छत्तीसगढ़ समेत देसभर म आज स्वतंत्रता सेनानी अउ जनजातीय नेता धरती आबा बिरसा मुंडा के जयंती ल जनजातीय गौरव दिवस के रूप म मनाय जात हे। प्रधानमंत्री नरेंद्र मोदी ह गुजरात के जनजातीय बहुल नर्मदा जिला म भगवान बिरसा मुंडा के जयंती के अवसर म आयोजित सभा ल संबोधित करत हुए किहीन कि जनजातीय गौरव हजारो बछर ले भारत के चेतना के अभिन्न अंग रेहे हे। ओमन ए बात उपर जोर दीन कि जब भी देस के सम्मान, स्वाभिमान अउ स्व-शासन के प्रश्न उठे हे, त भारत के जनजातीय समाज सबले आगू खड़े रेहे हे। श्री मोदी ह किहीन कि देस स्वतंत्रता आंदोलन म जनजातीय समाज के योगदान ल कभू नइ भुलाय सकय। ओमन यहू किहीन कि आज श्री गोविंद गुरू पीठ जनजातीय भाषा संवर्धन केंद्र के घलो स्थापना करे गेहे, जिंहा सबो जनजातीय मनके बोली मन उपर अध्ययन करे जाही। प्रधानमंत्री ह किहीन कि उंखर ले जुड़े कहानी अउ गीत मन ल घलो ए केंद्र म संरक्षित करे जाही।
श्री मोदी ह किहीन कि बछर दू हजार इक्कीस म केंद्र सरकार ह भगवान बिरसा मुंडा के जयंती ल जनजातीय गौरव दिवस के रूप म मनाय के सुरूआत करे रिहीन।
ऐति, छत्तीसगढ़ के सबो जिला म भगवान बिरसा मुंडा के जयंती ल जनजातीय गौरव के रूप म मनाय जात हे। राज्यपाल रमेन डेका अउ मुख्यमंत्री विष्णुदेव साय ह प्रदेसवासी मन ल जनजातीय गौरव दिवस के सुभकामना देहे। राज्यपाल ह राजभवन म भगवान बिरसा मुंडा के फोटो म फूलमाला चढ़ाके उनला नमन करीन।
उहें, मुख्यमंत्री विष्णुदेव साय ह जगदलपुर म आयोजित कारीकरम म सामिल होइन। ओमन बस्तर के आराध्य देवी, मां दंतेश्वरी अउ भगवान बिरसा मुंडा के छायाचित्र समेत जनजातीय देवी-देवता मन के पूजापाठ कर जनजातीय गौरव दिवस के सुभारंभ करीन। ए मउका म मुख्यमंत्री ह किहीन कि राज्य सरकार जनजातीय समुदाय के समग्र विकास बर संकल्पित हे। ओमन किहीन कि जनजातीय अंचल मन के विकास म अउ गति लाय बर प्रधानमंत्री नरेंद्र मोदी ह धरती आबा जनजातीय ग्राम उत्कर्ष अभियान के सुरूआत करे हे। राज्य सरकार जनजातीय समुदाय के उत्थान के दिसा म सरलग आगू बाढ़त हे।
ओति, राजनांदगांव म विधानसभा अध्यक्ष डॉक्टर रमन सिंह, दुरूग म उपमुख्यमंत्री विजय शर्मा, बिलासपुर म उपमुख्यमंत्री अरूण साव अउ रईपुर म आयोजित कारीकरम म केंद्रीय राज्य मंत्री तोखन साहू सामिल होइन।
बतादन कि प्रदेस म भगवान बिरसा मुंडा के जयंती के उपलक्ष्य म जनजातीय गौरव पखवाड़ा मनाय जात हे। ए दउरान अलग-अलग कारीकरम के आयोजन करे जात हे।
बांस तीर्थ-संकल्पना समारोह
बेमेतरा जिला के ग्राम कठिया म काली छत्तीसगढ़ तीर्थ संकल्पना सम्मेलन के आयोजन करे गीस। ए दउरान मुख्यमंत्री विष्णुदेव साय ह एक सौ चालीस फिट ऊंचा बांस टावर उपर ध्वजारोहण करीन। ए मउका म मुख्यमंत्री ह किहीन कि ए संरचना केवल बांस के निर्माण नोहय, बल्कि छत्तीसगढ़ के परंपरा, कौशल, नवाचार अउ व्यापक संभावना मनके प्रतीक हरय। ओमन बांस के पौधा रोपण कर पर्यावरण संरक्षण अउ बांस आधारित कृषि के प्रसार के अपील करीन। मुख्यमंत्री म समारोह स्थल म स्थापित बांस उत्पाद निर्माण इकाई, फैक्ट्री अउ प्रोसेसिंग केंद्र मनके अवलोकन करीन अउ ग्रामीण अउ कारीगर मन ले गोठबात कर उंखर आजीविका के बारे म जानकारी लीन।
सम्मेलन म उपमुख्यमंत्री अरूण साव अउ खाद्य मंत्री दयालदास बघेल उपस्थित रिहीन।
पेसा अधिनियम
उपमुख्यमंत्री विजय शर्मा के अध्यक्षता म पेसा अधिनियम ल अउ जादा प्रभावी बनाय ल लेके काली उच्च स्तरीय बइठका होइस। बइठका म वन, पंचायत अउ आदिमजाति कल्याण विभाग के प्रतिनिधि अउ सामाजिक संस्थान मनके विषय विशेषज्ञ मन सामिल होइन। ए दउरान बछर दू हजार बाईस म पेसा अधिनियम के तहत बनायगे नियम मनके समीक्षा करे गीस अउ अधिनियम ल अउ जादा प्रभावी बनाय अउ एला लागू करे ल लेके चर्चा घलो करे गीस।
ए मउका म उपमुख्यमंत्री श्री शर्मा ह अधिकारी मन ल ग्राम सीमा के निर्धारण अउ ग्राम पंचायत म निहीत छोटे गांव मन ल वित्तीय अधिकार ले संपन्न करे के निरदेस दीन। ओमन पेसा गांव मन म नियम मनके संबंध म लोगन मन ल जागरूक करे बर अभियान चलाय बर किहीन।
धान खरीदी
प्रदेस म आज ले समर्थन मूल्य म धान खरीदी सुरू हो गेहे। एखर बर दू हजार सात सौ उनचालीस धान खरीदी केंद्र बनाय गेहे। मुख्यमंत्री विष्णुदेव साय ह धान खरीदी ल किसान मनके मेहनत अउ सरकार उपर उंखर विस्वास के उत्सव बतावत हुए किहीन कि राज्य सरकार पूरी तरह व्यव्यस्थित, पारदर्सी अउ समयबद्द रूप ले संचालित करे बर प्रतिबद्द हे। ओमन किहीन कि धान खरीदी के सबो तैयारी समय म पूरा कर ले गेहे अउ प्रदेस के सबो केंद्र मन म जरूरी सुविधा सुनिश्चित करे गेहे। श्री साय ह किहीन कि किसान मन ल कोनो परेसानी झन होवय एखर बर सबो जिला कलेक्टर मन ल स्पष्ट निरदेस दे गेहे।
उहें, उपमुख्यमंत्री विजय शर्मा ह कबीरधाम जिला के बोड़ला बिकासखंड स्थित महराजपुर धान उपार्जन केंद्र म समर्थन मूल्य म धान खरीदी के सुभारंभ करीन। ए मउका म ओमन किसान मनले चर्चा करीन अउ खरीदी केंद्र म उपलब्ध सुविधा, टोकन व्यवस्था अउ खरीदी प्रक्रिया के निरीक्षण करीन।
ओति, बस्तर जिला के पल्ली धान खरीदी केंद्र म सहकारी मंत्री केदार कश्यप ह विधि-विधान ले पूजापाठ कर धान खरीदी के सुभारंभ करीन। ए दउरान श्री कश्यप ह केंद्र म तौल, कांटा बाट, भंडारण व्यवस्था, किसान पंजीयन, गुणवत्ता परीक्षण अउ सुरक्षा प्रबंध जइसे उपलब्ध सुविधा मनके समीक्षा करीन। ओमन अधिकारी मन ल निरदेस देहे कि किसान मन ल बिना कोनो बाधा के धान विक्रय के सुविधा मिलय अउ पूरा प्रक्रिया पारदर्सी राहय।
उहें, राज्य सरकार डहार ले किसान मनके सुविधा बर ‘तुंहर टोकन मोबाइल ऐप‘ घलो सुरू करे गेहे। ए ऐप के माध्यम ले किसान मन घर बइठे धान बेचे बर टोकन प्राप्त कर सकत हे, जेखर ले समिति मन म लंबा लाइन ले मुक्ति मिलही। समिति मन म माइक्रो एटीएम के व्यवस्था घलो करे गेहे। राज्य म धान के अवैध परिवहन ल रोके बर दूसर राज्य मनके सीमा म चेकपोस्ट घलो बनाय गेहे।
इही बीच, राज्य सरकार ह पाछू तीन नवंबर ले हड़ताल करत राज्य के सहकारी कर्मचारी अउ कम्प्यूटर आपरेटर मन उपर एस्मा लगा दे हे। सरकार ह चेतावनी दे हे कि धान खरीदी काम के बहिष्कार करइया कर्मचारी मन उपर कड़ा कार्रवाई करे जाही। संगेसंग सहकारिता विभाग ले अपील करे हे कि कर्मचारी मन इतवार तक अपन काम म लहुट सकत हे।
ओति, प्राथमिक कृषि साख सहकारी समिति गनियारी ह समिति प्रभारी कौशल वर्मा ल अनुशासनहीनता के सेति तुरते प्रभाव ले मुक्त कर देहे। समिति ह श्री वर्मा ल पहिली घलो शोकॉज नोटिस जारी करे रिहीस, फेर ओमन नोटिस के कोनो जवाब नइ दे रिहीन।
बतादन कि धान खरीदी के ए अभियान इकतीस जनवरी दू हजार छब्बीस तक चलही।
जिले की चिट्ठी
प्रादेशिक समाचार एकांश, आकाशवाणी रईपुर कोति ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पंाच मिनट ले छै बजके दस मिनट तक करे जाही। ए कारीकरम ल छत्तीसगढ़ स्थित आकाशवाणी के सबो कंेद्र रिले करही। ए बखत के अंक म ‘‘कबीरधाम‘‘ जिला के गतिविधि के संबंध म जानकारी दे जाही।
अउ अब पेस हे मौसम के हाल…
मौसम विभाग ह प्रदेस के कई ठिन जिला म सीतलहर चले के संभावना जताय हे। मौसम विभाग के मुताबिक उत्तर भारत म बाढ़त जाड़ के असर छत्तीसगढ़ म घलो दिखत हे। अवइया दू-तीन दिन तक न्यूनतम तापमान म बड़का बदलाव के संभावना नइ हे, ओखर बाद तापमान म बढ़ोत्तरी हो सकत हे, फेर उत्तरी अउ मध्य छत्तीसगढ़ म अवइया कुछेक दिन तक सीतलहर के सीतलहर के स्थिति बन सकत हे।