नवा रायपुर स्थित भारतीय प्रबंधन संस्थान-आईआईएम म आज ले पुलिस महानिदेसक अउ महानिरीक्षक मनके साठवां अखिल भारतीय सम्मेलन सुरू हो गेहे। तीन दिन तक चलइया ए सम्मेलन के सुभारंभ आज केंद्रीय गृहमंत्री अमित शाह ह करीन। सम्मेलन म राष्ट्रीय सुरक्षा सलाहकार अजीत डोभाल, केंद्रीय गृह राज्य मंत्री, राज्य अउ केंद्रशासित प्रदेस के पुलिस महानिदेसक के संगेसंग केंद्रीय पुलिस संगठन के परमुख मन भाग लेवत हे। उहें, गृह विभाग के परमुख अउ डीआईजी के संगेसंग पुलिस अधीक्षक स्तर के चने गे पुलिस अधिकारी मन घलो ए सम्मेलन म सामिल होवत हे।
‘विकसित भारत सुरक्षा आयाम‘ बिसय उपर राखे गे ए सम्मेलन के उद्देस्य पुलिस के आगू परमुख चुनौती ले निपटे म होय प्रगति के समीक्षा करना अउ विकसित भारत के राष्ट्रीय दृष्टिकोण के अनुरूप सुरक्षित भारत बनाय बर एक ठिन रोड मैप तियार करना हे। सम्मेलन म वामपंथी उग्रवाद, आतंकवाद के मुकाबला, आपदा प्रबंधन, महिला सुरक्षा अउ पुलिसिंग म फोरेंसिक विज्ञान के संगेसंग एआई के परयोग जइसन मुद्दा उपर गोठबात होवत हे।
एखर पहिली, काली देर संझा केंद्रीय गृह मंत्री अमित शाह ह रायपुर पहुंचिन, जिंहा मुख्यमंत्री के संगेसंग बड़का नेता मन केंद्रीय गृहमंत्री के सुवागत करीन। अब तक तय कारीकरम के मुताबिक प्रधानमंत्री नरेंद्र मोदी ह आज देर संझा रायपुर पहुंचही।
प्रधानमंत्री-आत्मनिर्भर भारत संकल्प
प्रधानमंत्री नरेंद्र मोदी ह देस ल आत्म-निर्भर बनाय बर नौ ठिन संकलप लेहे। प्रधानमंत्री ह कर्नाटक के उडुपी म ए मुद्दा उपर लोगन मनले आह्वान करीन। कर्नाटक के उडुपी म श्री कृष्ण मठ म लक्ष कंठ गीता पारायण कारीकरम म ओमन किहीन कि देसवासी मन ले प्राकृतिक खेती ल बढ़ावा दे, बाजरा के परयोग करके स्वस्थ्य जीवन सैली अपनाय, तेल जइसन जिनिस के कम परयोग करे अउ योग ल अपन जिनगी के हिस्सा बनाय के अपील करीन।
प्रधानमंत्री ह किहीन कि हमर पहिली संकलप जल बचाना हे नदिया मन ल बचाना हमर दूसर संकलप हरय। प्रधानमंत्री ह आज जेन नौ ठिन प्रस्ताव के जिकर करीन ओमा ले एक ठिन पुराना पांडुलिपि मन ल बचाना घलो जरूरी हे। प्रधानमंत्री ह किहीन कि भगवत गीता ह केंद्र सरकार के जादा ठिन कारीकरम मन बर प्रेरणा रेहे हे।
माओवादी-आत्मसमर्पण
जगदलपुर म पूना मारगेम के तहत आज दस झिन माओवादी मन ह पुलिस के आगू आत्मसमर्पण करे हे। ए माओवादी म झीरमघाटी हमला के कथित मास्टर माइंड चैतू उर्फ श्यामदादा घलो सामिल हे। ए माओवादी आंध्रप्रदेस के रहइया हरय अउ बस्तर के दरभा, कटेकल्याण, भैरमगढ़ अउ मलांगीर जइसन जघा म सक्रिय रिहीन। चैतू उर्फ श्यामदादा ल दरभा डिवीजन के इंचार्ज बताय जाथे। ए माओवादी मन ह बस्तर आईजी सुंदरराज पी. अउ बस्तर के पुलिस अधीक्षक शलभ कुमार सिन्हा के आगू आत्मसमर्पण करीन।
जानबा के मुताबिक दू हजार तेरह म होय झीरमघाटी हमला म तीस झिन कांग्रेस नेता मन के मउत हो गे रिहीस। उहें, कतकोन झिन घायल होय रिहीन।
विश्वविद्यालय अनुदान आयोग-निर्देश
विश्वविद्यालय अनुदान आयोग ह उच्च शिक्षा संस्थान ले बेरा म परीक्षा कराय अउ उपाधि के संगेसंग प्रमाण पत्र जारी करे के निरदेस देहे। आयोग ह केहे हे कि परीक्षा के देरी ले छात्र मन ल रोजगार पाय म समस्या आथे। आयोग ह केहे हे कि विद्यार्थी मन सैक्षणिक कैलेंडर म बेरा म परीक्षा दे अउ रिजल्ट पाय के हकदार हे। आयोग ह यहू किहीन कि छात्र परिणाम घोसित होय के एक सौ अस्सी दिन के भीतर डिग्री लेके घलो हकदार हवय। नियम के पालन नइ करे के स्थिति म आयोग ह दंडात्मक कार्रवाई करही।
मुख्यमंत्री-ग्लोजिंग यूनिट
मुख्यमंत्री विष्णुदेव साय ह काली जशपुर जिला के गांव नारायणपुर म कुम्हार समाज डहार ले राखे गे विष्णु महायज्ञ अउ चक्र पूजा कारीकरम म सामिल होइन। ए मउका म ओमन गांव गोरिया म माटी कला बोर्ड के माध्यम ले कुंभकार मन बर ग्लेजिंग यूनिट बनाय अउ कुम्हार समाज के मंगल भवन के बिस्तार बर पच्चीस लाख रूपिया देके घोसना करीन। मुख्यमंत्री ह कारीकरम म सरगुजा संभाग के सौ कुम्हार मन ल इलेक्ट्रानिक चाक घलो बांटिन।
श्रम संहिता
केंद्र सरकार डहार ले लागू चार ठिन नवा श्रम संहिता उपर छत्तीसगढ़ म क्षेत्रीय भविष्य निधि आयुक्त गौरव डोगरा ह किहीन कि नवा श्रम संहिता के उद्देस्य समग्र आर्थिक विकास, मजूर मनके सामाजिक सुरक्षा अउ उंखर अधिकारी ल सुरक्षित रखे के संगेसंग औद्योगिक विकास करना हे।
बातों बातों-में
प्रादेशिक समाचार एकांश के समसामयिक बिसय उपर आधारित कारीकरम ‘‘बातों-बातों-में‘‘ म ए दारी केंद्र सरकार डहार ले लागू करे गे नवा श्रम संहिता मन उपर केंद्रित रइही। एमा छत्तीसगढ़ के क्षेत्रीय भविष्य नीधि आयुक्त गौरव डोगरा ले लेगे बिसेस भेंटवार्ता के प्रसारण काली उनतीस नवंबर के एफ.एम. अउ प्रायमरी चैनल म बिहनिया नौ बजे ले करे जाही। एला छत्तीसगढ़ स्थित आकाशवाणी के जम्मों केंद्र रिले करही।
इफ्फी
छप्पनवां भारतीय अंतर्राष्ट्रीय फिल्मोत्सव-इफ्फी आज गोवा के राजधानी पणजी म एक ठिन जोरदरहा कारीकरम के संग सिरागे। ए समारोह म गोवा के मुख्यमंत्री प्रमोद सावंत, सूचना अउ प्रसारण सचिव संजय जाजू अउ समारोह के अध्यक्ष, शेखर कपूर के संगेसंग कतकोन बड़का लोगन मन सामिल होइन। इफ्फी म प्रदर्सित करे जाय आखिरी फिल्म थाई निर्देसक राचापूम बूनबंचचोक के ‘ए यूज़फूल घोस्ट‘ रिहीस। ए फिल्म एक ठिन ब्लैक कामेडी हरय। फिल्म महोत्सव के सर्वश्रेष्ठ फिल्म ल गोल्डन पीकॉक पुरस्कार ले सम्मानित करे गीस। संगेसंग आईसीएफटी यूनेस्को गांधी मेडल, सिल्वर पीकॉक अवार्ड अउ एक ठिन स्पेसल जूरी प्राइज के संगेसंग आने पुरस्कार दे जाही। समापन समारोह म जाने-माने अभिनेता रजनीकांत ल उंखर सिनेमा यात्रा के पचास साल पूरा होय उपर ओमन ल सम्मानित करे जाही। एसो इफ्फी म इक्यासी ठिन देस के दू सौ चालीस ले जादा फिल्म देखाय गीस।
रेलवे-छत्तीसगढ़ एक्सप्रेस
दक्षिण पूर्व मध्य रेलवे ले चलइया रेलगाड़ी कोरबा-अमृतसर-बिलासपुर छत्तीसगढ़ एक्सप्रेस के दू मिनट के अस्थायी ठहराव पश्चिम मध्य रेलवे के सांची स्टेसन म दू दिन बर दे जात हे। रेलवे प्रशासन ह चेटियागिरि विहार वर्षगांठ अउ पवित्र अवशेष मनके प्रदर्सन के उपलक्ष्य म सांची स्तूप परिसर म उनतीस अउ तीस नवंबर तक होवइया कारकीरम म सामिल होय बर अवइया श्रध्दालू मनके सुविधा बर ए बिसेस बेवस्था करे गेहे।
रेलगाड़ी के अस्थाई ठहराव ले सांची स्तूप म होवइया धार्मिक अउ सांस्कृतिक कारीकरम मन म भाग लेवइया यात्री मन ल अवई-जवई म सहूलियत होही।
अउ अब पेस हे मौसम के हाल…
मौसम विभाग के मुताबिक उत्तरी छत्तीसगढ़ के जशपुर, सामरीपाट, पेण्ड्रा रोड जइसन कतकोन जघा म ए बेरा सीतलहर चलत हे। उहें, तापमान म दू ले चार डिग्री के गिरावट दरज करे गेहे। एक ठिन चक्रवाती तूफान दित्वाह श्रीलंका के तीरतखार म स्थित हे। एखर उत्तर दिसा कोति आगू बाढ़े के संभावना हे। एखर ले प्रदेस के मौसम म थोरबहुत असर पड़ सकथे। मौसम विभाग ह तीस नवंबर के मध्य अउ दक्षिण छत्तीसगढ़ म बदली बारिस के संभावना बताय हे।
अउ अब थोरकुन समाचार सार म –
– बेमेतरा जिला रोजगार अउ स्व-रोजगार मार्गदर्सन केंद्र डहार ले अवइया एक, दू अउ तीन दिसंबर के कार्यालय परिसर म बिहनिया ग्यारा बजे ले प्लेसमेंट कैंप के आयोजन करे जाही। एखर माध्यम ले सिक्यूरिटी गार्ड के दू सौ पद म भर्ती करे जाही।
अउ
– दुरूग पुलिस ह अंतर्राज्यीय गांजा तस्कर गिरोह के भागे मुख्य आरोपी ल गिरफ्तार कर लेहे। ए मामला म तीन झिन आरोपी मन ल पहिलीच ले गिरफ्तार कर ले गेहे। एखर मन के तीर ले तीन कुंटल ले जादा साठ लाख रूपिया के गांजा बरामद करे गेहे।