आज गोठबात के सुरूआत म प्रधानमंत्री नरेंद्र मोदी ह किहीन कि वंदे मातरम के मंत्र ह पूरा देस ल सक्ति अउ प्रेरणा देके संगेसंग स्वतंत्रता आंदोलन ल ऊर्जावान बनाथे। प्रधानमंत्री ह किहीन कि आज वंदे मातरम के सुरता करना ए सदन के जम्मो सदस्य अउ देसवासी मन बर सौभाग्य के बात हरय। ओमन किहीन कि वंदे मातरम ह बछर उन्नीस सौ सैंतालीस म स्वतंत्रता देवाय म बड़का भूमिका निभाय हे। प्रधानमंत्री ह किहीन कि देस के स्वतंत्रता सेनानी मन ह अपन आखिरी सांस तक वंदे मातरम के जयघोष करीन।
मंत्री-विमानन
केंद्रीय नागर विमानन मंत्री के. राममोहन नायडू ह किहीन हे कि विमानन सुरक्षा ले कोनो प्रकार के समझौता नइ करे जा सकय। ओमन किहीन कि ए सरकार के पहिली प्राथमिकता हरय। उड़ान ड्यूटी समय सीमा जइसन दिसा निरदेस ले जुड़े पूरब प्रश्न के जवाब म श्री नायडू ह राज्यसभा म किहीन कि सरकार ह कतकोन उड़ान के रद्द होय के जांच करत हे। ओमन किहीन कि सरकार एखर उपर गंभीरता ले धियान देत हे। ए मामला म कड़ा कार्रवाई करे जाही।
राज्यपाल-ऑडिट पखवाड़ा
राज्यपाल रमेन डेका ह आज रईपुर स्थित महालेखाकार ऑफिस के आवासीय परिसर म राखे गे ऑडिट पखवाड़ा के समापन समारोह म सामिल होइन। ए पखवाड़ा बीस नवंबर ले आठ दिसंबर तक चलिस। समारोह ल संबोधित करत राज्यपाल ह किहीन कि लेखा परीक्षा सिरिफ सरकारी खर्चा अउ राजस्व के जांच तक सीमित नइ हे, एहा प्रशासनिक पारदर्सिता, वित्तीय अनुशासन अउ लोगन मनके सेवा के एक ठिन बड़का माध्यम हरय। लोकतांत्रिक ढांचा म भारत के नियंत्रक अउ महालेखा परीक्षक-कैग के बड़का भूमिका हे।
माओवादी-आत्समर्पण
खैरागढ़-छुईखदान-गंडई जिला म आज बारह झिन माओवादी मन ह आत्मसमर्पण करे हे। एमा माओवादी मनके केंद्रीय समिति के सदस्य अउ बड़का नक्सली नेता एक करोड़ के इनामी रामधेर मज्जी घलो सामिल हे। ए माओवादी मन ह आज बकरकट्टा थाना क्षेत्र म स्थित कुम्ही गांव म पुलिस अउ सीआरपीएफ के बड़का अधिकारी मनके आगू हथियार देके आत्मसमर्पण करीन। ए माओवादी मन ह पुलिस महानिदेशक अरूणदेव गौतम, आईजी, अभिषेक शांडिल्य अउ पुलिस अधीक्षक अंकिता शर्मा के आगू आत्मसमर्पण करीन। माओवादी मन म रामधेर मज्जी के संगेसंग चूंदू उसेंडी, रामसिंह दादा घलो सामिल हे। मध्यप्रदेस, महाराष्ट्र अउ छत्तीसगढ़ के कतकोन जिला मन म सक्रिय रिहीन। माओवादी मन ह एके-फोर्टीसेवन, एसएलआर के संगेसंग दस हथियार बिस्फोटक जिनिस अउ वाकीटॉकी पुलिस ल सौंपिन।
एसआईआर
मतदाता सूची के विशेष गहन पुनरीक्षण अभियान-एसआईआर के तहत अब तक प्रदेस म दू करोड़ बारह लाख ले जादा गणना प्रपत्र मनके डिजीटलीकरण करे जा चुके हे, जउन कुल मिले गणना प्रपत्र मनके निन्यानवे दसमलव आठ-तीन प्रतिसत हरय।
इही बीच, गौरेला-पेण्ड्रा-मरवाही जिला के उप जिला निर्वाचन अधिकारी अमित बेक ह बतइन कि जिला म एसआईआर के काम पूरा पारदर्सिता के संग करे जात हे। लोगन मनके सुविधा बर हेल्प डेस्क घलो बनाय गेहे।
एसआईआर-विशेष कार्यक्रम
आकाशवाणी केंद्र रायपुर डहार ले मतदाता सूची के विशेष गहन पुनरीक्षण अभियान-एसआईआर उपर काली नौ दिसंबर के बिहनिया नौ बजके पचपन मिनट म बिसेस कारीकरम के प्रसारण करे जाही। ए कारीकरम के प्रसारण छत्तीसगढ़ स्थित आकाशवाणी के जम्मो केंद्र रिले करही।
जमीन-गाइडलाइन दर-संशोधन
प्रदेस म गाइडलाइन दर के पुनरीक्षण के बारे म मिले सुझाव, ज्ञापन अउ प्रस्ताव उपर जांच परख के बाद केंद्रीय मुल्यांकन बोर्ड के बइठका होइस। जेमा प्रदेस के नगरीय विकास, रियल एस्टेट सेक्टर अउ आम लोगन मनके सुविधा ल धियान म राखत कतकोन जरूरी फइसला ले गीस अउ एला तुरते परभाव ले लागू कर दे गेहे। बइठका म ले गे फइसला के मुताबिक नगरीय क्षेत्र मन म चौदह सौ वर्ग मीटर तक भू-खंड के भाव के बढ़ोत्तरी ल खतम कर दे गेहे। अब पहिली चलत भाव लागू होही। एमा नगर निगम क्षेत्र म पचास डिसमिल, नगर पालिका म सैंतीस दसमलव पांच डिसमिल अउ नगर पंचायत म पच्चीस डिसमिल तक स्लैब दर ले मूल्यांकन करे जाही।
अइसने बहुमंजिला भवन म फ्लैट, दुकान अउ ऑफिस के अंतरण उपर सुपर बिल्ट-अप एरिया के आधार म बाजार मूल्य के गणना के प्रावधान ल घलो हटा दे गेहे। अब मूल्यांकन बिल्ट-अप एरिया के आधार उपर करे जाही। कमर्शियल काम्प्लेक्स मन म बीस मीटश्र ले जादा दूरी उपर स्थित संपत्ति बर पच्चीस प्रतिसत कमी के संग भूखंड के भाव के मूल्यांकन करे जाही।
ओपी चौधरी-पत्रकारवार्ता
इही बीच, वित्त अउ वाणिज्यकर मंत्री ओपी चौधरी ह किहीन हे कि राज्य सरकार डहार ले पाछू दू साल म गाइडलाइन दर म जनहितैषी सुधार करत रजिस्ट्री के कंडिका मनके गलती ल दूर करे गेहे। भारतीय जनता पार्टी के एकात्म परिसर म राखे गे पत्रकारवार्ता म श्री चौधरी ह ए बात ल किहीन।
ऑनलाइन फोटोग्राफी प्रतियोगिता
छत्तीसगढ़ पर्यटन बोर्ड डहार ले राज्य स्थापना के रजत जयंती वर्ष के उपलक्ष्य म आज ले पंद्रह दिसंबर तक ऑनलाइन फोटोग्राफी प्रतियोगिता कराय के फइसला ले गेहे। प्रतियोगिता म भारत के कोनो भी जघा ले अट्ठारा ले जादा उमर के प्रतिभागी मन ऑनलाइन अर्जी कर सकथे। प्रतिभागी मन ल छत्तीसगढ़ थीम उपर आधारित मौलिक फोटोग्राफ राखे गे ई-मेल आईटी एट द रेट विजिट सीजी डॉट इन के माध्यम ले अपलोड करे बर पड़ही। मिले प्रविष्टी मनके मूल्यांकन विशेषज्ञ ज्यूरी डहार ले करे जाही विजेता के घोसना उन्नीस दिसंबर के करे जाही। विजेता ल प्रमाण पत्र के संग पुरस्कार दे जाही।
बाल विवाह मुक्त जागरूकता अभियान
जांजगीर-चांपा जिला म बाल विवाह मुक्त जागरूकता अभियान के तहत अलग-अलग विकासखंड मन म कार्यशाला के आयोजन करे गीस। कारीकरम के दउरान बाल विवाह ले होवइया नकसान के बारे म जानबा दे गीस। संगेसंग महिला अउ बाल विकास विभाग के टीम डहार ले कालेज, छात्रावास म जाके जागरूकता अभियान चलाइन। ए दउरान छात्र-छात्रा मन ह बाल विवाह ल रोके अउ बाल विवाह मुक्त करे के सपथ देवाय गीस।
महिला अउ बाल विकास जिला अधिकारी अनिता अग्रवाल ह बतइन कि जिला ल बाल विवाह मुक्त बनाय बर चलाय जात अभियान के तहत बालिका छात्रावास म पॉक्सो एक्ट, अउ घरेलू हिंसा के बारे म जानबा दे जात हे।
ट्रेन-परिचालन
यात्री मन के सुविधा बर रेलवे डहार ले भुवनेश्वर ले लोकमान्य तिलक टर्मिनल्स-एलटीटी तक सात दिसंबर तक रेलगाड़ी चलाय गीस। वापसी म ए रेलगाड़ी लोकमान्य तिलक टर्मिनल एलटीटी ले संबलपुर बर नौ दिसंबर के बिहनिया साढ़े छै बजे छुटही। ए गाड़ी भुसावल, नागपुर, गोंदिया होवत दुरूग स्टेसन म मंझनिया एक बजके चालीस मिनट म पहुंचही, जेखर बाद रईपुर, महासमुंद कांटाभांजी होवत दूसर दिन बिहनिया आठ बजे संबलपुर पहुंचही।
हाथी हमला
कोरबा जिला के कटघोरा वनमंडल के गांव गोलाबाहरा म पाछू रतिहा एक ठिन दतैल हाथी के हमला म एक झिन सियनहा माईलोगिन के मउत होगे। हमला के बेरा ओखर नोनी ह भाग के अपन जान बचाइन। जानबा के मुताबिक ए माईलोगिन ह अपन ब्यारा म धान साफ करे के बाद आगी तापत रिहीन। इही दउरान हाथी ह उंखर मन उपर हमला कर दीन। सूचना मिले के बाद पुलिस अउ वन विभाग के टीम ह मउका म पहुंचिन अउ जरूरी कार्रवाई सुरू कर दीन।
अउ अब थोरकुन समाचार सार म –
– मुख्यमंत्री विष्णुदेव साय के अगुवई म दस दिसंबर के बिहनिया ग्यारा बजे ले मंत्रालय म राज्यमंत्रिमंडल के बइठका होही।
– भारत रत्न संविधान निर्माता डॉक्टर भीमराव अंबेडकर के महापरिनिर्वाण दिवस उपर आज रईपुर रेल मंडल म राखे गे श्रध्दांजलि समारोह म मंडल रेल प्रबंधक दयानंद के संगेसंग अधिकारी अउ कर्मचारी मन ह उंखर फोटू उपर फूलमाला चढ़ाइन।
अउ
– सक्ति जिला के नवापारा गांव म दू ठिन फटफटी के टक्कर होय ले एक झिन मनखे के मउत होगे। उहें, दू झिन आने मनखे गंभीर रूप ले घायल हो गेहे, एमन ल इलाज बर डभरा के सामुदायिक स्वास्थ्य केंद्र म भर्ती कराय गेहे।