भारत निर्वाचन आयोग ह किहीन हे कि विशेष गहन पुनरीक्षण-एसआईआर के दूसरइया चरण म निन्यानवे प्रतिशत ले जादा गणना प्रपत्र मतदाता मन ल बांटे गेहे। अब तक पचास करोड़ पचास लाख ले जादा गणना प्रपत्र बांटे गेहे।
ऐति, छत्तीसगढ़ के जम्मों विधानसभा क्षेत्र मन म घलो मतदाता सूची के विशेष गहन पुनरीक्षण-एसआईआर के काम चलत हे। बूथ लेवल अधिकारी-बीएलओ मन ह घर-घर जाके मतदाता मन डहार ले भरे गे गणना प्रपत्र मन ल जमा करे के काम करत हे। अब तक प्रदेस म एक करोड़ बारह लाख ले जादा गणना प्रपत्र मनके डिजि-टाइ-जिशेन करे गेहे, जउन ह पंजीकृत मतदाता मनके करीबन तिरपन प्रतिसत हे।
ओति, विशेष गहन पुनरीक्षण-एसआईआर के तहत मुंगेली जिला के अधिकारी मन ह बहुते बढ़िया काम करे हे। ए जानकारी जिला कलेक्टर कुंदन कुमार ह आज मनियारी म राजनीतिक दल मनके बइठका म दीन। ओमन बतईन कि गणना प्रपत्र भरे अउ डिजि-टाइ-जिशेन के काम म मुंगेली जिला ह प्रदेसभर म आगू हवय।
खबर के मुताबिक एसआईआर के दूसरइया चरण ह चार नवंबर ले नौ ठन राज्य अउ तीन ठन केन्द्रसासित प्रदेस मन म सुरू करे गेहे, जउन ह चार दिसंबर तक चलही।
भाजपा-बैठक
मतदाता सूची के विशेष गहन पुनरीक्षण-एसआईआर ल लेके आज रायपुर के प्रदेस भाजपा कार्यालय म बइठका राखे गीस। ए बइठका म भाजपा के राष्ट्रीय महामंत्री तरूण चुग, प्रदेस अध्यक्ष किरण सिंह देव, उपमुख्यमंत्री विजय शर्मा के संगेसंग सांसद, मंत्री, विधायक अउ भाजपा के बड़का पदाधिकारी मन सामिल होइन। एसआईआर ल लेके श्री चुग ह भाजपा नेता मन ल जरूरी दिसा-निरदेस दीन।
उहें, उपमुख्यमंत्री विजय शर्मा ह भाजपा के जम्मों सांसद अउ विधायक मन ल बूथ तक जाय के निरदेस दीन।
मुख्यमंत्री-रेल/स्वास्थ्य मंत्री मुलाकात
मुख्यमंत्री विष्णुदेव साय ह आज नई दिल्ली म रेलमंत्री अश्विनी वैष्णव ले भेंट करीन। ए दउरान दूनों झन के बीच छत्तीसगढ़ म रेल सुविधा के विस्तार अउ नवा रेल प्रोजेक्ट के संबंध म चर्चा करे गीस। श्री साय ह रेल मंत्री ले आग्रह करीन कि मंजूर करे गे परियोजना मन ल समय-सीमा म पूरा करे जाय, जेखर ले लोगन अउ व्यापारी मन ल रेल सुविधा मिल सकय।
उहें, मुख्यमंत्री श्री साय ह केन्द्रीय स्वास्थ्य मंत्री जगत प्रकाश नड्डा ले घलो भेंट करीन। ए दउरान स्वास्थ्य ले जुड़े चिकित्सा सुविधा उपर चर्चा करे गीस।
माओवादी-आत्मसमर्पण
नारायणपुर जिला म आज दंडाकारण्य स्पेशल जोनल कमेटी के तीन झन हथियारबंद माओवादी समेत अट्ठाईस झन माओवादी मन ह आत्मसमर्पण कर दीन। एमा उन्नीस झिन महिला माओवादी घलो सामिल हे। ए माओवादी मन उपर नवासी लाख रूपिया के इनाम घोषित रिहीस। ए माओवादी मन ह बस्तर रेंज के पुलिस महानिरीक्षक सुंदरराज पी. अउ नारायणपुर के पुलिस अधीक्षक के संगेसंग बड़का अधिकारी मनके आगू म आत्मसमर्पण करीन हे।
एसबीआई-श्रम संहिता
भारतीय स्टेट बैंक-एसबीआई ह किहीन हे कि नवा श्रम संहिता के कामकाज ले अर्थव्यवस्था ल बढ़ावा मिलही। जेखर ले देस म बेरोजगारी दर म कमी आही। बैंक के एक रिपोर्ट के मुताबिक नवा श्रम संहिता ले बेरोजगारी दर म एक दशमलव तीन प्रतिशत तक के कमी आ सकत हे। एखर ले ससत्तर लाख उपरहा रोजगार मिल सकही। रिपोर्ट म बताय गेहे कि इही महीना के इक्कईस तारीख ले लागू होय नवा श्रम संहिता के कामकाज ले श्रम बल म नियमित रोजगार के हिस्सेदारी कम से कम पन्द्रह प्रतिसत बाढ़ जही।
ऐति, छत्तीसगढ़ के कोरबा जिला के भारतीय मजदूर संघ के महिला प्रकोष्ठ के अध्यक्ष पूर्णिमा म साहू ह नवा श्रम संहिता ल माईलोगिन मनके हित म बतईन।
इन्वेस्टर कनेक्ट कार्यक्रम
नई दिल्ली म राखे गे इन्वेस्टर कनेक्ट कार्यक्रम म छत्तीसगढ़ राज्य ल छह हजार आठ सौ करोड़ रूपिया ले जादा के निवेस के प्रस्ताव मिले हवय। स्टील, ऊर्जा अउ पर्यटन के संगेसंग कई ठिन क्षेत्र के प्रमुख कंपनी मन ह राज्य म उद्योग लगाय, होटल निर्माण अउ वेस्ट टू-एनर्जी प्रोजेक्ट करे खातिर सहमति जताय हे। ए परियोजना ले राज्य म अवइया बछर म तीन हजार ले जादा रोजगार के अवसर मिल सकथे। अब तक छत्तीसगढ़ ल सात करोड़ नब्बे लाख रूपिया के निवेस के प्रस्ताव मिल गे हवय।
इन्वेस्टर कनेक्ट कार्यक्रम म मुख्यमंत्री विष्णुदेव साय ह उद्योग जगत के प्रमुख निवेसक, बिसेसज्ञ अउ प्रतिनिधि मन ले छत्तीसगढ़ म निवेस के संभावना उपर चर्चा करीन। कार्यक्रम म प्रदेस के उद्योग मंत्री लखनलाल देवांगन ह घलो मौजूद रिहीन।
भारत अंतर्राष्ट्रीय व्यापार मेला
नई दिल्ली के भारत मंडपम म राखे गे भारत अंतर्राष्ट्रीय व्यापार मेला म काली छत्तीसगढ़ के लोक कलाकार मन ह अपन लोक कला पेस करीन। ए दउरान गौरा-गौरी, भोजली, राउत नाचा, सुआ गीत, पंथी गीत अउ कर्मा नाच जइसन प्रस्तुति दे गीस। ए दउरान मुख्यमंत्री विष्णुदेव साय ह छत्तीसगढ़ स्टॉल ल देखीन। मुख्यमंत्री ह किहीन कि छत्तीसगढ़ कला, संस्कृति अउ परंपरा के भूमि हरय। इहां तीज-तिहार, लोक नाचा के संगेसंग पारंपरिक कला मन ल घलो आज कलाकार मन ह सहेज के राखे हवय।
संविधान दिवस
देसभर म काली संविधान दिवस मनाय जाही। एसो के बिसय हे – ‘‘हमारा संविधान-हमारा स्वाभिमान‘‘। प्रमुख कार्यक्रम ल नई दिल्ली म संविधान सदन के केन्द्रीय कक्ष म राखे जाही। ए दउरान राष्ट्रपति द्रौपदी मुर्मू, उपराष्ट्रपति सीपी राधाकृष्णन, प्रधानमंत्री नरेन्द्र मोदी, लोकसभा अध्यक्ष ओम बिरला, केन्द्रीय मंत्री अउ सांसद मन ह ए कार्यक्रम म सामिल होही।
रायगढ़-करियर मार्गदर्शन कार्यक्रम
रायगढ़ के रामलीला मैदान म काली करियर मार्गदर्शन कार्यक्रम के आयोजन करे गीस। एमा सुपर-थर्टी के संस्थापक पद्मश्री आनंद कुमार सामिल होइन। ओमन विद्यार्थी मन ल सफलता, संघर्ष, लक्ष्य अउ मेहनत के मूलमंत्र समझईन। ओमन किहीन कि युवा मन ह करियर बनाय खातिर योजनाबद्ध तरीका ले आगू बाढ़य।
उहें, वित्त मंत्री ओपी चौधरी ह युवा मन ले करियर संबंधी पुस्तक पढ़े, परीक्षा संबंधी जानकारी रखे अउ सही तरीका ले आगू बाढ़े के अपील करीन। ओमन जिला के सौ ले जादा हुशियार लइका मन ल पांच-पांच हजार रूपिया स्वेच्छानुदान रासि देके घोसना करीन।
ए दउरान छत्तीसगढ़ लोक सेवा आयोग म चुने गे विद्यार्थी मनके सम्मान करे गीस।
इफ्फी-प्रीमियर
गोवा म राखे गे छप्पनवां भारतीय अंतर्राष्ट्रीय फिल्म महोत्सव के सिनेमा ऑफ द वर्ल्ड समूह म आज रूस के फिल्म ट्रांसपेरेंट लैंड्स के प्रदर्सन करे गीस। दिमित्री डिविडोव डहार ले निर्देशित अउ मैक्सिम डोब्रो-मिस्लोव डहार ले बनाय गे ए फिलिम म तीन झन सियान मनखे मनके कहानी हवय, जउन ह एक ठन गांव के आखिरी निवासी हरय अउ ओमन कई ठिन समस्या के सामना करत अपन जिनगी ल जीये के परयास करत हे।
तारा साहू-बीसी सखी अवार्ड
दुरूग जिला के नंदिनी-खुर्दनी ग्राम पंचायत के तारा साहू ल ‘उत्कृष्ट बीसी सखी अवार्ड ले सम्मानित करे गीस। ए सम्मान ओमन ल गांव स्तर म बहुत बढ़िया बैंकिंग सेवा उपलब्ध कराय बर दे गीस। काली रईपुर म राखे गे राज्य स्तरीय कार्यशाला म राज्य ग्रामीण आजीविका मिशन-एसआरएलएम के मिशन संचालक ह ए सम्मान दीन। तारा साहू के अनुपस्थिति म एमीन दीदी ह ए सम्मान ग्रहण करीन।
खबर के मुताबिक तारा साहू ह बछर दू हजार अट्ठारह म बिहान स्व-सहायता समूह ले जुड़के बीसी सखी के रूप म काम सुरू करे रिहीन। अभी तारा साहू ह लोगन मनके साढ़े चार हजार ले जादा बैंक खाता खोल डरे हे।
शीत लहर-दिशा-निर्देश
राज्य म बाढ़त जाड़ अउ शीतलहर ल ध्यान म राखत स्वास्थ्य विभाग डहार ले जरूरी दिसा-निरदेस जारी करे हे। स्वास्थ्य विभाग के अधिकारी मन ह किहीन हे कि सीतलहर के दउरान लोगन मन ह जरूरत पड़े म घर ले बाहिर निकले अउ हो सके त यात्रा ले बचय। जाड़ ले बाचे खातिर गरम कपड़ा पहिने जादा जाड़ करे म अंगरी म पीला पन, सफेदा पन अउ सुन्न जनावय त तुरते डॉक्टर ले संपर्क करय।