अइसने, राज्य म मतदाता सूची के प्रारूप के प्रकासन के तारिख ल घलो बढ़ाके तेईस दिसंबर कर दे गेहे।
बस्तर ओलंपिक
बस्तर ओलंपिक के तहत संभाग स्तरीय प्रतियोगिता आज ले सुरू होगे हे। मुख्यमंत्री ह आज जगदलपुर म राखे गे समारोह म बस्तर ओलंपिक के मसाल जलाके सुभारंभ करीन।
ए मउका म बस्तर संभाग के जम्मांं सात जिला के खिलाड़ी मन ह मार्चपास्ट करीन। ए मउका म उपमुख्यमंत्री अरूण साव, विजय शर्मा अउ वन मंत्री केदार कश्यप के संगेसंग अंतर्राष्ट्रीय मुक्केबाजी पद्मश्री मैरीकॉम घलो सामिल होइन।
कार्यक्रम ल संबोधित करत मुख्यमंत्री ह किहीन कि सरकार ह बस्तर के युवा मन ल समाज के मुख्यधारा म जोड़े बर हर समय तैयार हे। ओमन किहीन कि बस्तर ओलंपिक के विजेता खिलाड़ी मन अवइया बेरा के खिलाड़ी मन बर रोल मॉडल बनही।
लोक अदालत
राज्य विधिक सेवा प्राधिकरण डहार ले प्रदेस के जम्मों जिला अउ व्यवहार न्यायालय मन म तेरह दिसंबर के लोक अदालत के आयोजन करे जाही। ए लोक अदालत एसो के आखिरी लोक अदालत होही। लोक अदालत म रूके आपराधिक प्रकरण के संगेसंग मोटर दुर्घटना प्रकरण, बिहाव ले जुड़े विवाद, जल कर, संपत्ति कर, राजस्व ले जुड़े प्रकरण, ट्रैफिक चालान, बैंक अउ बिजली ले जुड़े प्री-लिटिगेशन के संगेसंग आबकारी ले जुड़े प्रकरण के निपटारा करे जाही।
विधानसभा शीतकालीन सत्र
छत्तीसगढ़ विधानसभा के सीतकालीन सत्र चौदह दिसंबर इतवार ले सुरू होही। ए सत्र विधानसभा के नवा भवन म होही। नवा रायपुर म बने विधानसभा भवन म होवइया ए ह पहिली सत्र होही।
विधानसभा अध्यक्ष डॉक्टर रमन सिंह ह आज पत्रकार मन ले गोठबात करत बतईन कि सत्रह दिसंबर तक चलइया ए सत्र के दउरान कुल चार बइठका प्रस्तावित हे। सत्र के पहिली दिन चउदा दिसंबर के राज्य सरकार के ‘‘दीर्घकालीन विकास रणनीति छत्तीसगढ़ विजन – दू हजार सैंतालीस‘‘ उपर गोठबात होही। सत्र के दउरान चालू वित्तीय बछर भर प्रथम अनुपूरक अनुमान पेस करे जाही। संगेसंग छत्तीसगढ़ दुकान अउ स्थापना संशोधन विधेयक ल घलो ए सत्र के दउरान पेस करे जाही।
विधानसभा अध्यक्ष ह बतईन कि छत्तीसगढ़ विधानसभा के पहिली बइठका चौदह दिसंबर के सन दू हजार के राजकुमार कॉलेज के जशपुर हॉल म करे गे रिहीस। एखरे सेती विधानसभा के नवा भवन म पहिली सत्र चउदा दिसंबर ले सुरू करे जात हे।
वीरनारायण सिंह-मुख्यमंत्री
मुख्यमंत्री विष्णुदेव साय ह काली बलौदाबाजार जिला के सोनाखान म शहीद वीरनारायण सिंह के सहादत दिवस उपर राखे गे श्रद्धांजलि सभा म सामिल होइन। ए मउका म ओमन एक सौ एक करोड़ रूपिया ले जादा के आने-आने विकास काम के लोकार्पण अउ भूमिपूजन करीन। मुख्यमंत्री ह सोनाखान म मुख्यमंत्री ग्रामीण बस योजना के तहत बस सेवा चालू करे के संगेसंग नवा प्राथमिक स्वास्थ्य केन्द्र के भवन निर्माण बर पचहत्तर लाख रूपिया, सियान सदन बनाय बर पचास लाख रूपिया अउ मड़ई मेला वाले जघा म सौचालय बनाय बर बीस लाख रूपिया के घोसना करीन।
ऐति, मुख्यमंत्री ह बालोद जिला के गांव कर्रेझर म राखे गे विराट वीर मेला महोत्सव म घलो सामिल होइन। ओमन मेला के आखिरी दिन शहीद वीरनारायण सिंह श्रद्धांजलि सभा म सामिल होके जिला म करीबन बहत्तर लाख रूपिया के आने-आने विकास काम के लोकार्पण करीन।
टेकस्टार्स स्टार्टअप वीकेंड
धमतरी जिला प्रशासन अउ खेल युवा कल्याण विभाग डहार ले अट्ठाईस ले तीस नवंबर तक धमतरी म टेकस्टार्स स्टार्टअप वीकेंड के आयोजन करे गीस। विश्व स्तरीय स्टार्टअप एक्सीलरेटर टेकस्टार्स के मदद ले राखे गे ए कार्यक्रम म सौ ले जादा युवा प्रतिभागी, पचास संभावित स्टार्टअप टीम अउ बीस अनुभवी मेंटर्स के संगेसंग दस ले जादा निवेसक मन ह भाग लीन।
हाईकोर्ट-आंगनबाड़ी/नदी
छत्तीसगढ़ उच्च न्यायालय ह राज्य के आंगनबाड़ी केन्द्र मनके खस्ताहाल उपर मुख्य सचिव ल सपथ पत्र के संग जानकारी पेस करे के निरदेस देहे। मुख्य न्यायाधीश रमेश सिन्हा अउ न्यायाधीश बी.डी. गुरू के डिवीजन बेंच ह आंगनबाड़ी मन म अव्यवस्था अउ मध्यान्ह भोजन म लापरवाही ल लेके लगाय गे जनहित याचिका उपर सुनवाई करत किहीन कि बिलासपुर अउ रायगढ़ जिला म आंगनबाड़ी केन्द्र मनके व्यवस्था म कतकोन गलती पाय गेहे। ए मामला के अवइया सुनवाई इक्कीस जनवरी दू हजार छब्बीस के होही।
उहें, उच्च न्यायालय म नंदियां मनके बने ढंग ले रखरखाव ल लेके घलो सुनवाई होइस। सुनवाई के दउरान अरपा नदी के संगेसंग राज्य के तीन ठिन नंदियां मन ल ठीकठाक राखे बर उंखर उद्गम स्थल ल सवारे उपर जिला स्तर म समिति बनाय के घोसना करे गेहे। ए समिति प्रदेस के दस ठिन नंदियां मनके संरक्षण अउ संवर्धन उपर काम करही। उहें, अरपा नदी के उद्गम स्थल बर भूमि अधिग्रहण ल लेके घलो कोर्ट ह सासन ने स्टेटस रिपोर्ट मांगे हे। कोर्ट ह मामला के अवइया सुनवाई बीस जनवरी दू हजार छब्बीस तय करे हे।
कोरबा-ट्रिपल मर्डर
कोरबा जिला म पाछु रतिहा तीन झिन लोगन मनके हत्या कर दे गेहे। उरगा थाना क्षेत्र के कुदरी गांव म होय ए हत्या ल एक ठिन कबाड़ व्यवसायी के स्क्रैप यार्ड म दे गीस। ए तीनों मृतक कबाड़ व्यवसाय ले जुड़े बताय जात हे। ए मामला म पुलिस ह चार झिन लोगन मन ल गिरफ्तार कर लेहे, जेमा एक झिन बइगा घलो सामिल हे। पुलिस ह मृतक मनके मोबाइल कॉल डिटेल्स, घटना वाले जघा ले बरामद जिनीस अउ बइगा टीम के कामकाज के जांच करत हे।
हसदेव नदी-बच्चे डूबे
जांजगीर-चांपा जिला के चांपा स्थित हनुमानधारा क्षेत्र के हसदेव नदी म बुड़े ले तीन झिन लइका के मउत होगे। मृतक लइका मन एके मोहल्ला के रहइया रिहीस अउ एके स्कूल म पढ़त रिहीन। हमर संवाददाता ले मिले जानबा के मुताबिक काली बिहनिया तीनों लइका मन हसदेव नंदियां म नहाय बर गे रिहीन, इही दउरान बुड़े ले तीनों लइका के मउत होगे। डीडीआरएफ के टीम ह आज लइका मनके सव ल बरामद कर लेहे।
साहित्य उत्सव
नवा रायपुर म तेईस ले पच्चीस जनवरी दू हजार छब्बीस तक होवइया साहित्य उत्सव के पहिली प्रदेस के जम्मों जिला म कालेज के छात्र-छात्र मन बर कहानी अउ कविता प्रतियोगिता राखे जाही। ए दूनों प्रतियोगिता म जिला स्तर म विजेता छात्र-छात्रा मन ल इनाम दे जाही अउ ओमन ल राज्य स्तरीय प्रतियोगिता म सामिल होय के मउका मिलही। उहें, सुघ्घर कहानी अउ कविता ल रायपुर साहित्य उत्सव म इनाम दे जाही। ए प्रतियोगिता बर जिलावार नोडल अधिकारी बनाय जात हे। प्रतियोगिता म भाग लेवइया छात्र-छात्रा मन अपन खुद के लिखे कविता अउ कहानी ल तीस दिसंबर तक जिला के नोडल अधिकारी ऑफिस म जमा कर सकथे।
जानबा के मुताबिक प्रदेस के साहित्यिक विरासत ल लोगन मन तक पहुंचाय अउ साहित्य लेखन म युवा मनके इच्छा ल पूरा करे बर रायपुर साहित्य उत्सव के आयोजन करे जात हे।
आदिम जाति विभाग-ई-ऑफिस
आदिम जाति विकास विभाग के प्रमुख सचिव सोनमणि बोरा ह किहीन हे कि विभाग के जम्मों निगम, बोर्ड अउ आयोग मन म एक जनवरी दू हजार छब्बीस ले ई-ऑफिस के माध्यम ले कामकाज करे जाही। श्री बोरा ह मंत्रालय म विभाग के जम्मों आयोग, बोर्ड अउ निगम मनके कामकाज अउ योजना मनके समीक्षा करीन। ए दउरान ओमन पाछु तीन वित्तीय बछर के वार्षिक प्रतिवेदन मनके जानबा लीन अउ एला विभागीय वेबसाइट के ई-बुक म अपलोड करे के निरदेस दीन। बइठका म आधार सक्षम बायोमेट्रिक उपस्थिति प्रणाली के बारे म घलो जरूरी निरदेस दे गीस।