केंद्रीय गृहमंत्री अमित शाह ह आज छत्तीसगढ़ के जगदलपुर म बस्तर ओलंपिक के समापन समारोह ल संबोधित करत हुए किहीन हे कि अवइया बछर म जब बस्तर ओलंपिक होही, तब छत्तीसगढ़ के बस्तर संभाग के संगेसंग पूरा देस ह नक्सल मुक्त हो चुके होही। ओमन किहीन कि सरकार ह ए संकल्प घलो लीस हे कि अवइया पांच बछर म बस्तर संभाग ल देस के सबले विकसित आदिवासी संभाग बनाय जाही। एखर सबो सात जिला म रहइया लोगन ल घर, बिजली, पानी, शिक्षा अउ स्वास्थ्य जइसन जरूरी सुविधा उपलब्ध कराय जाही।
श्री शाह ह किहीन कि नक्सलवाद ह बस्तर के विकास म सबले बडे़ अडंगा रिहीस, अब बस्तर ह डर नइ फेर भविष्य के पर्याय बन चुके हे। ओमन एक पइत फेर बोलिन कि मार्च दू हजार छब्बीस तक पूरा देस ल नक्सली समस्या ले मुक्ति देवा दे जाही। अभी भी जेन हथियारबंद नक्सली मन बांचे हे ओमन ले केंद्रीय गृहमंत्री ह हथियार छोड़के आत्मसमर्पण करे के अपील करीन हें।
ए मउका म छत्तीसगढ़ के मुख्यमंत्री विष्णुदेव साय, विधानसभा अध्यक्ष डॉ. रमन सिंह, उपमुख्यमंत्री अरूण साव अउ विजय शर्मा के संगेसंग अंतर्राष्ट्रीय फुटबाल खिलाड़ी बाईचुंग भूटिया घलो जुरे रिहीन।
छत्तीसगढ़ म होय ए बस्तर ओलंपिक म बस्तर संभाग के सातो जिला के करीब तीन हजार पांच सौ खिलाड़ी मन भाग लीन, जेमा आत्मसमर्पित नक्सली अउ नक्सल हिंसा ले पीड़ित खिलाड़ी मन घलो सामिल रिहीन।
माओवादी-आत्मसमर्पण
गरियाबंद जिला म आज दस लाख रूपिया के दू इनामी माओवादी मन आत्मसमर्पण करीन हे। एमा एक महिला माअेवादी घलो सामिल हे। मिले जानकारी अनुसार प्रतिबंधित संगठन सीपीआई माओवादी के डीजीएन डिवीजन म सक्रिय माओवादी संतोष उर्फ लालपवन अउ मंजू उर्फ नंदे ह गरियाबंद पुलिस के आगू आत्मसमर्पण करीन हे। दूनों माओवादी सीनापाली एरिया कमेटी म सक्रिय रिहीन।
मुख्यमंत्री-पत्रकारवार्ता
छत्तीसगढ़ के भाजपा सरकार के दू बछर पूरा हो गेहे। ए मउका म मुख्यमंत्री विष्णुदेव साय ह जनता के आभार जतात हुए किहीन हे कि पाछू दू बछर ह शासन के नइ फेर सेवा, समर्पण अउ जन सहभागिता के बछर रेहे हे। मुख्यमंत्री ह सोसल मीडिया उपर लिखिन की ए दू बछर म राज्य सरकार ह छत्तीसगढ़ के सबो कोना म विकास के उजियारा पहुंचाय के परयास करे हे। ओमन किहीन कि जनता के आस्था ही सरकार के सबले बड़का सक्ति अउ छत्तीसगढ़ के सुघ्घर भविष्य के सच्चा गारंटी हे।
एखर ले पहिली, काली मुख्यमंत्री ह रईपुर म प्रसेवार्ता म अपन सरकार के दू बछर के कार्यकाल के रिपोर्ट कार्ड पेस करीन। ओमन किहीन कि सरकार बने के दूसरइया ही दिन अट्ठारा लाख जरूरतमंद परिवार ल प्रधानमंत्री आवास पास करे गीस। किसनहा मन ले इकतीस सौ रूपिया प्रति कुंटल के दर अउ इक्कीस कुंटल प्रति एकड़ के मान ले धान बिसाय जावत हे। मुख्यमंत्री ह किहीन कि महतारी वंदन योजना म लगभग सत्तर लाख माईलोगिन ल हर महिना एक हजार रूपिया के सहायता दे जावत हे। अब तक बाईस किस्त म चौदह हजार तीन सौ छै करोड़ रूपिया ले जादा के पइसा जारी करे जा चुके हे।
धान खरीदी-तुंहर टोकन ऐप
किसनहा मन ल समर्थन मूल्य म धान बेचे बर अब तुंहर टोकन ऐप चौबीस घंटा उपलब्ध रइही। मोबाइल ऐप ले टोकन कांटे बर अब कोनो निश्चित समय सीमा के बंधन नइ रहय। किसान मन तेरह जनवरी ले अवइया बीस दिन तक टोकन ले सकत हे। एखर ले किसान मन ल धान बेचे के योजना बनाय अउ टोकन ले म परयाप्त समय मिलही। उहें, दू एकड़ अउ दू एकड़ ले कम रकबा वाले किसान ह इकतीस जनवरी ले तुंहर टोकन ऐप ले टोकन ले सकही।
विधानसभा-शीकालीन सत्र
छत्तीसगढ़ विधानसभा के सीतकालीन सत्र काली चौदह दिसंबर ईतवार ले सुरू होही। ए दारी ए सत्र ह विधानसभा के नवा भवन म आयोजित करे जाही। नवा रईपुर म बने नवा विधानसभा भवन म होवइया ए पहिली सत्र होही। एखर पहिली दिन राज्य सरकार के दीर्घकालीन विकास रणनीति ‘‘छत्तीसगढ़ विजन दू हजार सैंतालीस‘‘ उपर गोठबात होही। सत्रह दिसंबर तक चलइया ए सत्र के दउरान चार बइठहा होही। एमा चालू वित्तीय बछर बर प्रथम अनुपूरक अनुमान पेस करे जाही। एखर अलावा छत्तीसगढ़ दुकान और स्थापना संशोधन विधेयक ल घलो ए सत्र के दउरान पेस करे जाही।
छत्तीसगढ़ राज्य बने के बाद पहिली विधानसभा के पहिली बइठका चौदह दिसंबर बछर दू हजार म राजकुमार कॉलेज के जशपुर हॉल म होय रिहीस। एखरे सेति विधानसभा के नवा भवन म पहिली सत्र चौदह दिसंबर ईतवार ले आयोजित करे जावत हे।
उपमुख्यमंत्री अरूण साव ह मीडिया ले गोठबात करत हुए किहीन कि छत्तीसगढ़ के संसदीय इतिहास म ए पहिली पइत होही, कि ईतवार ले सत्र के सुरूआत होही।
इही बीच, प्रमुख विपक्षी दल कांग्रेस ह सत्र के पहिली दिन विधानसभा म नइ जुरे के निरनय लिये हे। नेता प्रतिपक्ष चरणदास महंत ह बतइन कि काली सदन म बस ‘‘छत्तीसगढ़ विजन दू हजार सैंतालीस‘‘ उपर गोठबात प्रस्तावित हे। ए दिन कोनो सवाल नइ पूछे जाही अउ ध्यानाकर्षण या स्थगन प्रस्ताव घलो नइ ले जाही। एखरे सेति कांग्रेस के सबो विधायक मन ए सत्र के पहिली दिन विधानसभा म नइ आही।
रामसर-साइट
बिलासपुर जिला के कोपरा जलाशय ल छत्तीसगढ़ के पहिली रामसर साइट घोसित करे गेहे। जलाशय के खास पारिस्थितिकी, स्थानीय अउ प्रवासी पक्षी मनके विविधता अउ जल परितंत्र के समृध्दि ह एला रामसर मान्यता के लायक बनाय हे। रामसर साइट के दरजा ओ आद्रभूंईया मन ल दे जाथे, जेन जैव विविधता, जल संरक्षण अउ पर्यावरण बर जरूरी माने जाथे। कोपरा जलाशय म रामसर साइट घोसित करे जाय ले इको-टूरिजम बर नवा मउका बनही। उहें, स्थानीय लोगन ल रोजगार मिले के संगेसंग सरलग विकास ल घलो बढ़ावा मिलही।
ए उपलब्धि बर मुख्यमंत्री विष्णुदेव साय अउ वनमंत्री केदार कश्यप ह प्रदेसवासी मन ल बधई दीन हे।
गृह निर्माण मंडल-बैठक
छत्तीसगढ़ गृह निर्माण मंडल के बोर्ड के बइठका काली नवा रईपुर म राखे गीस। एमा अब्बड़ अकन जरूरी निरनय ले गीस। गृह निर्माण मंडल के अध्यक्ष अनुराग सिंह देव ह बतइन कि हाउसिंग बोर्ड के स्ववित्तीय अउ भाड़ाक्रय प्रकार के मकान लेवइया बहुत झन बने लंबा बेरा ले अपन किस्त निश्चित समय म जमा नइ कर पावत रिहीस, जेखर सेति ओमन उपर लेट अवधि के ब्याज लगत रिहीस। बोर्ड ह निरनय लीस हे कि अगर हितग्राही ह अपन पूरा बकाया रासि ल एके पइत म जमा कर दिही त, ओखर उपर लगे विलंबित अवधि के ब्याज म पचास प्रतिसत के छूट दे जाही।
खेल समाचार
चीन के शांगलुओं म चार ले तेरह दिसंबर तक होय अंडर-पंद्रह वर्ल्ड स्कूल वॉलीवाल चैंपियनशिप म भारतीय खेल प्राधिकरण प्रसिक्षण केंद्र रईपुर के वॉलीबॉल खिलाड़ी अब्दुल्ला ह कांस्य जीतिन हे।
दक्षिण पूर्व मध्य रेलवे खेल संघ के तत्वाधान म अमरकंटक म छप्पनवां अखिल भारतीय रेलवे क्रॉस कंट्री प्रतियोगिता आयोजित करे गीस।
शीतलहर-स्कूल समय बदलाव
दुरूग जिला म सीतलहर के कारण जिला प्रशासन ह सरकारी, गैर सरकारी अउ प्राइवेट स्कूल के समय म बदलाव करे हे। जारी आदेस के अनुसार दू पाली म लगइया स्कूल मन म प्राथमिक अउ पूर्व माध्यमिक स्कूल म सम्मार ले शुक्रवार तक बिहनिया आठ बजे ले पौने बारह बजे तक अउ शनिच्चर के मंझनिया सवा बारह बजे ले संझा सवा चार बजे तक कक्षा लगही। उहें, हाई अउ हायर सेकेंड्री स्कूल म सम्मार ले शुक्रवार तक मंझनिया बारह बजे ले संझा पौने पांच बजे तक अउ शनिच्चर के बिहनिया आठ बजे ले मंझनिया बारा बजे तक कक्षा लगही।