लोकसभा ह ‘‘विकसित भारत – रोजगार और आजीविका गारंटी मिशन-ग्रामीण‘‘ यानी ‘‘जी राम जी‘ विधेयक पारित कर देहे। ए विधेयक के उद्देश्य विकसित भारत दू हजार सैंतालीस के लक्ष्य कोति बाढ़त हुए गांव मनके पूरा विकास करना हे। नवा विधेयक म मजदूर मन ल हर बछर एक सौ पच्चीस दिन के रोजगार मिलही।
केन्द्रीय ग्रामीण विकास मंत्री शिवराज सिंह चौहान ह आज विधेयक उपर चर्चा के जवाब देवत हुए किहीन कि प्रधानमंत्री नरेन्द्र मोदी के अगुवई म मनरेगा योजना ल सुघ्घर अउ प्रभावी परकार ले लागू करे गेहे। ओमन बतईन कि ए विधेयक के तहत साठ प्रतिसत पइसा मजदूरी बर अउ चालीस प्रतिसत पइसा सामान बर निर्धारित करे गेहे।
विधानसभा-स्थगित
छत्तीसगढ़ विधानसभा के सीतकालीन सत्र काली संपन्न होगे। नवा रईपुर म अटल नगर स्थित विधानसभा के नवा भवन म ए पहिली सत्र रिहीस। चौदा ले सत्रा दिसंबर तक चले ए सत्र म कुल पांठ ठन बइठका होइस।
सत्र के आखिरी दिन विधानसभा अध्यक्ष डॉक्टर रमन सिंह ह अपन उद्बोधन म किहीन कि छत्तीसगढ़ विधानसभा के इतिहास म छठवां विधानसभा के ए सातवां सत्र ल जरूर सुरता करे जाही। ओमन बतईन कि सत्र के दउरान छत्तीसगढ़ के रजत जयंती बछर म राज्य के भविष्य उपर केन्द्रित ‘‘अंजोर छत्तीसगढ़-विजन दू हजार सैंतालीस‘‘ उपर गोठबात होइस, पैंतीस हजार करोड़ रूपिया के पहिली अनुपूरक बजट ह पारित होइस अउ सत्र के आखिरी दिन राष्ट्रीय गीत वंदे मात्रम उपर घलो चर्चा होइस।
विधानसभा अध्यक्ष ह बतईन कि सीतकालीन सत्र म छह सौ अट्ठाईस प्रश्न मिले रिहीस, जेमा तीन सौ तैंतीस तारांकित अउ दू सौ पंचानवे अतारांकित रिहीस। डॉक्टर सिंह ह बतईन कि ध्यानाकर्षण के कुल दू सौ बत्तीस सूचना मन ले सत्तर ल स्वीकार करे गीस। विपक्ष कोति ले स्थगन प्रस्ताव के एक सौ एक सूचना दे गे रिहीस।
माओवादी मुठभेड़
सुकमा जिला म आज सुरक्षा बल मन संग होय मुठभेड़ म तीन माओवादी मारे गेहे। तीनों माओवादी मनके सव बरामद कर ले गेहे।
पुलिस के मुताबिक किस्टाराम थाना क्षेत्र म माओवादी मनके मौजूदगी के खुफिया सूचना मिले म डिस्ट्रिक्ट रिजर्व गार्ड-डीआरजी के टीम तलाशी अभियान म निकले रिहीन। इही दउराज आज बिहनिया सिंगनमरागु इलाका म सुरक्षा बल अउ माओवादी मनके बीच मुठभेड़ होइस। अब तक घटनास्थल ले तीन झिन माओवादी मनके सव बरामद करे गेहे। मिले जानकारी के अनुसार इलाका म अभी तक दूनों कोति ले रूक-रूक के फायरिंग होवत हे। मुठभेड़ म मारे गे माओवादी मनके संख्या बाढ़ सकत हे।
गुरू घासीदास जयंती
सतनाम पंथ के प्रवर्तक बाबा गुरू घासीदास के आज जयंती हवय। ए मउका म प्रदेसभर म आने-आने कार्यक्रम आयोजित करे जावत हे।
मुख्यमंत्री विष्णुदेव साय ह मुंगेली जिला के सेतगंगा गांव म स्थित सेतगंगा धाम म राखे गे गुरू घासीदास जयंती कार्यक्रम म सामिल होइन। ए मउका म मुख्यमंत्री ह सामुदायिक भवन बनाय अउ राम-जानकी मंदिर के सौंदर्यीकरण बर पचास-पचास लाख रूपिया अउ जयंती कार्यक्रम के आयोजन बर दस लाख रूपिया देके घोसना करीन। एखरे संगेसंग श्री साय ह क्षेत्र म सिंचाई सुविधा बर बांध बनाय के आश्वासन घलो दीन।
राज्यपाल रमेन डेका ह लोकभवन म गुरू घासीदास के फोटू उपर फूल-माला चढ़ईन। श्री डेका ह किहीन कि बाबा गुरू घासीदास ह मानव समाज ल परेम अउ सद्भावना के संदेस दीन अउ समाज म रहे भेदभाव ल दूर करके समाज म एकरूपता स्थापित करे उपर जोर दीन। ओमन किहीन कि ‘‘मनखे-मनखे एक समान‘‘ के संदेस देवइया बाबा गुरू घासीदास के विचार आज म घलो प्रासंगिक हे अउ समाज ल एकता के रद्दा देखावत हे।
मेगा स्वास्थ्य शिविर
बाबा गुरू घासीदास के जयंती के मउका म रईपुर के आयुर्वेदिक कॉलेज म आज ले पांच दिनी मुफ्त मेगा स्वास्थ्य सिविर के सुरूआत होगे हे। बाईस दिसंबर तक चलइया ए सिविर के सुभारंभ मुख्यमंत्री विष्णुदेव साय ह करीन। ए मउका श्री साय ह कहिन कि ए सिविर ह लोगन बर वरदान साबित होही। ओमन किहीन कि राज्य सरकार कोति ले ‘‘मुख्यमंत्री विशेष स्वास्थ्य सहायता योजना‘‘ म बड़का बीमारी मनके इलाज बर पच्चीस लाख रूपिया तक के मदद दे जावत हे।
कार्यक्रम ल विधानसभा अध्यक्ष डॉक्टर रमन सिंह, स्वास्थ्य मंत्री श्यामबिहारी जायसवाल, विधायक राजेश मूणत अउ किरण सिंहदेव ह घलो संबोधित करीन।
मिलेनियर फार्मर ऑफ इंडिया अवॉर्ड
औषधीय अउ सुंगधित पौधा मनके खेती-किसानी के क्षेत्र म करे गे सुघ्घर काम बर छत्तीसगढ़ के तीन ठन जिला – धमतरी, मुंगेली अउ गौरेला-पेण्ड्रा-मरवाही ल ‘‘मिलेनियर फार्मर ऑफ इंडिया अवॉर्ड‘‘ ले सम्मानित करे गेहे। कृषि जागरण संस्था अउ भारतीय कृषि अनुसंधान परिषद के संघरा तत्वाधान म सात ले नौ दिसंबर तक नई दिल्ली म राखे गे कार्यक्रम म केन्द्रीय गृह राज्यमंत्री अजय मिश्रा ह ए जिला मन ल पुरस्कार दीन।
ए उपलब्धि म वन मंत्री केदार कश्यप ह तीनों जिला ल बधाई दीन हे। ओमन किहीन कि औषधीय अउ सुगंधित पौधा के खेती ले आदिवासी अंचल म रोजगार अउ आय के नवा अवसर पैदा होवत हे। ए उपलब्धि राज्य के किसान अउ महिला समूह बर प्रेरणास्त्रोत हरय।
बिज़नेस एक्सेलरेटर प्रोग्राम
भारतीय प्रबंधन संस्थान यानी आईआईएम रईपुर ह ‘‘बिजनेस एक्सेलरेटर कार्यक्रम‘‘ के सुरूआत करे हे। ए कार्यक्रम नवा व्यापारी, स्टार्टअप संस्थापक अउ नवा-नवा प्रयोग करइया मन ल अपन काम-धंधा ल आगू ले जाय बर एक सशक्त मंच दीहीं। ए कार्यक्रम के अंतर्गत प्रतिभागी मन ल उद्योग विशेषज्ञ, अनुभवी मेंटर अउ आईआईएम रईपुर के सदस्य मन ले जरूरी मदद मिलही। संगेसंग बिज़नेस मॉडल डेवलपमेंट, फाइनेंस, मार्केटिंग, स्केल-अप रणनीति अउ निवेस के तियारी जइसन बिसय उपर प्रसिक्षण दे जाही। भाग लेके इच्छुक उम्मीदवार ह कार्यक्रम ले जुडे़ जानकारी अउ आवेदन बर आईआईएम रईपुर के आधिकारिक वेबसाइट ल देख सकत हे।
जवान-आत्महत्या
नारायणपुर जिला म सीमा सुरक्षा बल-बीएसएफ के एक झन जवान ह आत्महत्या कर लेहे। ए जवान सोनपुर थाना क्षेत्र के अंतर्गत होरादी कैंप म पदस्थ रिहीस। मृतक जवान मूल रूप ले उत्तरप्रदेश के निवासी हरय। नारायणपुर जिला के पुलिस अधीक्षक रॉबिन्सन गुड़िया ह एखर पुष्टि करत बतईन कि आत्महत्या के कारण के अभी पता नइ चल पाय हे। पुलिस ह मामला के जांच करत हे।
दुर्घटना
बस्तर जिला म आज होय दू अलग-अलग सड़क दुर्घटना म दू लोगन के मउत होगे। उहें, करीब आधा दर्जन मनखे घायल हे।
मिले जानकारी अनुसार आज बिहनिया तीरथ यात्री मन ल ले जावत एक बस ह तारागांव के तीर अनते-तनते होके पेड़ ले टकरा गीस। ए हादसा म एक यात्री के मउत होगे अउ छह झन घायल होगे। घायल मनके इलाज भानपुरी अउ जगदलपुर के अस्पताल म चलत हे।
उहें, जगदलपुर के आड़ावाल गांव के तीर होय एक दूसर दुर्घटना म ट्रक ह दुचकिया सवार युवक ल ठोकर मार दीस, जेखर ले ओखर मउका म ही मउत होगे।
अउ अब थोरकुन समाचार सार म –
– दुरूग जिला म ‘‘प्रशासन गांव की ओर‘‘ अभियान के तहत काली उन्नीस ले पच्चीस दिसंबर तक जनसमस्या निवारण शिविर मनके आयोजन करे जाही।
– कोरबा जिला के कटघोरा वनमंडल के बिंझरा गांव म हाथी के हमला ले एक माईलोगिन के मउत होगे। एखर ले पहिली इही वनमंडल के लीमपानी गांव म घलो हाथी के हमला म एक माईलोगिन मउत होय रिहीस।
– श्रीरामलला दर्शन योजना म आज राजनांदगांव रेलवे स्टेसन ले साढ़े आठ सौ तीर्थयात्री मन अयोध्याधाम बर रवाना होइस।
अउ
– मुंगेली के डॉक्टर श्यामा प्रसाद मुखर्जी स्टेडियम म काली जिला स्तरीय युवा उत्सव के आयोजन करे जाही। एमा लोकनृत्य अउ लोकगीत के संगेसंग वाद-विवाद, कहानी लेखन समेत आने-आने प्रतियोगिता होही।