अइसने, शारीरिक प्रसिक्षण पत्र उपाधि परीक्षा-डिप्लोमा इन फिजिकल एजुकेशन बीस फरवरी ले अट्ठाईस फरवरी तक होही।
गौरतलब हे कि पाछू बछर दसवीं अउ बारहवीं बोर्ड के परीक्षा एक मार्च ले सुरू होय रिहीस।
सेमीकंडक्टर उद्योग
राज्य म सेमीकंडक्टर चिप निर्माता कंपनी पॉलीमैटेक इलेक्ट्रानिक्स प्रायवेट लिमिटेड ह एक हजार एक सौ तिरालीस करोड़ रूपिया के लागत ले अत्याधुनिक निर्माण इकाई स्थापित करत हे। डेढ़ लाख वर्ग फीट क्षेत्र म बनइया ए प्लांट बछर दू हजार तीस तक दस अरब चिप्स के उत्पादन करही, जउन टेलीकॉम, सिक्स-जी, सेवन-जी, लैपटॉप, पावर इलेक्ट्रानिक्स अउ आने-आने बाढ़त तकनीकी म उपयोग होही। ए प्लांट ले प्रदेस के कतकोन युवक मन ल रोजगार मिलत हे। कंपनी ह प्रदेस म चयनित बारह जवान के पहिली सूची जारी करे हे, जेमा जादा इंजीनियरिंग अउ कॉमर्स के छात्र सामिल हे। ए युवा मन ल चेन्नई के संगेसंग एस्टोनिया, सिंगापुर अउ फ्रांस के वैश्विक कंपनी म बड़का प्रसिक्षण ेबर भेजे जाही।
मुख्यमंत्री विष्णुदेव साय ह किहीन कि सेमीकंडक्टर उद्योग के स्थापना ले प्रदेस के विकास अब नवा तकनीकी अध्याय ले जुड़त हे। प्रधानमंत्री श्री नरेंद्र मोदी के विजन के अनुरूप छत्तीसगढ़ अब बड़का प्रौद्योगिकी क्षेत्र म तेजी ले आगू बाढ़त हे। ओमन किहीन कि राज्य सरकार ह हरेक निवेसक मन ल पूरा सहयोग अउ हरेक युवा मन ल विश्व स्तरीय कौशल उपलब्ध कराय बर प्रतिबध्द हे।
दिशा समिति-बैठक
मुख्यमंत्री विष्णुदेव साय के अध्यक्षता म काली रईपुर म राज्य स्तरीय दिसा समिति के बइठका होइस। ए बइठका म आने-आने विभाग के केंद्र अउ राज्य पोषित योजना मनके प्रगति के समीक्षा करे गीस। बइठका म मुख्यमंत्री ह अधिकारी मन ल निरदेस दीन कि कोनो भी पात्र हितग्राही योजना मनके लाभ ले छूटे झन अउ योजना मनके क्रियान्वयन समय म प्रभावी ढंग ले सुनिश्चित करे जाय। ओमन बतइन कि राज्य म छब्बीस विभाग के इकयासी योजना संचालित होवत हे। मुख्यमंत्री ह सांसद मन ले आग्रह करे हे कि हर तीन महिना म जिला म होवइया दिसा समिति के बइठका म अनिवार्य रूप ले सामिल होवय।
श्रम संहिता
भारतीय मजदूर संघ ह चार नवा श्रम संहिता ल लागू करे के सुवागत करे हे। मजदूर संघ के राष्ट्रीय सचिव गिरीश आर्य ह किहीन हे कि ए आजादी के बाद ले श्रमिक मन के पक्ष म करे गे सबले बड़का सुधार हे। ओमन किेहीन कि एखर ले श्रमिक सशक्त होही अउ अनुपालन सरल होही।
मत्स्य कृषक-संगोष्ठी
कृषि मंत्री राम विचार नेताम ह काली रईपुर स्थित इंदिरा गांधी कृषि विश्व विद्यालय म आयोजित मत्स्य कृषि संगोष्ठी म सामिल होइन। ए बेरा म श्री नेताम ह बतइन कि राज्य सरकार ह मछली पालन ल आगू बढ़ाय बर कतकोन कदम उठाय हे। राज्य ल मछली बीज क्षेत्र म आगू बढ़ाय के परयास जारी हे। ओमन बतइन कि मछली बीज के उत्पादन म छत्तीसगढ़ देस म छठवां नंबर म हवय। श्री नेताम ह किहीन कि छत्तीसगढ़ मछली बीज उत्पादन म न सिर्फ आत्मनिर्भर होय हे, बल्कि आने-आने राज्य ल घलो निर्यात करे जात हे।
आकांक्षा कार्यक्रम-समीक्षा
नीति आयोग डहार ले नियुक्त बस्तर जिला के नोडल अधिकारी अउ संयुक्त सचिव शोभित जैन ह बस्तर आकांक्षी जिला अउ ब्लॉक कारीकरम के प्रगति के समीक्षा करीन। ए मउका म श्री जैन ह आकांक्षी जिला कारीकरम के तहत निर्धारित जिला अउ ब्लॉक स्तरीय चयनित इंडिकेटर्स के वर्तमान स्थिति, क्रियान्वयन अउ प्रगति उपर चर्चा करीन। ओमन शिक्षा, स्वास्थ्य, पोषण, कृषि, आधारभूत संरचना अउ वित्तीय समावेशन के संग जम्मो प्रमुख क्षेत्र के लक्ष्य के घलो समीक्षा करीन।
ए दउरान बस्तर कलेक्टर हरीश एस. ह जिला अउ ब्लॉक म आकांक्षी कारीकरम के तहत योजना मनके क्रियान्वयन के संबंध म जानकारी दीन अउ समस्या के संबंध म ओमनल अवगत कराइन।
माओवादी-आत्मसमर्पण
तेलंगाना के हैदराबाद म आज सैंतीस झन माओवादी मन ह पुलिस महानिदेशक शिवधर रेड्डी के आगू आत्मसमर्पण कर दीन। आत्मसमर्पण करे जम्मो माओवादी मन उपर एक करोड़ चालीस लाख रूपिया ले जादा के इनाम घोसित रिहीस। आत्मसमर्पण करइया म कोय्यादा सम्बैया उर्फ आजाद, अप्पासी नारायण उर्फ रमेश अउ दंडकारण्य स्पेसल जोनल कमेटी सदस्य मुचाकी सोमड़ा उर्फ एर्रा जइसे बड़का नाम सामिल हे। एर्रा ल अभी मुठभेड़ म मारे गे नक्सली कमांडर हिड़मा के सबले भरोसामंद सहयोगी माने जात रिहीस।
खैरागढ़ महोत्सव-समापन
खैरागढ़ म आयोजित तीन दिवसीय खैरागढ़ महोत्सव के काली समापन हो गीस। समापन समारोह म राज्यपाल रमेन डेका सामिल होइन। ए मउका म राज्यपाल ह किहीन कि खैरागढ़ के सांस्कृतिक धरोहर न सिरिफ छत्तीसगढ़ के पहिचान हरय, बल्कि ए भारत के विविध कल पध्दति मनके जीवंत केंद्र घलो हरय। ओमन किहीन कि इंहा के संस्कृति रामायणकाल ले घलो प्राचानी हे। संस्कृति के संरक्षण म ग्रामीण मनके महत्वपूर्ण भूमिका होथे। श्री डेका ह किहीन कि अइसने आयोजन नवा पीढ़ी म कला के प्रति प्रेम अउ संरक्षण के प्रेरणा जगाथे अउ कलाकार मन ल हुनर के प्रदर्सन के महत्वपूर्ण मंच प्रदान करथे।
आयोजन ल संबोधित करत रईपुर सांसद श्री बृजमोहन अग्रवाल ल किहीन की खैरागढ़ भारत के कला राजधानी के रूप म उभरत हे अउ ए महोत्सव अवइया बछर म अंतर्राष्ट्रीय पहिचान बनाही। महोत्सव के आखिरी दिन शास्त्रीय संगीत अउ लोक प्रस्तुति के आयोजन करे गीस। ए बेरा पंडित हरीश तिवारी ह शास्त्रीय गायन पद्मभूषण पंडित बुधादित्य मुखर्जी ह सितार वादन, व्योमेश शुक्ला अउ उंखर टीम ह ‘राम की शक्ति पूजा‘‘ अउ डॉक्टर पी.सी. यादव के टीम ह ‘‘दूधमोंगरा‘‘ के सांस्कृतिक कारीकरम प्रस्तुत करीन।
जागरूकता-सप्ताह
रईपुर के पंडित जवाहरलाल नेहरू स्मृति चिकित्सा महाविद्यालय म आज विश्व एंटी माइक्रोबियल रजिस्टेंस जागरूकता सप्ताह के तहत एक बिसेस कारीकरम के आयोजन करे गीस। कारीकरम के सुरूआत चिकित्सा महाविद्यालय के डीन डॉक्टर विवेक चौधरी ह करीन। ए मउका म ओमन किहीन कि एंटी बायोटिक के तर्कसंगत उपयोग जरूरी हे, यदि एंटी बायोटिक के अनुचित या बिना जरूरत के परयोग करे जाय ले रजिस्टेंस के खतरा बड़ जाथे। ओमन यहू किहीन कि डॉक्टर डहार ले बताय गे दवा ल निर्धारित समय-सीमा तक लेना चाही, तभी दवा प्रभावी रहिथे।
बतादन कि हर बछर अट्ठारा ले चौबीस नवंबर के बीच एंटी माइक्रोबियल रजिस्टेंस जागरूकता सप्ताह मनाय जाथे।
आहार निर्माण संयंत्र
सूरजपुर जिला म एक नवा पूरक पोषक आहार निर्माण संयंत्र के सुरूआत करे गेहे। ए संयंत्र भैयाथान विकासखंड के दर्रीपारा म आकांक्षा स्व-सहायता समूह डहार ले संचालित करे जाही। संयंत्र के सुभारंभ काली महिला अउ बाल विकास मंत्री लक्ष्मी राजवाड़े ह करीन। ए बेरा म श्रीमती राजवाड़े ह किहीन कि ए आधुनिक संयंत्र म मीठा सक्ति आहार अउ नमकीन पौष्टिक दलिया के उत्पादन होही, जेखर उद्देस्य आंगनबाड़ी केंद्र मन म पंजीकृत, लइका मनके गुणवत्ता, सुरक्षित अउ पोषक पूरक आहार उपलब्ध कराना हे। ए संयंत्र के माध्यम ले भैयाथान परियोजना के अंतर्गत होवइया तीन सौ छैंसठ आंगनबाड़ी केंद्र मन ल नियमित रूप ले मीठा शक्ति आहार अउ नमकीन पौष्टिक दलिया अउ उपलब्ध कराय जाही।
विवेक शर्मा-महाधिवक्ता
छत्तीसगढ़ उच्च न्यायालय म अतिरिक्त महाधिवक्ता विवेक शर्मा ल छत्तीसगढ़ के नवा महाधिवक्ता नियुक्त करे गेहे। विधि अउ विधायी कार्य विभाग डहार ले जारी आदेस के अनुसार महाधिवक्ता प्रफुल्ल कुमार भारत के इस्तीफा स्वीकार कर ले गेहे। बतादन कि विवेक शर्मा बिलासपुर हाईकोर्ट म करीबन इक्कीस साल ले वकालत करत आत हे। पाछू दू बछर ले ओमन महाधिवक्ता के रूप म काम करत हे।