प्रधानमंत्री नरेन्द्र मोदी ह आज तमिलनाडु के कोयम्बटूर ले पीएम किसान सम्मान निधि योजना के इक्कीसवां किश्त जारी करीन। देशभर म नौ करोड़ किसान मनके सहायता बर अट्ठारह हजार करोड़ रूपिया ले जादा के रकम जारी करे गेहे। ए बेरा म श्री मोदी ह किहीन कि राष्ट्र प्राकृतिक खेती के मामला म वैश्विक केन्द्र बन गेहे अउ एखर जैव विविधता नवा आकार लेवत हे।
ऐति, धमतरी के एकलव्य खेल मैदान म राखे गे कार्यक्रम केन्द्रीय कृषि मंत्री शिवराज सिंह चौहान सामिल होइन। ए बेरा म श्री चौहान ह प्रदेस के चौबीस लाख सत्तर हजार ले जादा किसान मन ल चार सौ चौरानवे करोड़ रूपिया ले जादा के रकम जारी करीन। ओमन किहीन कि किसान मनके हित सरकार के सबले पहिली प्राथमिकता हरय। श्री चौहान ह किहीन कि केन्द्र के एनडीए सरकार खाद्य सुरक्षा, किसान मनके उपज के पूरा दाम निःशुल्क रासन अउ पोषण आहार सुनिश्चित करे के छह सूत्रीय कार्यक्रम काम करत हे। कार्यक्रम म केन्द्रीय कृषि मंत्री ह प्रदेस के सात सौ अस्सी गांव ल एक-दूसर ले जोड़े बर करीबन दू हजार दू सौ पच्चीस करोड़ रूपिया मंजूर करे के घोषणा करीन।
नई बिजली योजना
राज्य सरकार ह बिजली बिल म उपभोक्ता मन ल राहत देहे। अइसन उपभोक्ता जिखर बिजली के खपत दू सौ यूनिट तक हे, ओमन ल हाफ बिजली बिल के फायदा मिलही। नवा योजना एक दिसंबर ले लागू होही। सरकार के ए फइसला ले राज्य के छत्तीस लाख घरेलू उपभोक्ता मन ल सोझे फायदा मिलही। उहें, दू सौ ले चार सौ यूनिट तक बिजली खपत करइया छह लाख उपभोक्ता मन ल अवइया बछर भर तक दू सौ यूनिट तक हाफ बिजली बिल के लाभ मिलही। ए उपभोक्ता मन ल एक बछर तक के छूट दे गेहे, जेखर ले ए बेरा म अपन घर म पीएम-सूर्यघर मुफ्त बिजली योजना म सोलर प्लांट लगवा सकय। असइने, दू सौ यूनिट तक हाफ बिजली बिल योजना ले प्रदेस के बयासी लाख उपभोक्ता लाभांवित होही।
मुख्यमंत्री विष्णुदेव साय ह काली विधानसभा के बिसेस सत्र के दउरान नवा बिजली योजना के घोषणा करत किहीन कि राज्य सरकार के प्राथमिकता हर उपभोक्ता ल सस्ता बिजली देवाना हे।
माओवादी मुठभेड़/गिरफ्तार
छत्तीसगढ़-आंध्रप्रदेश के सीमा म अल्लूरी-सीताराम जिला म आज होय मुठभेड़ म तीन महिला समेत सात झिन माओवादी मारे गेहे। सुरक्षा बल ह घटना के जघा ले माओवादी मनके सव के संग दू ठिन एके फोर्टी सेवन रायफल समेत आठ ठिन हथियार बरामद करे गेहे।
खबर के मुताबिक अल्लूरी-सीताराम जिला म ए मुठभेड़ काली ले चलत हे। काली मुठभेड़ म हिड़मा समेत छह झिन माओवादी मारे गे रिहीस। सुरक्षा बल कोति ले ओ क्षेत्र म अभी घलो सर्चिंग ऑपरेशन चलत हे।
मुख्यमंत्री विष्णुदेव साय ह काली बड़े नक्सली लीडर माड़वी हिड़मा समेत छह झिन माओवादी के मारे जाय म सुरक्षा बल के साहस के प्रसंसा करीन हे। श्री साय ह किहीन कि हिड़मा के अंत न सिरिफ एक ऑपरेसन के उपलब्धि हे, भलूक लाल आतंक म गहरा चोट हे।
इही बीच, आंध्रप्रदेश पुलिस ह पचास झिन माओवादी मन ल गिरफ्तार करे हे। ए माओवादी म सुकमा जिला के जगरगुंडा अउ केरलापाल एरिया कमेटी म सक्रिय कतकोन सदस्य सामिल हे।
छत्तीसगढ़/मध्यप्रदेश-मुठभेड़
छत्तीसगढ़-मध्यप्रदेश के सीमा म बोरतालाव क्षेत्र ले लगे कनघुर्रा के जंगल म आज सुरक्षा बल अउ माओवादी मनके बीच होय मुठभेड़ म एमपी हॉक फोर्स के उप निरीक्षक आशीष शर्मा शहीद होगे। जानकारी के मुताबिक महाराष्ट्र, मध्यप्रदेश, छत्तीसगढ़-एमएमसी जोन म माओवादी मनके होय के खुफिया सूचना मिले म सुरक्षा बल कोति ले संयुक्त ऑपरेशन चलाय गीस। ए दउरान कनघुर्रा के जंगल म पहिली ले मौजूद माओवादी मन ह सुरक्षा बल उपर फायरिंग सुरू कर दीन। ए मुठभेड़ म उप निरीक्षक आशीष शर्मा गंभीर रूप ले घायल होगीन, जउन ल बने इलाज बर राजनांदगांव जिला के डोंगरगढ़ सामुदायिक स्वास्थ्य केन्द्र लाय गीस, जिहां डॉक्टर मन ह ओमन ल मृत घोषित कर दीन।
एसीबी/ईओडब्लयू-कार्रवाई
एंटी करप्शन ब्यूरो-एसीबी अउ आर्थिक अपराध अन्वेषण ब्यूरो-ईओडब्ल्यू के टीम ह आज रईपुर, बिलासपुर, दुरूग, अंबिकापुर, जगदलपुर, गरियाबंद अउ महासमुंद सहर के करीबन बीस ठन जघा म एक संघरा छापा मारीन। ए कार्रवाई वो अधिकारी मनके घर अउ कार्यालय म करे जात हे, जिखर उपर पटवारी ले राजस्व निरीक्षक परीक्षा म गड़बड़ी या भ्रष्टाचार के आरोप आगू आय रिहीस। आने-आने जघा के तलासी लेके दस्तावेज डिजिटल रिकॉर्ड अउ आने साक्ष्य जुटाय जावत हे।
राष्ट्रपति-अंबिकापुर
राष्ट्रपति द्रौपदी मुर्मू काली बीस नवंबर के एक दिन के दउरा म छत्तीसगढ़ आही। श्रीमती मुर्मू अंबिकापुर के पीजी कॉलेज मैदान म राखे गे जनजातीय गौरव दिवस के समापन समारोह म माईपहुना के रूप म संघरही। कार्यक्रम के अगुवई राज्यपाल रमेन डेका करही।
ए बेरा म राष्ट्रपति ह मुख्यमंत्री जनजातीय ग्राम अखरा विकास योजना के सुभारंभ करही अउ जनजातीय विद्रोह के नायक अउ स्वतंत्रता संग्राम सेनानी मनके परिवार वाले मन ल सम्मानित करही। ए कार्यक्रम म विशिष्ट अतिथि के रूप म मुख्यमंत्री विष्णुदेव साय केन्द्रीय जनजातीय कार्यमंत्री जुएल ओराम, जनजातीय कार्य राज्यमंत्री दुर्गादास उइके अउ केन्द्रीय राज्यमंत्री तोखन साहू घलो मौजूद रइही।
जल संरक्षण-पुरस्कार
जल संरक्षण अउ सामुदायिक भागीदारी के क्षेत्र म छत्तीसगढ़ के बारह ठिन जिला रईपुर, गरियाबंद, महासमुंद, राजनांदगांव, बलौदाबाजार-भाटापारा, धमतरी, बालोद, बलरामपुर, बिलासपुर, रायगढ़, दुरूग अउ सूरजपुर ल इनाम दे गेहे। काली नई दिल्ली म राखे गे छठवां राष्ट्रीय जल पुरस्कार अउ जल संचय जनभागीदारी अवॉर्ड समारोह म राष्ट्रपति द्रौपदी मुर्मू ह ए सबो जिला ल सम्मानित करीन।
मुख्यमंत्री विष्णुदेव साय ह ए जिला मनके उपलब्धि म इहां के लोगन अउ जिला प्रशासन ल शुभकामना दीन हे।
मतदाता सूची-एसआईआर
प्रदेस म चार नवंबर ले मतदाता सूची के बिसेस गहन पुनरीक्षण-एसआईआर करे जात हे। ए अभियान म राज्य के करीबन निन्यानवे प्रतिशत पंजीकृत मतदाता मन ल गणना प्रपत्र दे गेहे। सबो विधानसभा क्षेत्र म नियुक्त बूथ स्तरीय अधिकारी-बीएलओ ए प्रपत्र ल बांटे अउ इकट्ठा करे बर घर-घर पहुंचत हे। अब तक करीबन सत्ताईस लाख गणना प्रपत्र के डिजिटलीकरण होगे हे। मतदाता वोटर्स डॉट ईआईसी डॉट जीओवी डॉट इन पोर्टल ले ऑनलाइन गणना प्रपत्र भर सकत हे।
कोंडागांव-हादसा
कोंडागांव जिला म पाछु रतिहा होय एक रद्दा दुर्घटना म पांच झिन मनखे के मउत होगे हे। उहें, सात झिन आने मनखे घायल होगे हे। घायल मनके इलाज जगदलपुर के अस्पताल म चलत हे।
खबर के मुताबिक फरसगांव थाना क्षेत्र के बारह झिन युवक फिलिम देखे बर कोंडगांव गे रिहीन। लहुटत बेरा उंखर चौपहिया गाड़ी मसोरा टोल नाका तीर खडे़ ट्रक ले टकरा गे। गाड़ी के रफ्तार अतका तेज रिहीस कि पिता-पुत समेत पांच झिन मनखे के मउकाच म मउत होगे।
फसल बीमा योजना-पशु आक्रमण
जंगली जानवर के सेती फसल खराब होय अउ बाढ़ ले धान के फसल के नुकसान प्रधानमंत्री फसल बीमा योजना म सामिल होगे हे। केन्द्रीय कृषि मंत्रालय ह बतईन कि राज्य फसल क्षति बर जिम्मेदार जंगली जानवर मनके सूची अधिसूचित करे जाही। संगेसंग ऐतिहासिक आंकड़ा के आधार म संवेदनशील जिला या बीमा इकाई के पहिचान करही। ए फइसला खरीफ मौसम बर लागू होही। एखर ले ओ राज्य के किसान मन ल जादा फायदा मिले के उम्मीद हवय, जिहां मानव-वन्यजीव संघर्ष के स्थिति जादा हरय, ओ राज्य म छत्तीसगढ़ घलो सामिल हे।
फिल्म महोत्सव
भारत के छप्पनवां अंतर्राष्ट्रीय फिल्म महोत्सव काली ले गोवा के पणजी म सुरू होवत हे। इक्यासी देस के दू सौ चालीस फिल्म के सानदार सिनेमाई उत्सव के आयोजन अट्ठाईस नवंबर तक चलही। एसो के फिल्म महोत्सव अपन पारंपरिक प्रतिष्ठा ल आगू ले जात कतकोन मुख्य आयोजन के साक्षी बनही।
मुख्यमंत्री-ट्रॉफी अनावरण
भारत पहिली घांव एफ.आई.एच. हॉकी जूनियर मेन्स वर्ल्ड कप के मेजबानी करही। ए प्रतियोगिता तमिलनाडु के चेन्नई अउ मदुरई म अट्ठाईस नवंबर ले दस दिसंबर तक होही। भारत टूर म ए ट्रॉफी के छत्तीसगढ़ पहुंचे म मुख्यमंत्री विष्णुदेव साय अउ विधानसभा अध्यक्ष डॉक्टर रमन सिंह ह काली विधानसभा परिसर म ट्रॉफी के अनावरण करीन। ए मउका म मुख्यमंत्री ह किहीन कि राज्य सरकार खेल अधोसंरचाना के बढ़ावा, प्रसिक्षण सुविधा ल मजबूत बनाय अउ नवा प्रतिभा मन ल आगू लाय बर प्रतिबद्ध हवय।