ए मउका म उपमुख्यमंत्री ह छत्तीसगढ़ म इही पांच योजना मनके काम, उंखर प्रगति अउ भावी कार्ययोजना के जानकारी देइन। केंद्रीय आवास अउ सहरी कार्य मंत्री मनोहर लाल खट्टर ह घलो ए योजना मन ल संहरावत छत्तीसगढ़ ल हरसंभव मदद बर आस्वासन देइन हें। ‘‘मिसन अमृत- टू प्वाइंट ओ‘‘ के कारज के समीक्षा के बेरा बताय गिस कि छत्तीसगढ़ के प्रदर्सन आने राज्य मनले जादा बढ़िया हे। बइठका म केंद्रीय आवास अउ सहरी कार्य मंत्रालय के अधिकारी मन राज्य ल मिसन अमृत के अवइया किस्त के रासि ल झटकुन जारी करे के गोठ किहिन हे।
शिवराज सिंह चौहान-विधेयक
केंद्रीय कृषि मंत्री शिवराज सिंह चौहान ह किहिन हें कि सरकार ह नकली खाद अउ कीटनासक ले निपटे बर संसद के अवइया सत्र म एक ठन बिधेयक लानही। नई दिल्ली म चौधरी चरण सिंह पुरस्कार समारोह म ओमन भ्रामक टैग के संगे नकली खाद अउ कीटनासक बिक्री उपर संसो जतइन। किहीन कि- बेईमान कारोबारी मनके खिलाफ सख्त कारवाही करे जाही। कृषि मंत्री यहू किहीन कि ‘‘विकसित भारत-जी राम जी‘‘ योजना न सिरिफ किसान अउ श्रमिक मन बर लाभकारी ह भलुक गांव के बिकास ले घलो हर तरह ले जुरे हे। योजना ले मजदूर मन ल अब 125 दिन काम के कानूनी गारंटी हे अउ काम नइ त बेरोजगारी भत्ता के प्रावधान उपर घलो जोर दे गेहे, जदि मजदूरी देरी ले मिलही त उपराहा रासि देय के घलो प्रावधान हे।
जेपी नड्डा-जांजगीर
केंद्रीय स्वास्थ्य मंत्री जेपी नड्डा काली जांजगीर-चांपा जिला के दउरा म रइहीं। ए बेरा जांजगीर के पुलिस मैदान म साय सरकार के दू बछर पूरे के मउका म आयोजित ‘‘जनादेश परब‘‘ कारीकरम म सामिल होहीं अउ आमसभा ल संबोधित करहीं। ए बेरा श्री नड्डा ह आने-आने बिकास कारज के लोकार्पण अउ सिलान्यास घलो करहीं।
कारीकरम म मुख्यमंत्री विष्णुदेव साय, विधानसभा अध्यक्ष डॉ. रमन सिंह के संगे पार्टी पदाधिकारी अउ बड़का नेता सामिल होहीं। ऐति, उप-मुख्यमंत्री अरूण साव ह बतइन कि ए कारीकरम राज्य सरकार के दू बछर के उपलब्धि अउ सफलता उपर केंद्रित रइही।
पीएम आशा-राशि स्वीकृत
प्रधानमंत्री अन्नदाता आय संरक्षन अभियान-पीएम आशा के तहत छत्तीसगढ़ ल दलहन अउ तिलहन फसल के न्यूनतम समर्थन मूल्य म खरीदी के अनुमति मिल गेहे। एखर बर केंद्र सरकार ह छत्तीसगढ़ ल खरीफ सीजन म दलहन-तिलहन खरीदी बर चार सौ पच्चीस करोड़ रूपिया के स्वीकृति देय हे। एखर तहत राहेर, उरीद, मूंग, सोयाबीन, अउ मूंगफली के खरीदी करे जाही।
मुख्यमंत्री विष्णुदेव साय ह किहीन हें कि न्यूनतम समर्थन मूल्य म दलहन-तिलहन के खरीदी किसान मनके हित म बड़का फइसला हें। एखर ले किसान मन ल अपन उपज के उचित मूल्य मिलही अउ उंखर आय म घलो बढ़ोतरी होही।
बतादन कि छत्तीसगढ़ सरकार ह केंद्र सरकार ल खरीफ अउ रबी सीजन बर एक लाख बाईस हजार मीट्रिक टन दलहन-तिलहन खरीदी के प्रस्ताव भेजे रिहीस। एखर बाद केंद्र सरकार ह मांग बाढ़े म सोयाबीन अउ मूंगफली बर उपराहा स्वीकृति के घलो आस्वासन देय हे।
गृह मंत्रालय-अग्निवीर
केंद्रीय गृह मंत्रालय ह सीमा सुरक्षा बल-बीएसएफ म कांस्टेबल भर्ती बर पूर्व अग्निवीर मनके कोटा ल दस प्रतिसत ले बढ़ाके पचास प्रतिसत कर देय हे। पूर्व अग्निवीर मनके पहिली बैच ल उपरी आयु सीमा म पांच बछर के छूट मिलही। उहें, बांचे पूर्व अग्निवीर मन ल तीन बछर के छूट मिलही। अधिसूचना म कहे गेहे कि पूर्व अग्निवीर मन ल शारीरिक मानक अउ दक्षता परीक्षा ले घलो छूट दे जाही। यहू केहे गेय हे कि हर भर्ती बछर म पूर्व अग्निवीर मन बर जघा खाली रइही।
मुख्यमंत्री-छत्तीसगढ़ी फिल्मों के सफर
मुख्यमंत्री विष्णुदेव साय आज रइपुर म छत्तीसगढ़ फिल्म विकास निगम डहार ले आयोजित ‘‘छत्तीसगढ़ी फिलिम के सफर‘‘ कारीकरम म सामिल होइन। ए कारीकरम छत्तीसगढ़ राज्य स्थापना के रजत जयंती के मउका म आयोजित करे गिस। ए बेरा मुख्यमंत्री ह छत्तीसगढ़ी सिनेमा के बिकास यात्रा उपर अपन बिचार साझा करत किहिन कि छत्तीसगढ़ी सिनेमा आज नवा दउर म प्रवेस कर चुके हे। अवइया बेरा म छत्तीसगढ़ी फिलिम राष्ट्रीय अंतर्राष्ट्रीय स्तर म प्रदेस के कला संस्कृति अउ चिन्हारी ल बगराही। मुख्यमंत्री ह आस जतइन कि छालीवुड के भविष्य बड़ सुघ्घर हे अउ फिलिम उद्योग ल नवा ऊंचाई तक अमराय म सरकार ह हरसंभव सहयोग प्रदान करही।
कारीकरम म मुख्यमंत्री ह छत्तीसगढ़ी सिनेमा ले जुड़े निर्माता अउ वरिष्ठ कलाकार मन ल सम्मानित करिन।
पीआईबी-श्रम संहिता विशेष वार्ता
पत्र सूचना कार्यालय-पीआईबी के क्षेत्रीय कार्यालय डहार ले काली रइपुर म ‘‘भारत के श्रम सुधारः चार श्रम संहिता लागू‘‘ बिसय उपर एक ठन बिसेस वार्ता कारीकरम के आयोजन करे जाही। कारीकरम म विभाग के बड़का अधिकारी अउ बिसय बिसेसज्ञ भाग लिहीं, जउन श्रम संहिता के परभाव अउ भविष्य के कार्ययोजना उपर जानकारी दिहीं। ए वार्ता केंद्र सरकार डहार ले इक्कीस नवंबर के लागू करे गेय चार ठन ऐतिहासिक श्रम संहिता मनके दूरगामी परभाव, क्रियान्वयन अउ भावी कार्ययोजना उपर केंद्रित रइही।
जवान-मौत
नारायणपुर जिला के छोटेडोंगर के तिर कड़ेनार कैंप म अचानक गोली चले ले डीआरजी के जवान बलदेव सिंह हुर्रा के मउत होगिस। मिले जानकारी ले डीआरजी के टीम ह छोटेडोंगर इलाका म तालासी अभियान म निकले रिहीस हे, ओखर बाद लहुटत बेरा जवान के बंदूक ले ही अचानक गोली चलके मुड़ म लागे ले घटना होइस।
मोहला मानपुर-विवाद
मोहला-मानपुर जिला के सीतागांव म वनभूमि म बने घर मन ल टोरे बर पहुंचे राजस्व अउ वन करमचारी के संग ग्रामीन मनके झगरा होगे। एखर बाद तिर-तखार गांव के सैकड़ों लोगन सकला गिन। तनाव ल देखत इलाका म भारी पुलिस बल तैनात करे गेहे। उहें, एसडीएम, तहसीलदार अउ वन विभाग के संग पुलिस अधिकारी घलो मौजूद हें।
बतादन कि वन विभाग ह कारवाही ले पहिलिच करीबन एक दर्जन घर ल टोरे बर नोटिस जारी करे रिहिस। एखर बाद घलो कब्जा नइ हटाय म राजस्व अउ वन विभाग के टीम ह कारवाही करिस।
पल्स पोलिया अभियान
पल्स पोलियो अभियान के तहत आज राजधानी रइपुर संगे प्रदेसभर म सून्य ले पांच बछर के लइका मन ल पोलियो के खुराक दे गिस। जउन लइका आज पोलियो के दवा पिये ले छूट गिन हें, ओमन ल काली अउ परनदिन माने बाईस अउ तेईस दिसंबर के स्वास्थ्य टीम ह घर-घर जाके पोलियो के दवा पियाही।
‘‘कैरा वैन फेस्ट‘‘
छत्तीसगढ़ पर्यटन बोर्ड डहार ले काली रइपुर म ‘‘कैरा वैन फेस्ट‘‘ के आयोजन करे जाही। ए कारीकरम ‘‘अ शार्ट जर्नी इन टू द हार्ट ऑफ छत्तीसगढ‘‘़ के थीम म होही। ए कारीकरम म लोगन मन ल परकीति अउ संस्कृति के सुघ्घर संगम देखे बर मिलही।
भाकपा-शताब्दी वर्ष
भारतीय कम्युनिस्ट पार्टी के स्थापना के सौ बछर छब्बीस दिसंबर के पूरा होही। ए मउका म पार्टी ह छत्तीसगढ़ के संगे देसभर म सताब्दी बछर मनावत हे। इही कड़ी म पार्टी के डहार ले जगदलपुर म एक ठन रैली निकाले गिस, जेमा बस्तर संभाग के अलावा राष्ट्रीय स्तर के नेता अउ कार्यकर्ता सामिल होइन।