बिलासपुर के अटल बिहारी वाजपेयी विश्वविद्यालय के छटवां दीक्षांत समारोह आज आयोजित करे गीस। समारोह म पूर्व राष्ट्रपति रामनाथ कोविंद मुख्य अतिथि के रूप म सामिल होइन। कारीकरम के अध्यक्षता राज्यपाल रमेन डेका ह करीन। उहें, विशिष्ट अतिथि के रूप म मुख्यमंत्री विष्णुदेव साय मौजूद रिहीन। समारोह म चौसठ झन शोधार्थी मन ल सोध उपाधि, बियानवे झन विद्यार्थी मन ल गोल्डमेडल अउ छत्तीस हजार ले जादा स्नातक अउ स्नात्कोत्तर के उपाधि करे गीस।
समारोह म पूर्व राष्ट्रपति श्री कोविंद ह स्नातक छात्र मन ल उंखर उज्जवल भविष्य बर सुभकामना दीन अउ ओमन ल शिक्षा, आत्मविस्वास, संकल्प अउ राष्ट्र निर्माण म सक्रिय योगदान देबर प्रेरित करीन। ओमन ह विद्यार्थी मन ले आत्म प्रबंधन, भावनात्मक बुध्दिमता अउ प्रभावी संचार जइसन क्षमता के विकास के जरूरत बतइन।
उहें, राज्यपाल श्री डेका ह किहीन कि विद्यार्थी मन तीर बहुत अवसर अउ संभावना हे अउ शिक्षा ल सिरिफ डिग्री तक सीमित नइ होना चाही। ओमन ह आग्रह करीन कि विद्यार्थी मन जीवन म अइसन काम चुनय, जेमा तनाव कमती हो, पारदर्सिता हो अउ जेखर ले खुद के, समाज के अउ राष्ट्र के सकारात्मक परिवर्तन संभव हो।
समारोह म मुख्यमंत्री श्री साय ह किहीन कि सही शिक्षा वहीं हे, जउन विद्यार्थी मन ल विनम्र बनाय अउ जिम्मेदार बनाय अउ उंखर मनके काम आय।
एसआईआर
मतदाता सूची के विसेस गहन पुनरीक्षण अभियान-एसआईआर म प्रदेस म अभी तक करीबन दू करोड़ आठ लाख छियालीस हजार ले जादा गणना प्रपत्र के डिजीटलीकरण हो गे हवय, जउन ह कुल पंजीकृत मतदाता मनके अंठानवे दसमलव एक नौ प्रतिसत हे।
बस्तर जिला म एसआईआर के तहत बूथ लेवल अधिकारी-बीएलओ मन ह मतदाता मनके घर जाके गणना प्रपत्र ल सकेले के काम करत हे। बस्तर कलेक्टर हरीश एस. ह बतइन कि जिला म करीबन संतानवे प्रतिसत गणना प्रपत्र के डिजीटलीकरण करे जा चुके हे।
लोकसभा-आदिवासी
केंद्र सरकार ह ‘‘धरती आबा जनजातीय ग्राम उत्कर्ष अभियान‘‘ म देसभर के जनजातीय गांव के विकास बर अस्सी हजार करोड़ रूपिया दे हवय। आज लोकसभा म प्रश्नकाल के दउरान पूरक प्रश्न के उत्तर म, जनजातीय मामला के मंत्री जुएल ओराम ह किहीन कि ए योजना के उद्देस्य तिरसठ हजार ले जादा गांव ह बुनियादी ढांचा के कमी ल पूरा करना हे, जेखर ले स्वास्थ्य, शिक्षा अउ बिजली के पहुंच म सुधार हो सकय। ओमन किहीन कि ए पहिली घांव हे कि जब प्रधानमंत्री नरेंद्र मोदी के अगुवई म सरकार ह जनजातीय लोगन के कल्याण बर अतका बड़े धनरासि दे हवय। श्री ओराम ह किहीन कि केंद्र सरकार ह जनजातीय समुदाय बर प्रधानमंत्री जनजातीय आदिवासी न्याय महाअभियान-पीएम जनमन अउ धरती आबा लागू करत हे। केंद्रीय मंत्री ह किहीन कि पीएम जनमन कारीकरम के उद्देस्य बिसेस रूप ले पचहत्तर ठन कमजोर जनजातीय समूह मन ल सामिल करना हे अउ चौव्वन हजार ले जादा घर बनाय जात हे।
आपकी पूंजी आपका अधिकार-शिविर
बीजापुर, कांकेर, नारायणपुर अउ सुकमा जिला म काली पांच दिसंबर के ‘‘आपकी पूंजी, आपका अधिकार‘‘ शिविर के आयोजन करे जाही। ए सिविर के उद्देश्य वित्तीय साक्षरता ल बढ़ावा देना अउ लोगन ल बैंकिंग सेवा बर जागरूक करना हे। सिविर के दउरान कतकोन सरकारी विभाग, बैंक अउ वित्तीस साक्षरता टीम के प्रतिनिधि मन ह सलाह, मदद अउ जरूरी दस्तावेज के सत्यापन के सुविधा दीहीं। उहें, लोगन ल बैंक खाता खोले के बारे म आधार लिंकिंग, डिजिटल लेनदेन के संगेच प्रधानमंत्री जन-धन योजना, प्रधानमंत्री जीवन ज्योति बीमा योजना, प्रधानमंत्री सुरक्षा बीमा योजना अउ अटल पेंशन जइसन योजना के बारे म जानकारी दे जाही। एखर अलावा सुरक्षित बैंकिंग, साइबर सुरक्षा, बचत अउ निवेस अउ सिकायत निवारण तंत्र उपर घलो जागरूकता सत्र कराय जाही।
बाल विवाह मुक्त भारत अभियान
केन्द्रीय महिला अउ बाल विकास मंत्री अन्नपूर्णा देवी ह आज नई दिल्ली म बाल विवाह मुक्त भारत बर सौ दिन के गहन जागरूकता अभियान के सुरूआत करीन। ये अभियान बाल विवाह मुक्त भारत अभियान के पहली बछर पूरा होय के मउका म आयोजित करे गीस। ए मउका म महिला अउ बाल विकास मंत्री ह किहीन कि सरकार ह बछर दू हजार तीस तक भारत ल बाल विवाह मुक्त बनाय के लक्ष्य राखे हे। ओमन किहीन कि समाज, समुदाय अउ लोगन के सक्रिय भागीदारी ले देस, बाल विवाह मुक्त भारत बने के देसा म सरलग आगू बाढ़त हे।
महिला अउ बाल विकास ह किहीन कि हमन ल अउ जादा मजबूती के संग नोनी मनके भलई के दिसा म आगू बढ़ना हे। ओमन कहिन कि हमर मन बर बड़े खुशी के बात हवय कि छत्तीसगढ़ के सूरजपुर जिला ह बाल विवाह मुक्त जिला बन गे हवय।
ए अभियान के अंतर्गत स्कूल, कॉलेज, विश्वविद्यालय अउ पंचायत मन म कतकोन जागरूकता कार्यक्रम कराय जाही। ए अभियान अवइया बछर अंतर्राष्ट्रीय महिला दिवस के मउका म सिराही।
माओवादी मुठभेड़/आईईडी बरामद
बीजापुर जिला के भैरमगढ़ इलाका म काली होय मुठभेड़ म मारे गे माओवादी मनके संख्या बाढ़ के अट्ठारा हो गे हवय। एमा नौ झन महिला माओवादी घलो सामिल हे। मउका ले सुरक्षा बल ल एलएमजी, एके फोर्टीसेवन, एसएलआर, इंसास रायफल, तीन सौ तीन बोर के बंदूक, राकेट लॉन्चर के संगेच ग्रेनेड, रेडियो, स्कैनर, माओवादी साहित्य अउ भारी मात्रा म विस्फोटक सामग्री बरामद करे हे।
ए मुठभेड़ म तीन झन जवान म घलो सहीद होय रिहीन, जउन मन ल बीजापुर के नवा पुलिस लाइन म श्रध्दांजलि दे गीस। एखर बाद जवान मनके शव ल उंखर गांव बर रवाना करे गीस। उहें, घायल होय दू झन जवान के इलाज रईपुर म चलत हे।
बस्तर रेंज के पुलिस महानिरीक्षक सुंदरराज पी. ह बतइन कि ए मुठभेड़ ह तेईस घंटा तक चलिस। ओमन बतइन कि मुठभेड़ म आठ लाख रूपिया के इनामी माओवादी कंपनी नंबर दू के कमांडर वेल्ला मोड़ियम घलो मारे गे हवय।
ऐति, नारायणपुर जिला के छोटेडोंगर थाना क्षेत्र ले आज सुरक्षाबल ल तीन ठन आईईडी बरामद करे हे। सूचना मिले रिहीस कि माड़ीन नदी के तीर पदबेड़ा पगडंडी रद्दा म माओवादी मन डहार ले आईईडी लगाय गे हवय। एखर बाद ओरछा थाना ले जिला पुलिस बल अउ आईटीबीपी के जवान मन तलासी अभियान म निकले रिहीन। सुरक्षा बल के संयुक्त दल ह माओवादी मन डहार ले लगाय गे तीनों आईईडी ल मउकच म निष्क्रिय कर दीन।
मुख्यमंत्री-मोहला/मानपुर
मुख्यमंत्री विष्णुदेव साय काली मोहला-मानपुर जिला के अंबागढ़ चौकी म राखे गे जनजातीय गौरव दिवस अउ प्रतिभा सम्मान समारोह म सामिल होइन। ए मउका म ओमन ह चार सौ पचहत्तर करोड़ रूपिया ले जादा के विकास के काम के भूमिपूजन अउ लोकार्पण करीन। श्री साय ह अंबागढ़ चौकी ल राजस्व अनुभाग बनाय के अउ इहां सबो सुविधा वाले ऑडिटोरियम बनाय के घोसना करीन। ए मउका म मुख्यमंत्री ह महतारी वंदन योजना के लाभार्थी माईलोगिन मनके खाता म बाईसवां किस्त के राशि घलो भेजीन।
कार्यक्रम श्री साय ह किहीन कि प्रधानमंत्री नरेन्द्र मोदी के अगुवई म केन्द्र अउ राज्य सरकार आदिवासी मनके भलई अउ विकास बर संकल्पित हे।
कार्यक्रम म विधानसभा अध्यक्ष डॉक्टर रमन सिंह, उपमुख्यमंत्री विजय शर्मा अउ सांसद संतोष पांडेय ह घलो अपन विचार राखीन। समारोह म आने-आने क्षेत्र म सुघ्घर काम करइया जनजातीय समाज के प्रतिभा मन ल सम्मानित करे गीस।
अउ अब थोरकुन समाचार सार म –
– आज नौसेना दिवस हे। भारतीय नौसेना के उपलब्धि अउ भूमिका के सम्मान म हर बछर चार दिसंबर के ए दिवस मनाय जात हे।
– इंदिरा गांधी राष्ट्रीय मुक्त विश्वविद्यालय म सत्रांत परीक्षा एक दिसंबर ले सुरू हो गेहे, जउन ह अवइया बछर चौदह जनवरी तक बनही।
अउ
– मुंगेली जिला के दाबो के पीएमश्री जवाहर नवोदय विद्यालय म कक्षा छठवीं म प्रवेस बर तेरह दिसंबर के चयन परीक्षा होही।