मुख्य निर्वाचन पदाधिकारी ह बतईन कि ड्राफ्ट मतदाता सूची ले जुड़े दावा-आपत्ति आज ले बाईस जनवरी तक ले जाही। सुनवाई अउ सत्यापन चौदह जनवरी तक करे जाही। मतदाता सूची के आखिरी प्रकासन इक्कीस फरवरी के करे जाही।
मुख्य निर्वाचन पदाधिकारी ह राज्य के लोगन मन ले अपील करे हे कि अपन नाव ड्राफ्ट सूची म देखयं। यदि कोनों सिकायत हवय, त ओमन दावा आपत्ति ल निर्धारित करे के समय के भीतर करा सकत हे। ओमन लोगन मन ले अपील करीन हे कि जिखर नाव मतदाता सूची म नइ हे, ओमन घबराय झन। मतदाता सूची म नाव जोड़े के काम आगू घलो चलत रइही।
विनोद कुमार शुक्ल-निधन
राज्य के जाने-माने साहित्यकार अउ ज्ञानपीठ पुरस्कार ले सम्मानित विनोद कुमार शुक्ल के आज रईपुर म निधन होगे। करीबन अट्ठायासी बछर के श्री शुक्ल के पाछु कुछ दिन पहिली ले अखिल भारतीय आयुर्विज्ञान संस्थान-एम्स रईपुर म इलाज चलत रिहीस हे। आज संझा करीबन पांच बजे उंखर निधन होगे।
विनोद कुमार शुक्ल ल कुछ दिन पहिली ज्ञानपीठ पुरस्कार ले सम्मानित करे गे रिहीस। उंखर उपन्यास ‘दीवार में एक खिड़की‘ खातिर ओमन ल साहित्य अकादमी पुरस्कार घलो दे गे रिहीस। उंखर कविता संग्रह ‘लगभग जयहिन्द‘ अउ उपन्यास ‘नौकर के कमीज‘ ल बहुते जादा प्रसिद्धि मिले रिहीस।
श्री शुक्ल ह पाछु पचास बछर ले साहित्य लेखन के काम म जुड़े रिहीन। इंखर किताब के कई ठिन भाषा म अनुवाद घलो करे गेहे।
मजदूर-मौत
केरल के पलक्कड़ म छत्तीसगढ़ के सक्ती जिला के एक झन मजदूर के हत्या कर दे गेहे। मिले खबर के मुताबिक करही गांव के रहवइया रामनारायण बघेल ह एक हफ्ता पहिली मजदूरी करे खातिर पलक्कड़ गे रिहीस। ए दउरान ओमन काम खोजे बर घूमत रिहीन, उही समय उहां के स्थानीय लोगन मन ह रामनारायण बघेल ल बांग्लोदेशी घुसपैठिया समझ के पीट-पीट के मार डरीन।
मुख्यमंत्री विष्णुदेव साय ह ए घटना म सोक जतावत किहीन कि कोनों भी निर्दोष मनखे के संग अइसन घटना झन करयं। मुख्यमंत्री ह पीड़ित परिवार ल पांच लाख रूपिया के सहायता रासि देके घोसना करे हे।
जी राम जी अधिनियम-ग्राम सभा
‘विकसित भारत – रोजगार अउ आजीविका गारंटी मिशन ग्रामीण – जी राम जी अधिनियम के बारे लोगन मन ल जागरूक करे खातिर राज्यभर म विशेष ग्राम सभा के कार्यक्रम राखे जाही। अनुसूचित क्षेत्र के गांव मन म चौबीस दिसंबर के राष्ट्रीय पेसा दिवस के मउका म ग्राम सभा राखे जाही। उहें, बांचे ग्राम पंचायत मन म छब्बीस दिसंबर के विशेष ग्राम सभा होही। ग्राम सभा मन म जी-राम-जी अधिनियम के प्रावधान, बाढ़े रोजगार गारंटी अउ विकसित भारत दू हजार सैंतालीस उपर गोठबात करे जाही।
पंचायत अउ ग्रामीण विकास विभाग डहार ले जारी करे गे दिसा-निरदेस के मुताबिक ग्राम सभा के दउरान ग्राम पंचायत मन म लोगन मन ल नेवता दे जाही।
महतारी गौरव वर्ष
भाजपा सरकार के दू बछर के कार्यकाल पूरा होय के बाद मुख्यमंत्री विष्णुदेव साय ह अपन कार्यकाल के तीसरइया बछर ल ‘महतारी गौरव बछर‘ के रूप म मनाय के घोसना करे हे। ओमन कहिन कि ‘महतारी गौरव बछर‘ के दउरान राज्य सरकार के जम्मों प्रमुख योजना अउ कार्यक्रम ल महतारी अउ बहिनी मन ल ध्यान म राखत करे जाही। ए बछर न सिरिफ महतारी शक्ति के सम्मान के चिन्हा रिही, भलूक उंखर सशक्तिकरण, सुरक्षा, स्वास्थ्य, स्वावलंबन अउ सामाजिक गरिमा ल नवा पहिचान दिलाय के काम करे जाही। ओमन आसा जतावत कहिन कि महतारी गौरव बछर के माध्यम ले छत्तीसगढ़ म महतारी शक्ति के अगुवई, सहभागिता अउ सम्मान के एक ठन नवा इतिहास लिखे जाही, जउन ह विकसित छत्तीसगढ़ ल अउ जादा मजबूत बनाही।
मुख्यमंत्री ह बतईन कि राज्य सरकार ह अपन कार्यकाल के पहिली बछर ल ‘विश्वास बछर‘ अउ दूसरइया बछर ल ‘अटल निर्माण बछर‘ के रूप म मनाय गेहे।
ग्राम पंचायत-आवास दिवस
प्रदेस के जम्मों ग्राम पंचायत मन म हरेक महीना के सात तारीख के ‘आवास दिवस‘ के रूप म मनाय जाही। ए बारे म पंचायत अउ ग्रामीण विकास विभाग ह दिसा-निरदेस जारी कर देहे। एखर उद्देश्य प्रधानमंत्री आवास योजना-ग्रामीण के तहत गांव क्षेत्र मन म आवास निर्माण के काम ल गति देना, हितग्राही मन ल जागरूक करना अउ निर्माण काम के दउरान अवइया समस्या ल मउका म निपटारा करना हे।
पंचायत अउ ग्रामीण विकास विभाग के प्रमुख सचिव निहारिका बारिक सिंह ह बतईन कि आवास दिवस के दिन ग्राम पंचायत मन म मंजूर करे हे भवन अउ जउन हितग्राही मनके घर ह पूरा बन गेहे, ओ जम्मों हितग्राही मनके सूची ल सार्वजनिक रूप ले बताय जाही। संगेसंग हितग्राही मन ल आवास स्वीकृति प्रमाण पत्र घलो बांटे जाही। ओमन बतईन कि आवास दिवस के मउका म पीएम जन-मन के तहत अवइया हितग्राही मनके आवास निर्माण काम ल प्राथमिकता के संग पूरा करे खातिर बिसेस गोठबात घलो करे जाही।
राष्ट्रीय किसान दिवस
राष्ट्रीय किसान दिवस ल आज छत्तीसगढ़ के संगेसंग देसभर म मनाय जात हे। ग्रामीण मुद्दा के जादा समझ अउ किसान मनके कल्याण करे खातिर अपन जिनगी ल समर्पित करइया पूर्व प्रधानमंत्री चौधरी चरण सिंह के जयंती के मउका म ए दिवस ल मनाय जाथे।
उहें, राष्ट्रीय किसान दिवस के मउका म रईपुर के इंदिरा गांधी कृषि विश्वविद्यालय म कार्यसाला के आयोजन करे गीस। ए मउका म केन्द्रीय कृषि मंत्री शिवराज सिंह चौहान ह देस के किसान मन ले वर्चुअल संबोधित करीन। ए दउरान छत्तीसगढ़ के सत्ताईस झन कृषि विज्ञान केन्द्र के किसान मन घलो वर्चुअल जुड़ीन।
सहायक अभियंता-पदोन्नति/निलंबन
राज्य सरकार ह लोक निर्माण विभाग के तेरा झन उप अभियंता मन ल सहायक अभियंता के रूप म प्रमोसन करे हे। ए जम्मों अभियंता मनके नवा पदस्थापना सूची ल अलग ले जारी करे जाही।
उहें, लोक निर्माण विभाग डहार ले भ्रष्टाचार म सामिल होय के आरोप म सुकमा के एक झन कार्यपालन अभियंता, बीजापुर अउ जगदलपुर के दू झन अनुविभागीय अधिकारी मन ल निलंबित कर दे गेहे। ए जम्मों झन के खिलाफ बीजापुर के नेलसनार-कोडोली-मिरतुर-गंगालूर रद्दा के निर्माण काम म कथित भ्रष्टाचार के आरोप म कार्रवाई करे गेहे। निलंबन के समय-सीमा म इंखर मुख्यालय ल नवा रईपुर के प्रमुख अभियंता कार्यालय म निर्धारित करे गेहे।
खरीफ विपणन वर्ष-प्रमाणित बीज
राज्य सरकार डहार ले अवइया खरीफ विपणन बछर म किसान मन ल धान अउ आने फसल के प्रमाणित बीजा देवाय के तियारी सुरू कर दे गेहे। एखर बर छत्तीसगढ़ राज्य बीज अउ कृषि विकास निगम डहार ले इकतीस ठन बीजा ल केन्द्र के माध्यम ले आने-आने फसल मन बर किसान मनके इक्कीस हजार चार सौ हेक्टेयर ले जादा रकबा म बीजा उत्पादन खातिर पंजीयन करे गेहे। सरकार ह ए बछर किसान मन ल करीबन छह लाख सैंतीस हजार कुंटल ले जादा प्रमाणित बीजा देवाय के लक्ष्य राखे हे।
मिले खबर के मुताबिक पंजीकृत बीज उत्पादक किसान मनके प्रक्षेत्र के बीज प्रमाणीकरण संस्था के सहायक बीज प्रमाणीकरण अधिकारी मन डहार ले खड़े फसल के निरीक्षण कर ले गेहे।