राष्ट्रपति द्रौपदी मुर्मु ह आज नई दिल्ली के विज्ञान भवन म राखे गे कार्यक्रम बछर दू हजार तेईस अउ दू हजार चौबीस बर राष्ट्रीय हस्तशिल्प पुरस्कार दीन। एमा छत्तीसगढ़ के सारंगढ़-बिलाईगढ़ जिला के शिल्पकार हीराबाई झरेका बघेल घलो सामिल हे। धातु शिल्प म सुघ्घर योगदान बर राष्ट्रपति ह ओमन ल बछर दू हजार तेईस के राष्ट्रीय हस्तशिल्प पुरस्कार ले सम्मानित करीन।
ए मउका म राष्ट्रपति ह कहिन कि कला ह लोगन मन ल आने-आने संस्कृति अउ एक-दूसर ले जोड़थे। ओमन कहिन कि हस्तशिल्प के क्षेत्र म अड़सठ प्रतिसत माईलोगिन काम करत हे। ओमन कहिन कि ए क्षेत्र के विकास ले माईलोगिन मनके सशक्तिकरण घलो होही। इनाम मिले म गोठबात करत हीराबाई झरेका बघेल ह खुसी जतईन।
मुख्यमंत्री विष्णुदेव साय ह कहिन हे कि शिल्पकार हीराबाई झरेका बघेल के पुरस्कृत होना छत्तीसगढ़ बर गर्व के बात आय। श्री साय ह किहिन कि सारंगढ़ जिला के बैगीनडीह गांव के शिल्पकार ह अपन अनूठा धातुकला ले देसभर म छत्तीसगढ़ के पहिचान ल नवा ऊंचाई देहे।
लोकसभा वामपंथ उग्रवाद
केन्द्र सरकार ह वामपंथ उग्रवाद ल कतई बर्दास्त नइ करे के नीति अपनाय हे अउ अवइया बछर मार्च महीना तक एला खतम करे के लक्ष्य राखे हे। लोकसभा म प्रश्नकाल के दउरान पूरक प्रश्न के उत्तर म केन्द्रीय गृह राज्यमंत्री नित्यानंद राय ह कहिन कि केन्द्र सरकार ह ए समस्या ल समाप्त करे बर राज्य सरकार के संग मिलके काम करत हे। ओमन कहिन कि वामपंथ उग्रवाद ह न तो देस के संविधान म अउ न ही लोकतंत्र म विश्वास राखथे।
श्री राय ह कहिन कि बछर दू हजार चार ले बछर दू हजार चौदह के बीच वामपंथ उग्रवाद के सोलह हजार ले जादा घटना होय हे, जउन पाछु दस बछर म घटके करीबन सात हजार रहि गेहे।
राज्यपाल-बस्तर विवि
राज्यपाल रमेन डेका ह बस्तर स्थित शहीद महेन्द्र कर्मा विश्वविद्यालय के जमीन म अवैध कब्जा अउ आने निर्माण काम करे जात ल गंभीरता ले लेवत एमा कार्रवाई करे के निरदेस दीन हे। ए बारे म काली राज्यपाल ह लोकभवन म मुख्य सचिव ले गोठबात करीन अउ कहिन कि विश्वविद्यालय के भूईंया म अवैध निर्माण हटाय के संगेसंग ओला पहिली असन विश्वविद्यालय के अधिकार क्षेत्र म सुरक्षित राखे जाय।
उहें, राज्यपाल ह रायपुर कलेक्टर गौरव सिंह ले गोठबात करत कहिन कि स्वतंत्रता सेनानी अउ देस के रक्षा म अपन जीवन समर्पित करइया पूर्व सैनिक मनके सुरता ल घलो संरक्षित करे बर कार्रवाई करे जाय। ओमन स्वतंत्रता सेनानी रामकृष्ण तिवारी के उल्लेख करीन, ओमन आजादी के आंदोलन म परिवार समेत अपन सब कुछ बलिदान कर दे रिहीन। राज्यपाल ह उंखर ले जुड़े अभिलेख अउ विरासत ल संरक्षित राखे के निरदेस दीन। श्री डेका ह रायपुर म अइसन जगह के चिन्हारी करके ओला स्मारक, सूचना पट्ट या मेमोरियल गैलरी के रूप म संरक्षित करे बर कहिन हे।
एसआईआर
मतदाता सूची के विशेष गहन पुनरीक्षण अभियान-एसआईआर के तहत अब तक प्रदेस म दू करोड़ बारह लाख सात हजार ले जादा गणना प्रपत्र मनके डिजिटलीकरण करे जा चुके हे, जउन ह कुल प्राप्त गणना प्रपत्र के निन्यानवे दशमलव आठ-नौ प्रतिसत हवय।
इही बीच, महासमुंद कलेक्टर विनय कुमार लंगेह ह बतईन कि जिला म निन्यानवे प्रतिसत ले जादा गणना प्रपत्र मन ल बांटे जा चुके हे। ओमन बतईन कि आठ लाख छियासठ हजार ले जादा गणना प्रपत्र के डिजिटलीकरण करे गेहे।
वीरनारायण सिंह-शहादत दिवस
शहीद वीरनारायण सिंह के काली सहादत दिवस हरय। ओमन गरीब, किसान अउ आदिवासी मन ल एकजुट करीन अउ अंग्रेज मनके खिलाफ लड़ाई लड़े रिहीन। ओमन ल छत्तीसगढ़ के पहिली स्वतंत्रता संग्राम सेनानी माने जाथे। ए मउका म काली दस दिसंबर के बलौदाबाजार जिला के सोनाखान गांव म कार्यक्रम के आयोजन करे जाही। ए कार्यक्रम म मुख्यमंत्री विष्णुदेव साय के सामिल होय के संभावना हे।
स्टेट बैंक ऑफ इंडिया फाउंडेशन डहार ले एसबीआई सम्मान कार्यक्रम चलाय जावत हे। एमा राष्ट्रीय नायक मन ल श्रद्धांजलि स्वरूप उंखर पैतृक गांव या फेर उंखर गृह नगर म कार्पोरेट सामाजिक उत्तरदायित्व-सीएसआर के तहत विकासात्मक गतिविधि संचालित करे जात हे। एसबीआई फाउंडेशन ह सोनाखान गांव म ए कार्यक्रम के तहत बुनियादी सुविधा, स्कूल, आंगनबाड़ी के विकास के संगेसंग शहीद वीरनारायण सिंह युवा प्रशिक्षण केन्द्र घलो स्थापित करे हे। ए केन्द्र म स्थानीय युवा मन ल सेना म भर्ती बर प्रशिक्षण दे जावत हे।
स्वदेशी संकल्प यात्रा
उपमुख्यमंत्री अरूण साव ह आज रायपुर के तेलीबांधा तालाब परिसर म स्वदेशी संकल्प यात्रा ल झंडा देखाके रवाना करीन। ए यात्रा के आयोजन कन्फेडरेशन ऑफ ऑल इंडिया ट्रेडर्स-कैट अउ स्वदेशी जागरण मंच डहार ले करे जावत हे। ए मउका म श्री साव ह बाईक रैली म घलो सामिल होइन अउ ओमन रायपुरवासी मन ले स्वदेशी वस्तु ल अपनाय के अपील करे के संगेसंग किहीन कि स्वदेशी के माध्यम ले छत्तीसगढ़ अउ देस ल आत्मनिर्भर बनाय जा सकत हे। प्रदेस म बाईस दिन तक चलइया स्वदेशी संकल्प यात्रा के उद्देश्य घर-घर स्वदेशी के संदेस पहुंचाना आय।
कवर्धा-चिकित्सक सम्मानित
स्वास्थ्य सेवा के क्षेत्र म सुघ्घर काम बर डॉक्टर मन ल कवर्धा म राखे गे समारोह म सम्मानित करे गीस। ए कार्यक्रम म जिला अस्पताल अउ प्राईवेट अस्पताल के डॉक्टर मन ह मौजूद रिहीन। समारोह के माईपहुना उपमुख्यमंत्री विजय शर्मा रिहीन। ओमन जिला के सुदूर वनांचल म स्वास्थ्य सिविर लगाके लोगन मनके सेवा करइया डॉक्टर मन ल सम्मानित करीन।
उपमुख्यमंत्री ह बतईन कि अवइया ग्यारह दिसंबर के मुख्यमंत्री विष्णुदेव साय ह कवर्धा मेडिकल कॉलेज के सिलान्यास करही।
मुख्य सचिव-बैठक
मुख्य सचिव विकासशील ह आज मंत्रालय म राज्य सरकार के आने-आने योजना मनके समीक्षा करीन। ओमन सचिव मन ल अपन-अपन विभाग बर अवइया तीन बछर के कार्ययोजना तैयार करे के निरदेस दीन। मुख्य सचिव ह किहीन कि राज्य सरकार के उद्देश्य जनता के हित म काम करना हे। बइठका म बछर दू हजार पच्चीस-छब्बीस के बजट म सामिल नवा मद प्रस्ताव, योजना अउ निर्माण काम के प्रगति के मूल्यांकन करे गीस। एखर संगेसंग मुख्य सचिव ह आधार-सक्षम बायोमेट्रिक उपस्थिति प्रणाली ल विभाग म सुघ्घर ढंग ले लागू करे, ई-ऑफिस मन ल संचालनालय के संगेसंग जिला स्तर म घलो अवइया बछर म बने ढंग ले लगातार रूप ले संचालित करे के निरदेस दीन।
जांजगीर-भाजी महोत्सव
जांजगीर-चांपा जिला के बहेराडीह स्थित किसान स्कूल म काली दस दिसंबर के राज्य स्तरीय भाजी महोत्सव के आयोजन करे जाही। महोत्सव के दउरान साठ ले जादा किसम के भाजी मनके प्रदर्सनी लगाय जाही। महोत्सव के दउरान भाजी प्रतियोगिता घलो होही, जेमा दस भाजी दीदी मनके सम्मान करे जाही। माईलोगिन मन डहार ले स्टॉल लगाके भाजी ले बने किसम-किसम के व्यंजन के प्रदर्सन घलो करे जाही।