संसद के शीतकालीन सत्र विकसित भारत- जी राम जी समेत कई ठिन महत्वपूर्ण विधेयक के पारित होय के संग आज सिरागे। ए सत्र एक दिसंबर ले सुरू होय रिहीस। राज्यसभा के सभापति सी.पी.राधाकृष्णन ह समापन भाषण म किहीन कि सदन करीबन बियानवे घंटा चलिस अउ एक सौ इक्कीस प्रतिसत कामकाज होइस। श्री राधाकृष्णन ह किहीन कि सत्र के दउरान उनसठ निजी विधेयक पेस करे गीस।
उहें, संसदीय मामला के मंत्री किरेन रिजिजू ह किहीन कि संसद के सीतकालीन सत्र म पारित होय विधेयक करोड़ो लोगन मन के जिंदगी बेहतर करे अउ भारत ल एक विकसित देस बनाय म महत्वपूर्ण भूमिका निभाही। मीडिया ले चर्चा करत श्री रिजिजू ह बतइन कि ए पहिली घांव रिहीस, जब चुनाव सुधार उपर अलग से चर्चा होइस।
जी राम जी विधेयक
संसद ह विपक्ष के विरोध के बीच विकसित भारत-रोजगार और आजीविका मिशन गारंटी ग्रामीण-जी राम जी विधेयक ध्वनिमत ले पारित कर देहे। राज्यसभा ह काली रतिहा एला मंजूरी दीस। लोकसभा एला पहिली ही पारित कर चुके हे। विधेयक के प्रावधान के अनुसार हर वित्तीय बछर म हरेक ग्रामीण परिवार ल एक सौ पच्चीस दिन के रोजगार मिलही।
राज्यसभा म विधेयक उपर चर्चा के उत्तर देवत केंद्रीय ग्रामीण विकास मंत्री शिवराज सिंह चौहान ह किहीन कि सरकार राष्ट्र प्रथम के विचार के संग काम करत हे। ओमन किहीन कि गांव के विकास के बिना देस के विकास नइ हो सकय।
सरकार ए विधेयक के माध्यम ले बछर दू हजार सैंतालिस म विकसित भारत के राष्ट्रीय परिकल्पना के अनुरूप ग्रामीण विकास ढांचा तियार करना चाहत हे।
एसआईआर-सूची
भारत निर्वाचन आयोग के निरदेस के अनुसार प्रदेस म मतदाता सूची के विशेष गहन पुनरीक्षण के तहत गणना प्रपत्र भरे के काम पूरा होय के बाद अब मतदाता सूची के प्रकाशन तेईस दिसंबर के करे जाही। ए जानकारी राज्य के मुख्य निर्वाचन पदाधिकारी यशवंत कुमार ह दीन हे। ओमन बतइन कि नवा मतदाता सूची म अगर कोनो मनखे के नांव कट जाथे, त ओमन अपन नांव सम्मिलित कराय बर घोसना पत्र के संग फारम छै म आवेदन कर सकही।
मुख्य निर्वाचन पदाधिकारी ह बतइन कि तेईस दिसंबर के जारी होवइया मतदाता सूची जम्मो राजनीतिक दल के प्रतिनिधि मन ल दे जाही। संघरा कोनो भी मनखे अपन नांव निर्वाचन आयोग के वेबसाइट म घलो देख सकत हे अउ सूची म नाव म कोनो तरह के गलती होय म ओला सुधरवा सकत हे।
प्रधानमंत्री-सम्मान
मुख्यमंत्री विष्णुदेव साय ह किहीन कि प्रधानमंत्री नरेंद्र मोदी ल ओमान के सर्वोच्च नागरिक सम्मान ‘‘द फर्स्ट क्लास ऑफ द ऑर्डर ऑफ ओमान‘‘ ले अलंकृत करे जाना भारत बर अत्यंत गरब के बात हे। ओमन किहीन कि ए सम्मान प्रधानमंत्री के दूरदर्सी नेतृत्व, वैश्विक प्रभाव अउ भारत के बाढ़त अंतर्राष्ट्रीय प्रतिष्ठा के सशक्त प्रमाण हरय। सम्मान बर प्रधानमंत्री ल सुभकामना देवत मुख्यमंत्री ह किहीन कि श्री मोदी के अगुवई म भारत आज आत्मनिर्भर, निर्णायक अउ प्रभावशाली राष्ट्र के रूप म वैश्विक मंच म नवा दिसा देवत हे।
बातों बातों-में
प्रादेशिक समाचार एकांश के समसामयिक बिसय उपर आधारित कारीकरम ‘‘बातों-बातों-में‘‘ म ए दारी सिकल सेल बीमारी उपर केंद्रित रइही। ए संबंध म यूनिसेफ के स्वास्थ्य विसेसज्ञ डॉ. गजेन्द्र संग ले लेगे बिसेस भेंटवार्ता के प्रसारण काली बीस दिसंबर के एफ.एम. अउ प्रायमरी चैनल म बिहनिया नौ बजे ले करे जाही। एला छत्तीसगढ़ स्थित आकाशवाणी के जम्मों केंद्र रिले करही।
माओवादी मुठभेड़
बीजापुर जिला म आज सुरक्षा बल मन संग होय मुठभेड़ म पांच लाख रूपिया के एक इनामी माओवादी मारे गेहे। मउका ले माओवादी के शव के संग हथियार घलो बरामद करे गेहे। मारे गे माओवादी के सिनाख्त फगनू माड़वी के रूप म होय हे।
जिला के पुलिस अधीक्षक डॉ. जितेन्द्र यादव ह बतइन कि इंद्रावती थाना क्षेत्र के अंतर्गत आदवाड़ा-कोटमेटा के जंगल म माओवादी मनके सकलाय के जानकारी मिले के बाद सुरक्षाबल के संयुक्त दल मउका बर रवाना करे गीस, जिंहा माओवादी मन संग मुठभेड़ होइस। सुरक्षा बल ह घटना स्थल ले थ्री नॉट थ्री रायफल, नौ एमएम पिस्टल अउ बिस्फोटक के संग माओवादी जिनिस बरामद करे हे।
मुख्यमंत्री घासीदास जयंती
बाबा गुरू घासीदास जी के दू सौ उनहत्तरवां जयंती समारोह के मउका म मुख्यमंत्री विष्णुदेव साय काली रईपुर, दुरूग अउ मुंगेली जिला म राखे गे कारीकरम म सामिल होइन अउ गुरू घासीदास ल सुरता करीन। ए मउका म मुख्यमंत्री ह किहीन कि बाबा गुरू घासीदास जी ह मनखे-मनखे एक समान के अमर संदेस देके पूरा मानव जाति ल सामाजिक समरस्ता, समानता अउ भाईचारा के रद्दा दिखाइन हे। उंखर विचार आज भी समाज ल जोड़े अउ भेदभाव रहित बेवस्था के प्रेरणा देथे।
रईपुर म राखे गे कारीकरम ल संबोधित करत मुख्यमंत्री ह पेंशन बाड़ा स्थित शासकीय पोस्ट मैट्रिक अनुसूचित जाति अउ अनुसूचित जनजाति छात्रावास के क्षमता बढ़ाक तीन सौ सीटर करे जाय के घोसना करीन।
उहें, भिलाई के सेक्टर छै स्थित सतनाम भवन म राखे गे कारीकरम म मुख्यमंत्री ह सतनाम भवन म डोम निर्माण बर पचास लाख रूपिया अउ बाबा गुरू घासीदास जयंती कारीकरम के आयोजन बर हर साल दास लाख रूपिया देके घोसना करीन।
अइसने मुख्यमंत्री मुंगेली जिला के लालपुर म राखे गे कारीकरम म घलो सामिल होइन। ए मउका म श्री साय ह लालपुर म नवीन महाविद्यालय के स्थापना, कारीकरम स्थल म प्रवेस द्वार निर्माण अउ सतनाम भवन के जीणौध्दार के अलावा मेला अउ कारीकरम आयोजन बर रासि स्वीकृत करे के घोसना करीन।
ए जम्मो कारीकरम म मुख्यमंत्री के संग कौशल विकास मंत्री गुरू खुशवंत साहेब घलो मौजूद रिहीन।
सौम्या चौरसिया-ईडी
सराब घोटाला मामला म गिरफ्तार पूर्व मुख्यमंत्री भूपेश बघेल के उप सचिव सौम्या चौरसिया ल प्रवर्तन निदेशालय-ईडी के चौदह दिन के रिमांड म भेज दे गेहे। ईडी ह सौम्या चौरसिया ल दू दिन पहिली धन, शोधन निवारन अधिनियम के प्रावधान के तहत गिरफ्तार करे रिहीस। एखर बाद चौरसिया ल आज रईपुर के बिसेस न्यायालय म पेस करे गीस।
ईडी ह सराब घोटाला के मामला म कुछेक आरोपी मनके बयान के आधार म सौम्या चौरसिया ल गिरफ्तार करे हे। ईडी ल जांच ले ए पता चलिस की सराबा घोटाला ले राज्य के खजाना ल बड़का नुकसान होय हे अउ सराब सिंडीकेट बनाके ढाई हजार करोड़ रूपिया ले जादा के अनियमितता करे गीस। जांच ले यहू पता चले हे कि सौम्या चौरसिया ल लगभग एक सौ पंद्रह करोड़ रूपिया के रासि दे गेहे अउ ओहा सराब सिंडीकेट के एक सक्रिय सदस्य रिहीस।
बतादन कि सौम्या चौरसिया ल कोल लेवी घोटाला के मामला म बछर दू हजार बाईस म गिरफ्तार करे गे रिहीस। ए मामला म ओहा करीबन ढाई साल तक जेल म रिहिस अउ करीबन छै महिन पहिली सुप्रीम कोर्ट ले जमानत मिले रिहीस।
कॉमन फैसिलिटी सेंटर
प्रदेस म इलेक्ट्रानिक्स अउ आईटी विनिर्माण ल नवा गति देके परयास करे जात हे। एखर तहत केंद्रीय इलेक्ट्रानिक्स अउ सूचना प्रौद्योगिकीय मंत्रालय ह नवा रईपुर म प्रस्तावित कॉमन फैसिलिटी सेंटर परियोजना बर साढ़े बाईस करोड़ रूपिया के रासि पहला किस्त के रूप म जारी करे के मंजूरी देहे। ए रासि मोडिफाई इलेक्ट्रानिक्स मैन्युफैक्चरिंग क्लस्टर्स योजना के तहत दे गेहे। उहें, ए परियोजना के मूल्यांकन अउ निगरानी के जिम्मेदारी सॉफ्टवेयर टेक्नोलॉजी पार्क्स ऑफ इंडिया ल सौंपे गेहे।
ए कॉमन फैसिलिटी के सेंटर के माध्यम ले उद्योग ल साझा अधोसंरचना, तकनीकी सुविधा, परीक्षण अउ नवाचार ले जुड़े सेवा उपलब्ध कराय जाही, जेखर ले निवेस ल बढ़ावा मिलही अउ स्थानीय युवा मन बर रोजगार के नवा अवसर खुलही।
मुख्यमंत्री विष्णुदेव साय ह केंद्र सरकार के ए निर्णय ल छत्तीसगढ़ म औद्योगिक विकास अउ तकनीकी आत्मनिर्भरता के दिसा म मील का पत्थर बताय हे।