अपन संबोधन म प्रधानमंत्री ह पुलिस नेतृत्व ले आह्वान करीन कि ओमन ह पुलिसिंग के तौर-तरीका ल विकसित होवत राष्ट्र के आसा के अनुरूप ढालय, जेखर ले देस विकसित भारत के लक्ष्य कोति जल्दी ले जल्दी आगू बढ़ सकय।
प्रधानमंत्री ह किहीन कि पुलिस बल म पेसेवर दक्षता, संवेदनसीलता अउ तत्परता ल अउ जादा बढ़ावा देके जरूरत हे। श्री मोदी ह एनएटी ग्रिड के अंतर्गत एकीकृत डाटाबेस के प्रभावी उपयोग करे के अउ आर्टिफिसियल इंटेलीजेंस के माध्यम ले ए प्रणाली ल जोड़के कार्रवाई योग्य खुफिया सूचना तियार करे के जरूरत उपर घलो जोर दीन हे।
मन की बात
आकाशवाणी ले आज प्रधानमंत्री नरेंद्र मोदी के ‘मन की बात‘ कारीकरम के एक सौ अट्ठाईसवां कड़ी के प्रसारण होइस। जेमा प्रधानमंत्री ह किहीन कि लीप इंजन एमआरओ सुविधा, आईएनएस माहे अउ स्काईरूट के इनफिनिटी परिसर भारत के नवा सोच, नवाचार अउ युवा सक्ति ल दर्साथे।
श्री मोदी ह किहीन कि भारत के खाद्यान्न उत्पादन पाछू दस बछर म दस करोड़ टन बाढ़े हे।
प्रधानमंत्री ह किहीन कि नवंबर के महिना देसबर प्रेरणा ले के आय हे। प्रधानमंत्री ह किहीन कि राष्ट्रमंडल खेल के मेजबानी मिलना भारत बर गौरव के बात हे। ओमन किहीन कि एहा देस अउ देसवासी मनके उपलब्धि हवय। श्री मोदी ह किहीन कि ए महिना महिला टीम के क्रिकेट विश्व कप जीते के अलावा कतकोन खिताब भारतीय खिलाड़ी मन ह अपन नांव करे हे। श्री मोदी ह लोगन ले वोकल फॉर लोकल के मंत्र ल अपनाय के आग्रह करीन।
मन की बात-छत्तीसगढ़
प्रधानमंत्री नरेंद्र मोदी के रेडियो कारीकरम मन की बात ल आज छत्तीसगढ़ म घलो सुने गीस। मुख्यमंत्री विष्णुदेव साय ह रईपुर पंडित दीनदयाल उपाध्याय ऑडिटोरियम म मन की बात ल सुनिन अउ एला प्रेरणादायी बतइन। श्री साय ह किहीन कि मन की बात सिरिफ एक कारीकरम नइ हे, फेर एहा देस के सामूहिक चेतना के तिहार बन गे हवय।
बाद म पत्रकार मनले गोठबात करत मुख्यमंत्री ह किहीन कि प्रधानमंत्री ह देसवासी अउ व्यापारी बंधू मन ले स्वदेसी अपनाय के आह्वान करीन हे।
एसआईआर-कार्यक्रम संशोधन
भारत निर्वाचन आयोग ह छत्तीसगढ़ संघरा बारह ठन राज्य अउ केंद्रशासित प्रदेस मन म मतदाता सूची के विशेष गहन पुनरीक्षण-एसआईआर के कारीकरम म संशोधन करे हे। आयोग ह एसआईआर के समय-सीमा ल ग्यारा दिसंबर तक बढ़ा दे हवय। पहिली, ए समय सीमा चार दिसंबर तक रिहीस। मतदाता सूची के रूपरेखा अब सोलह दिसंबर के प्रकासित करे जाही। दावा अउ आपत्ति सोलह दिसंबर ले पंद्रह जनवरी तक करे जा सकत हे। अंतिम मतदाता सूची अवइया बछर चौदह फरवरी के प्रकासित होही।
ए बखत छत्तीसगढ़ संघरा उत्तर प्रदेस, अंडमान अउ निकोबार द्वीप समूह, गोवा, गुजरात, केरल, लक्ष्यद्वीप, मध्यप्रदेस, पुद्दुचेरी, राजस्थान, तमिलनाडु अउ पश्चिम बंगाल म एसआईआर के काम चलत हे।
एसआईआर-गणना प्रपत्र
प्रदेस म ए दिन मतदाता सूची के विशेष गहन पुनरीक्षण अभियान-एसआईआर के काम चलत हे। बूथ लेवल अधिकारी बीएलओ मन ह घर-घर जाके पंजीकृत मतदाता मन के गणना प्रपत्र ल सकेले के अउ डिजीटलीकरण के काम करत हे। अभी तक प्रदेस म करीबन एक करोड़ बयासी लाख ले जादा गणना प्रपत्र के डिजीटलीकरण करे गे हवय, जउन ह कुल पंजीकृत मतदाता मनके लगभग छियासी प्रतिसत हे। प्रदेस म कुल मतदाता मन के संख्या दू करोड़ बारह लाख तीस हजार ले जादा हे।
संसद-शीतकालीन सत्र
संसद के सीतकालीन सत्र काली एक दिसंबर ले सुरू होही। ए सत्र उन्नीस दिसंबर तक चलही।
सत्र सुरू होय ले पहिली आज नई दिल्ली म सर्वदलीय बइठका होइस। बइठका के अध्यक्षता केंद्रीय रक्षा मंत्री राजनाथ सिंह ह करीन। राज्यसभा म सदन के नेता जे.पी. नड्डा, संसदीय कार्य मंत्री किरेन रिजिजू, संसदीय कार्य राज्यमंत्री अर्जुन राम मेघवाल, कांग्रेस नेता गौरव गोगोई, डीएमके नेता तिरूचि शिवा, तृणमूल कांग्रेस नेता डेरेक ओ ब्रायन, शिवसेना नेता नरेश महास्के समेत कतकोन आने नेता बइठका म सामिल होइन। बइठका के बाद श्री रिजिजू ह किहीन कि सरकार ह सदन म सबो राजनीतिक दल के नेता मन ले दूनो सदन के कामकाज म सहयोग के अपील करीन।
ईसीआईनेट
भारत निर्वाचन आयोग ह लोगन ले ईसीआईनेट ऐप डाउनलोड करे के अउ ऐप म ही टैब के उपयोग करके ओला अउ बढ़िया बनाय बर सुझाव मांगिन हे। सुझाव सत्ताईस नवंबर ले सत्ताईस दिसंबर तक दे जा सकत हे। खबर के मुताबिक ईसीआईनेट ऐप के प्रयोग बिहार विधानसभा चुनाव अउ दूसर उपचुनाव के दउरान करे गे रिहीस। ए नवा प्लेटफॉर्म के माध्यम ले मतदाता मनले जुड़े सेवा ल बेहतर बनाय गे हवय। संगेसंग मतदान के प्रतिसत के रूझान जल्दी मिले बर लगे हे। एखर अलावा मतदान के गणना ले जुड़े सेवा घलो जल्दी मिलत हे।
ईसीआईनेट ऐप चुनाव आयोग के अइसन मोबाइल एप्लीकेसन हे, जेमा पहिली ले चलत चालीस ठन आने-आने एप्लीकेसन अउ वेबसाइट के सेवा एक्के जघा म दे गे हवय, जेला गूगल प्ले स्टोर अउ ऐपल स्टोर दूनो ले डाउनलोड करे जा सकत हे।
माओवादी-आत्मसमर्पण
दंतेवाड़ा जिला म आज सैंतीस झन माओवादी मन ह आज पुलिस के आगू आत्मसमर्पण करीन। एमा ले सत्ताईस माओवादी मन उपर कुल पैंसठ लाख रूपिया के इनाम रिहीस। जिला के पुलिस अधीक्षक गौरव राय ह बतइन कि ए सबो माओवादी मन ह दंतेवाड़ा, नारायणपुर, बीजापुर अउ सुकमा जिला के आने-आने इलाका म सक्रिय रिहीन। ए माओवादी मन उपर पुलिस पार्टी उपर हमला करे के रोड कांटे के, बैनर पोस्टर लगाय जइसन कतकोन घटना म सामिल रहय के आरोप हे।
आत्मसमर्पण करइया माओवादी मन ल राज्य सरकार के पुनर्वासनीति म पचास-पचास हजार रूपिया के सहायता रासि संघरा दूसर सुविधा घलो दे जाही।
कोंडागांव न्यायालय भवन-निरीक्षण
कोंडागांव जिला के कलेक्ट्रेट परिसर म बनत नवा न्यायालय भवन के बारे म विवाद चलत हे। इही बीच, छत्तीसगढ़ उच्च न्यायालय के न्यायाधीश सचिन सिंह राजपूत ह काली कोंडागांव प्रवास के दउरान कलेक्ट्रेट परिसर म बनत न्यायालय भवन के निरीक्षण करीन। ए दउरान ओमन ह न्यायालय भवन के जघा ल बदले के निरदेस दीन, जेखर ले स्कूली लइका मनके खेल मैदान सुरक्षित रइही अउ कोंडागांव ल एक ठन पूरा सुविधा वाले न्यायालय परिसर घलो मिलही।
आईआईटी/नपानि-एमओयू
संपत्तिकर प्रणाली ल कुशल अउ पारदर्सी बनाय बर आईआईटी भिलाई अउ नगर पालिक निगम भिलाई के बीच समझौता ज्ञापन म हस्ताक्षर करे गेहे। एमा आईआईटी भिलाई डहार ले नगर पालिक निगम भिलाई के मकान, जमीन अउ व्यवसायिक प्रतिष्ठान के ड्रोन ले सर्वेक्षण करे जावत हे। ए तकनीक के उपयोग करके सहर के सबो संपत्ति के चित्रण करे जाही, जेखर ले उंखर वास्तविक क्षेत्रफल अउ उपयोग के पता लगाय जा सकही। एखर ले निगम क्षेत्र के सबो नवा अउ बिना रिकार्ड वाले संपत्ति के पहिचान करे जा सकही।
बस्तर ओलंपिक-संभाग स्तरीय प्रतियोगिता
बस्तर ओलंपिक के तहत संभाग स्तरीय प्रतियोगिता ग्यारा ले तेरह दिसंबर तक जगदलपुर म होही। संभाग स्तरीय प्रतियोगिता म साढ़े तीन हजार खिलाड़ी मन ह भाग लिही। एमा पांच सौ नक्सल पीड़ित अउ पुनर्वासित नक्सली मन घलो सामिल हे।
उपमुख्यमंत्री अरूण साव अउ विजय शर्मा ह आज रईपुर म संभाग स्तरीय प्रतियोगिता के आयोजन के तियारी के समीक्षा करीन।