प्रधानमंत्री नरेन्द्र मोदी ल इथियोपिया के सर्वोच्च नागरिक सम्मान ‘‘ग्रेट ऑनर निशान ऑफ इथियोपिया ले सम्मानित करे गेहे। ए पुरस्कार श्री मोदी ल भारत इथियोपिया साझेदारी ल मजबूत करे म उंखर असाधारण योगदान अउ एक वैश्विक राजनेता के रूप म उंखर अगुवई बर इथियोपिया के राजधानी अदीस अबाबा म राखे गे एक विशेष समारोह म दे गीस। प्रधानमंत्री ह ए पुरस्कार दूनों देस के ओ लोगन ल समर्पित करीन, जउन मन बहुत समय ले द्विपक्षीय संबंध ल पोषित करीन हे।
छत्तीसगढ़ के मुख्यमंत्री विष्णुदेव साय ह प्रधानमंत्री ल ग्रेट ऑनर निशान ऑफ इथियोपिया ले सम्मानित करे जाय म बधाई अउ सुभकामना दीन हे। श्री साय ह एला भारत बर ऐतिहासिक अउ गौरवशाली पल बतईन हे।
विधानसभा वंदे मातरम्
छत्तीसगढ़ विधानसभा के शीतकालीन सत्र के चौथा दिन आज वंदे मात्रम म चर्चा चलत हे। गोठबात के सुरूआत करत विधानसभा अध्यक्ष डॉक्टर रमन सिंह ह किहीन कि वंदे मात्रम सिर्फ गीत नो हे, भलूक स्वतंत्रता आंदोलन के ऊर्जा हरय। डॉक्टर सिंह किहीन कि आज के दिन विधानसभा बर मउका हे कि हम सबो इकट्ठा होके नवा भारत बनाय म अपन योगदान देवन।
चर्चा म भाग लेवत नेता प्रतिपक्ष डॉक्टर चरणदास महंत ह किहीन कि हम इतिहास ल झन बिगाड़न। अवइया पीढ़ी ल कहूं हमन गलत रद्दा बता देबो त ए ह सही नइ होही।
उहें, मुख्यमंत्री ह विष्णुदेव साय ह किहीन कि जउन समाज इतिहास ले समझ नइ लेवय, ओखर भविष्य बर्बाद हो जथे। ओमन किहीन कि वंदे मात्रम चेतना अउ सार्वजनिक रूप ले जोड़थे। राष्ट्रगीत वंदे मात्रम के एक सौ पचासवीं जयंती म विशेष गोठबात खातिर धन्यवाद देवत मुख्यमंत्री ह किहीन कि गौरवगाथा के बखान करना हरेक देसवासी बर महत्वपूर्ण हरय। ओमन संसद म ए बिसय उपर चर्चा कराय बर प्रधानमंत्री नरेन्द्र मोदी के आभार जतईन।
विधानसभा-संशोधन विधेयक
शीतकालीन सत्र के चौथ दिन आज सदन म तीन संशोधन विधेयक पारित करे गीस। एमा छत्तीसगढ़ दुकान अउ प्रतिष्ठान संशोधन विधेयक, छत्तीसगढ़ जन विश्वास संशोधन विधेयक अउ छत्तीसगढ़ निजी विश्वविद्यालय संशोधन विधेयक सामिल हे। ए तीनों विधेयक म होय चर्चा म कांग्रेस विधेयक मन ह भाग नइ लीन।
विधानसभा-केन्द्रीय एजेंसी
राज्य विधानसभा म आज मुख्य विपक्षी दल ह केन्द्रीय एजेंसी के कथित दुरूपयोग के मामला के मुद्दा म गोठबात कराय के मांग ल लेके स्थगन प्रस्ताव लईन। पूर्व मुख्यमंत्री भूपेश बघेल ह किहीन कि केन्द्रीय जांच एजेंसी छत्तीसगढ़ म पड़यंत्र के संग कार्रवाई करत हे। विपक्ष ल बदनाम करे के परयास करे जात हे।
भाजपा विधायक अजय चंद्राकर ह आपत्ति जतात किहीन कि एमा चर्चा नइ हो सकय। एखर बाद सत्ता पक्ष अउ विपक्ष सदस्य मनके बीच चलत बहस के दउरान विधानसभा अध्यक्ष ह स्थगन प्रस्ताव ल अग्राह्य कर दीन। स्थगन प्रस्ताव अग्राह्य करे के बाद विपक्षी सदस्य मन ह गर्भगृह म पहुंच के नाराबाजी करीन। विधानसभा के नियम के मुताबिक गर्भगृह म पहुंच कांग्रेस के सबो विधायक खुदे निलंबित होगे।
विस-अनुपूरक बजट पारित
राज्य विधानसभा म छत्तीसगढ़ सरकार कोति ले पेस करे गे पैंतीस हजार करोड़ रूपिया के प्रथम अनुपूरक बजट काली सर्वसम्मति ले पारित होगे। ए अनुपूरक बजट ल मिलाके राज्य सरकार के चालू वित्तीय बछर के कुल बजट दू लाख करोड़ रूपिया के होगे हे।
काली सदन म अनुपूरक बजट म होय गोठबात के दउरान मुख्यमंत्री विष्णुदेव साय ह किहीन कि राज्य सरकार के छत्तीसगढ़ अंजोर विजन डॉक्टयूमेंट-दू हजार सैंतालीस ल साकार करे के दिसा म ए बजट एक मजबूत अउ निर्णायक कदम हवय, जउन छत्तीसगढ़ ल विकास, विश्वास अउ समृद्धि के रद्दा म आगू ले जाही।
आरटीई नियम बदलाव
स्कूल सिक्षा विभाग ह सिक्षा के अधिकार अधिनियम-आरटीई के तहत प्राईवेट स्कूल म लइका मनके प्रवेस ल लेके नियम म फेरबदल करे हे। अब अवइया सिक्षा सत्र ले प्रदेसभर के प्राईवेट स्कूल म आरटीई के तहत कक्षा पहली ले लइका मनके भर्ती होही। पहिली आरटीई के तहत प्राईवेट स्कूल मन म लइका मनके भर्ती नर्सरी अउ केजी-वन ले होवत रिहीस हे। अब नर्सरी ले प्रवेश नइ दे जाही।
खबर के मुताबिक आरटीई के तहत लइका मनके पढ़ई के खरचा राज्य सरकार कोति ले दे जात हे।
माओवादी-आत्मसमर्पण
नारायणपुर जिला म आज ग्यारह झिन माओवादी मन ह आत्मसमर्पण करे हे। एमा पांच महिला माओवादी सामिल हे। ए सबो उपर कुल सैंतीस लाख रूपिया के इनाम घोषित रिहीस। आत्मसमर्पण करइया माओवादी मन ल राज्य सरकार के पुनर्वास नीति म पचास-पचास रूपिया के प्रोत्साहन रासि के चेक दे गीस।
अग्निवीर भर्ती-प्रवेश पत्र
भारतीय सेना ह अग्निवीर भर्ती प्रक्रिया म ऑनलाइन सामान्य प्रवेश परीक्षा म पास होय उम्मीदवार मनके प्रवेश पत्र जारी कर देहे। संगेसंग उम्मीदवार मन ल ई-मेल आईडी म प्रवेश पत्र भेजे गेहे। अभ्यर्थी मन प्रवेश पत्र ‘‘डब्ल्यू डब्ल्यू डब्ल्यू डॉट ज्वाइन इंडियन आर्मी डॉट एनआईसी डॉट इन‘‘ म देख सकत हे।
सेना भर्ती कार्यालय रायपुर कोति ले छत्तीसगढ़ के सबो तैंतीस जिला के पुरूष उम्मीदवार मन बर अग्निवीर भर्ती रैली के आयोजन दस ले चौबीस जनवरी तक धमतरी जिला इंडोर स्टेडियम म करे जाही। ए रैली ले पात्र उम्मीदवार मन ल चुने जाही।
कैग-रिपोर्ट
भारत के नियंत्रक अउ महालेखा परीक्षक-कैग ह काली राज्य विधानसभा म रिपोर्ट पेस करीन। कैग ह अपन रिपोर्ट म सार्वजनिक क्षेत्र के उपक्रम के वित्तीय स्थिति, कारर्पोरेट गवर्नेंस मानक अउ परियोजना क्रियान्वयन क्षमता म संसो जतईन। संगेसंग राज्य म स्मार्ट सिटी मिशन के परियोजना ल चलाय म होवत अबेर, कमजोर निगरानी व्यवस्था अउ धन रासि के सही किसम ले नइ बउरे ल घलो चिन्हारी करे गेहे। कैग ह राज्य सरकार ले सिफारिश करे हे कि घाटा म चलत अउ निष्क्रिय उपक्रम के कार्यप्रणाली के समीक्षा करय।
पुलिस आरक्षक-परिणाम
उपमुख्यमंत्री अउ गृह मंत्री विजय शर्मा ह कहिन हे कि छत्तीसगढ़ पुलिस आरक्षक भर्ती प्रक्रिया पारदर्सी अउ विश्वसनीय तरीका ले संपादित करे गेहे। ओमन कहिन कि अभ्यर्थी मनके अंक सार्वजनिक कर दे गेहे। कोनांें भी अभ्यर्थी वेबसाइट म जाके एखर अवलोकन कर सकथे। विभाग ह एखर रिजल्ट जाने पर क्यूआर कोर्ड जारी करे हे, जेखर मदद ले अभ्यर्थी अपन रिजल्ट देख सकत हे। पुलिस विभाग के एडीजी प्रशासन एस.आर.पी. कल्लूरी ह बतईन कि कहूं कोनों अभ्यर्थी ल भर्ती प्रक्रिया के बारे सिकायत हे, त ओमन सबूत के संग उन्नीस या बीस दिसंबर के पुलिस मुख्यालय म सीधा ओमन ल भेंट कर सकत हे।
एखर संगेसंग उपमुख्यमंत्री विजय शर्मा ह घलो कहिन कि कहूं कोनांे उम्मीदवार ल भर्ती प्रक्रिया के बारे म कोनों समस्या या सिकायत हे, त ओमन उंखर रायपुर स्थित निवास कार्यालय म इक्कीस दिसंबर के बिहनिया दस बजे ले संझा छह बजे तक भेंट कर सकत हे।
कहूं कोनों अभ्यर्थी रायपुर आय म असमर्थ हवय, त ओमन ह संबंधित जिला के पुलिस अधीक्षक कार्यालय के माध्यम ले घलो उंखर ले संपर्क कर सकत हे।
खबर के मुताबिक राज्य म पुलिस आरक्षक भर्ती बर पांच हजार नौ सौ ले जादा पद बर करीबन सात लाख अरजी मिले रिहीस। ए भर्ती परीक्षा के परिणाम नौ दिसंबर के घोषित करे गेहे।
हाईकोर्ट-जंगली जानवर
छत्तीसगढ़ उच्च न्यायालय ह प्रदेस म जंगली जनावर के संदिग्ध मउत अउ अवैध सिकार के आसंका ले जुड़े मामला ल गंभीरता ले लेहे। मुख्य न्यायाधीश रमेश सिन्हा अउ न्यायाधीश विभूदत्त गुरू के डिवीजन बेंच ह स्वतः संज्ञान लेवत ए मामला के सुनवाई जनहित याचिका के रूप म करीन। कोर्ट ह राज्य के प्रधान मुख्य वन संरक्षक ल व्यक्तिगत हलफनामा दाखिल करे के निरदेस दीन हे। संगेसंग स्पष्ट करे हे कि प्रदेस म वन्यजीव के सुरक्षा ल लेके कोनों भी किसम के कोताही बर्दास्त नइ करे जाही। ए मामला के अवइया सुनवाई अब उन्नीस दिसंबर के होही।
घासीदास जयंती
सतनाम पंथ के प्रवर्तक बाबा गुरू घासीदास जी के काली जयंती हरय। ए बेरा म सतनामी समाज कोति ले राजधानी रईपुर समेत प्रदेसभर म कतकोन कार्यक्रम राखे गेहे।
घासीदास जयंती म समाज के लोगन मन ह मंगलवार के रईपुर म एक सोभा यात्रा निकालीन। ए सोभायात्रा म रईपुर के संगेसंग बिलासपुर, राजनांदगांव, महासमुंद अउ जगदलपुर के अखाड़ा दल ह अपन प्रस्तुति दीन। रईपुर के आमापारा चउक ले निकले ए यात्रा गुरू घासीदास चउक म सिरईस, जिहां सबले बने पांच ठिन झांकी ल सम्मानित करे गीस।