सुकमा जिला म आज पुलिस के संग होय मुठभेड़ म दू माईलोगिन समेत तीन माओवादी मारे गेहे। इमन उपर कुल पंद्रा लाख रूपिया के इनाम घोसित रिहीस। घटनास्थल ले सुरक्षा बल ह थ्री नाट थ्री रायफल, बीजीएल लॉन्चर, गोला-बारूद समेत आने-आने हथियार अउ माओवादी सामान घलो बरामद करे हे।
जिला के पुलिस अधीक्षक किरण चव्हाण ह ए घटना के पुष्टि करत हुए बतइन कि भेज्जी अउ चिंतागुफा के सीमा वाले इलाका म माओवादी मनके रहे के खुफिया सूचना मिले के बाद डिस्ट्रिक्ट रिजर्व गार्ड याने डीआरजी के टीम ल भेजे गीस। इही दउरान तुमालपाड़ के जंगल म पुलिस अउ माओवादी मनके बीच मुठभेड़ होगे, इही म ए तीन माओवादी मारे गेहे। तीनो झन उपर पच-पच लाख रूपिया के इनाम घोसित रिहीस।
बिलासपुर-राउच नाचा
बिलासपुर के लालबहादुर शास्त्री स्कूल मैदान म काली अड़तालीसवां राउत नाचा महोत्सव के आयोजन करे गीस। नाचा महोत्सव म मुख्यमंत्री विष्णुदेव साय पारंपरिक राउच नाचा के वेसभूषा म आयोजन स्थल म पहुंचिस। ए उमाक म मुख्मंत्री ह किहीन कि छत्तीसगढ़ के नृत्य अउ गायन के परंपरा ह राज्य के सांस्कृतिक समृध्दि अउ एकता के सजीव चिन्हा हे। ए मउका म केंद्रीय राज्य मंत्री तोखन साहू, स्कूल शिक्षा मंत्री गजेन्द्र यादव, बिलासपुर विधायक अमर अग्रवाल अउ ए महोत्सव के संरक्षक डॉक्टर कालीचरण यादव घलो मौजूद रिहीन।
अपन बिलासपुर के दउरान मुख्यमंत्री ह वंदे मातरम उद्यान के लोकार्पण करे के संगेच नाम पट्टीका के अनावरण घलो करीन। ए मउका म मुख्यमंत्री ह किहीन कि वंदे मातरम उद्यान अउ स्वतंत्रता संग्राम सेनानी मन के नांव पट्टीका ले ओमन के सुरता ल संजोय के परयास करे गेहे।
सुनइया मन ल बतादन कि ए गार्डन बिलासपुर सहर के पुराना बस स्टैण्ड मेर स्वतंत्रता संग्राम सेनानी मनके सुरता म बनाय गेहे।
स्वदेशी मेला
बिलासपुर के साईंस कालेज मैदान म पाछू कुछेक दिन ले स्वदेसी मेला लगे हे। मुख्यमंत्री विष्णुदेव साय ह काली स्वदेसी मेला म लगाय गे स्टाल म पहुंचिन अउ कारीगर, स्व-सहायता समूह अउ युवा उद्यमी मन कोति ले बनाय गे समान के बड़ई करीन। ए मउका म श्री साय ह किहीन कि अइसने आयोजन स्थानीय प्रतिभा मन ल मंच देथे।
धान खरीदी
प्रदेस म समर्थन मूल्य म धान खरीदी सुरू हो गेहे। उपमुख्यमंत्री अरूण साव ह बतइन कि काली पहिली दिन एक सौ पंचानवे सेंटर म करीब बीस हजार कुंटल के धान खरीदी करे गेहे। ओमन बतइन कि राज्य सरकार कोति ले धान खरीदी बर सबो इंतेजाम करे गेहे।
इही बीच, खाद्य विभाग के सचिव रीना बाबा साहेब कंगाले ह कांकेर जिला के अब्बड़ अकन धान खरीदी केंद्र के निरीक्षण करीन। उंहा, ओमन किसनहा मन ले गोठबात करके उंखर परेसानी घलो सुनिन। श्रीमती कंगाले ह जिला खाद्य अधिकारी अउ सहकारी बैंक के नोडल अधिकारी मनले कम्प्यूटर आपरेटर मनके भर्ती, ओमन के प्रसिक्षण, नमी मापे के मसीन, बारदाना, डेमेज अउ हमाल के व्यवस्था ले जुड़े जानकारी लीन। ओमन साफ-साफ निरदेस दीन कि खरीदी केंद्र म किसनहा मन ल कोनो भी प्रकार के परेसानी नइ होना चाही।
सुनइया मन ल बतादन कि ए बछर म राज्य के दू हजार सात सौ उनचालीस केंद्र ले धान के खरीदी करे जाही।
राष्ट्रपति-अंबिकापुर
राष्ट्रपति द्रौपदी मुर्मु ह बीस नवंबर के अपन एक दिनी छत्तीसगढ़ प्रवास म अंबिकापुर आही। राष्ट्रपति के प्रवास के तियारी बर वित्त मंत्री ओपी चौधरी ह समीक्षा बइठका लीन। बइठका म सरगुजा संभाग के सबो जिला के कलेक्टर, पुलिस अधीक्षक समेत आने-आने अधिकारी मन वर्चुअल रूप ले जुड़े रिहीस। इही दउरान श्री चौधरी ह कारीकरम के जघा समेत हेलीपेड अउ अवई-जवई के रद्दा म सुरक्षा के कड़ा इंतेजाम करे के निरदेस दीन।
जनजातीय गौरव दिवस
भगवान बिरसा मुंडा के एक सौ पचासवां जयंती म बिलासपुर म राखे गे जनजातीय गौरव दिवस कारीकरम म मुख्यमंत्री विष्णुदेव साय सामिल होइन। ए मउका म मुख्यमंत्री ह अपन संबोधन म किहीन कि स्वतंत्रता संग्राम म जनजातीय वीर मनके योगदान ल भुलाय नइ जा सकत हे। कारीकरम म मुख्यमंत्री ह भगवान बिरसा मुंडा के आदमकर प्रतिमा के स्थापना करे के संगेसंग सहर के एक चौक के नाम भगवान बिरसा मुंडा के नाम म करे के घोसना करीन। ओमन लाल खदान ओवरब्रिज के नाम सहीद वीर नारायण सिंह के नाम म करे, जनजातीय बालक-बालिका बर पांच सौ सीट के अत्याधुनिक पोस्ट मेट्रिक छात्रावास के स्थापना करे के अलावा कोटा ब्लाक म जनजातीय समाज बर सामुदायिक भवन बनाय के बात किहीन। कारीकरम म मुख्यमंत्री ह बिलासपुर जिला म तीन सौ उनतीस करोड़ ससत्तर लाख रूपिया ले जादा के विकास कार्य के लोकार्पण अउ सिलान्यास करीन।
उहें, केंद्रीय राज्य मंत्री तोखन साहू ह रईपुर के एकलव्य प्रयास आवासीय विद्यालय म जनजातीय गौरव दिवस कारीकरम म सामिल होइन। ओमन किहीन कि जनजातीय समाज के इतिहास, परंपरा, संस्कृति अउ ज्ञान ह भारतीय सभ्यता के जड़ म बसे हे। श्री साहू ह राष्ट्रीय पात्रता सह प्रवेस परीक्षा याने नीट अउ संयुक्त प्रवेस परीक्षा याने जेईई म चयन होय जनजातीय विद्यार्थी मन ल घलो सम्मानित करीन।
जनजातीय गौरव दिवस म कवर्धा म राखे गे कारीकरम ल संबोधित करत हुए उपमुख्यमंत्री विजय शर्मा ह किहीन कि भारत के प्रगति म जनजातीय समाज के योगदान सदा बल देथे। ए मउका म श्री शर्मा ह रेंगाखार, कवर्धा अउ कुछेक जघा म भगवान बिरसा मुंडा के मूर्ति लगाय के घोसना करीन। कारीकरम म उपमुख्यमंत्री ह प्रधानमंत्री जनमन योजना के तहत हितग्राही मन ल घर के चाबी सौंपिन। संगेसंग किसान मन ल मसूर मिनी किट घलो बांटिन।
राष्ट्रीय प्रेस दिवस
आज राष्ट्रीय प्रेस दिवस हवय। ए दिवस हर बछर सोला नवंबर के स्वतंत्र अउ दायित्व पूर्ण प्रेस के भूमिका ल मान्यता देबर मनाय जाथे। ए बछर के बिसय ‘‘बढ़ती गलत सूचनाओं के बीच प्रेस की विश्वनीयता की रक्षा‘‘ हवय।
सूचना और प्रसारण मंत्री अश्विनी वैष्णव अउ सूचना और प्रसारण राज्य मंत्री डॉक्टर एल. मुरूगन आज नई दिल्ली म राष्ट्रीय प्रेस दिवस कारीकरम म सामिल होइन। श्री वैष्णव ह संवाददाता मनले किहीन कि हमर लोकतंत्र म प्रेस के बड़का भूमिका हे।
इही बीच, छत्तीसगढ़ के मुख्यमंत्री विष्णुदेव साय ह राष्ट्रीय प्रेस दिवस के मउका म मीडिया जगत ले जुड़े सबो लोगन ल बधई अउ सुभकामना दीन हे। ओमन किहीन कि निष्पक्ष प्रेस अउ निडर पत्रकारिता ह स्वस्थ लोकतंत्र बर जरूरी हे।
एकलव्य विद्यालय-राष्ट्रीय क्रीडा प्रतियोगिता
ओडिसा के सुदंरगढ़ म ग्यारा नवंबर ले पंद्रा नवंबर तक आने-आने एकलव्य आदर्स आवासीय विद्यालय म पढ़इया विद्यार्थी मन बर राखे गे चौथा राष्ट्रीय खेल प्रतियोगिता म छत्तीसगढ़ ह देसभर म दूसरइया स्थान लाय हे। प्रतियोगिता म प्रदेस के खिलाड़ी मन ह शानदार खेल दिखात हुए पचपन स्वर्ण, तिरालीस रजत अउ चौंसठ कांस्य पदक जीते हे। ए प्रतियोगिता म लगभग सात हजार खिलाड़ी मन भाग ले रिहीस, एमा छत्तीसगढ़ के पचहत्तर एकलव्य आदर्स आवासीय विद्यालय के चार सौ छैंसठ प्रतिभागी मनके संग पांच सौ सोला सदस्यीय दल ह भाग लीन।
मुख्यमंत्री विष्णुदेव साय ह खिलाड़ी मन ल बधई देवत हुए किहीन कि ए जीत ह राज्य के युवा खिलाड़ी मनके मेहनत, लगन अउ कौशल के प्रतीक हे।
अउ अब थोरकुन समाचार सार म –
– मुख्य चिकित्सा अउ स्वास्थ्य अधिकारी ह सिमगा अउ बलौदाबाजार स्थित दू निजी अस्पताल मन के जांच म गड़बड़ी पाय जाय म कारण बताओ नोटिस जारी करत हुए दूनो अस्पताल के आयुष्मान पंजीयन ल तीन महिना बर निलंबित कर देहे।
अउ
– बिलासपुर कोर्ट परिसर म हंगामा करइया लोगन मनके खिलाफ पुलिस ह गैर जमानती धारा म दू आने-आने एफआईआर लिखे हे।