बस्तर ओलंपिक के जिकर करत राष्ट्रपति ह किहीन कि हालेच म राखे गे ए ओलंपिक म एक लाख पैंसठ हजार ले जादा प्रतिभागी मन ह भाग लेहे। राष्ट्रपति ह ए बात उपर खुसी व्यक्त करे हे कि छत्तीसगढ़ समेत देसभर म लोगन वामपंथी उग्रवाद के रद्दा छोड़के विकास के मुख्यधारा म सामिल होवत हे।
ओमन किहीन हे कि केंद्र अउ राज्य सरकार के सविचार अउ सुसंगठित कोसिस ले अवइया भविष्य म वामपंथी उग्रवाद के उन्मूलन संभव हो पाही। समारोह म राष्ट्रपति ह आदिवासी समुदाय के नेता मन के संग आदिवासी क्रांतिकारी अउ स्वतंत्रता संग्राम सेनानी मन के परिवार वाले मन ल सम्मानित करीन। ओमन जनजातीय गौरव दिवस कारीकरम म भाग ले लोक नृत्य प्रतियोगिता मन के विजेता मन ल घलो सम्मानित करीन।
ए कारीकरम म राज्यपाल रमेन डेका, मुख्यमंत्री विष्णुदेव साय, केंद्रीय राज्यमंत्री दुर्गादास उइके अउ कतकोन आने जनप्रतिनिधि सामिल होइन।
एसआईआर-गणना प्रपत्र
प्रदेस के जम्मो विधानसभा क्षेत्र मन म ए दिन मतदाता सूची के बिसेस गहन पुनरीक्षण-एसआईआर के कार्य चलत हे। अभियान के तहत बूथ स्तरीय अधिकारी-बीएलओ हरेक मतदाता मन ले भरके गणना प्रपत्र लेवत हे। अब तक करीबन सैंतीस लाख गणना प्रपत्र के डिजिटाइजेशन पूरा कर ले गेहे। एसआईआर ले जुड़े जम्मो जानकारी, प्रक्रिया अउ अपडेट्स मुख्य निर्वाचन पदाध्किारी के आधिकारिक सोसल मीडया प्लेटफॉर्म- फेसबुक, एक्स अउ इंस्टग्राम म हवय।
ए प्लेटफॉर्म के जरिया ले एन्यूमरेशन फारम भरे के काम अउ बछर दू हजार तीन के मतदाता सूची म नाम खोजे के विधि ले जुड़े जानकारी वाले वीडियो अउ सामान साझा करे जावत हे, जेखर ले कोनो भी मतदाता मन ल फारम भरे म कठिनाइ झन होवय।
इही बीच, भारत निर्वाचन आयोग अउ छत्तीसगढ़ के मुख्य निर्वाचन पदाधिकारी कार्यालय ले एक विज्ञप्ति जारी करके मतदाता मन ल साइबर ठगी ले बचे बर किहीन हे। मुख्य निर्वाचन पदाधिकारी यशवंत कुमार ह किहीन हे कि बिसेस गहन पुनरीक्षण-एसआईआर ले जुड़े कोनो भी काम बर कभू भी मोबाइल फोन म वन टाइम पासवर्ड-ओटीपी नइ मांगे जाय। मतदाता ओटीपी या अपन निजी जानकारी कोनो भी अनजान मनखे के ल मत बतावय। ओमन किहीन हे कि एसआईआर ले जुड़े जम्मो सिरिफ मुख्य निर्वाचन पदाधिकारी के आधिकारिक माध्यम ले ही पा सकत हे। मतदाता अउ जादा जानकारी बर हेल्पलाइन नंबर- एक नौ पांच सून्य म फोन कर सकत हे।
धान खरीदी
प्रदेस म ए दिन समर्थन मूल्य म किसान मन ले धान खरीदी के काम चलत हे। अब तक चौदह लाख चौव्वन हजार कंुटल ले जादा धान के खरीदी करे जा चुके हे। धान खरीदी के संगेच सरकार ह किसान मनके भुगतान बर अपेक्स बैंक ल दू सौ चौदह करोड़ रूपिया जारी करे हे। उहें, धान के अवैध परिवहन ल रोके बर सीमावर्ती क्षेत्र म बनाय गे चेकपोस्ट म अधिकारी तैनात करे गेहे।
प्रधानमंत्री-मन की बात
प्रधानमंत्री नरेंद्र मोदी ए महिना के तीस तारीख के आकाशवाणी म ‘मन की बात‘ कारीकरम म देस-विदेस के लोगन मनके संग अपन बिचार साझा करही। एहा ए महिना के रेडियो कारीकरम के एक सौ अट्ठाईसवां कड़ी होही। लोगन ए कारीकरम बर अपन बिचार अउ सुझाव टोल फ्री नंबर- एक आठ सून्य सून्य-एक एक – सात आठ सून्य सून्य (1800-11-7800) म भेज सकत हे। ओमन नरेंद्र मोदी ऐप या माय जीओवी ओपन फोरम के माध्यम ले ऑनलाइन घलो अपन सुझाव साझा कर सकत हे। एक नौ दू दू म मिस्ड कॉल देके अउ एसएमएस के माध्यम ले प्रधानमंत्री ल अपन सुझाव भेज सकत हे। सुझाव ए महिना के अट्ठाईस तारीख तक मंजूर करे जाही।
अस्पताल-प्रमाण पत्र
रायपुर के पंडरी स्थित जिला अस्पताल अउ बलौदाबाजार के इंटिग्रेटेड पब्लिक हेल्थ लैब के राष्ट्रीय गुणवत्ता आश्वासन मानक-एनक्यूएएस के तहत प्रमाण पत्र मिले हे। रायपुर के जिला अस्पताल देस के पहिली, जबकि बलौदाबाजार के इंटिग्रेटेड पब्लिक हेल्थ लैब देस अउ राज्य के दूसरइया प्रमाणित लैब बने हे। देनो लैब्स के मूल्यांकन केंद्रीय स्वास्थ्य मंत्राल कोति नामित बिसेसज्ञ मूल्यांकनकर्ता मनके टीम ह करे हे।
मुख्यमंत्री विष्णुदेव साय ह किहीन हे कि उपलब्धि छत्तीसगढ़ के स्वास्थ्य तंत्र म आवत व्यापक, वैज्ञानिक अउ संरचानात्मक सुधार मन के प्रमाण हे।
खबर के मुताबिक इंटिग्रेटेड पब्लिक हेल्थ लैब म मरीज मन ल एकेच छत के नीचे पैथोलाजी, बायोकैमिस्ट्री अउ माइक्रोबायोलाजी ले जुड़े जम्मो प्रकार के जांच सुविधा उपलब्ध होवत हे।
स्कूल शिक्षा विभाग-दिशा/निर्देश
स्कूल शिक्षा विभाग ह प्रदेस म चलत जम्मो गैर-अनुदान पाय अशासकीय पूर्व-प्राथमिक विद्यालय-प्ले स्कूल बर दिसा-निरदेस जारी करे हे। एखर मुताबिक तीन बछर ले कमती उमर के लइका मन ल पूर्व-प्राथमिक विद्यालय म भर्ती म रोक लगा देहे। एखरे संगेसंग ओमन ल अपन संस्थान के पंजीयन तीन महिना के भीतर संबंधित जिला शिक्षा अधिकारी के आगू प्रस्तुत करना होही। पंजीयन प्रक्रिया म संस्थान ल अपन नाम ले जुड़े विवरण, शिक्षक मनके सैक्षणिक अउ व्यावसायिक योग्यता के संगेच आने-आने जरूरी दस्तावेज जमा करे बर पड़ही। उहें, पूर्व-प्राथमिक विद्यालय के अनुसूची-एक म निर्धारित जम्मो मानक के पालन करे बर पढ़ही।
खबर के मुताबिक छत्तीसगढ़ उच्च न्यायालय म लंबित पीआईएल अउ आने-आने याचिका म देगे आदेस मनके अनुपालन या प्रस्तावित प्ले स्कूल एक्ट के रूपरेखा के तहत ए निरदेस जारी करे गेहे।
जमीन-नई गाइडलाइन
राज्य सरकार ह प्रदेस म जमीन मनके नवा गाइडलाइन दर जारी कर देहे। एखर ले किसान अउ आम लोगन मन ल फायदा होही। सहरी अउ ग्रामीण क्षेत्र के गाइडलाइन दर के वैज्ञानिक अउ तर्कसंगत पुनरीक्षण करे गेहे। नवा गाइडलाइन दर के मुताबिक नगरीय क्षेत्र मन म करीबन बीस प्रतिसत के बढ़ोत्तरी करे गेहे। उहें, ग्रामीण क्षेत्र मन म किसान मन के हित म पचास ले लेके तीन सौ प्रतिसत बढ़ोत्त्री करे गेहे, जेखर ले किसान मन ल भूमि अधिग्रहण म तीन गुना जादा मुआवजा मिलही।
पहिली एकेच सड़क म संपत्ति मनके दर आने-आने रिहीस हे, जेखर ले लोगन मन ल वास्तविक मूल्यांकन म कठिनाई होवत रिहीस। ग्रामीण क्षेत्र मन म घलो एकेच रद्दा म स्थित गांव वाले मनके दर मन म अतार्किक भिन्नता रिहीस हे, जेखर ले किसान मन ल मुआवजा अउ बैंक लोन म नुकसान होवत रिहीस हे। पाछू सात बछर म बने नवा हाईवे, कालेानी, औद्योगिक क्षेत्र आदि के दर निर्धारित नइ रिहीस, जेखर ले मनखे मन ल संपत्ति के कीमत जाने म कठिनाई होवत रिहीस। नवा गाइडलाइन दर रोड-वाइज अउ वैज्ञानिक मैपिंग के आधार म तियार करे गेहे, ताकि हरेक क्षेत्र म दर तर्कसंगत, समान अउ समझे म सरल होवय।
वाणिज्य कर मंत्री ओ.पी.चौधरी ह किहीन कि बछर दू हजार सत्रह-अट्ठारह के बाद दर मन म संशोधन नइ होय ले राज्य म वास्तविक बाजार मूल्य अउ गाइडलाइन दर म असंतुलन पैदा हो गे रिहीस, जेखर ले किसान, भूमिस्वामी अउ सामान्य नागरिक प्रतिककूल रूप ले प्रभावित होवत रिहीस।