उहें, उपराष्ट्रपति सी.पी. राधाकृष्णन ह किहीन कि संविधान ह स्वतंत्रता संग्राम म भाग ले लाखों देसवासी मनके सामूहिक ज्ञान, बलिदान अउ सपना के चिन्हा हरय।
प्रधानमंत्री नरेन्द्र मोदी ह संविधान दिवस के मउका म देस के नाव चिट्ठी लिखके बछर उन्नीस सौ उनचास म संविधान के ऐतिहासिक रूप ल अंगीकार करे जाय के सुरता करीन। राष्ट्र के प्रगति म संविधान के स्थायी भूमिका के जिकर करत ओमन अपन चिट्ठी म लिखे हे कि बछर दू हजार पन्द्रह म सरकार ह ए पवित्र दस्तावेज के सम्मान म छब्बीस नवंबर ल संविधान दिवस के रूप म घोषित करीन। ओमन किहीन कि भारत ह एक ठिन विकसित अउ मजबूत राष्ट्र बने के दिसा म आगू बाढ़त हे।
ऐति, प्रदेस म घलो संविधान दिवस के मउका म कतकोन कार्यक्रम चलत हे। मुख्यमंत्री विष्णुदेव साय ह रायपुर के टाउन हॉल म राखे गे ‘‘हमारा संविधान, हमारा स्वाभिमान‘‘ कार्यक्रम म सामिल होइन। ए मउका म मुख्यमंत्री ह इहां आय लोगन मनके संग संविधान के प्रस्तावना के सामूहिक वाचन करीन अउ संविधान के प्रति अपन निष्ठा व्यक्त करीन। ए दउरान मुख्यमंत्री ह संविधान दिवस उपर राखे गे प्रदर्सनी के संगेसंग संविधान उपर आधारित लघु फिल्म ल देखीन। ए मउका म मुख्यमंत्री ह किहीन कि संविधान ह हरेक लोगन मन ल स्वतंत्रता के संग अपन बात राखे के अधिकार देथे। ओमन किहीन कि विधायक अउ सांसद जइसन पद उपर आम लोगन मनके पहुंचना संविधान के उदार अउ लोकतांत्रिक व्यवस्था के परिणाम हरय।
मुख्यमंत्री ह आज रायपुर स्थित अंबेडकर चौक म भारत रत्न डॉक्टर भीमराव अंबेडकर के मूर्ति उपर फूलमाला चढ़ाके सादर नमन करीन। ओमन किहीन कि भारत के संविधान न सिरिफ हमर अधिकार के रक्षा करथे, भलूक लोगन मनके कर्तव्य के प्रति हमन ल जागरूक घलो कराथे।
संविधान दिवस के मउका म आज राजभवन सचिवालय के अधिकारी-कर्मचारी मन ह संविधान के प्रस्तावना के सामूहिक वाचन करीन।
त उहें, मंत्रालय म मुख्य सचिव विकासशील ह अधिकारी अउ कर्मचारी मन ल संविधान के उद्देशिका के सामूहिक वाचन करईन।
ऐति, दक्षिण पूर्व मध्य रेलवे के रायपुर मंडल म मंडल रेल प्रबंधक दयानंद ह संविधान के प्रस्तावना के वाचन करीन। ए मउका म रायपुर रेलमंडल के जम्मों विभाग के अधिकारी अउ कर्मचारी मन सामिल होइन।
खाद्य सचिव-पत्रकारवार्ता
प्रदेस म अवइया साल तक स्मार्ट-पीडीएस योजना लागू कर दे जाही। ए योजना के तहत रासनकार्ड प्रबंधन, आपूर्ति श्रृंखला प्रबंधन, अनाज बांटे के काम के संगेसंग आने-आने काम करे जाही। ए जानबा खाद्य नागरिक आपूर्ति अउ उपभोक्ता संरक्षण विभाग के सचिव रीना बाबा साहेब कंगाले ह आज नवा रायपुर म पत्रकार मनले गोठबात के दउरान दीन। ओमन पाछू दू साल म अपन विभाग म करे गे कामकाज के बारे म बतइन।
श्रीमती कंगाले ह बतइन कि स्मार्ट पीडीएस योजना के तहत रासन कार्ड आवेदन ऑनलाइन ले जाही। एखरे संग ‘‘ग्रेन एटीएम‘‘ योजना घलो लागू करे जाही। ए योजना म रासन कार्ड ल रासन दुकान म एटीएम कार्ड जइसन स्कैन करके अनाज ले जा सकही। खाद्य सचिव ह बतइन कि राज्य के दूरदराज वाले ग्राम पंचायत मन म चलाय जात उचित मूल्य के आठ सौ तेरह दुकान मन ल अवइया बेरा म ऑनलाइन करे जाही। संगेसंग ए दुकान मन म गोदाम भवन घलो बनाय जाही। खाद्य सविच ह तीन साल के भीतर राज्य के जम्मो किसान मन ल डिजीटल किसान ऋण पुस्तिका मुफत म दिही। खाद्य सचिव ह किहीन कि राज्य म करीबन तिरपन हजार राजस्व मामला लंबित हे। मामला के सुनवाई बर राज्य के जिला उपभोक्ता फोरम म ई-कोर्ट बनाय गेहे।
एसआईआर
प्रदेस म ए बेरा मतदाता सूची के विशेष गहन पुनरीक्षण-एसआईआर के काम चलत हे। ए अभियान के तहत बढ़िया काम अउ तय बेरा म काम ल पूरा करइया बूथ लेवल अधिकारी-बीएलओ मन ल प्रशस्त्रि पत्र के संग इनाम के रूप म पइसा दे जाही।
मुख्य निर्वाचन पदाधिकारी कार्यालय के अधिकारी मन ह बतईन कि राज्य के हरेक विधानसभा क्षेत्र म, जिहां कोनों भी भाग संख्या उपर आठ सौ या ओखर ले जादा पंजीकृत मतदाता हे, उहां अट्ठाईस नवंबर तक गणना फॉर्म वितरण, संग्रहण अउ डिजिटाइजेशन के काम ल पूरा करइया पहिली तीन बीएलओ ल राष्ट्रीय मतदाता दिवस म पच्चीस जनवरी के दिन इनाम दे जाही। एमा राज्य के जम्मों नब्बे विधानसभा क्षेत्र ले तीन-तीन बीएलओ माने दू सौ सत्तर बीएलओ ल जिला स्तरीय कार्यक्रम म पुरस्कार दे जाही। पुरस्कार बर चुने गे बीएलओ मन ल प्रशस्ति पत्र के संग पांच हजार रूपिया के प्रोत्साहन रासि दे जाही।
मुख्य निर्वाचन पदाधिकारी यशवंत कुमार ह कलेक्टर अउ जिला निर्वाचन अधिकारी मन ल निरदेस देहे कि, ओमन पात्र बीएलओ के पहिचान अउ पुरस्कार वितरण ले जुड़े जम्मों काम ल बेरा म पूरा करय।
माओवादी-आत्मसमर्पण
बीजापुर जिला म आज ‘‘पूना मारगेम यानी पुनर्वास ले पुनर्जीवन‘‘ नीति के तहत इकचालीस झिन माओवादी मन ह आत्मसमर्पण करे हे। एमा ले बारह झिन माईलोगिन माओवादी घलो सामिल हे। आत्मसमर्पण करइया ए जम्मो माओवादी मन उपर कुल एक करोड़ उन्नीस लाख रूपिया के इनाम घोसित रिहीस। केंद्रीय रिजर्व पुलिस बल-सीआरपीएफ के डीआईजी डी.एस. नेगी अउ बीजापुर जिला के पुलिस अधीक्षक डॉक्टर जितेंद्र कुमार यादव के आगू ए माओवादी मन ह आत्मसमर्पण करीन। आत्मसमर्पण करइया मन साउथ सब जोनल ब्यूरो के कैडर, डीकेएसजेडसी, तेलंगाना स्टेट कमेटी अउ धमतरी-गरियाबंद-नुआपाड़ डिवीजन के सदस्य मन सामिल हे।
दुर्घटना
जांजगीर-चांपा जिला के सुकली गांव म पाछु रतिहा होय एक ठिन सड़क दुर्घटना म सेना के दू झिन जवान के संगेसंग पांच झिन लोगन के मउत होगे। उहें, तीन झिन आने मनखे मन घायल होगे हे, जेखर मनके इलाज बिलासपुर के अस्पताल म चलत हे।
हमर संवाददाता ले मिले जानबा के मुताबिक नवागढ़ ले एक मनखे मन एक ठिन बिहाव कार्यक्रम म सामिल होय बर पंतोरा गांव गे रिहीन। उहां ले लहुटत बेरा इंखर मनके गाड़ी ह राष्ट्रीय राजमार्ग क्रमांक-उनचास म सुकली गांव के तीर एक ठिन ट्रक ले टकरा गे। टक्कर होतेच मउका म तीन झिन लोगन के परान छूट गे। दू झिन आने मनखे मनके इलाज के दउरान मउत होगे। जम्मों मृतक नवागढ़ के रहइया रिहीस।
ईओडब्ल्यू-चालान
सराब घोटाला मामला म आर्थिक अपरध अन्वेषण ब्यूरो-ईओडब्ल्यू ह आज आबकारी विभाग के तत्कालीन आयुक्त अउ सचिव निरंजन दास के संगेसंग छै झिन आरोपी मनके खिलाफ रायपुर के विशेष अदालत म चालान पेस करीन। ए मामला म अब तक पचास आरोपी मनके विरूध्द चालान पेस करे जा चुके हे।
श्रम संहिता
केंद्र सरकार डहार ले लागू करे गे चार ठिन नवा श्रम संहिता के आने-आने संगठन मन ह सुवागत करे हे। भारतीय मजदूर संघ के पदाधिकारी राधेश्याम जायसवाल ह किहीन हे कि चार नवा श्रम संहिता के लागू होय ले हर सेक्टर म काम करइया मजूर मन ल एखर फायदा मिलही।
इफ्फी
गोवा म चलत छप्पनवां अंतर्राष्ट्रीय फिल्म महोत्सव म आज मैक्सिको के नाटकीय फिल्म – द डेविल स्मोक्स-एंड सेव्स द बर्न्ट माचिस इन द सेम बॉक्स के ‘एक डायरेक्टर के बेस्ट डेब्यू फीचर फिल्म‘ श्रेणी के तहत दिखाय गीस।
निर्देशक अर्नेस्टो मार्टिनेज बुसियो फिल्म के प्रीमियर म सामिल होय अउ समारोह के हिस्सा बने उपर खुसी जतईन। ए फिल्म ल एसो बर्लिनले अंतर्राष्ट्रीय फिल्म महोत्सव म बेस्ट फर्स्ट फीचर फिल्म के पुरस्कार मिल चुके हे।