राष्ट्रपति ह विकसित भारत-रोजगार अउ आजीविका मिसन-ग्रामीन जी राम जी विधेयक दू हजार पच्चीस ल मंजूरी दे देहे। एखर ले हरेक वित्तीय बछर म जम्मो ग्रामीन परिवार मन ल एक सौ पच्चीस दिन के रोजगार के वैधानिक गारंटी दे जाही।
ए अधिनियम विकसित भारत दू हजार सैंतालिस के राष्ट्रीय दृष्टिकोण के मुताबिक गांव के विकास ढांचा ल मजबूत करही। ए योजना म केंद्र अउ राज्य सरकार के बीच निजी बंटवारा के अनुपात कतकोन राज्य मन बर साठ अउ चालीस प्रतिसत होही। ए योजना म कोनो कारण ले काम नइ दे जाही त बेरोजगारी भत्ता दे के घलो नियम हे। ए अधिनियम महात्मा गांधी राष्ट्रीय ग्रामीन रोजगार गारंटी अधिनियम-मनरेगा के जघा लिही।
उहें, मख्यमंत्री विष्णुदेव साय ह किहीन कि विकसित भारत-जी राम जी ग्रामीन योजना गरीब, मजूर मनके जिनगी म सम्मान अउ सुरक्षा बनाय के बेवस्था हरय। ओमन किहीन कि मजदूरी के भुगतान सोज्झे बैंक खाता म करके आर्थिक सुरक्षा ल मजबूती दे गेहे।
जनादेश परब
मुख्यमंत्री विष्णुदेव साय के अगुवई म छत्तीसगढ़ के भाजपा सरकार के दू बछर पूरा होय के मउका म आज जांजगीर म जनादेस परब राखे गीस। ए कारीकरम म मुख्य अतिथि के रूप म केंद्रीय स्वास्थ्य परिवार कल्याण मंत्री जेपी नड्डा सामिल होइन। ए मउका म मुख्यमंत्री, केंद्रीय राज्य मंत्री तोखन साहू, उपमुख्यमंत्री अरूण साव, विजय शर्मा के संगेसंग राज्य मंत्रिमंडल के कतकोन सदस्य अउ जनप्रतिनिधि मन सामिल होइन।
केंद्रीय मंत्री जेपी नड्डा ह कारीकरम ल संबोधित करत किहीन कि पाछू दू बछर के दउरान छत्तीसगढ़ ह विकास के नवा आयाम बनाय हे। ओमन किहीन कि मुख्यमंत्री विष्णुदेव साय के अगुवई म राज्य के भाजपा सरकार ह दू साल म युवा, माईलोगिन, मजूर, किसान मनके हित के संगेसंग आदिवासी मनके हित म कतकोन फइसला ले गीस। ओमन किहीन कि भाजपा सरकार ह राज्य म नक्सलवाद उपर रोक लगाय के काम करे हे। कतकोन बड़का नक्सली नेता मारे गीस अउ हालेच म करीबन ढाई हजार नक्सली मन ह आत्मसमर्पण करे हे। कारीकरम ल संबोधित करत मुख्यमंत्री ह किहीन कि राज्य म भाजपा सरकार बने के बाद हर वादा ल पूरा करे गेहे। छत्तीसगढ़ ह विकास के रद्दा म आगू बढ़त हे।
महिला आयोग-फैलोशिप
राष्ट्रीय महिला आयोग ह युवा शोध फेलोशिप कारीकरम-शक्ति फैलोशिप के सुरूआत करे हे। एमा भारत म माईलोगिन मन ले जुड़े मुद्दा उपर शोध बर युवा छात्र अउ शोधकर्ता मनले अर्जी मंगाय गे हे। कोनो भी मान्यता वाले संस्थान ले स्नातक के उपाधि पवइया इक्कीस ले तीस साल के युवा मन अर्जी कर सकथे। ए फैलोशिप के उद्देस्या माईलोगिन मनके सुरक्षा, लिंग आधारित हिंसा, कानूनी अधिकार अउ न्याय, साइबर सुरक्षा, स्वास्थ्य अउ पोषण जइसन परमुख क्षेत्र उपर शोध ल आगू लाना हे। आयोग ह बतइन कि चुने गे उम्मीदवार मन ल छै महिना के शोध अध्ययन बर एक लाख रूपिया के शोध अनुदान दे जाही। अर्जी करे के आखिरी तारीख इकतीस दिसंबर हवय।
विजय शर्मा-आरक्षक भर्ती
उपमुख्यमंत्री अउ गृहमंत्री विजय शर्मा ह रईपुर म छत्तीसगढ़ पुलिस आरक्षक भर्ती के अभ्यर्थी मन ले मिल के सोज्झे बात करीन। ए मउका म ओमन बतइन कि भर्ती के काम म पारदर्सिता बनाय बर मिले गे अंक ल लेके मांग होतेच तुरते पूरा करत जम्मो अभ्यर्थी मनके प्राप्तांक ल सार्वजनिक कर दे गीस। जम्मों अभ्यर्थी मनके परिणाम पोर्टल म घलो देगे रिहीस। युवा मन के चयन मेरिट सूची के मुताबिक करे जात हे।
गृहमंत्री ह किहीन कि शासन डहार ले जल्दीच प्रतीक्षा सूची ल स्पष्ट करे के काम करे जाही। अउ पहिली प्रतीक्षा सूची के संख्या ल बढ़ाय बर घलो मुख्यमंत्री ले सलाह ले जाही। जिंहा गड़बड़ी मिलही उंहे, तुरते कार्रवाई करे गेहे।
सांसद खेल-महोत्सव
सांसद खेल महोत्सव के तहत अंतिम चरण के प्रतियोगिता रईपुर म तेईस ले पच्चीस दिसंबर तक होही। ए प्रतियोगिता नेताजी सुभाष स्टेडियम, सप्रेशाला मैदान अउ जे.एन.पांडेय स्कूल ऑडिटोरियम म राखे गेहे। आज रईपुर म होय एक ठिन पत्रकारवार्ता म सांसद बृजमोहन अग्रवाल ह बतइन कि ए प्रतियोगिता म आठ विकासखंड मनके करीबन पच्चीस सौ खिलाड़ी मन भाग लिही। प्रतियोगिता पच्चीस दिसंबर तक चलही, जेमा तीनों दिन आने-आने कारीकरम मन म विजेता खिलाड़ी अउ खेल अधिकारी मन ल सम्मानित करे जाही।
माओवादी-विस्फोटक बरामद
सुकमा जिला के मीनागट्टा जघा के पहाड़ी क्षेत्र म सुरक्षाबल मन ह माओवादी मनके हथियार बनाय के फैक्ट्री ल नष्ट कर देहे। इंहा ले जवान मन ल बड़ मात्रा म माओवादी मनके डंप जिनिस मिले हे। एमा आठ सिंगल शॉट रायफल, बिस्फोटक जिनिस अउ नक्सली साहित्य सामिल हे।
जवान-मौत
खैरागढ़-छुईखदान-गंडई जिला के घाघरा गांव स्थित छत्तीसगढ़ सशस्त्र बल के बटालियन कैंप म पाछू रतिहा एक झिन सीएएफ जवान के गोली लगे ले मउत होगे। जानबा के मुताबिक मृतक जवान सुते रिहीन, इही दउरान एक झिन आने जवान ह उंखर मन उपर गोली चला दीन, जेखर ले मउकच म ओखर मउत होगे। मृतक जवान उत्तर प्रदेस के रहइया हरय। पुलिस ह आरोपी जवान ल गिरफ्तार कर लेहे अउ मामला के जांच करत हे।
विनोद शुक्ल-स्वास्थ्य
जाने-माने हिंदी साहित्यकार अउ ज्ञानपीठ पुरस्कार ले सम्मानित विनोद कुमार शुक्ल के स्वास्थ्य गंभीर बताय जात हे। ओमन ए बेरा रईपुर स्थित एम्स के क्रिटिकल केयर यूनिट म भर्ती हवय। एम्स डहार ले जारी स्वास्थ्य बुलेटिन के मुताबिक ए बेरा गंभीर निमोनिया बर उंखर मनके इलाज चलत हे।
पर्यटन बोर्ड-प्रतियोगिता
छत्तीसगढ़ पर्यटन बोर्ड डहार ले पाछू आठ ले इक्कीस दिसंबर तक बिसेस प्रतियोगिता मनके श्रृंखला राखे गीस। इही कड़ी म बीस दिसंबर के कवर्धा जिला के सरोधा दादर स्थित बैगा एथनिक रिसॉर्ट म छत्तीसगढ़ी, जनजातीय अउ पारंपरिक व्यंजन प्रतियोगिता के आयोजन होइस।
राज्यपाल कौशल उन्नयन शिविर
राज्यपाल रमेन डेका ह आज रईपुर म श्रवण अउ दृष्टिबाधित दिव्यांगजन मन बर राखे जाही कौशल उन्नयन सिविर ल देखिन। एखर आयोजन छत्तीसगढ़ दिव्यांगजन, वित्त अउ विकास निगम डहार ले एक समाजसेवी संस्था के संग मिल के करे गे हे। ए सिविर काली तेईस दिसंबर तक चलही। एमा देस के आने-आने राज्य ले आय एक हजार ले जादा दिव्यांगजन प्रसिक्षण लेवत हे।
अउ अब थोरकुन समाचार सार म –
– सराब घोटाला मामला म गिरफ्तार करे गे पूर्व मुख्यमंत्री भूपेश बघेल के बेटा चैतन्य बघेल के खिलाफ आज आर्थिक अपराध अन्वेषण ब्यूरो- ईओडब्ल्यू अउ एंटी करप्शन ब्यूरो-एसीबी ह रईपुर के बिसेस न्यायालय म अभियोग पत्र पेस करीन। अब ए मामला म मूल अभियोग पत्र के संगेसंग कुल आठ अभियोग पत्र न्यायालय म पेस करे जा चुके हे।
– स्वास्थ्य मंत्री श्याम बिहारी जायसवाल ह आज चिरमिरी म आधुनिक शासकीय पॉलिटेक्निक भवन के भूमिपूजन करीन।
अउ
– महिला अउ बाल विकास मंत्री लक्ष्मी राजवाड़े काली रईपुर म आंगनबाड़ी कार्यकर्ता अउ सहायिका के भर्ती बर विभाग के नवा वेबसाइट के सुभारंभ करही। विभाग डहार ले आवेदन ल लेके चयन तक के पूरा प्रक्रिया अब डिजीटल तरीका ले करे जाही।