मुख्यमंत्री विष्णुदेव साय ह किहीन कि जमीन ले जुड़े नवा कलेक्टर गाइड लाइन के बाद दर म जउन बढ़ोत्तरी होय हे ओखर ले यदि जनता ल कोनो कष्ट होवत हे, त निश्चित रूप ले सरकार ह एखर उपर बिचार करही। आज पत्रकार वार्ता म गोठबात करत मुख्यमंत्री ह किहीन कि बछर दू हजार सत्रह ले कलेक्टर गाइडलाइन दर म कोनो बढ़ोत्तरी नइ करे गे रिहीस।
बतादन कि छत्तीसगढ़ म जमीन खरीदी बिक्री बर कलेक्टर गाइडलाइन दर म हाल बेरा म बढ़ोत्तरी करे गेहे। एला लेके रियल स्टेट, कारोबारी किसान के संगेसंग निवेसक मन म भारी आक्रोस देखे जावत हे। रइपुर सांसद बृजमोहन अग्रवाल ह ए बढ़ोत्तरी ल स्थगित करे बर अउ बिसेसज्ञ मनके कमेटी बनाके एखर परीक्षण कराय के संबंध म मुख्यमंत्री ल पाती घलो पठोय हें।
सशस्त्र सेना झंडा दिवस
आज सशस्त्र सेना झंडा दिवस आय। ए मउका म प्रधानमंत्री नरेंद्र मेदी ह देस के वीर पुरूष अउ माईलोगन मनके प्रति गहरा आभार जतइन जउन साहस के संग देस के रक्षा करथें। एक ठन सोशल मीडिया पोस्ट म श्री मोदी ह किहीन कि अनुशासन, दृढ़ संकल्प अउ अदम्य साहस लोगन के रक्षा करथे अउ राष्ट्र ल मजबूत बनाथे। ए बेरा श्री मोदी ह देसवासी मन ल सशस्त्र सेना झंडा दिवस कोष म योगदान देय बर घलो अपील करिन हें।
उहें, सशस्त्र सेना झंडा दिवस के मउका म रइपुर म लोकभवन के छत्तीसगढ़ मंडपम म कारीकरम के आयोजन करे गिस। जिंहा राज्यपाल रमेन डेका ह सशस्त्र सेना झंडा दिवस निधि बर दू लाख रूपिया के सहयोग रासि राज्य सैनिक कल्याण बोर्ड ल प्रदान करिन। कारीकरम म राज्यपाल ह सहीद मनके परिजन अउ वीरता अलंकरण पवइया सैनिक के संगे झंडा दिवस के मउका म बिसेस योगदान देवइया मन ल घलो सम्मातिन करिन। उहें, सबले जादा रासि सकेले बर रइपुर कलेक्टर गौरव कुमार सिंह ल प्रथम पुरस्कार अउ दुरूग कलेक्टर अभिजीत सिंह ल दूसरइया पुरस्कार के संगे राज्यपाल ट्राफी प्रदान करे गिस।
ऐति, छत्तीसगढ़ राज्य सैनिक बोर्ड के सचिव ब्रिगेडियर विवेक शर्मा ह मुख्यमंत्री विष्णुदेव साय ले सौजन्य भेंट करिन। ए मउका म ओमन मुख्यमंत्री ल सशस्त्र सेना झंडा दिवस के प्रतीक स्वरूप सम्मान बैच लगइन अउ सैनिक कल्याण विभाग डहार ले चलाय जवइया आने-आने कल्याणकारी योजना मनके जानकरी दीन।
किसान पोर्टल-पंजीयन
राज्य सरकार ह किसान मनके सुविधा बर एकीकृत किसान पोर्टल म पंजीयन के तारीख ल पंद्रह दिसंबर तक बढ़ा देहे। फेर ए सुविधा के लाभ उहीं किसान मन ल मिलही जउन आघू बढ़ाय या डूबान, वन पट्टाधारी हें अउ उंखर पंजीयन आने-आने विभाग म प्रक्रियाधीन हे। राज्य सरकार ह ए सुविधा के फायदा देवाय बर सबो विभाग मन ल निरदेस जारी कर देहे।
धान खरीदी
छत्तीसगढ़ म समर्थन मूल्य म धान खरीदी चलत हे। पांच दिसंबर तक प्रदेस म बाईस लाख मीट्रिक टन ले जादा धान खरीदी हो चुके हे। अब तक चार लाख उनतालीस हजार ले जादा पंजीकृत किसान मन धान बेचिन हे। धान खरीदी के बदला म किसान मन ल पांच हजार दू सौ सतहत्तर करोड़ रूपिया घलो जारी करे जा चुके हे। एसो करीबन सत्ताईस लाख इकतीस हजार किसान म धान बेचे बर पंजीकृत कराय हे।
अब तक महासमुंद जिला म सबले जादा पंद्रह लाख उन्नीस हजार कुंटल ले जादा धान खरीदी गिस, उहे, सबले जादा धान खरीदी के मामला म गरियाबंद जिला दूसरइया अउ बिलासपुर जिला तिसरइया स्थान म हे।
ऐति, धान अवैध के भंडारण अउ परिवहन के खिलाफ घलो खाद्य विभाग सरलग कार्रवाही करत हे। छै दिसंबर तक प्रदेस के आने-आने जिला ले एक लाख इंक्यावन हजार कुंटल ले जादा धान जब्त करे गिस।
दुर्घटना
जशपुर जिला म बीते रतिहा कार अउ ट्रक के जोरदार टक्कर होइस, जेमा पांच झन के मउत होगे। ए हादसा दुलदुला थाना इलाका के पतराटोली के तिर होइस। कार म सवार सबो झन खटंगा गांव के रहइया रिहीन, जेमन मनोरा इलाका ले मड़ई देखके घर लहुटत रिहीन, तभे एक ठन ट्रक ले उंखर टक्कर होगे।
उहें, दुरूग जिला के अंडा थाना इलाका म घलो बीते रतिहा रिसामा गांव म दू ठन तेज रफ्तार फटफटी मन टकार गिन, जेमा एक झन युवक के मउत होगे। गंभीर रूप ले घायल एक झन आने युवक ल दुरूग जिला अस्पताल म भर्ती कराय गेहे।
माओवादी-आत्मसमर्पण
मध्यप्रदेस के बालाघाट जिला म दस झन माओवादी मन ह आत्मसमर्पण करिन हें। ए सबो नक्सली मन बालाघाट म मध्यप्रदेस के मुख्यमंत्री डॉ. मोहन यादव के आघू हथियार डालिन। एमा सतहत्तर लाख रूपिया के इनामी माओवादी कबीर घलो सामिल हे, जउन मध्यप्रदेस के संगे छत्तीसगढ़ अउ ओडिसा म सक्रिय रहय, जेखर सुरक्षाबल मन ल लंबा बेरा ले तलास रिहीस। बतादन कि आत्मसमर्पण करइया मन म चार झन महिला माओवादी घलो सामिल हें।
उहें, आंध्रप्रदेस के अल्लूरी सीताराम राजू जिला म घलो माओवादी दंपति ह आत्मसमर्पण कर देहे। ए दूनां झन सुकमा जिला म सक्रिय रिहीन अउ दूनों उपर तैंतीस लाख रूपिया के इनाम रिहीस। अल्लूरी सीताराम राजू जिला के पुलिस अधीक्षक अमित बरदार अउ सुकमा के अतिरिक्त पुलिस अधीक्षक नक्सल ऑपरेसन रोहित शाह ह बतइन कि आत्मसमर्पण करइया माओवादी मन ल सरकार के पुर्नवास नीति के तहत सबो सुविधा दे जाही।
इही बीच, छत्तीसगढ़-मध्यप्रदेस सीमा तिर मातघाट इलाका म काली सुरक्षाबल अउ माओवादी मनके बीच मुठभेड़ होइस। ए इलाका खैरागढ़-गंडई-छुईखदान जिला ले लगे हे। बालाघाट पुलिस अधीक्षक आदित्य मिश्रा ह एखर पुष्टि करत बतइन कि मुठभेड़ म कोनो जनहानि नइ होय हे। ऐति, तलासी अभियान के बेरा सुरक्षाबल ह माओवादी मनके बउरे के जिनिस, नक्सल साहित्य अउ दवई के संग आने जिनिस बरामद करे हे।
एसआईआर
मतदाता सूची के विशेष गहन पुनरीक्षण अभियान-एसआईआर के तहत अब तक प्रदेस म दू करोड़ ग्यारा लाख पंचानवे हजार ले जादा गणना प्रपत्र के डिजिटलीकरण करे जा चुके हे, जउन कुल प्राप्त गणना प्रपत्र के निन्यानवे दसमलव आठ-तीन प्रतिसत हे।
उहें, सुकमा कलेक्टर देवेश कुमार धु्रव ह बइतन कि जिला म एसआईआर के काम तेजी ले करे जात हे। सबो मतदाता मन ल गणना प्रपत्र बांटे जा चुके हे।
परीक्षा पे चर्चा-प्रतियोगिता
प्रधानमंत्री नरेंद्र मोदी के ‘परीक्षा पे चर्चा‘ कारीकरम के नौवां कड़ी ले पहिली माई जीओवी पोर्टल म एक ठन राष्ट्रव्यापी प्रतियोगिता चलत हे। ए ऑनलाइन प्रतियोगिता नवा बछर के ग्यारा जनवरी तक चलही। ए प्रतियोगिता म कक्षा छठवीं ले बारहवीं तक के छात्र, शिक्षक अउ पालक भाग ले सकत हें। उहें, पंजीकृत प्रतिभागी मन ल माई जीओवी पोर्टल कोति ले भागीदारी प्रमाण पत्र दे जाही। बतादन कि ए ‘परीक्षा पे चर्चा‘ कारीकरम अवइया बछर जनवरी महिना म आयोजित करे जाही, जेमा देस-विदेस के छात्र, शिक्षक अउ पालक प्रधानमंत्री के संग परीक्षा उपर गोठबात करहीं।
रेलवे-स्पेशल ट्रेन
इंडिगो विमान रद्द होय के बाद अउ जाड़ म यात्रा के बाढ़त दबाव ल देखत भारतीय रेलवे ह काली ले अवइया दू दिन बर कतकोन जोन म नवासी ठन बिसेस रेलगाड़ी सुरू करे हे, जेमा मध्य रेलवे-पुणे ले बेंगलुरू, पुणे ले दिल्ली अउ मुंबई ले दिल्ली के संगे आने-आने रद्दा म चौदह ठन बिसेस रेलगाड़ी के घोसना करे गेहे।