बतादन कि लोक सेवा आयोग ह दू सौ छियालीस पद बर मुख्य परीक्षा आयोजित करे रिहीस। एमा ले छै सौ तिरालीस अभ्यर्थी मनके चयन साक्षात्कार बर करे गे रिहीस।
मुख्यमंत्री विष्णुदेव साय ह पीएससी म उत्तीर्ण होवइया जम्मो प्रतिभागी मन ल अपन सुभकामना दीन हे।
सीआरपीएफ डीजी-जवान मुलाकात
केंद्रीय रिजर्व पुलिस बल-सीआरपीएफ के महानिदेसक ज्ञानेन्द्र प्रताप सिंह आज बीजापुर जिला के ताड़पाला स्थित कैंप पहुचिन, जिंहा ओमन सीआरपीएफ कोबरा बटालियन अउ डीआरजी के जवान मन ले भेंट करीन। ए मउका म महानिदेसक नक्सल ऑपरेसन विवेकानंद सिन्हा घलो मौजूद रिहीन।
बतादन कि कुछेक दिन पहिली, करिगुट्टा पहाड़ म सुरक्षाबल ह माओवादी मनके खिलाफ अभियान चलाय रिहीस।
आवारा कुत्ता-निर्देश
लोक शिक्षण संचालनालय ह स्कूल मनके तीर-तखार म घूमइया आवारा कुकुर मन ले लइका मन ल बचाय के निरदेस जारी करे हे। ए संबंध म स्कूल के प्राचार्य अउ प्रमुख मन ले कहे गेहे, कि ओमन स्कूल परिसर या आसपास घूमइया आवारा कुत्ता मनके बारे म जानकारी संबंधित ग्राम पंचायत या नगर निगम के डॉग कैचर नोडल अधिकारी मन ल उपलब्ध कराय जेखर ले लइका मन ल कुकुर ले होवइया नुकसान ले बचाय जाय सकय। यहू कहे गे हे कि कुत्ता कांटे के स्थिति म प्रभावित लइका मन ल बेरा म उपचार उपलब्ध कराय जाय। जम्मो जिला शिक्षा अधिकारी स्कूल म ए आदेस के पालन करावय, जेखर ले स्कूल म लइका मन बर सुरक्षित वातावरण बन सकय।
बतादन कि ए बारे म पहिली सुप्रीम कोर्ट ह कुकुर मनले सुरक्षा संबंधी आदेस जारी करे रिहीस।
पशु मृत-स्थान निर्धारित
नगरीय प्रशासन अउ विकास विभाग ह सहर मन म गौवंशीय अउ दूसर जानवर मनके मृत सरीर के वैज्ञानिक अउ सुरक्षित निपटान बर उपयुक्त स्थल निर्धारित करे के निरदेस अधिकारी मन ल देहे। विभाग ह जम्मो नगरीय निकाय ल परिपत्र जारी करके पर्यावरणीय मानक अउ जैव सुरक्षा नियम के अनुरूप पशु मनके मृत सरीर के निपटान बर कहे हे। अइसने नगर पंचायत अउ नगर पालिका मनके मुख्य नगर पालिका अधिकारी मनले केहे गेहे कि ओमन आबादी ले उचित दूरी म अउ पर्यावरणीय मानक के अनुरूप जानवर मनके मृत सरीर के निपटान बर उचित व्यवस्था करय।
‘वेटलैंड मित्र‘
छत्तीसगढ़ आद्रभूमि प्राधिकरण ह राज्य म वेटलैंड संरक्षण बर ‘‘वेटलैंड मित्र‘‘ बनाय के अभियान सुरू करे हे। ए ‘‘वेटलैंड मित्र‘‘ स्थानीय आद्रभूमि के संरक्षण म समुदाय के सक्रिय भागीदारी सुनिश्चित करे म महत्वपूर्ण भूमिका निभाही। ‘‘वेटलैंड मित्र‘‘ बने बर इच्छुक मनखे क्यूआरकोड स्कैन करके निर्धारित फारम म जरूरी जानकारी भरके अपन पास के आद्रभूमि क्षेत्र ले जोड़ सकत हे। पंजीकृत ‘‘वेटलैंड मित्र‘‘ ल वेटलैंड संरक्षण ले जुड़े जानकारी, प्रसिक्षण अउ जन जागरूकता कारीकरम म भाग लेके मउका मिलही। संघरा ओमन वेटलैंड क्षेत्र म होवइया परिवर्तन के पहिचान, अवैध गतिविधि के सूचना दे अउ स्थानीय समुदाय तक जरूरी जानकारी पहुंचाय म सहयोग करही। राज्य म जागरूक अउ समर्पित ‘‘वेटलैंड मित्र‘‘ के मजबूत नेटवर्क विकसित करे गेहे, जउन विभाग अउ लोगन के बीच समन्वय के काम करत हे।
बतादन कि प्रदेस म अब तक पांच सौ ले जादा ‘‘वेटलैंड मित्र‘‘ पंजीकृत करे जा चुके हे।
बातों बातों-में
प्रादेशिक समाचार एकांश के समसामयिक बिसय उपर आधारित कारीकरम ‘‘बातों-बातों-में‘‘ म ए दारी प्रदेस म चलत मतदाता सूची के बिसेस गहन पुनरीक्षण-एसआईआर उपर केंद्रित रइही। एखर तहत एक बिसेस कारीकरम के प्रसारण काली बाईस नवंबर के एफ.एम. अउ प्रायमरी चैनल म बिहनिया नौ बजे ले करे जाही। एला छत्तीसगढ़ स्थित आकाशवाणी के जम्मों केंद्र रिले करही।
विनोद कुमार शुक्ल-ज्ञानपीठ पुरस्कार
प्रदेस के वरिष्ठ साहित्यकार विनोद कुमार शुक्ल ल आज ज्ञानपीठ पुरस्कार प्रदान करे गीस। ज्ञानपीठ के महाप्रबंधक आर.एन. तिवारी ह ओखर रईपुर स्थित निवास पहुंच के ओमन ल वाग्देवी के प्रतिमा अउ चेक प्रदान करीन। ए मउका म श्री शुक्ल ह अपन पाठक मनके प्रति आभार जतावत किहीन कि जब हिन्दी भाखा समेत दूसर भाषा मन उपर संकट के बात कहे जात हे, अइसे म मोला पूरा उम्मीद हे कि नवा पीढ़ी हर भाषा अउ विचारधारा के सम्मान करही। ओमन किहीन कि ओ पाछू कई साल ले लइका अउ किशोर मन बर घलो लिखत हे। ओमन किहीन कि हर मनखे ल अपन जीवन म एक किताब जरूर लिखना चाही।
विनोद कुमार शुक्ल पाछू पचास साल ले साहित्य लेखन म जुटे हे। ओखर पहिली कविता संग्रह लगभग जय हिन्द बछर उन्नीस सौ इकहत्तर म प्रकासित होय रिहीस। ओखर उपन्यास ‘‘नौकर की कमीज‘‘, ‘‘खिलेगा तो देखेंगे‘‘, अउ ‘‘दीवार में एक खिड़की रहती थी‘‘ हिंदी के सबले बेहतरीन उपन्यास म माने जाथे। संघरा ओमन के कहानी के संग्रह ‘‘पेड़ पर कमरा‘‘ अउ ‘‘महाविद्यालय‘‘ घलो चर्चा म रहे हे। श्री शुक्ल ह लइका मन बर घलो किताब लिखे हे। उंखर किताब के कई भाखा म अनुवाद हो चुके हे। श्री शुक्ल ल एखर पहिली ओखर लेखन बर कई ठिन पुरस्कार मिल चुके हे। एमा गजानन माधव मुक्तिबोध फैलोशिप, रजा पुरस्कार अउ साहित्य अकादमी पुरस्कार सामिल हे।
हाईकोर्ट-सड़क सुनवाई
छत्तीसगढ़ उच्च न्यायालय ह प्रदेस म सड़क के बूरा स्थिति म लोक निर्माण विभाग के सचिव ले जवाब मांगिन। मुख्य न्यायाधीश के डिवीजन बैंच म सुनवाई के दउरान शासन कोति ले बताय गीस कि सड़क के डिजाइनिंग अउ सुरक्षा मॉड्यूल के बारे म नेशनल इंस्टीट्यूट ऑफ टेक्नालॉजी-एनआईटी के लिखित एडवाइजरी रिपोर्ट दू हफ्ता म मिल जाही। ए मामला म हाईकोर्ट ह लोक निर्माण विभाग के सचिव ले सपथ पत्र म जवाब देबर केहे हे।
बतादन कि राष्ट्रीय राजमार्ग प्रदेस के सड़क के बदहाल स्थिति म हाईकोर्ट म सुनवाई चलत हे।
अधिकारी-गिरफ्तार
पटवारी ले राजस्व निरीक्षक पदोन्नति भर्ती घोटाला मामला म आर्थिक अपराध अन्वेषण ब्यूरो-ईओडब्ल्यू अउ एंटीकरप्शन ब्यूरो ह दू झिन सांख्यिकीय अधिकारी मन ल गिरफ्तार करे हे। ए अधिकारी मन ले पूछताछ करे जात हे। ए दूनो सांख्यिकीय अधिकारी रईपुर के आयुक्त भू-अभिलेख कार्यालय म पदस्थ हरय। एमन उपर परीक्षार्थी मनले पइसा लेके प्रश्न पत्र लीक करे अउ परीक्षा के पहिली प्रश्न मनके तियारी कराय के आरोप हे।
बस्तर ओलंपिक
बस्तर ओलंपिक के तहत विकासखंड स्तरीय प्रतियोगिता खतम हो चुके हे, अब जिला स्तरीय प्रतियोगिता के आयोजन बाईस अउ तेईस नवंबर के जगदलपुर के इंदिरा प्रियदर्शिनी स्टेडियम म होही। ए प्रतियोगिता के उद्घाटन बस्तर सांसद महेश कश्यप करही। उहें, तेईस नवंबर के होवइया समापन कारीकरम म उपमुख्यमंत्री विजय शर्मा सामिल होही।
धान खरीदी
राज्य म समर्थन मूल्य म धान खरीदी के सिलसिला जारी हे। अब तक किसान मन ले कुल तेइस लाख छैंसठ हजार कुंटल ले जादा धान के खरीदी करे जा चुके हे। उहें, धान खरीदी के संघरा किसान मन ल भुगतान घलो सुरू कर दे गेहे। एखर बर मार्कफेड ह अपेक्स बैंक ल दू सौ चौदह करोड़ अट्ठारा लाख रूपिया जारी करे हे। धान खरीदी के व्यवस्था उपर निगरानी बर जम्मो केंद्र म अधिकारी तैनात करे गेहे। ए अधिकारी दउरा करके धान खरीदी अउ केंद्र मनके व्यवस्था ल देखत हे। उहें, बाहिर ले अवैध रूप ले धान के अवई रोके बर चेकपोस्ट म अधिकारी तैनात करे गेहे।