु परिवर्तन मंत्री भूपेन्द्र यादव ह किहीन हे कि कुछेक राजनीतिक दल बिसेस रूप ले कांग्रेस अरावली पहाड़ी म सर्वोच्च न्यायालय के फइसला के संबंध म गलत सूचना बगरावत हे। ओमन किहीन कि सर्वोच्च न्यायालय के फइसला के गलत व्याख्या करत हे अउ अपन स्वार्थ ल पूरा करे खातिर एला राजनीतिक हथियार के रूप म बउरत हे। आकाशवाणी ले गोठबात म श्री यादव ह किहीन कि लोगन विपक्ष कोति ले फैलाय जात ए दुष्प्रभाव के झांसा म झन आवय।
ओमन किहीन कि सर्वोच्च न्यायालय के फइसला अरावली क्षेत्र म अवैध खनन म रोक लगाय के हे। अरावली पर्वतमाला के कार्यनीतिक महत्ता ल बतात श्री यादव ह किहीन कि ए क्षेत्र महत्वपूर्ण खनिज के एक परमुख स्त्रोत हे जउन देस के आर्थिक अउ औद्योगिक विकास बर जरूरी हे अउ मोदी सरकार एखर संरक्षण बर प्रतिबध्द हवय।
श्री यादव ह ए गोठबात आज संझा सात बजके दस मिनट म हमर कारीकरम सुर्खियों म आकाशवाणी एफएम गोल्ड चैनल सौ दसमलव एक म प्रसारित करे जाही। एखर सीधा प्रसारण हमर मोबाइल ऐप न्यूज ऑन एआईआर अउ यूट्य्ब चैनल न्यूज ऑन एआईआर ऑफिसियल म घलो होही।
बिलासपुर के बहतराई स्टेडियम म काली ले तीन दिवसीय राज्य स्तरीय युवा महोत्सव सुरू हो गेहे। एखर सुभारंभ मुख्यमंत्री विष्णुदेव साय ह करीन। ए युवा महोत्सव म प्रदेसभर ले तीन हजार ले जादा युवा भाग लेवत हे। जउन चौदह सांस्कृतिक अउ साहित्यिक विधा म अपन प्रतिभा के प्रदर्सन करत हे। लोक नृत्य, लोकगीत, वाद-विवाद, चित्रकला अउ कविता लेखन के विजेता मन ल बछर दू हजार छब्बीस म नई दिल्ली म होवइया राष्ट्रीय युवा उत्सव म छत्तीसगढ़ के अगुवई करे के मउका मिलही। ए बेरा म मुख्यमंत्री ह खेलो इंडिया ट्रायबल गेम्स छत्तीसगढ़- दू हजार छब्बीस के सुभंकर ‘‘मोर वीर‘‘ थीम सॉन्ग अउ खेलो इंडिया टार्च के अनावरण करीन। उद्घाटन समारोह म अबूझमाड़ क्षेत्र के खिलाड़ी मन ह मलख्ांभ के सुघ्घर प्रस्तुति दीन।
समारोह म बोलत मुख्यमंत्री ह खेलो इंडिया म सुघ्घर प्रदर्सन करइया खिलाड़ी मन ल प्रोत्साहन रासि देके संगेसंग मलखंभ खिलाड़ी मन ल एक लाख रूपिया दे अउ अमेरिका गॉट टैलेंट म चुने गे मलखंभ खिलाड़ी अनतई पोटाई के अमेरिका आय-जाय के खरचा राज्य सरकार कोति ले देके घोसना करीन।
ए मउका म उपमुख्यमंत्री अरूण साव ह बस्तर ओलंपिक असन सरगुजा अंचल म घलो ओलंपिक स्तरीय खेल आयोजन करे के घोसना करीन हे। कारीकरम म केंद्रीय राज्य मंत्री तोखन साहू, उपमुख्यमंत्री विजय शर्मा, संस्कृति अउ पर्यटन मंत्री राजेश अग्रवाल समेत बड़ संख्या म जनप्रतिनिधि खिलाड़ी अउ युवा मौजूद रिहीन।
राष्ट्रीय तीरंदाजी-प्रतियोगिता
राष्ट्रीय ताप विद्युत निगम लिमिटेड एनटीपीसी कोति ले राजधानी रईपुर के कोटा स्थित स्वामी विवेकानंद एथेलेटिक स्टेडियम म बाईस ले तीस दिसंबर तक जूनियर राष्ट्रीय तीरंदाजी प्रतियोगिता होवत हे। मुख्यमंत्री विष्णुदेव साय ह काली ए प्रतियोगिता के विधिवत सुभारंभ करीस। प्रतियोगिता म तीस राज्य अउ केंद्रशासित प्रदेस के करीबन पांच सौ खिलाड़ी भाग लेवत हे।
समारोह म बोलत मुख्यमंत्री ह किहीन कि छत्तीसगढ़ म खेलो इंडिया के नवा परिसर के सुरूआत करे गेहे। एखर ले खेल प्रतिभा ल सबो कीसम के जरूरी सुविधा मिलत हे। मुख्यमंत्री ह पहिली करे गे अपन घोसना ल दोहरात किहीन कि राज्य सरकार कोति ले ओलंपिक म सामिल होवइया एथेलिट मन ल इक्कीस लाख स्वर्ण पदक जीतइया मन ल तीन करोड़, रजत पदक जीतइया मन ल दू करोड़ अउ कांस्य पदक जीतइया खिलाड़ी मन ल एक करोड़ रूपिया के प्रोत्साहन रासि दे जाही।
छत्तीसगढ़-बंद
धर्मांतरण के मुद्दा म छत्तीसगढ़ सर्व समाज ह आज छत्तीसगढ़ बंद के आह्वान करीन, रईपुर समेत राज्य के आने-आने जिला म बंद के व्यापक असर देखे गीस। बंद ल छत्तीसगढ़ चेंबर ऑफ कॉमर्स ह घलो अपन समर्थन दे रिहीस, जेखर सेति अधिकतर दुकान बंद रिहीस। राजधानी रईपुर के जयस्तंभ चौक समेत परमुख रद्दा म कतकोन चेंबर पदाधिकारी मन ह दुकान ल बंद कराइन।