पल्स पोलियो अभियान म काली इक्कीस दिसंबर के प्रदेसभर म सून्य ले पंाच बछर के लइका मन ल पोलिया के दवई पिलाय जाही। उहें, ए अभियान म छुट गे लइका मन ल स्वास्थ्य विभाग के टीम ह बाईस अउ तेईस दिसंबर के घर-घर जाके पोलियो ड्राप पिलाही। पल्स पोलियो अभियान बर स्वास्थ्य विभाग कोति ले सबो तियारी पूरा कर ले गेहे।
प्रशासन गांव की ओर
प्रदेस म आजकल ‘‘प्रशासन गांव की ओर‘‘ थीम उपर सुशासन सप्ताह के आयोजन करे जावत हे। काली ले सुरू होय ए अभियान के समापन पच्चीस दिसंबर के होही। ए अभियान म गांव म सिविर लगाके लोगन ल सरकारी योजना मनके जानकारी दे जावत हे। संगेसंग जरूरी प्रमाण पत्र बनाय के अलावा जन सिकायत मन ल घलो सुलझाय जावत हे।
छत्तीसगढ़ शासन के सुशासन और अभिसरण विभाग के सचिव अउ मुख्यमंत्री के सचिव राहुल भगत ह आकाशवाणी समाचार ले गोठबात करत हुए बतइन कि सुशासन अभियान बर कलेक्टर मन ल जरूरी निरदेस दे गेहे। अवइया तेईस दिसंबर के जिला स्तर म कार्याशाला अउ प्रसार कारीकरम मन के आयोजन करे जाही।
वीर बाल रैली
मुख्यमंत्री विष्णुदेव साय ह आज रईपुर स्थित छत्तीसगढ़ राज्य अल्पसंख्यक आयोग कोति ले आयोजित वीर बाल रैली म सामिल होइन। ए मउका म मुख्यमंत्री ह तेलीबांधा तरिया ले रैली ल हरियर झंडा देखाके रवाना करीन। रैली म स्कूली लइका मन, स्काउट-गाइड अउ एनसीसी कैडेट्स ह भाग लीन।
अपन संबोधन म श्री साय ह किहीन कि छब्बीस दिसंबर के वीर बाल दिवस के रूप म मनाय जाथे। ए दिन गुरू गोबिंद सिंह के साहिबजादा-बाबा जोरावर सिंह अउ बाबा फतेह सिंह के अद्वितीय बलिदान ल सुरता करे जाथे। ए दुनो झन छोटकन उमर म जेन अदम्य साहस, आस्था अउ बलिदान दीन, ओहा मानुष इतिहास म अनुकरणीय हे।
कारीकरम ल कैबिनेट मंत्री खुशवंत साहेब अउ छत्तीसगढ़ राज्य अल्पसंख्यक आयोग के अध्यक्ष अमरजीत छाबड़ा ह घलो संबोधित करीन।
नवा रायपुर-तहसील प्रस्ताव
राज्य सरकार ह नवा रईपुर अटल नगर ल नवा तहसील बनाय बर प्रस्ताव जारी कर देहे। राजस्व और आपदा प्रबंधन विभाग ह छत्तीसगढ़ राजपत्र म एखर अधिसूचना प्रकासित करे हे। जारी अधिसूचना अनुसार रईपुर जिला के वर्तमान तहसील-रईपुर, मंदिरहसौद, गोबरा-नवापारा अउ अभनपुर के सीमा म परिवर्तन करके नवा रईपुर अटल नगर तहसील के गठन करे जाही। अधिसूचना के प्रकाशन के दिन ले साठ दिन तक ए प्रस्ताव उपर आपत्ति या सुझाव मंगाय गेहे। प्रस्तावित नवा तहसील म छै ठन राजस्व निरीक्षक मंडल के अंतर्गत बीस पटवारी हल्का के उनचालीस गांव ल जोडे़ जाही। एमा पलौद, मंदिरहसौद, केंद्री, तोरला, सेरीखेड़ी अउ कांदुल क्षेत्र के गांव सामिल हे।
प्रमाणीकरण-छानबीन समिति-बैठक
आदिम जाति और अनुसूचित जाति विकास विभाग के प्रमुख सचिव सोनमणि बोरा के अगुवई म उच्च स्तरीय प्रमाणीकरण छानबीन समिति के बइठका आयोजित करे गीस। बइठका म समिति ह वीडियो कॉन्फ्रेंसिंग ले आने-आने मामला के सुनवई अउ समीक्षा करीस।
विशेष कार्यक्रम
आकाशवाणी रईपुर कोति ले ‘‘विकसित भारत-रोजगार और आजीविका मिशन गारंटी- ग्रामीण‘‘ याने ‘‘जी राम जी विधेयक‘‘ उपर एक बिसेस कारीकरम के प्रसारण करे जाही। ए कारीकरम ल काली इक्कीस दिसंबर के रतिहा आठ बजे ले आठ बजके पंद्रह मिनट तक आकाशवाणी रईपुर ले सुने जा सकही। ए कारीकरम के प्रसारण छत्तीसगढ़ स्थित आकाशवाणी के सबो कंेद्र ले होही।
वन मंत्री-कूप कटाई कार्य
वन विभाग ह स्पष्ट करीस हे कि जंगल ल स्वस्थ रखे बर रूखराई मन के कटाई के काम सुरू करे गेहे। ए काम कानूनी प्रक्रिया, केंद्र अउ राज्य सरकार के दिसा निरदेस अनुसार करे जावत हे। ए काम म बस सूखा, कीरा लगे अउ क्षतिग्रस्त पेड़ मन ल हटाय जावत हे, जेखर ले जंगल के स्वस्थ विकास ल बढ़ावा मिलही अउ हरियर जंगल म बढ़ोत्तरी होही।
वन मंत्री केदार कश्यप ह बतइन कि जंगल बचाय, लकड़ी उत्पादन अउ स्थानीय लोगन ल फायदा पहुंचाय बर क्षतिग्रस्त पेड़ मनके कटाई करे जाथे। ए काम के प्रस्ताव ल केंद्र सरकार ल मंजूरी बर भेजे जाथे, अउ मंजूरी मिले के बाद ही काम सुरू होथे।
इही बीच, बीजापुर वनमंडल के वनमंडलाधिकारी रंगानाथन रामाकृष्णन वाय ह बतइन कि जिला म माओवाद ले मुक्त क्षेत्र मन म रोजगार उपलब्ध कराय बर क्षतिग्रस्त पेड़ मन के कटाई के काम फेर सुरू करे गेहे। ए अभियान म बारा हजार ले जादा रूखराई के कटाई होही। एखर ले होवइया आय के बीस परतीसत भाग वन प्रबंधन समिति के सहमति ले गांव म जरूरी सुविधा उपलब्ध कराय अउ वन संरक्षण काम म खरचा करे जाही।
राज्य स्तरीय युवा महोत्सव
बिलासपुर म अवइया तेईस ले पच्चीस दिसंबर तक राज्य स्तरीय युवा महोत्सव के आयोजन करे जाही। एमा बहतराई स्थित खेल परिसर अउ पुलिस परेड मैदान में आने-आने प्रतियोगिता होही। ए महोत्सव म पहली ले जिला स्तरीय युवा महोत्सव के विजेता प्रतिभागी अउ दल मन के अलावा अधिकारी कर्मचारी घलो सामिल होही। इंहा प्रतियोगिता म पंद्रह ले उनतीस बछर तक के युवा मन भाग लिही।
राज्य स्तरीय युवा महोत्सव के आयोजन बर मुख्य सचिव विकासशील ह मंत्रालय म अधिकारी मनके बइठका लीन अउ जरूरी निरदेस दीन। बइठका म अधिकारी मन ह बतइन कि मुख्य समारोह स्थल म राज्य के युवा मन बर आने-आने विभाग डहार ले संचालित योजना के स्टॉल घलो लगाय जाही।
ट्रेन परिचालन
दक्षिण पूर्व मध्य रेलवे के नागपुर मंडल के अंतर्गत, डोंगरगढ़ लाइन म सुधार के काम करे जाही। एखर कारण तेईस ले अट्ठाईस दिसंबर तक कुछू -कुछू ट्रेन ह रद्द रइही। एमा दुरूग-गोंदिया मेमू, गोदिंया-नेताजी सुभाषचंद्र बोस इतवारी मेमू, रईपुर-डोंगरगढ़ मेमू, गोंदिया-झारसुगुड़ा मेमू, रईपुर-नेताजी सुभाषचंद्र बोस इतवारी पैसेंजर, डोंगरगढ़-गोंदिया मेमू सामिल हे।
एखर अलावा रईपुर-डोंगरगढ़ अउ डोंगरगढ़-बेलासपुर मेमू सत्ताईस दिसंबर के दुरूग-डोंगरगढ़ के बीच रद्द रइही।
दिव्यांगजन-शिविर
मूक-बधिर अउ दृष्टिबाधित दिव्यांग लइका मन ल आत्मनिर्भर बनाय बर रईपुर म काली ले पांच दिनी मुफ्त सिविर सुरू होय हे। एखर आयोजन छत्तीसगढ़ दिव्यांगजन वित्त तथा विकास निगम कोति ले एक निजी संस्था के मदद ले करे जावत हे।
छत्तीसगढ़ दिव्यांगजन वित्त तथा विकास निगम के अध्यक्ष लोकेश कावड़िया ह बतइन कि ए सिविर म देस के आने-आने राज्य ले लगभग बारा सौ दिव्यांग लइका मन हिस्सा लिही। सिविर म प्रसिक्षक मन कोति ले रोजगार ले जुड़े काम के प्रसिक्षण दे जाही, जेखर ले दिव्यांग लइका मन आत्मनिर्भर बन सकय।
जिले की चिट्ठी
आकाशवाणी रईपुर के प्रादेशिक समाचार एकांश कोति ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पंाच मिनट ले छै बजके दस मिनट तक करे जाही। ए कारीकरम ल छत्तीसगढ़ स्थित आकाशवाणी के सबो कंेद्र एके संग रिले करही। ए दारी के अंक म ‘‘मुंगेली‘‘ जिला के गतिविधि के बारे म जानकारी दे जाही।
अउ अब थोरकुन समाचार सार म –
– बिलासपुर जिला के तोरवा थाना क्षेत्र म चारचकिया गाड़ी के चक्कर ले मोटर साइकिल सवार एक सीआरपीएफ जवान के मउत होगे। उहें, एक आने मनखे ह गंभीर रूप ले घायल हे।
– कोरबा जिला म कटघोरा थाना क्षेत्र के तानाखार म कार अउ डीजल टैंकर के बीच होय टक्कर म कार सवार मनखे के मउका म ही मउत होगे अउ चार झन घायल हे।
अउ
– धमतरी जिला के दुगली थाना क्षेत्र म आज तेजी ले चलत कार ह एक ठन मोटर साइकिल ल अपन चपेट म ले लीस। ए हादसा म मोटर साइकिल सवार के मउत होगे। उहें, दू झन घायल हे।