देसभर म काली अट्ठारा नवंबर के नशामुक्त भारत अभियान के पांचवां बछर म राष्ट्रीय स्तर म आने-आने कारीकरम आयोजित करे जाही। मुख्य कारीकरम पंजाब के अमृतसर म होही, जेमा प्रधानमंत्री नरेंद्र मोदी के संदेस वर्चुअल माध्यम ले पूरा देस म प्रसारित करे जाही।
छत्तीसगढ़ म घलो बड़का पैमाना म कारीकरम के आयोजन सुनिश्चित करे जाही। सबो जिला, विश्वविद्यालय, महाविद्यालय, स्कूल, विभागीय संस्थान, स्व-सहायता समूह, आंगनबाड़ी अउ आसा कार्यकर्ता के जरिया ले सामूहिक रूप ले नशामुक्ति के सपथ दिलाय जाही।
जानबा के मुताबिक छत्तीसगढ़ के सत्तर जघा ल मुख्य कारीकरम के वर्चुअली जोड़े के व्यवस्था करे गेहे।
प्रधानमंत्री-प्रशंसा
गुजरात के डेडियापारा म होवइया जनजातीय गौरव दिवस के राष्ट्रीय कारीकरम म प्रधानमंत्री नरेंद्र मोदी ह अपन उद्बोधन के दउरान छत्तीसगढ़ म मुख्यमंत्री विष्णुदेव साय के नेतृत्व के बिसेस रूप ले प्रशंसा करीन। प्रधानमंत्री ह किहीन कि देस म जनजातीय समाज के बाढ़त भागीदारी अउ नेतृत्व भारत के विकास के नवा पहिचान बनत हे अउ ए दिसा म छत्तीसगढ़ के भूमिका बहुत जरूरी हे। प्रधानमंत्री ह किहीन कि कोनो भी समाज के प्रगति बर लोकतांत्रिक भागीदारी जरूरी हे। ओमन किहीन कि छत्तीसगढ़ म जनजातीय समाज ले अवइया मुख्यमंत्री विष्णुदेव साय के नेतृत्व म राज्य म व्यापक विकास होवत हे अउ सबो क्षेत्र म निर्णायक प्रगति दिखाई देवत हे।
‘पंडुम कैफे‘
मुख्यमंत्री विष्णुदेव साय ह आज जगदलपुर म पूना मार्गेम परिसर म ‘पंडुम कैफे‘ के उद्घाटन करीन। ए कैफे के उद्देस्य केवल आजीविका प्रदान करना ही नही, फेर ए भी प्रदर्सित करना हे कि अवसर अउ मार्गदर्सन मिले म परिवर्तन संभव हे। बस्तर रेंज के पुलिस महानिरीक्षक सुंदरराज पी. ह बतइन कि ‘पंडुम कैफे‘ म काम करइया युवा, नक्सली हिंसा ले पीड़ित अउ हिंसा के रद्दा ल छोड़ चुके पूर्व माओवादी कैडर हे। जिला प्रशासन अउ पुलिस के सहयोग ले ओमन ल पहुना सेवा, कैफे प्रबंधन, ग्राहक सेवा, स्वच्छता मानक, खाद्य सुरक्षा अउ उद्यमिता कौशल के प्रसिक्षण प्रदान करे गेहे। ए ‘पंडुम कैफे‘ के संचालन म नक्सली पीड़ित युवा अउ आत्मसमर्पित नक्सली जरूरी सहयोगी रइही।
सरकार के मार्गदर्सन म बस्तर पुलिस अउ स्थानीय प्रशासन ए सुनिश्चित करही कि ‘पंडुम कैफे‘ के सफल सामाजिक-आर्थिक मॉडल के रूप म स्थापित हो जेखर ले भविष्य म क्षेत्र म अइसन अउ पुनर्वास केंद्र विकसित करे जा सके।
मरीन फॉसिल पार्क-सम्मान
मनेन्द्रगढ़ स्थित गोंडवाना मरीन फॉसिल पार्क ल राष्ट्रीय स्तर म नवा पहिचान मिले हे। एखर बर दिल्ली म वन मंडलाधिकारी मनीष कश्यप ल ‘‘नेक्सस ऑफ गुड फाउंडेंशन अवॉर्ड‘‘ ले सम्मानित करे गेहे। ए सम्मान ओमन ल एशिया के सबले बड़े अउ उनतीस करोड़ बछर पुराना गोंडवाना मरीन फॉसिल पार्क ल विकसित करे बर दे गीस।
जानबा के मुताबिक मनेन्द्रगढ़ के गोंडवाना मरीन फॉसिल पार्क एशिया के सबले बड़े मरीन फॉसिल साइट हे। भारत म अइसन केवल पांच जघा हे, जिंहा मरीन फॉसिल पाय जाथे। इंखर खोज बछर उन्नीस सौ चौव्वन म होय रिहीस। इंहा प्राकृतिक रूप ले मौजूद विशाल ग्रेनाइट चट्टान म पुरातन जीव अउ डायनासोर प्रजाति के संग पैंतीस जीव के मूर्ति उकेरे गेहे।
उपमुख्यमंत्री-लोकर्पण
उपमुख्यमंत्री अरूण साव ह काली बालोद अउ डौंडीलोहारा म अटल परिसर के लोकार्पण करीन। ओमन ह जल जीवन मिशन के तहत गुरूर, गुण्डरदेही अउ डौंडीलोहारा विकासखंड के गांव नलजल योजना के घलो लोकार्पण करीन। संगेसंग श्री साव ह बालोद म नालंदा परिसर अउ डौंडीलोहारा म अमृत मिशन म अवइया वाटर ट्रीटमेंंट प्लांट के भूमिपूजन घलो करीन। ए बेरा म श्री साव ह बालोद सहर के विकास बर चार करोड़ रूपिया देके घोसना करीन। ओमन ह बालोद जिला मुख्यालय म तांदुला नदी पुल ले उप जेल तक डिवाइडर बनाय अउ बालोद ले लोहारा रद्दा अउ जगन्नाथपुर ले परसोदा रद्दा बनाय के घलो घोसना करीन। कारीकरम म श्री साव ह प्रधानमंत्री आवास योजना-सहरी के हितग्राही मन ल पूर्णता प्रमाण पत्र अउ आवास के चाबी देके सुभकामना दीन। ओमन ह बालोद के प्रतिभावान खिलाड़ी मन ल घलो सम्मानित करीन।
नगरीय प्रशासन प्रस्ताव
नगरीय प्रशासन विभाग ह बरसा के दउरान सहर मन म जलभराव के समस्या के समाधान बर सबो नगरीय निकाय ले प्रस्ताव मंगाय हे। ए संबंध म नगरीय प्रशासन विभाग के संचालक आर. एक्का ह सबो नगर निगम के आयुक्त, नगर पालिका अउ नगर पंचायत के मुख्य नगर पालिका अधिकारी मन ल परिपत्र जारी करे हे।
उहें, उपमुख्यमंत्री अउ नगरीय प्रशासन मंत्री अरूण साव ह किहीन हे कि राज्य म बरसा के बाद नवा सड़क बनाय के काम तेजी ले करे जात हे।
विधानसभा सत्र
छत्तीसगढ़ विधानसभा के एक दिवसीय सत्र काली अट्ठारा नवंबर के आयोजित करे जाही। ए सत्र म छत्तीसगढ़ विधानसभा के पच्चीस बछर के संसदीय यात्रा उपर केंद्रीत बिसय म चर्चा करे जाही।
हड़ताली कर्मचारी-कार्यवाही
राज्य सरकार ह सहकारी समिति के हड़ताली कर्मचारी मनके विरूध्द सख्त कार्रवाही सुरू कर देहे। बलौदाबाजार-भाटापारा जिला के प्रभारी प्रबंधक के संग तेरह कर्मचारी मन ल बर्खास्त कर दे गेहे। संगेसंग तीन कर्मचारी मनके विरूध्द एफआईआर प्रस्तावित हे। धान खरीदी काम ले इंकार करइया कर्मचारी उपर जरूरी सेवा अनुरक्षण कानून-एस्मा के तहत कार्रवाही करे जात हे। विकासखंड पलारी म अवइया कोनारी के प्रभारी प्रबंधक राजेन्द्र चंद्राकर, रोहरा के कम्प्यूटर आपरेटर बिरेन्द्र साहू अउ रिसदा के एक विक्रेता के विरूध्द एफआईआर दर्ज करे बर शाखा प्रबंधक ल पत्र जारी करे गेहे।
इही बीच, प्रदेस म अवैध परिवहन ले अवईया धान म कड़ा निगरानी राखे जावत हे। पाछू एक नवंबर ले सोलह नवंबर तक लगभग उन्नीस हजार कुंटल धान जब्त करे गेहे। ए साल मार्कफेड डहार ले राज्य म अवैध परिवहन के जरिया ले आने राज्य मनले छत्तीसगढ़ अवइया धान ल रोके बर राज्य के सीमावर्ती जिला मन म चेकपोस्ट अउ कलेक्टर के अध्यक्षता म टॉस्कफोर्स घलो बनाय गेहे। एखरे संग मार्कफेड म स्थापित इंटीग्रेटेड कमांड एंड कंट्रोल सेंटर के जरिया ले समर्थन मूल्य म धान खरीदी व्यवस्था के सतत निगरानी घलो करे जावत हे।
हाइकोर्ट-सुनवाई
छत्तीसगढ़ उच्च न्यायालय ह रईपुर के अंबेडकर अस्पताल म व्याप्त अव्यवस्था उपर राज्य शासन ले जवाब मांगे हे। मीडिया म प्रकासित रिपोर्ट ल खुदे संज्ञान म लेवत होय मुख्य न्यायाधीश ह जनहित याचिका के रूप म एखर सुनवाई सुरू करे हे। अंबेडकर अस्पताल म कैंसर मरीज के संख्या लगातार बाढ़त हे। एखर बाद घलो सत्रह करोड़ रूपिया के मसीन सात साल ले बंद पड़े हे। अधिकारी मनके लापरवाही अउ विभागीय जटिलता के वजह ले ए मसीन आज तक चालू नइ हो पाइस। होईकोर्ट ह ए मामला म संज्ञान लेवत हुए शासन ले जवाब मांगे हे।
उहें, बलौदाबाजार जिला के बारनवापारा वन क्षेत्र म खेत म बने गहरा कुंआ म हाथी मनके गिरे के घटना म उच्च न्यायालय ह संज्ञान लेवत हुए वन विभाग के सचिव ल नोटिस जारी करके जवाब पेस करे के निरदेस देहे। जानबा के मुताबिक पाछू हफ्ता बलौदाबाजार जिला म बारनवापारा वन क्षेत्र के ग्राम हरदी म किसान के खेत म बने गहरा कुंआ म चार हाथी गिर गे रिहीस, जेखर बाद रेस्क्यू करके सुरक्षित निकाल ले गे रिहीस।
भारतीय वन खेल प्रतियोगिता
देहरादून म बारह ले सत्रह नवंबर तक होय अट्ठाइसवां अखिल भारतीय वन खेल प्रतियोगिता म बढ़िया प्रदर्सन करत छत्तीसगढ़ ह पदक सूची म पहला स्थान हासिल करे हे। ए प्रतियोगिता म छत्तीसगढ़ ह एक सौ पचास मेडल अउ पांच सौ अठहत्तर अंक पाइन। प्रतियोगिता म छत्तीसगढ़ ह चौहत्तर स्वर्ण, चौतीस रजत अउ बयालिस कांस्य पदक लेके पहला स्थान पाइन। प्रतियोगिता म प्रदेस के दू सौ तिरपन सदस्य मन ह हिस्सा लीन।
मुख्यमंत्री विष्णुदेव साय अउ वन मंत्री केदार कश्यप ह प्रतियोगिता म उत्कृष्ट प्रदर्सन करइया सबो खिलाड़ी अउ टीम ल बधई दीन।