संसद-शीतकालीन सत्र
उहें, राज्यसभा म बिहनिया ग्यारा बजे कार्यवाही सुरू होइस। आज पहिली घांव राज्यसभा के अध्यक्षता करइया सदन के सभापति सी.पी.राधाकृष्णन के सुवागत करत प्रधानमंत्री नरेंद्र मोदी ह किहीन कि श्री राधाकृष्णन के साधारण पृष्ठभूमि ले उपराष्ट्रपति पद तक के सफर देस के लोकतंत्र के ताकत ल दर्साथे।
प्रधानमंत्री नरेंद्र मोदी ह किहीन कि सीतकालीन सत्र सिरिफ एक परंपरा नइ हे, फेर एहा भारत ल विकास के रद्दा म ले जाय के परयास ल घलो दिखाथे। संसद के सीतकालीन सत्र के पहिली संवाददाता मन ल श्री मेदी ह किहीन कि भारत ह सिध्द कर दे हवय कि लोकतंत्र परिणाम दे सकत हे।
हाफ बिजली बिल योजना
प्रदेस म आज ले दू सौ यूनिट हाफ बिजली योजना लागू हो गेहे, जेखर ले छत्तीस लाख घरेलू बिजली उपभोक्ता मन लाभान्वित होही। मुख्यमंत्री विष्णुदेव साय ह विधानसभा के विसेस सत्र म एखर घोसना करे रिहीन। प्रदेस के अइसन घरेलू उपभोक्ता जिंखर बिजली खपत दू सौ यूनिट तक हे, ओमन ल दू सौ यूनिट तक हाफ बिजली के पूरा फायदा मिलही। दू सौ ले चार सौ यूनिट तक बिजली खपत करइया उपभोक्ता मन ल घलो अवइया एक बछर तक दू सौ यूनिट तक हाफ बिजली बिल के फायदा मिलही। एखर ले छै लाख उपभोक्ता मनले फायदा होही। ए उपभोक्ता मन ल एक बछर तक के छूट दे गे हवय, जेखर ले ओमन ह अपन घर म प्रधानमंत्री सूर्यघर मुफ्त बिजली योजना के तहत सोलर प्लांट लगा सकय।
मुख्यमंत्री-डीजीपी कांफ्रेंस
मुख्यमंत्री विष्णुदेव साय ह किहीन हे कि नवा रईपुर अटल नगर म तीन दिन के पुलिस महानिदेसक सम्मेलन के सफल आयोजन ह राज्य बर गौरवपूर्ण उपलब्धि हवय। ए सम्मेलन म प्रधानमंत्री नरेंद्र मोदी अउ केंद्रीय गृहमंत्री अमित शाह संघरा देसभर के डीजीपी अउ सुरक्षा बल के बड़का अधिकारी मनके मौजूदगी रिहीस। ओमन किहीन कि ए सम्मेलन राष्ट्रीय सुरक्षात्मक नीति, रणनीति अउ समन्वय तंत्र बर बड़े चर्चा के महत्वपूर्ण मंच बने हे।
मुख्यमंत्री ह सम्मेलन के सुचारू संचालन, सुरक्षा, प्रशासनिक समन्वय अउ अतिथि सत्कार म लगे सबो अधिकारी, कर्मचारी अउ सुरक्षा बल बर अपन आभार जतइन हे।
मुख्यमंत्री नगरोत्थान योजना
राज्य शासन ह मुख्यमंत्री नगरोत्थान योजना म तेरह नगर निगम म छब्बीस ठन काम बर चार सौ उनतीस करोड़ पैंतालीस लाख रूपिया मंजूर करे हे। एमा आक्सीजोन, स्पोर्ट्स काम्पलेक्स, अंतर्राज्यीय बस टर्मिनल, ऑडिटोरियम, तालाब सौंदर्यीकरण, सड़क चौड़ीकरण, संघरा दूसर काम सामिल हे।
उपमुख्यमंत्री अउ नगरीय प्रशासन मंत्री अरूण साव ह बतइन कि मुख्यमंत्री नगरोत्थान योजना म पहिली चरण म राज्य के सबो नगर निगम ल सामिल करे गेहे। चरणबध्द रूप ले एला सबो नगरीय निकाय म लागू करे जाही।
स्वास्थ्य केंद्र-मूल्यांकन
प्रदेस के दंतेवाड़ा अउ सुकमा जिला म राष्ट्रीय गुणवत्ता आश्वासन मानक के तहत ग्यारा स्वास्थ्य संस्था के मूल्यांकन विश्व स्वास्थ्य संगठन- डब्ल्यूएचओ के तकनीकी सहयोग ले कराय गे हवय। ए मूल्यांकन म सुकमा जिला के बुरड़ी, कंजीपानी, किस्टाराम अउ गगनपल्ली के संग दंतेवाड़ा जिला के बड़े बचेली, बड़े कमेली, फरसपाल, मडसे, मेलावाड़ा, अरनपुर अउ कोड़ेनार स्वास्थ्य केंद्र सामिल हे।
विश्व एड्स दिवस
आज विश्व एड्स दिवस हरय। ए मउका म केंद्रीय स्वास्थ्य अउ परिवार कल्याण मंत्री जगत प्रकाश नड्डा ह एचआईवी अउ एड्स के बारे म बेहतर समक्ष के जरूरत उपर बात करीन। सोसल मीडिया पोस्ट म ओमन ह एखर प्रसार ल रोके बर एखर उपाय अउ सीघ्र जांच के महत्व के बारे म बतइन। ओमन किहीन कि ए दिन एचआईवी ले संक्रमित अउ प्रभावित लोगन के संग एकजुटता देखाय के अउ एखर ले जुड़े भं्राति ल दूर करे के मउका देथे।
श्री नड्डा ह यहू किहीन कि एचआईवी के बारे म जागरूकता जगाना अउ एड्स ले जुड़े भेदभाव के मुकाबला करना समाज के सामूहिक जिम्मेदारी हे। अेमन ह स्वास्थ्य सेवा तक सबके पहुंच निश्चित करे के अउ एक स्वस्थ भविष्य के निर्माण उपर जोर दीन।
बस्तर ओलंपिक-प्रतियोगिता
बस्तर ओलंपिक के तहत संभाग स्तरीय प्रतियोगिता के आयोजन ग्यारा ले तेरह दिसंबर तक जगदलपुर म होही। एमा जिला स्तरीय प्रतियोगिता के तीन हजार विजेता खिलाड़ी मन ह संभाग स्तरीय प्रतियोगिता म भाग लिही। करीब पांच सौ नक्सल पीड़ित अउ पुनर्वासित नक्सली मन घलो ए प्रतियोगिता म भाग लिही। एथलेटिक्स, तीरंदाजी, बैडमिंटन, फुटबॉल, हॉकी, वेटलिफ्टिंग, कराटे, कबड्डी, खो-खो, वॉलीबॉल अउ रस्सा खीच म ए खिलाड़ी मन ह अपन प्रदर्सन करही।
उपमुख्यमंत्री अरूण साव अउ विजय शर्मा ह आज रईपुर म संभाग स्तरीय प्रतियोगिता के आयोजन के तियारी के समीक्षा करीन। श्री साव ह संभाग स्तरीय प्रतियोगिता के सफल आयोजन बर सबो विभाग ल मिलजुल के तियारी करे के निरदेस दीन। श्री साव ह किहीन कि बस्तर ओलंपिक सिरिफ खेल के आयोजन नइ हे, फेर एहा बस्तर के युवा मनके सशक्तिकरण अउ नेतृत्व के विकास के सुरूआत हे।
बस्तर-पंडुम
बस्तर पंडुम के आयोजन अवइया पांच जनवरी ले पांच फरवरी तक करे जाही। एमा बारह ठन प्रमुख विधा म प्रतियोगिता होही। एमा बस्तर के पारंपरिक नृत्य गीत, रीति-रिवाज, जनजातीय नृत्य, वाद्य यंत्र, सिल्प, पांरपरिक व्यंजन, जनजातीय गीत, वेशभूषा, चित्रकला, आंचलिक साहित्य, जनजातीय नाट्य, जनजातीय आभूषण, पेय पदार्थ अउ वन औषधि के प्रदर्सन उपर आधारित प्रतियोगिता सामिल हे। ए प्रतियोगिता जनपद, जिला अउ संभाग स्तर म आयोजित करे जाही।
प्रतियोगिता के पहिली चरण पांच ले पंद्रह जनवरी तक जनपद स्तर म होही। दूसर चरण बीस ले पचीस जनवरी तक जिला स्तर म अउ अंतिम चरण एक ले पांच फरवरी तक संभाग स्तर म होही। प्रत्येक चरण के विजेता मन ल पुरस्कार अउ प्रमाण पत्र दे जाही।
उपमुख्यमंत्री विजय शर्मा ह रईपुर म आयोजित बइठका म बस्तर पंडुम के आयोजन के तियारी के समीक्षा करीन। ए मउका म श्री शर्मा ह किहीन कि बस्तर पंडुम के आयोजन न सिरिफ बस्तर के सांस्कृतिक धरोहर ल सहेजे के परयास हे, फेर ए क्षेत्र के प्रतिभासाली कलाकार मन ल मंच देके अउ उंखर कला ल प्रोत्साहित करे के सुघ्घर मउका घलो हे।
प्रधानमंत्री आवास योजना
प्रधानमंत्री आवास योजना ग्रामीण के तहत स्वीकृत आवास निर्माण के काम जल्दी सुरू करे बर अउ समय-सीमा म पूरा करे बर बलौदाबाजार-भाटापारा जिला के सबो ग्राम पंचायत म आवास चौपाल के आयोजन करे जावत हे। आवास चौपाल के दउरान हितग्राही मन ल योजना के बारे म जानकारी दे जावत हे। अधिकारी मन ह बतइन कि ए योजना म बछर दू हजार चौबीस-पचीस बर जिला म छब्बीस हजार चार सौ आवास स्वीकृत करे गेहे। एमा ले पचीस हजार पांच सौ ले जादा हितग्राही मनके खाता म पहला किस्त के रासि जारी करे गेहे।
साइबर ठग-गिरफ्तार
दुरूग जिला के साइबर पुलिस टीम ह अड़तालीस लाख रूपिया के साइबर ठगी करे के मामला म दू झन आरोपी मन ल आंध्रप्रदेस ले गिरफ्तार करे हे। आरोपी मनके तीर ले मोबाइल, बैंक पासबुक अउ एटीएम कार्ड जब्त करे गेहे। पुलिस के अनुसार इंस्टाग्राम म फॉरेक्स ट्रेडिंग म निवेस करे बर भेजे गे लिंक उपर क्लिक करे ले प्रार्थी के बैंक खाता ले लगभग अड़तालीस लाख रूपिया के ठगी होय रिहीस।
राज्यपाल-प्रशिक्षु आईपीएस
राज्यपाल रमेन डेका ह किहीन कि पुलिस ल आम जनता ले मानवीय दृष्टिकोण ल धियान म राखत संवेदनसीलता के संग बर्ताव करना चाही। पुलिस के छवि थाना म सिकायत लेके अवइया नागरिक मनले होय व्यवहार ले बनथे। पुलिस अधिकारी मन ल थाना म आय पीड़ित व्यक्ति के मदद बर तत्पर होना चाही। राज्यपाल ह आज राजभवन म भेंट करे बर आय भारतीय पुलिस सेवा के परिवीक्षाधीन अधिकारी मनले ए बात किहीन।