कोरोना-केन्द्रीय दल नियुक्ति
केन्द्रीय स्वास्थ्य मंत्रालय ह कोरोना संक्रमण ल देखत छत्तीसगढ़ सहित उत्तरप्रदेश, झारखंड अउ ओड़िसा म उच्च स्तरीय केन्द्रीय दल नियुक्त करे के निर्णय लीन हे। ए चार राज्य म कोरोना संक्रमण के मामला म अचानक तेजी देखे जात हे, जेमा कुछु राज्य म मृत्युदर के प्रतिसत घलो बाढ़े हे। ए दल कोरोना के पाॅजिटिव मामला के रोकथाम, निगरानी अउ जांच ल मजबूत करे के दिसा म राज्य के प्रयास म मदद करही। हरेक दल म एक महामारी विशेषज्ञ अउ एक झिन जन स्वास्थ्य विशेषज्ञ सामिल रइही।
कोरोना-मरीज
प्रदेस म कोरोना संक्रमित मरीज मन सरलग मिलत हे। धमतरी जिला आज छत्तीस झिन नवा कोरोना मरीज मिले हे। एमा चैबीस झिन मरीज धमतरी उप जेल ले हवय।
ओति, बस्तर जिला म आज संझा तक अट्ठारह झिन नवा कोरोना संक्रमित मिले हे। एमा ले सोलह झिन मरीज मन जगदलपुर ले हवय। बस्तर रेंज के पुलिस महानिरीक्षक कार्यालय के कई झिन स्टाॅफ मन घलो कोरोना पाॅजिटिव पाय गेहे। आई.जी. पी. सुंदरराज ह बतईन कि ओखर मनके रिपोर्ट निगेटिव आय हे। लेकिन सुरक्षा ल देखत हुए ओमन खुद आइसोलेशन म रइही। ए बेरा म आईजी कार्यालय बंद रइही।
दुरूग जिला म आज उनचास झिन नवा कोरोना के मरीज मिले हे। एमा बीएसपी के एक झिन सहायक महाप्रबंधक, एक झिन डाॅक्टर सहित नौ झिन करमचारी संक्रमित पाय गेहे। उहें, अहिवारा नगर पालिका क्षेत्र ले एके परिवार के छह झिन मनखे मन ह घलो कोरोना ले संक्रमित होगे हे।
ऐति, बालोद जिला म आज सत्रह झिन नवा कोरोना संक्रमित मरीज मनके पहिचान होय हे, जेमा गुंडरदेही विकासखंड के सिकोसा गांव ले सात झिन मरीज सामिल हे।
उहें, राजनांदगांव जिला पंचायत के मुख्य कार्यपालन अधिकारी तनूजा सलाम ह जिला पंचायत कार्यालय ल दू दिन बर बंद राखे के निरदेस दीन हे। कार्यालय के पांच झिन अधिकारी अउ करमचारी मनके कोरोना पाॅजिटव पाय जाय के बाद ए फइसला ले गेहे।
कोरिया जिला के मनेन्द्रगढ़ सेंट्रल बैंक करमचारी के कोरोना जांच रिपोर्ट पाॅजिटिव आय के बाद बैंक ल सील कर दे गेहे। उहें, महासमुंद जिला के बागबाहरा नगरी क्षेत्र म कोरोना के बाढ़त संक्रमण ल देखत हुए व्यापारिक संगठन ह जरूरी सेवा ल छोड़ के आज ले तीन दिन तक पूर्ण लाॅकडाउन के घोषणा करीन हे।
पोषण अभियान
प्रदेस म राष्ट्रीय पोषण माह अभियान आज ले सुरू होगे हे। वैश्विक महामारी कोरोना ल देखत एसो राष्ट्रीय पोषण माह ल डिजिटल जन आंदोलन के रूप म मनाय जावत हे। ए दउरान कुपोषण ल दुरिहा भगाय के उद्देश्य ले जन-जागरूकता बर वर्चुअल कारीकरम राखे जाही। संगेसंग सोशल मीडिया के घलो प्रयोग करे जाही। ए अभियान तीस सितंबर तक चलही।
इही बीच, मुख्यमंत्री भूपेश बघेल ह राष्ट्रीय पोषण माह म सहयोग बर जम्मों जनप्रतिनिधि मन ल एक ठिन चिट्ठी लिखीन हे, जेमा ओमन ह कुपोषण मुक्त छत्तीसगढ़ बर राज्य के सबो सांसद, विधायक, महापौर, नगरीय निकाय अउ पंचायत प्रतिनिधि मन ले योगदान देके बात किहीन।
प्रणब मुखर्जी-अंतिम संस्कार
पूर्व राष्ट्रपति प्रणब मुखर्जी के अंतिम संस्कार आज नई दिल्ली के लोधी रोड के शवदाह गृह म पूरा राजकीय सम्मान के संग करे गीस। सुरक्षित दूरी अउ कोरोना संबंधी आने-आने नियम ल देखत हुए पूर्व राष्ट्रपति के पार्थिव सरीर तोपगाड़ी के बजाय सव वाहन म ले जाय गीस।
एखर पहिली, राष्ट्रपति रामनाथ कोविंद, उप राष्ट्रपति एम. वेकैंया नायडू, प्रधानमंत्री नरेन्द्र मोदी अउ कई आने-आने मनखे मन ह आज पूर्व राष्ट्रपति श्री मुखर्जी ल पुष्पांजलि अर्पित करीन।
केन्द्र सरकार ह श्री मुखर्जी के निधन म सात दिन के राजकीय सोक के घोषणा करीन हे।
ऐति, छत्तीसगढ़ म घलो पूर्व राष्ट्रपति प्रणब मुखर्जी के निधन म राज्य सरकार ह सात दिन के राजकीय सोक घोषित करीन हे, जेखर चलत सासकीय स्तर म मनोरंजन अउ सांस्कृतिक कारीकरम के आयोजन नइ करे जाही।
जेईई-प्रवेश परीक्षा
देस के सीर्ष इंजीनियरिंग कालेज म प्रवेस बर संयुक्त प्रवेस परीक्षा-जेईई पूरा तैयारी के संग आज ले सुरू होगे हे। लगभग छह सौ साठ ठिन केन्द्र म छह सितंबर तक होवइया ए परीक्षा बर करीब नौ लाख अंठावन हजार उम्मीदवार मन ह पंजीयन कराय हे। कोरोना महामारी के चलत ए ह एक ठिन अइसन पहिली परीक्षा हे, जेमा लगभग दस लाख छात्र मन बर छह सौ ले जादा केन्द्र बनाय गेहे।
छत्तीसगढ़ सहित ओड़िसा, मध्यप्रदेश, राजस्थान के सरकार ह परीक्षार्थी मनके आय-जाय बर मुफ्त गाड़ी के घलो बेवस्था करे हे।
ऐति, छत्तीसगढ़ म घलो जेईई मेन्स के परीक्षा आज ले सुरू होगे हे। प्रदेस म एखर बर पांच केन्द्र बनाय गेहे। परीक्षा म सामिल होय बर प्रदेस ले कुल तेरह हजार चार सौ पच्चीस परीक्षार्थी मन ह पंजीयन कराय हे।
जवान/सरपंच-हत्या
दंतेवाड़ा जिला के बोदली कैम्प म पदस्थ छत्तीसगढ़ सशस्त्र बल के जवान कनेश्वर नेताम के सव आज मालेवाही-करियामेट के बीच रद्दा तीर म मिले हे। मउत होय जवान के सिर म चोट के निसान घलो पाय गेहे।
पुलिस अधीक्षक डाॅक्टर अभिषेक पल्लव ह बतईन कि ए जवान ह पाछु छब्बीस अगस्त के छुट्टी के बाद अपन ड्यूटी म लहुटे रिहीस। फेर अट्ठाईस अगस्त के बाद लापता रिहीस। ओमन ह बतईन कि पुलिस ह मामला के जांच करत हे। पोस्टमार्टम के बाद ही एखर जानकारी लग पाही।
ओति, कांकेर जिला म कोयलीबेड़ा विकासखंड के मंडागांव के पूर्व सरपंच घस्सुराम उसेंडी ल माओवादी मन ह गोली मार दीन। जानबा के मुताबिक श्री उसेंडी ह अपन परिवार के संग एक ठिन सामाजिक कारीकरम बर मदले गांव गे रिहीन। इही बेरा म तीन झिन माओवादी मन ह उहां पहुंचीन अउ पूर्व सरपंच ल गोली मार दीन, जेखर बाद ओखर मउत होगे।
पुलिस अधीक्षक एम.आर. आहिरे ह बतईन कि ए घटना ल माओवादी के स्माॅल एक्सन टीम ह अंजाम देहे। पुलिस मामला के जांच म जुट गेहे।
स्वतंत्रता सेनानी-निधन
स्वतंत्रता संग्राम सेनानी, शिक्षक अउ पूर्व विधायक देवप्रसाद आर्य के काली राजनांदगांव जिला के हथरा गांव म निधन होगे। श्री आर्य तत्कालीन मध्यप्रदेश के बेरा राजनांदगांव जिला के अंबागढ़ चैकी विधानसभा क्षेत्र ले बछर उन्नीस सौ बैसठ ले उन्नीस सौ बहत्तर तक विधानसभा बर निर्वाचित होय रिहीन।
मुख्यमंत्री भूपेश बघेल ह श्री आर्य के निधन म दुख व्यक्त करीन।
साइबर मितान योजना
साइबर अपराध ल रोके अउ लोगन मन ल आॅनलाईन ठगी ले बचाय बर बिलासपुर पुलिस के ‘‘साइबर मितान-एक कदम सजगता की ओर‘‘ अभियान आज ले सुरू होगे हे। ए अभियान के पहिली दिन आज दस हजार ले जादा मनखे मन सामिल होईन, जेमा सहरभर के आने-आने जघा म लोगन मन ल जागरूक करे गीस।
ए अभियान के तहत बिलासपुर पुलिस के टीम ह सहर के अलावा जिलाभर के हर गांव म घर-घर पहुंचही अउ मनखे मन ल जागरूक करही। पुलिस ह लोगन ले आज ले आठ सितंबर तक चले वाले ए साइबर मितान अभियान ले जुडे के अपील करीन।
गणेश-विसर्जन
ग्यारह दिन के पूजा-पाठ के बाद आज अंनत चतुर्दशी ले भगवान गणेश के मूर्ति के विसर्जन करे जात हे। रायपुर म आज घर-घर म हवन पूजा के आयोजन करे गीस, जेखर बाद लोगन मन ह भगवान गणेश के मूर्ति ल विसर्जित करीन। ऐति, नगर निगम डहार ले कुंड बनाके छोटे गणेश मूर्ति के विसर्जन करे के बेवस्था करे गेहे। कोरोना संक्रमण ल देखत ए दारी भगवान गणेश के बड़का मूर्ति स्थापित नइ करे गेहे।
ओेति, राजनांदगांव जिला प्रसासन ह गणेश विसर्जन बर काली स्थानीय अवकाश घोषित करीन हे। फेर ए अवकाश बैंक अउ कोषालय म लागू नइ होही।
संसद-मानसून सत्र
संसद के मानसून सत्र अवइया चैदह सितंबर ले सुरू होही। ए सत्र एक अक्टूबर तक चलही। लोकसभा सचिवालय डहार ले जारी करे गे अधिसूचना म बताय गेहे कि राष्ट्रपति रामनाथ कोविंद ह चैदह सितंबर के लोकसभा के सत्र बुलाईन हे। कोरोना संक्रमण के दिसा-निरदेस के सेती दूनों सदन म बइठे के बेवस्था ल बदले के फइसला ले गेहे। संगेसंग सबो सांसद मन ह सोसल डिस्टेंसिंग के पालन घलो करही।
अनलाॅक-4/दिशा-निर्देश
केन्द्र सरकार डहार ले घोषित करे गे अनलाॅक-फोर के दिसा-निरदेस आज ले लागू होगे हे, जउन ह तीस सितंबर तक लागू रइही। गृह मंत्रालय ह सनिवार के जारी करे गे दिसा-निरदेस के अनुसार आने-आने गतिविधि बर अनुमति दे रिहीस।
देसभर म ए महीना के सात तारीख ले मेट्रो रेल सेवा एक घांव फेर सुरू होवइया हे अउ स्कूल कालेज मन ह तीस सितंबर तक बंद रइही। संगेसंग धार्मिक, राजनीतिक, सामाजिक अउ खेल संबंधी आयोजन म अब सौ झिन मनखे मन सामिल हो सकत हे। सरकार के बिसेस अनुमति ल छोड़ के अंतर्राष्ट्रीय विमान यात्रा अभी फिलहाल स्थगित रइही। त उहें, एक राज्य ले दूसर राज्य म मनखे अउ सामान के आवाजही म कोनों प्रतिबंध नइ होही।