रेल मंत्री ह बतइन कि छत्तीसगढ़ म कुल छब्बीस रेल परियोजना के काम चलत हे। एमा दल्लीराजहरा-रावघाट, रावघाट-जगदलपुर, गेवरा रोड-पेण्ड्रा रोड अउ धरमजयगढ़- कोरबा नवा रेल लाइन सामिल हे। एखर अलावा राज्य म कई ठिन रेल लाइन दोहरीकरण अउ मल्टी ट्रैकिंग परियोजना घलो प्रगति म हे।
सरकार-फ्लाइट आदेश
नागर विमानन मंत्री राम मोहन नायडू ह इंडिगो उड़ान के रद्द होय अउ देर होय ले पैदा होय स्थिति उपर नागर विमानन मंत्रालय के नियंत्रण कक्ष के सरलग निगरानी करे के आदेस देहे। श्री नायडू ह आज बिहनिया नियंत्रण कक्ष के दउरा करीन अउ जम्मो हितधारक के निर्बाध संपर्क सुनिश्चित करे बर एखर काम के समीक्षा करीन। हवाई अड्डा ऑपरेटर, एयरलाइन अउ हवाई यातायात नियंत्रण के डेटा ल संग्रहित करे जात हे अउ जम्मो एयरलाइन बिसेसकर इंडिगो के संग ओमन ल साझा करे जात हे। देसभर के जम्मो हवाई अड्डा म परिचालन के सामान्य स्थिति बहाल करे बर संसाधन जुटाय अउ समय म सक्रिय कार्रवाई सुनिश्चित करे के निरदेस घलो जारी करे गेहे।
इही बीच, नागरिक उड्डयन महानिदेशालय-डीजीसीए ह एयरलाइन ल चालक दल के सदस्य मन डहार ले बीमारी या विसेस अवकाश ल उंखर अनिवार्य साप्ताहिक विश्राम अवधि के हिस्सा के रूप म गिने ले रोके वाले नियम ल वापिस लहूटा लेहे। जम्मो ऑपरेटर ल लिखे एक पत्र म डीजीसीए ह किहीन कि परिचालन म जारी रूकावट अउ परिचालन के निरंतरता अउ स्थिरता सुनिश्चित करे के संबंध म आने-आने एयरलाइन ले मिले ज्ञापन ल देखत ए नियम ल तत्काल प्रभाव ले हटा दे गेहे। डीजीसीए ह पहिली ए अनिवार्य करे रिहीस कि साप्ताहिक विश्राम के जघा कोनो अवकाश नइ ले जाही।
बतादन कि दिल्ली हवाई अड्डा ले इंडिगो के घरेलू उड़ान आज आधा रतिहा तक रद्द कर दे गेहे। दिल्ली हवाई अड्डा के बयान के अनुसार दूसर जम्मो एयरलाइन के संचालन निर्धारित समय के अनुसार जारी रइही।
वक्फ संपत्ति-जुर्माना
केंद्रीय अल्प संख्यक कार्य मंत्री किरेन रिजिजू ह आश्वासन देहे कि सरकार अवइया तीन महिना तक ओ लोगन मन उपर कोनो जुर्माना नइ लगाही अउ न ही कोनो कड़ा कार्रवाई करही, जउन मन उम्मीद पोर्टल म वक्फ संपत्ति के पंजीकरण नइ कराय हे। ओमन किहीन कि आज आखरी दिन हे अउ लाखों संपत्ति अभी भी पंजीकृत नइ होय हे। नई दिल्ली म पत्रकार मनले गोठबात करत श्री रिजिजू ह किहीन कि ए निर्णय कई सांसद अउ समुदाय के प्रतिनिधि कोति ले मुतवल्लि मनके आगू अवइया चुनौती के हवाला देत अतिरिक्त समय के अनुरोध करे के बाद ले गेहे।
श्री रिजिजू ह किहीन कि सर्वोच्च न्यायालय ह अपन निरदेस म स्पष्ट करे हे कि छै महिना के समय सीमा के बाद तिथि नइ बढा़य जा सकय, लेकिन यदि पंजीकरण प्रक्रिया म कोनो समस्या हे, त न्यायाधीकरण करा एला छै महिना तक आगू बढ़ाय के अधिकार हे।
रिजर्व बैंक-ब्याज दर
रिजर्व बैंक ह आर्थिक विकास ल अउ बढ़ावा देबर आज ब्याज दर म पच्चीस आधार अंक के कटौती करत एला पांच दसमलव दू पांच प्रतिसत कर देहे। रिजर्व बैंक के गवर्नर संजय मल्होत्रा ह चालू वित्त बछर के पांचवा द्विमासिक मौद्रिक नीति म ए निर्णय के घोसना करीन।
एखर ले आवास, ऑटो अउ वाणिज्यिक समेत आने-आने ऋण सस्ता होय के उम्मीद हे।
हिराबाई झरेका-हस्तशिल्प पुरस्कार
छत्तीसगढ़ के हस्तसिल्प कलाकार हिराबाई झरेका बघेल ल बछर दू हजार पच्चीस बर हस्तसिल्प के राष्ट्रीय पुरस्कार प्रदान करे जाही। ए पुरस्कार राष्ट्रपति द्रौपदी मुर्मु नौ दिसंबर के नई दिल्ली के विज्ञान भवन म आयोजित समारोह म प्रदान करही। कारीकरम के अध्यक्षता केंद्रीय कपड़ा मंत्री गिरिराज सिंह ह करही।
हीराबाई झरेका ल ए राष्ट्रीय पुरस्कार धातुकला के क्षेत्र म दे जात हे। आकाशवाणी समाचार ले गोठियात हीराबाई झरेका ल किहीन कि ओमन बारह साल के उमर ले ही ढोकरा सिल्प के क्षेत्र म काम करत हे।
हस्तसिल्प के क्षेत्र म ए पुरस्कार उन उत्कृष्ट सिल्पी मन ल दे जात हे, जेमन के अद्वितीय कौशल ह देस के सांस्कृतिक विरासत ल समृध्द करे हे।
पर्यटन-विशेष टूर पैकेज
छत्तीसगढ़ पर्यटन विभाग अउ आईआरसीटीसी मिलके मुख्यमंत्री जन पर्यटन प्रोत्साहन योजना के तहत रईपुर अउ बस्तर म पर्यटक मन बर बिसेस टूर पैकेज के सुरूआत करे हे। ए योजना के अंतर्गत रईपुर ले चार ठिन प्रमुख टूर पैकेज संचालित करे जाही, जेमा रईपुर सिटी टूर, रईपुर सिटी धार्मिक टूर, रईपुर जगदलपुर सर्किट टूर अउ रईपुर-सिरपुर-बारनवापारा सर्किट टूर सामिल हे। हरेक पैकेज म वातानुकुलित वाहन, हिंदी, अंग्रेजी गाइड, भोजन अउ ट्रैव्हल्स इंश्योरेंस जइसे सुविधा उपलब्ध होही।
मुख्यमंत्री विष्णुदेव साय ह किहीन कि पर्यटन ल जन-जन तक पहुंचाय बर ए महत्वूपर्ण योजना सुरू करे गेहे। एखर ले न केवल आर्थिक विकास ल बल मिलही, बल्कि छत्तीसगढ़ के पहिचान राष्ट्रीय अउ अंतर्राष्ट्रीय स्तर म अउ जादा सशक्त होही।
अमित बघेल-गिरफ्तार
विवादित बयान देके मामला म फरार जोहार छत्तीसगढ़ पार्टी के प्रदेस अध्यक्ष अमित बघेल ह आज रईपुर स्थित देवेन्द्र नगर थाना म आत्मसमर्पण कर देहे। रईपुर पुलिस ह अमित बघेल ल फरार बतात उंखर उपर पांच हजार रूपिया के इनाम घोसित करे रिहीस। पुलिस ह आज ओमन ल रईपुर कोर्ट म पेस करीन। जिंहा ले कोर्ट ह ओमन ल तीन दिन के पुलिस रिमांड म भेज देहे। मिले जानकारी के अनुसार कोर्ट ले ही पुलिस अमित बघेल ल ओखर पैतृक गांव ले जाही। जिंहा ओ अपन मां के अंतिम संस्कार म सामिल होही।
बातों बातों-में
प्रादेशिक समाचार एकांश के समसामयिक बिसय उपर आधारित कारीकरम ‘‘बातों-बातों-में‘‘ म ए दारी बीएसएनएल डहार ले छत्तीसगढ़ के ग्रामीण अउ दुर्गम क्षेत्र मन म दूरसंचार सेवा ल पहुंचाय बर करे जावत परयास उपर केंद्रित रइही। एखर तहत बीएसएनएल के सीजीएम विजय कुमार छबलानी ले लेगे बिसेस भेंटवार्ता के प्रसारण काली छै दिसंबर के एफ.एम. अउ प्रायमरी चैनल म बिहनिया नौ बजे ले करे जाही। एला छत्तीसगढ़ स्थित आकाशवाणी के जम्मों केंद्र रिले करही।
एसआईआर
मतदाता सूची के बिसेस गहन पुनरीक्षण अभियान-एसआईआर के तहत प्रदेस म अब तक करीबन दू करोड़ आठ लाख छियालीस हजार ले जादा गणना प्रपत्र के डिजीटलीकरण करे जा चुके हे, जउन कुल प्राप्त गणना प्रपत्र के अंठानवे दसमलव एक नौ प्रतिसत हरय।
दुरूग जिला म एसआईआर के तहत बूथ लेवल अधिकारी बीएलओ मतदाता मनके घर-घर जाके गणना प्रपत्र इकट्ठा करे के काम करत हे। दुरूग कलेक्टर ह अभिजीत सिंह ह बतइन कि जिला म करीबन छियानवे प्रतिसत गणना प्रपत्र के डिजीटलीकरण करे जा चुके हे।