ईओडब्ल्यू-एसीबी छापा
आर्थिक अपराध अन्वेषण ब्यूरो अउ एंटी करप्शन ब्यूरो के टीम ह आज आबकारी अउ डीएमएफ ले जुड़े मामला म प्रदेस के बीस ले जादा जघा म छापामार कार्रवाही करिन। राजधानी रइपुर, दुरूग, बिलासपुर, जगदलपुर, अंबिकापुर अउ कोंडागांव जिला म ए कार्रवाही करे गीस। टीम ह रइपुर म पूर्व आबाकारी आयुक्त निरंजन दास अउ कारोबारी हरपाल अरोरा के ठिकाना म दबिस देके दस्तावेज खंगालिन।
उहें, सरगुजा म जांच टीम ह पशु चिकित्सक डॉ. तनवीर अहमद अउ कारोबारी अमित अग्रवाल के घर अउ दफ्तर म छापामारी करिस। इंहा जांच टीम ह लेनदेन अउ विभागीय रिकार्ड ले जुड़े कागजात के जांच करत हे। अइसने ढंग ले जांच टीम ह बिलासपुर म कारोबारी अशोक टुटेजा के ठिकाना म घलो दस्तावेज के जांच करिस।
मुख्यमंत्री-यूनिटी मार्च
सरदार वल्लभभाई पटेल के एक सौ पचासवीं जयंती के मउका म गुजरात के करमसद ले केवड़िया तक पदयात्रा के आयोजन करे जावत हे। ए पदयात्रा म हमर छत्तीसगढ़ के भारतीय जनता युवा मोर्चा के अड़सठ झन युवा घलो सामिल होवत हें। इंखर दल ल आज मुख्यमंत्री विष्णुदेव साय ह हरा झंडा दिखाके रवाना करिन।
ए मउका म मुख्यमंत्री ह किहीन कि सरदार वल्लभभाई पटेल ह देस के पांच सौ बांसठ रियासत अउ ब्रिटिश शासन के अधीन इलाका मन ल एकजुट करके अखंड भारत के नेव राखिन। ओमन किहीन कि छब्बीस नवंबर ले छै दिसंबर तक आयोजित ए कारीकरम म छत्तीसगढ़ के युवा मन के संगेसंग देसभर के जनप्रतिनिधि घलो सामिल होहीं।
ए कारीकरम म उप-मुख्यमंत्री अरूण साव अउ जगदलपुर विधायक के संग प्रदेस भाजपा अध्यक्ष किरण सिंह देव घलो मौजूद रिहीन।
राज्य स्तरीय आवास मेला
राजधानी रइपुर के बी.टी.आई. ग्राउंड म आज ले तीन दिवसीय राज्य स्तरीय आवास मेला के आयोजन करे जावत हे। एखर उद्घाटन आज मुख्यमंत्री विष्णुदेव साय ह करहीं। ए मेला म प्रदेसभर के आवासीय अउ बेवसायिक संपत्ति के बिस्तार ले जानकारी एके मंच म मिलही। संगेसंग आवासीय योजना मनके स्पॉट बुकिंग सुविधा, बैंक ऋण सहायता अउ पंजीयनकर्ता मन बर आकर्षक उपहार जइसन बिसेस बेवस्था घलो करे गेहे। ए बेरा हाउंसिंग बोर्ड के डहार ले प्रदेस के आने-आने जिला म करीबन दू हजार करोड़ रूपिया के नवा आवासीय योजना मनके सुभारंभ करे जावत हे। ए योजना मन म करीबन सत्तर प्रतिसत आवासीय संपत्ति कमजोर वर्ग बर आरक्षित रइही।
ए मउका म आवास अउ पर्यावरण मंत्री ओ.पी. चौधरी ह किहीन कि राज्य सरकार के उद्देस्य प्रदेस के जम्मो परिवार ल पक्का मकान देवाय बर हे। ए आवास मेला सबो लोगन बर फायदा के होही।
बतादन कि छत्तीसगढ़ राज्य के पच्चीस बछर पूरे के मउका म ए आवास मेला लगाय गेहे।
नई श्रम संहिता
केंद्र सरकार ह श्रम कानून ल सरल अउ कारगर बनाय के मंसा ले चार ठन नवा श्रम संहिता ल लागू कर देहे। ए चारों श्रम संहिता के लागू होय ले न्यूनतम वेतन के अधिकार, माईलोगन मन ल बरोबर वेतन, फिक्स टर्म करमचारी मन ल ग्रेच्युटी, हरेक श्रमिक बर सामाजिक सुरक्षा मुफत म स्वास्थ्य जांच सुविधा अउ उपराहा कारज बर उपराहा वेतन जइसन बेवस्था जम्मो देसभर म सुनिश्चित करे गेहे।
भारतीय मजदूर संघ ह लागू ए चारों नवा श्रम संहिता के सुवागत करे हे। मजदूर संघ के प्रदेस अध्यक्ष शोभा सिंहदेव ह किहीन कि ए संहिता ले जम्मो श्रम तंत्र पारदर्सी, सरल अउ आधुनिक बन जाही।
उपमुख्यमंत्री-सुकमा
उपमुख्यमंत्री विजय शर्मा ह सुकमा के पुनर्वास केंद्र के औचक निरीक्षण करिन। ए बेरा म ओमन पुनर्वास केंद्र म रहइया युवा मनले गोठबात करिन, जउन हालेच म हथियार छोड़के मुख्यधारा म लहुटिन हें। ए दउरान श्री शर्मा ह पुनर्वास केंद्र म जरूरी सुविधा के जानकारी लेवत अधिकारी मनले किहीन कि इंहा रहइया युवा मनके जरूरत के बने ढंग ले चेत राखे जाय।
बतादन कि सुकमा पुनर्वास केंद्र म चलत प्रसिक्षण पाठ्यक्रम म पुनर्वासित युवा मन ल राज मिस्त्री, कृषि उद्यमी अउ सिलई मसीन के प्रसिक्षण दे जावत हे।
माओवादी-गिरफ्तार
बीजापुर जिला म आज सुरक्षाबल मन 7 झन माओवादी मन ल गिरफ्तार करिन हे। मिले जानकारी ले जिला पुलिस अउ कोबरा बटालियन के संयुक्त टीम ह आज बिहनिया तलासी अभियान म निकले रिहीन। इही बेरा नैमेड़ अउ भोपालपटनम इलाका के आने-आने जघा ले सातों माओवादी ल गिरफ्तार करिन। ए माओवादी मनके तिर ले टिफिन बम के संग आने-आने बिस्फोटक जिनिस बरामद करे गिस।
अवैध धान-जब्त
प्रदेसभर म किसान मनले समर्थन मूल्य म धान खरीदी होवत हे। इही बीच, अवैध धान भंडारण अउ परिवहन करइया मनके खिलाफ कार्रवाही घलो जारी हे। रायगढ़ जिला प्रशासन डहार ले चलाय गे अभियान के तहत पंद्रह दिन म तीस प्रकरन म करीबन तीन हजार दू सौ छैंसठ कुंटल धान जब्त करे गिस, जेखर कीमत करीबन एक करोड़ रूपिया ले जादा हे।
स्वास्थ्य शिविर
सुकमा जिला के लखापाल अउ दुलेड़ गांव म इक्काईस अउ बाईस नवंबर के दू दिवसीय स्वास्थ्य सिविर के आयोजन करे गिस। ए सिविर म करीबन तीन सौ ग्रामीण मन स्वास्थ्य जांच कराइन, जिंहा एमन ल मुफत म दवा बांटे गिस। ए सिविर म लोगन मनके आयुष्मान कार्ड घलो बनाय गिस।
कैंसर-शिविर
कबीरधाम जिला अस्पताल म हर महिना कैंसर जांच सिविर के आयोजन करे जावत हे। सिविर म काली बालको के कैंसर बिसेसज्ञ डॉ. दिवाकर पांडेय ह करीबन चालीस मरीज के जांच करिस, जेमा ले पंद्रह मरीज कैंसर ले पीड़ित पाय गिन। ए बेरा डॉ. दिवाकर ह बतइन कि कैंसर के सुरूआती के पहिचान अउ बेरा म उपचार ले मरीज के परान बचाय जा सकथे, जेखर बर जागरूकता अउ नियमित जांच कराना जरूरी हे।
युवा आदान-प्रदान
नक्सल प्रभावित इलाका म युवा मन ल मुख्यधारा ले जोड़े अउ ओमन म देस प्रेम के भावना ल जगाय बर आईटीबीपी अउ नेहरू युवा केंद्र ह आदान-प्रदान कारीकरम आयोजित करिस। एखर तहत नारायणपुर जिला के करीबन तीस झन पढ़इया लइका मन ल चेन्नई भ्रमण बर भेजे गिस। ए युवा मन चेन्नई म तेईस ले उनतीस नवंबर तक आने-आने कारीकरम म हिस्सा लिही।
पावर लिफ्टिंग-स्वर्ण पदक
भूटान म आयोजित इंटरनेशनल पावर लिफ्टिंग प्रतियोगिता म कोंडागांव जिला के दू खिलाड़ी- शोभा ढाकरे अउ नीता नेताम ह स्वर्ण पदक जीतिन हें। ए प्रतियोगिता म भूटान, नेपाल, श्रीलंका अउ भारत के संगेसंग कतकोन देस के प्रतिभागी मन हिस्सा ले रिहीन। दूनो खिलाड़ी मन कुल एक सौ दस किलोग्राम वजन ल उठाइन। ए दूनों खिलाड़ी काली कोंडागांव पहुंचिन, जिंहा उंखर जोरदार सुवागत करे गिस।
अउ अब थोरकुन समाचार सार म ..
– भारतीय क्रिकेटर रिंकू सिंह ह आज मुख्यमंत्री विष्णुदेव साय ले रइपुर म सौजन्य भेंट करिन।
– प्रदेस के व्याख्याता, व्याख्याता एल.बी. अउ प्रधान पाठक अउ ई-संवर्ग के ऑनलाइन ओपन काउंसिलिंग इक्कीस ले चौबीस नवंबर तक रइपुर स्थित शासकीय शिक्षा महाविद्यालय म आयोजित करे जावत हे।
अउ
– राज्य सरकार के ‘‘छत्त्तीसगढ़ युवा रत्न सम्मान योजना‘‘ के तहत युवा मनर ले तीस नवंबर तक आवेदन मंगाय गेहे।