मुख्यमंत्री विष्णुदेव साय ह किहीन हे कि नक्सलवाद आज अपन अंतिम चरण म हवय अउ ए छत्तीसगढ़ बर ऐतिहासिक उपलब्धि हे। ओमन किहीन कि इकतीस मार्च दू हजार छब्बीस तक देसभर ले नक्सलवाद ल खतम करे के प्रधानमंत्री नरेंद्र मोदी अउ केंद्रीय गृह मंत्री अमित शाह के जउन संकलप हे, ओ अब साकार होवत दिखत हे। श्री साय ह किहिन कि अब बस्तर समेत छत्तीसगढ़ म सांति अउ स्थिरता के मजबूत नींव स्थापित होवत हे। नक्सलवाद के सेति कतकोन बछर तक विकास ले पाछू रेहे क्षेत्र म अब रद्दा, शिक्षा, स्वास्थ्य, संचार पर्यटन अउ आजीविका बर नवा रद्दा खुलत हे। बस्तर म अवइया बछर म विकास के गंगा बोहाही।
विजय शर्मा-जवान मुलाकात
उपमुख्यमंत्री विजय शर्मा ह रईपुर के प्राइवेट अस्पताल जाके बीजापुर जिला म मुठभेड़ के दउरान घायल होय तीन जवान मनले भेंट करत उंखर हालचाल जानिन। ओमन घायल जवान ले घटना के जानकारी लीन अउ मुठभेड़ म सहीद होय तीन जवान बर संवेदना जतइन। उपमुख्यमंत्री ह घायल जवान मनके परिवार वाले मनले घलो भेंट करीन।
खबर के मुताबिक पाछू तीन दिसंबर के भैरमगढ़ थाना क्षेत्र म माओवादी मन संग होय मुठभेड़ के दउरान आईईडी बिस्फोट म तीन जवान घायल हो गे रिहीन, जउन मन ल इलाज बर रईपुर लाय गेहे। ए मुठभेड़ म अट्ठारा झिन माओवादी मारे गे रिहीन।
बीजापुर-सुरक्षा कैम्प
बीजापुर जिला के उसूर थाना क्षेत्र के ताड़पाल घाटी म डीआरजी एसटीएफ कोबरा अउ सीआरपीएफ के संयुक्त टीम कोति ले सुरक्षा अउ जन सुविधा कैम्प लगाय गेहे। ए कैम्प के स्थापना ले क्षेत्र म माओवादी विरोधी अभियान ल गति मिलही। बछर दू हजार चैबीस ले अभी तक बीजापुर जिला म तेईस ठिन नवा सुरक्षा कैम्प लगाय गेहे।
इंडिगो-निर्देश
नागरिक उड्डयन मंत्रालय ह इंडिगो ल यात्री मन ले किराया के लंबित भुगतान बिना अबेर करे जारी करे के निरदेस दीन हे। मंत्रालय ह केहे हे कि सबो रद्द या बाधित उड़ान बर भुगतान के काम काली रतिहा आठ बजे तक पूरा हो जाना चाही। भुगतान के काम म कोनो भी कीसम के अबेर होय म तुरते कार्रवाई करे जाही।
खबर के मुताबिक इंडिगो ह आज बिहनिया देसभर म एक सौ नौ उड़ान रद्द करे हे।
एसआईआर
मतदाता सूची के विशेष गहन पुनरीक्षण अभियान-एसआईआर म अभी तक प्रदेस के दू करोड़ ग्यारा लाख ले जादा गणना प्रपत्र के डिजीटलीकरण हो गेहे, जउन कुल मिले गणना प्रपत्र के निन्यानवे दसमलव पांच सून्य प्रतिसत हवय। उहें, गरियाबंद कलेक्टर भगवान ंिसंह उईके ह बतइन कि जिला म एसआईआर के काम तेजी ले होवत हे। ओमन लोगन ले अपील करीन कि एसआईआर के काम म मदद करय अउ अपन फारम तय बेरा म जमा करय।
परीक्षा पे चर्चा-प्रतियोगिता
प्रधानमंत्री नरेंद्र मोदी के परीक्षा पे चर्चा कारीकरम के नौवां कड़ी के पहिली माई जीओवी पोर्टल म एक राष्ट्रव्यापी प्रतियोगिता चलत हे जउन ग्यारा जनवरी तक चलही। ए प्रतियोगिता म कक्षा छठवीं ले बारहवीं तक के छात्र, शिक्षक अउ अभिभावक भाग ले सकत हे। पंजीयन होय प्रतिभागी मन ल माई जीओवी पोर्टल कोति ले भागीदारी के प्रमाण पत्र दे जाही। परीक्षा पे चर्चा अवइया बछर जनवरी महिना म आयोजित करे जाही।
हाईकोर्ट-याचिका खारिज
छत्तीसगढ़ उच्च न्यायालय ह शिक्षक मन कोति ले फेर ले अलग-अलग पेस करे गे स्कूल शिक्षा विभाग म संलग्नीयकरण संबंधी याचिका ल खारिज कर देहे। ए याचिका म शिक्षक मन ह शासन ले ए मांग करे रिहीन कि ओमन ल दू बछर के सेवा अवधि पूरा करे के बाद शिक्षा विभाग म संलग्न करे जाय।
न्यायाधीश ए.के. प्रसाद ह ए मामला के सुनवाई करत किहीन कि वरिष्ठता हमेसा कानूनी नियम अउ कोनो खास कैडर के सेवा म आय के तारीख ले लागू होथे। बछर दू हजार अट्ठारा के नियम म आठ बछर के सेवा अवधि पूरा होय म शिक्षक मन ल शिक्षा विभाग म संलग्न करे गे रिहीस। एखर सेति याचिकाकर्ता मनके मांग ल पूरा करे बर वरिष्ठता के नियम म कोनो कीसम के फेरबदल नइ करे जा सकय।
फ्लाईओवर राशि मंजूर
राजधानी रईपुर के रेलवे स्टेसन ले एयरेपोर्ट तक सुघ्घर यातायात बेवस्था खातिर कई ठिन फ्लाईओवर्स के कार्य योजना तियार करे गेहे। एमा लोक निर्माण विभाग ह गुरूतेग बहादुर उद्यान ले तेलीबांधा म नेता जी सुभाष चैक ले गुरूनानक चैक तक फ्लाईओवर बर एक सौ तिहत्तर करोड़ रूपिया मंजूर करे हे। करीबन डेढ़ किलोमीटर लंबा ए फोर लेन फ्लाईओवर के बने ले शंकरनगर चैक, केनाल रोड क्रासिंग अउ गुरूनानक चैक म यातायात के समस्या दूरिहा होही।
बाल विवाह मुक्त भारत-बेमेतरा
बाल विवाह मुक्त भारत अभियान म महिला बाल विकास विभाग अउ जिला विधिक सेवा प्राधिकरण कोति ले बेमेतरा के सरस्वती शिशु मंदिर म जागरूकता अभियान चलाय गीस। एमा विद्यार्थी मन ल बाल विवाह मुक्त भारत के उद्देस्य, बाल विवाह के दुष्परिणाम अउ बाल विवाह प्रतिसेध अधिनियम के जानकारी दे गीस।
बाल विवाह मुक्त भारत-विशेष कार्यक्रम
बाल विवाह मुक्त भारत अभियान म प्रादेशिक समाचार एकांश रईपुर कोति ले तियार करे गे बिसेस कारीकरम के प्रसारण काली सात दिसंबर के बिहनिया नौ बजके पंद्रह मिनट ले नौ बजके पच्चीस मिनट तक करे जाही। एखर प्रसारण छत्तीसगढ़ स्थित आकाशवाणी के जम्मो केंद्र करही।
अंबेडकर-पुण्यतिथि
राष्ट्र आज भारतरत्न बाबा साहेब डॉक्टर भीमराव अंबेडकर ल उंखर सत्तरवीं पुण्यतिथि महापरिनिर्वाण दिवस म सुरता करत हे। ए बेरा म राष्ट्रपति द्रौपदी मुर्मु, उपराष्ट्रपति सी.पी.राधाकृष्णन, प्रधानमंत्री नरेंद्र मोदी अउ आने कतकोन प्रमुख नेता मन ह आज नई दिल्ली म डॉक्टर अंबेडकर ल फूलमाला चढ़ाइन।
ऐति, छत्तीसगढ़ के राज्यपाल रमेन डेका ह घलो लोक भवन म डॉक्टर अंबेडकर के छाया चित्र म फूलमाला चढ़ाके सुरता करीन। मुख्यमंत्री विष्णुदेव साय ह डॉक्टर अंबेडकर ल सुरता करत किहीन कि बाबा साहेब ह भारत के लोकतांत्रिक संरचना ल नवा दिसा दे हे।
स्पेशल ट्रेन
सीतकाल के दउरान यात्री मनके सुविधा बर रेलवे कोति ले बिलासपुर अउ मुंबई के लोकमान्य तिलक टर्मिनस-एलटीटी के बीच एक फेरा बर स्पेसल टेªन चलाय जाही। ए टेªेन बिलासपुर ले दस दिसंबर के एलटीटी बर रवाना होही। उहें, बारह दिसंबर के ए ट्रेन एलटीटी ले बिलासपुर तक चलही। एखर ठहराव रईपुर, दुरूग, गोंदिया, नागपुर, अकोला, भुसावल, मनमाड़, नासिक, कल्याण अउ ठाणे स्टेसन म दे गेहे। ए स्पेसल ट्रेन म बीस कोच होही।
उहंे, दुरूग अउ दिल्ली के हज़रत निज़ामुद्दीन स्टेसन के बीच घलो एक स्पेसल ट्रेन काली सात दिसंबर ले सुरू होही। ए ट्रेन के ठहराव रईपुर, उसलापुर, पेण्ड्रा रोड, अनूपपुर, शहडोल, आगरा कैंट अउ मथुरा जंक्सन म दे गेहे। ए ट्रेन काली दुरूग ले रवाना होही। उहें, दिल्ली ले ए ट्रेन आठ दिसंबर के चलही। एमा अट्ठारा ठिन कोच के सुविधा दे गेहे।
पीएम रोजगार भारत विकसित योजना
प्रधानमंत्री विकसित भारत रोजगार योजना म रईपुर के दिसा इंस्टीट्यूट ऑफ मैनेजमेंट एंड टेक्नॉलाॉजी संस्थान म जागरूकता कारीकरम राखे गीस। कारीकरम म माई पहुना के रूप म क्षेत्रीय भविष्य नीधि आयुक्त गौरव डोगरा संघरीन। ए बेरा म प्रधानमंत्री विकसित भारत रोजगार योजना के जानकारी दे गीस। योजना म एक लाख रूपिया तक मासिक वेतन पवइया नवा करमचारी मन ल बिसेस लाभ देके प्रावधान करे गेहे। संगेसंग संस्थान ल घलो प्रोत्साहन के रूप म वित्तीय सहायता देवाय जात हे, जेखर ले रोजगार के नवा मउका ल बढ़ावा मिलही। ए बेरा म राष्ट्रीय प्रौद्योगिकी संस्थान-एनआईटी, एमिटी अउ मैट्स यूनिवर्सिटी समेत आने-आने सैक्षणिक अउ औद्योगिक संस्थान के प्रतिनिधि मौजदू रिहीन।
कबड्डी प्रतियोगिता
हरियाणा म राखे गे पैंतीसवां सब जूनियर नेशनल कबड्डी चैंपियनशिप म छत्तीसगढ़ के टीम ह रजत पदक पाय हे। टीम के खिलाड़ी मन ह उपमुख्यमंत्री अउ खेल मंत्री अरूण साव ले भेंट करके अवइया प्रतियोगिता बर अपन तियारी के साझा करीन हे। ए बेरा म श्री साव ह खिलाड़ी मनके सानदार उपलब्धि बर बधाई देत ओमन ल प्रोत्साहन रासि दीन। भारतीय कबड्डी संघ ह ए प्रतियोगिता सत्ताईस ले तीस नवंबर तक हरियाणा म राखे गे रिहीस।
बेमेतरा-फसल बीमा पाठशाला
बेमेतरा जिला के मड़ई गांव म किसान मन बर फसल बीमा पाठसाला के आयोजन करे गीस। ए कारीकरम म किसान मन ल प्रधानमंत्री फसल बीमा योजना, पंजीयन के काम, क्रॉफ कंिटंग अउ प्राकृतिक आपदा के स्थिति म दावा दाखिल करे के काम समेत कतकोन महत्वपूर्ण जानकारी दे गीस।