भारतीय जनता पार्टी के संसदीय बोर्ड ह वरिष्ठ नेता अउ पार्टी के छत्तीसगढ़ प्रभारी नितिन नबीन ल भाजपा के राष्ट्रीय कार्यकारी अध्यक्ष नियुक्त करे हे। ओमन ह अभी बिहार सरकार के मंत्री हें। भाजपा के राष्ट्रीय महासचिव अरूण िंसंह ह एखर जुरे पत्र जारी करे हे।
विधानसभा-शीतकालीन सत्र
छत्तीसगढ़ विधानसभा के सीतकालीन सत्र आज ले सुरू हो गेहे। नवा रइपुर म अटल नगर म बने विधानसभा के नवा भवन म ए पहिली सत्र हे।
शीतकालीन सत्र के बेरा उन्नीस दिसंबर तक बढ़ा दे गेहे। पहिली, एहा सत्रह दिसंबर के खतम होवइया रिहीस हे, अब बाढ़े बेरा के दउरान सदन म वंदे मातरम उपर चर्चा करे जाही।
सत्र के पहिली दिन वित्त मंत्री ओ.पी. चौधरी ह ‘‘छत्तीसगढ़ अंजोर विजन डाक्यूमेंट दू हजार सैंतालिस‘‘ प्रस्तुत करिन। एखर उपर चर्चा म भाग लेवत भाजपा सदस्य अजय चंद्राकर ह अंजोर विजन के लक्ष्य उपर कतकोन सवाल उठाइन। ओमन किहीन कि ए विजन डाक्यूमेंट म गरीबी उन्मूलन, लॉ एंड आर्डर, समाज कल्याण अउ महिला सशक्तिकरण ल स्पष्ट नइ करे गेहे।
अंजारे विजन उपर चर्चा म भाजपा के धरमलाल कौशिक, भावना बोहरा, सुनील सोनी, राजेश मूणत, धरमजीत सिंह, लता उसेंडी अउ भाजपा के आने विधायक घलो हिस्सा लिन। सदन म चर्चा अभी घलो चलत हे। आज अंजोर विजन उपर चर्चा म राज्य के मुख्य विपक्षी दल कांग्रेस के सदस्य मन हिस्सा नइ लिन। पाछू मीडिया ले गोठबात करत वन मंत्री केदार कश्यप ह किहीन कि ‘‘अंजोर विजन‘‘ के चर्चा म विपक्ष के सामिल नइ होना दुर्भाग्यपूर्ण हे।
भूमि-वर्ग मीटर दर
राज्य सरकार ह भूमि मूल्यांकन प्रक्रिया ल सरल बनाय बर सहरी अउ ग्रामीण इलाका के बीच लागू वर्ग मीटर दर ल खतम कर देहे। अब ग्रामीण अउ आधा सहरी इलाका म भूमि मूल्यांकन सिरिफ हेक्टेयर दर के आधार म करे जाही। पहिली, ग्रामीण इलाका म पांच सौ वर्ग मीटर तक के भूमि मूल्यांकन वर्ग मीटर दर ले अउ ओखर ले जादा भूमि के हेक्टेयर दर ले मूल्यांकन करे जावत रिहिस। अब ए दुविधा ल दूरियावत सरकार ह ग्रामीण भूमि बर एक्के बरोबर हेक्टेयर आधारित मूल्यांकन बेवस्था ल लागू करे हे।
मुख्यमंत्री-डबरी निर्माण शुभारंभ
मुख्यमंत्री विष्णुदेव साय ह आज विधानसभा के अपन कार्यालय कक्ष म मनरेगा के तहत दस हजार आजीविका डबरी निरमान कारज के सुभारंभ करिन। ए डबरी मन ल अवइया बछर के मई महीना तक पूरा करे के लक्ष्य राखे गेहे। ए मउका म श्री साय ह किहीन कि मनरेगा के तहत प्रधानमंत्री आवास योजना- ग्रामीन के लाभार्थी मनके निजी भूमि म डबरी निरमान करे जाही। एखर ले न सिरिफ रोजगार भलुक किसान अउ ग्रामीन परिवार के आय घलो बाढ़ही।
ऐति, मुख्यमंत्री ह राज्य सरकार के दू बछर पूरे के मउका म कॉफी टेबल बुक के अनावरन करिन। जेमा राज्य म ग्रामीन आवास योजना के प्रगति, नवाचार अउ उपलब्धि मन ल बताय गेहे।
तुंहर टोकन ऐप
राज्य सरकार ह किसान मन के सुबिधा ल चेत म राखत ‘‘तुंहर टोकन ऐप‘‘ म पंजीयन के बेरा ल बढ़ाके चौबीस घंटा कर देहे। अब किसान मन अवइया बीस दिन तक बर टोकन ले सकत हें। उहें, दू एकड़ अउ ओखर ले कमती रकबा वाले किसान मन अब इकतीस जनवरी तक ‘‘तुंहर टोकन ऐप‘‘ ले टोकन ले सकहीं।
ऐति, मुख्यमंत्री विष्णुदेव साय ह किहीन हें कि राज्य सरकार ह किसान मन के हित म हरसंभव कदम उठाय बर प्रतिबद्ध हे। अब किसान मन बिना कोनो दबाव के अपन सुविधा अनुसार टोकन ले सकहीं।
परीक्षा पे चर्चा
प्रधानमंत्री नरेंद्र मोदी के ‘‘परीक्षा पे चर्चा‘‘ कारीकरम के नौवां संस्करण अवइया नवा बछर म आयोजित करे जाही। केंद्रीय शिक्षा मंत्रालय ह बतइस कि ए कारीकरम म प्रधानमंत्री ह देस-बिदेस के पढ़इया लइका, गुरूजी अउ पालक मनले गोठबात करके परीक्षा ले जुड़े तनाव, अनुभव अउ सकारात्मक तियारी उपर चर्चा करथें। कारीकरम बर पंजीयन के प्रक्रिया सुरू हो चुके हे अउ एखर आखिरी तारीख ग्यारा जनवरी निर्धारित हे। एक कारीकरम म कक्षा छठवीं ले बाहरवीं तक के लइका, गुरूजी अउ पालक मन भाग ले सकत हें। एखर बर ओमन ल ग्यारा जनवरी तक अपन प्रश्न ‘‘इनोवेटिव इंडिया वन डॉट माई जीओवी डॉट इन म अपलोड करे बर परही। उहें, पंजीयन के बाद प्रतिभागी मन अपन परमान पत्र डाउनलोड कर सकत हें।
वित्त मंत्री-विद्यालय भवन
वित्त मंत्री ओ.पी. चौधरी ह रायगढ़ जिला के रेंगालपाली गांव म एक करोड़ इक्काईस लाख रूपिया ले जादा के लागत के शासकीय उच्चतर माध्यमिक विद्यालय भवन के लोकार्पण करीन। ए दउरान ओमन स्मार्ट क्लास अउ परयोगशाला के निरीक्षन करत पढ़इया लइका मन के ‘‘विज्ञान मॉडल‘‘ प्रदर्सनी ल गजब संहराइन। ए मउका म वित्त मंत्री ह लइका मनले किहिन कि मेहनत, अनुशासन अउ लक्ष्य निर्धारन के संग पढ़ई करव।
बतादन कि ए स्कूल भवन म नौ ठन कक्षा, स्मार्ट क्लास, दू ठन आधुनिक परयोगशाला अउ लाइब्रेरी जइसन सुविधा हे।
स्वास्थ्य मंत्री-सम्मेलन
स्वास्थ्य मंत्री श्याम बिहारी जायसवाल ह रइपुर के पंडित जवाहरलाल नेहरू चिकित्सा महाविद्यालय म आयोजित इंडियन रेडियोलॉजिकल एंड इमेजिंग एसोशिएसन के छत्तीसगढ़ इकाई के पंद्रहवां राज्य स्तरीय वार्षिक सम्मेलन के सुभारंभ करिन। ए सम्मेलन म देसभर ले एक सौ पचास ले जादा रेडियोलॉजिस्ट भाग लेवत हें।
एक मउका म स्वास्थ्य मंत्री ह किहीन कि एआई आधारित तकनीक ले रेडियोलॉजिस्ट बिसेसज्ञ मनके कमती वाला इलाका म जांच के गुणवत्ता म सुधार होही अउ रिर्पोटिंग म घलो तेजी आही। ए दउरान स्वास्थ्य मंत्री ह रेडियोलॉजिस्ट मनले अपील करिन कि तकनीकी नवाचार ल अपनावत एआई के जरिया ले स्वास्थ्य सुबिधा ल जादा परभावी बनाय बर कारज करव।
पर्यटन बोर्ड-सिरपुर/बारनवापारा
छत्तीसगढ़ राज्य स्थापना के रजत जयंती बछर के मउका म छत्तीसगढ़ पर्यटन बोर्ड के डहार ले प्रदेस म आठ ले इक्काईस दिसंबर तक पर्यटन गतिविधि के आयोजन करे जावत हे। इही कड़ी म सिरपुर म संगोष्ठी अउ शोधपत्र प्रतियोगिता आयोजित करे गिस। ए मउका म ‘‘छत्तीसगढ़ म पर्यटन के बाढ़त संभावना‘‘ बिसय उपर गोठबात करे गिस।
उहें, बलौदाबाजार जिला के बारनवापारा म सोसल मीडिया ले जुड़े बिसेस लोगन मन बर कार्यसाला के आयोजन करे गिस। ए दउरान प्रतिभागी मन हरेली, इको रिसॉर्ट अउ बारनवापारा अभयारण्य के तिर-तखार के सुघ्घर जघा मनके निरीक्षण करके कंटेंट तियार करे के रूपरेखा बनाइन। ए कारीकरम के उद्देस्य छत्तीसगढ़ के प्राकृतिक सुंदरता, वन्यजीव, संस्कृति अउ पर्यटन ल डिजिटल प्लेटफार्म के जरिया ले राष्ट्रीय अउ अंतर्राष्ट्रीय स्तर म प्रचारित करना रिहिस।
राष्ट्रीय लोक अदालत
प्रदेस के सबो जिला अउ व्यवहार न्यायालय म काली राष्ट्रीय लोक अदालत के आयोजन करे गिस। ए दउरान दस लाख नौ हजार ले जादा प्रकरन मन के राजीनामा ले निराकरन करे गिस। लोक अदालत म पारिवारिक, दांडिक, सिविल, राजस्व, पेंसन, जन उपायोगी सेवा ले जुरे मामला के संगेसंग आने-आने प्रकरन के घलो सुनवाई होइस। बतादन कि लोक अदालत के जरिया ले पक्षकार मन ल तिरसठ करोड़ सैंतालिस लाख रूपिया ले जादा के रासि मिलिस। ए आयोजन ‘‘न्याय तुंहर द्वार‘‘ योजना के अंतर्गत करे गिस।
अउ अब थोरकुन समाचार सार म –
– जांजगीर-चांपा जिला म नकटीडीह के तिर एक ठन ऑटो पलट गिस। हादसा म एक मनखे के मउत अउ पांच लोगन मन घायल होगिन।
– भिलाई इस्पात संयंत्र म अढ़ई बछर पहिली होय दुर्घटना म मजदूर के मउत के मामला म भट्ठी थाना पुलिस ह बीएसपी के दू अधिकारी अउ ठेकेदार ल गिरफ्तार कर लेहे।
– बलरामपुर जिला के चौकी-डवरा म राजस्व अभिलेख म छेड़छाड़ करके धान बेचे के सेति पुलिस ह पटवारी संग दू आरोपी ल गिरफ्तार कर लिस।
अउ
– कवर्धा जिला के चिल्फी म खाद्य विभाग ह धान के अवैध परिवहन करत तीन ठन टरक ले नौ सौ साठ कुंटल धान जब्त करे हे।