छत्तीसगढ़-आंध्रप्रदेश के सीमा म आज बिहनिया होय मुठभेड़ म सुरक्षा बल ल बड़का सफलता मिले हे। लंबा समय ले वांछित माओवादी कमांडर हिड़मा ए मुठभेड़ म मारे गेहे। ओहा सीपीआई माओवादी के सेंट्रल कमेटी के सदस्य रिहीस। ओखर उपर पचास लाख रूपिया के इनाम घोसित रिहीस। हिड़मा उपर बछर दू हजार दस म दंतेवाड़ा म सीआरपीएफ जवान उपर होय हमला, बछर दू हजार तेरह म झीरम घाटी हमला समेत छब्बीस बड़का माओवादी घटना म सामिल रेहे के आरोप हे।
ए मुठभेड़ में हिड़मा समेत छह माओवादी मारे गेहे। ए मुठभेड़ छत्तीसगढ़ के सीमा करा आंध्रप्रदेश के अल्लूरी-सीताराम जिला के मारेडू मिल्ली के जंगल म होइस। मुठभेड़ म मारे गे दूसर माओवादी मनके पहिचान हिड़मा के पत्नी राजे, डीसीएम लकमल, पीपीसीएम कमलू मल्ला के संघरा हिड़मा के गार्ड देवे के रूप म होय हे। सुरक्षा बल ह घटनास्थल ले माओवादी मनके सव के संघरा दू ठिन एके-फोर्टी सेवन रायफल, एक रिवॉल्वर अउ एक ठिन पिस्तौल बरामद करे हे।
छत्तीसगढ़ के उपमुख्यमंत्री अउ गृहमंत्री विजय शर्मा ह किहीन कि हिड़मा के मारे जाना मार्च दू हजार छब्बीस तक सशस्त्र नक्सलवाद ल खतम करे के दिसा म एक बड़का कदम हरय।
बस्तर रेंज के पुलिस महानिरीक्षक सुंदरराज पी. ह किहीन कि हिड़मा के मारे जाना सुरक्षा बल मन बर एक निर्णायक बढ़त हरय।
इही बीच, आंध्रप्रदेश पुलिस ह विजयवाड़ा, एनटीआर, कृष्णा, काकीनाडा, एलुरू अउ तीर-तखार के जगह ले इकतीस माओवादी मन ल गिरफ्तार करे हे। एमा ले नौ माओवादी केन्द्रीय समिति सदस्य देवजी के सुरक्षा गार्ड हरय। जबकि बाईस पीएलजीए अउ साउथ बस्तर जोनल कमेटी ले जुड़े सदस्य बताय गेहे।
विधानसभा-विशेष सत्र
विधानसभा के वर्तमान भवन म आयोजित विशेष सत्र म आज छत्तीसगढ़ विधानसभा के पच्चीस बछर के संसदीय यात्रा उपर चर्चा करे गीस। विधानसभा अध्यक्ष डॉक्टर रमन सिंह ह सदन ल बतईन कि आज के ए बिसेस सत्र वर्तमान विधानसभा भवन म आखिरी सत्र हे। विधानसभा के अगला सत्र चौदह ले सत्रह दिसंबर तक नवा रायपुर स्थित नवा विधानसभा भवन म आयोजित करे जाही। चौदह दिसंबर के हालांकि इतवार हे, लेकिन पच्चीस साल पहिली बछर दू हजार म छत्तीसगढ़ के गठन के बाद राज्य विधानसभा के पहिली सत्र चौदह दिसंबर के ही सुरू होय रिहीस। एखरे सेती नवा विधानसभा भवन म घलो पहिली सत्र के सुरूआत चौदह दिसंबर ले होही।
आज होय बिसेस चर्चा म सत्तापक्ष अउ विपक्ष के आने-आने सदस्य मन भाग लीन। चर्चा के सुरूआत भारतीय जनता पार्टी के विधायक अजय चंद्राकर ह करीन। श्री चंद्राकर ह बतईन कि छत्तीसगढ़ विधानसभा के पहिली सत्र बछर दू हजार म रायपुर स्थित राजकुमार कॉलेज के जशपुर हॉल म टेंट म आयोजित करे गे रिहीस।
एखर पहिली, सदन के कार्यवाही सुरू होते ही अविभाजित मध्यप्रदेश के पूर्व विधायक रजनीताई उपासने, छत्तीसगढ़ विधानसभा के पूर्व उपाध्यक्ष बनवारीलाल अग्रवाल अउ अविभाजित मध्यप्रदेश के पूर्व सदस्य राधेश्याम शुक्ल ल श्रद्धांजलि दे गीस।
राष्ट्रपति-जल पुरस्कार
राष्ट्रपति द्रौपदी मुर्मु ह आज नई दिल्ली म छठवां राष्ट्रीय जल पुरस्कार अउ प्रथम जल संचय जनभागीदारी पुरस्कार के तहत सर्वश्रेष्ठ जिला, ग्राम पंचायत सहरी स्थानीय निकाय, संस्थान समेत दस श्रेणी म छियालीस विजेता मन ल पुरस्कार प्रदान करीन। एमा छत्तीसगढ़ के बालोद जिला ल पूर्वी जोन म सर्वश्रेष्ठ जिला, कांकेर जिला के डूमरपानी ग्राम पंचायत ल श्रेष्ठ ग्राम पंचायत श्रेणी म तीसरा स्थान अउ रायपुर के कृष्णा पब्लिक स्कूल ल सर्वश्रेष्ठ स्कूल श्रेणी म सम्मानित करे गीस। राष्ट्रपति ह रायपुर नगर निगम ल जल संचय जन भागीदार अभियान के पहिली पुरस्कार सौंपीन, जेला रायपुर निगम आयुक्त विश्वदीप ह ग्रहण करीन।
ए मउका म राष्ट्रपति ह जल के उपलब्धता अउ सुरक्षा सुनिश्चित करे बर जम्मों झन ले मिलके काम करे के आग्रह करीन। ओमन ए बात उपर जोर दीन कि जलवायु परिवर्तन आज के समय म जल चक्र ल प्रभावित करत हे।
राष्ट्रपति ह पुरस्कार विजेता मन ल जल संरक्षण के ओमन के प्रयास बर बधाई दीन अउ किहीन कि एखर बिना कोनों भी जीवित नइ रहि सकय। ओमन देस बर जल के कुशल उपयोग के जरूरत उपर बल दीन।
राष्ट्रपति ह यहू बतईन कि जल संरक्षण जनभागीदारी कार्यक्रम के अंतर्गत पैंतीस लाख ले जादा भूजल पुनर्भरण संरचना के निर्माण करे गेहे।
धमतरी-केन्द्रीय कृषि मंत्री
प्रधानमंत्री किसान सम्मान निधि के तहत कल धमतरी में राज्य स्तरीय कार्यक्रम के आयोजन करे जाही। ए कार्यक्रम ले प्रधानमंत्री नरेन्द्र मोदी वर्चुअल रूप ले जुड़ही। प्रधानमंत्री धमतरी के कुछ किसान मन ले गोठबात घलो करही।
ए मउका म केन्द्रीय कृषि मंत्री शिवराज सिंह चौहान किसान मन ल सम्मान निधि के इक्कीसवां किश्त के हस्तांतरण करही। धमतरी के एकलव्य खेल मैदान म होवइया ए कार्यक्रम के अध्यक्षता मुख्यमंत्री विष्णुदेव साय करही। ए मउका म केन्द्रीय राज्यमंत्री तोखन साहू, विधानसभा अध्यक्ष डॉक्टर रमन सिंह, उपमुख्यमंत्री अरूण साव अउ विजय शर्मा समेत राज्य मंत्रिमंडल के आने-आने सदस्य मौजूद रइही।
कार्यक्रम के दउरान केन्द्रीय कृषि मंत्री शिवराज सिंह चौहान प्रधानमंत्री ग्राम सड़क योजना के तहत छत्तीसगढ़ के आने-आने जिला म सात सौ ले जादा सड़क निर्माण काम के भूमिपूजन अउ लोकार्पण करही। एखर संगेसंग श्री चौहान किसान मन ल खेती के आधुनिक मसीन के संघरा दलहन-तिलहल के बोआई बर मिनी किट घलो बांटही।
अपन छत्तीसगढ़ प्रवास के दउरान केन्द्रीय कृषि मंत्री रायपुर के तीर स्थित नेशनल इंस्टीट्यूट ऑफ बायोटिक स्ट्रेस मैनेजमेंट म काली आयोजित होवइया कृषक संवाद अउ बीज वितरण कार्यक्रम म घलो सामिल होही।
अंबिकापुर-जनजातीय गौरव दिवस
भगवान बिरसा मुंडा के जयंती के उपलक्ष्य म काली उन्नीस नवंबर ले अंबिकापुर के पी.जी. कॉलेज मैदान म राज्य स्तरीय जनजातीय गौरव दिवस समारोह के आयोजन करे जाही। ए कार्यक्रम के समापन समारोह म बीस नवंबर के राष्ट्रपति द्रौपदी मुर्मु मुख्य अतिथि के रूप म सामिल होही। समापन समारोह के अध्यक्षता राज्यपाल रमेन डेका करही। उहें, मुख्यमंत्री विष्णुदेव साय समेत केन्द्रीय जनजातीय कार्य मंत्री जुएल ओराम, केन्द्रीय राज्यमंत्री दुर्गादास उइके अउ तोखन साहू, उपमुख्यमंत्री अरूण साव अउ विजय शर्मा समेत मंत्री, सांसद, विधायक अउ दूसर जनप्रतिनिधि सामिल होही।
समारोह के पहिली दिन जनजातीय गौरवशाली इतिहास अउ स्वतंत्रता संग्राम म जनजातीय मनके योगदान बिसय उपर संगोष्ठी के आयोजन करे जाही। समारोह के समापन अवसर म राष्ट्रपति द्रौपदी मुर्मु जनजातीय विद्रोह के नायक अउ स्वतंत्रता संग्राम सेनानी के परिजन मन ल सम्मानित करही। ए मउका म मुख्यमंत्री बैगा, गुनिया अउ हड़जोड़ सम्मान योजना के घलो सुभारंभ करे जाही।
स्वास्थ्य मंत्री-बैठक
स्वास्थ्य मंत्री श्याम बिहारी जायसवाल के अध्यक्षता म रायपुर स्थित पंडित जवाहरलाल नेहरू स्मृति चिकित्सा महाविद्यालय अउ डीकेएस अस्पताल के स्वशासी समिति के सामान्य सभा के बैठक होइस। बइठका म मेडिकल कॉलेज के दू सौ छात्र मन बर चयनित छात्रावास भवन उपर सहमति बनीस। उहें, डीकेएस अस्पताल के एमसीएच छात्रावास के सुल्क पांच हजार ले घटाके ढाई हजार रूपिया करे के निर्णय ले गीस। संघरा गरीबी रेखा ले उपर जीवन यापन करइया मरीज मन ल एमआरआई जांच बर दू हजार रूपिया अउ सीटी स्कैन बर एक हजार रूपिया के प्रावधान करे गीस। उहें, बीपीएल मरीज अउ साठ साल ले जादा उमर के लोगन मन बर ओपीडी म जांच सुविधा निःशुल्क रिही।