केन्द्रीय मंत्रिमंडल-ऋण आश्वासन योजना
केन्द्रीय मंत्रिमंडल ह निर्यातक मन बर एक ठन नवा ऋण आश्वासन योजना ल मंजूरी देहे, जउन ह एमएसएमई संघरा निर्यातक मन ल शत-प्रतिशत ऋण के आश्वासन देथे। सूचना अउ प्रसारण मंत्री अश्विनी वैष्णव ह किहीन कि ए योजना के उद्देश्य भारत ल एक लाख करोड़ रूपिया के निर्यात लक्ष्य के समर्थन करना अउ आत्मनिर्भर भारत ल बढ़ावा देना हे।
प्रधानमंत्री नरेन्द्र मोदी ह किहीन हे कि केन्द्रीय मंत्रिमंडल डहार ले निर्यातक मन बर ऋण गारंटी योजना के मंजूरी ले वैश्विक प्रतिस्पर्धा ल बढ़ावा मिलही अउ व्यावसायिक संचालन निश्चित होही अउ एखरे संग भारत ल आत्मनिर्भर राष्ट्र बने म मदद मिलही। ए योजना बीस हजार करोड़ रूपिया तक के उपरहा ऋण दीहीं।
विधानसभा सत्र
छत्तीसगढ़ विधानसभा एक दिवसीय सत्र अट्ठारह नवंबर के आयोजित करे जाही। ए सत्र म छत्तीसगढ़ विधानसभा के पच्चीस बछर के संसदीय यात्रा ले जुड़े बिसय उपर चर्चा करे जाही। विधानसभा सचिव दिनेश शर्मा ह ए सत्र बर अधिसूचना जारी कर दे हवय।
जनदर्शन कार्यक्रम
मुख्यमंत्री विष्णुदेव साय के रायपुर निवास कार्यालय म आज जनदर्शन कार्यक्रम कराय गीस। ए दउरान मुख्यमंत्री ह लोगन के समस्या सुनीन अउ अधिकारी मन ल जरूरी कदम उठाय के निरदेस दीन।
जनदर्शन कार्यक्रम म वूमेन्स सेल्फ डिफेंस ऑर्गनाइजेशन के प्रतिनिधिमंडल ह मुख्यमंत्री ले भेंट करके राष्ट्रीय अउ अंतर्राष्ट्रीय स्तर म कराटे, कुश्ती अउ ताइक्वांडो जइसन खेल म सुघ्घर प्रदर्शन करइया खिलाड़ी मन बर स्वेच्छानुदान मंजूर करे के आग्रह करीन। एमा मुख्यमंत्री ह ओमन ल आश्वासन दीन कि ए बारे म सकारात्मक फइसला करे जाही।
उहेंं, अभनपुर ले आय दिव्यांग रग्बी खिलाड़ी पिंटू राम साहू के मांग म मुख्यमंत्री ह तुरते फइसला करत नब्बे हजार रूपिया के आर्थिक अनुदान मंजूर करीन। अइसने, मुख्यमंत्री ह रईपुर के ब्राम्हणपारा निवासी रमन निर्मलकर ल श्रवण यंत्र सौंपीन।
जनदर्शन कार्यक्रम म मुख्यमंत्री ह रईपुर के तेलीबांधा के रहवइया सेरेब्रल पाल्सी ले जूझत पूनम ले घलो भेंट करीन। ए दउरान मुख्यमंत्री ह पूनक के पढ़ई के व्यवस्था बर ओला बिसेस स्कूल म भर्ती कराय के अउ छात्रवृत्ति दे जाय के निरदेस दीन।
धान खरीदी/तुहर टोकन मोबाइल ऐप
प्रदेस म समर्थन मूल्य म धान खरीदी परसों पन्द्रह नवंबर ले सुरू होही। एखर पहिली, राज्य सरकार डहार ले किसान मनके सुविधा बर ‘तुहर टोकन मोबाइल ऐप‘ सुरू करे गेहे। ए ऐप के माध्यम ले किसान मन ह घर बइठे धान बेचे बर टोकन हासिल कर सकत हे, जेखर ले समिति मन म लंबा लाइन लगाय ले मुक्ति मिलही। ए मोबाइल ऐप ह गूगल प्ले स्टोर म हवय। एमा किसान मन ल आधार ले जुड़े ओटीपी के माध्यम ले पंजीयन कराना होही। किसान मन ह हर दिन बिहनिया आठ बजे ले ए ऐप के माध्यम ले टोकन बर आवेदन कर सकही।
खाद्य विभाग के सचिव रीना बाबा साहेब कंगाले ह बतईन कि धान खरीदी प्रक्रिया म पारदर्सिता अउ सुविधा ल देखत सीमांत किसान ल एक ठन टोकन, छोटे किसान ल दू ठन टोकन अउ बड़े किसान ल जादा ले जादा तीन ठन टोकन दे जाही। ओमन बतईन कि नवा टोकन बनाय बर इतवार ले सुक्रवार तक बिहनिया आठ बजे ले संझा पांच बजे तक समय-सीमा तय करे गेहे। जारी टोकन ह अवइया सात दिन बर मान्य रइही।
ईडी-चैतन्य बघेल संपत्ति कुर्क
प्रवर्तन निदेशालय-ईडी ह मनी लॉन्ड्रिंग मामला म पूर्व मुख्यमंत्री भूपेश बघेल के बेटा चैतन्य बघेल के करीबन इकसठ करोड़ बीस लाख रूपिया के संपत्ति ल कुर्क करे हे। कुर्क करे गे संपत्ति म तीन सौ चौंसठ आवासीय प्लॉट अउ खेती के जमीन हरय, जेखर कीमत करीब साठ करोड़ रूपिया हे। उहें, बैंक खाता म जमा रासि अउ फिक्स्ड डिपॉजिट के रूप म एक करोड़ चौबीस लाख रूपिया जब्त करे गेहे। ईडी ह अपन जांच म पईस कि चैतन्य बघेल ह रियल स्टेट कंपनी ‘बघेल डेवलपर्स‘ के माध्यम ले अवैध कमाई ल वैध के परयास करीस।
चैतन्य बघेल ल ईडी ह पाछु अट्ठारह जुलाई के गिरफ्तार करे रिहीस। अभी ओमन ह जेल म हवय।
कृषि विवि-संगोष्ठी
रायपुर के इंदिरा गांधी कृषि विश्वविद्यालय म आज प्राकृतिक खेती विषय उपर राष्ट्रीय संगोष्ठी के आयोजन करे गीस। संगोष्ठी के उद्घाटन करत राज्यपाल रमेन डेका ह किहीन कि प्राकृतिक अउ जैविक खेती आज के सबले बड़े जरूरत हे। रासायनिक उर्वरक के उपयोग सिरिफ उतका होना चाही, जतका जरूरत हे। ओमन किहीन कि जल संरक्षण बर जरूरी कदम अभी नइ उठाय जाही, त अवइया बेरा म जल संकट अउ तेजी ले बाढ़ही। राज्यपाल ह कृषि विश्वविद्यालय म पढ़ईया लइका मन ले अपील करीन कि ओमन ह अपन पढ़ाई पूरा करे के बाद जैविक खेती ल अपनाय, जेखर ले दूसर किसान मन घलो प्रेरित होही। ओमन किहीन कि आज ले समय म जैविक खेती ल बड़े व्यवसाय बन गे हवय अउ एला सही दिसा दे जाय के जरूरत हे।
संगोष्ठी ल कृषि मंत्री रामविचार नेताम, कृषि उत्पादन आयुक्त अउ सचिव शहला निगार ह घलो संबोधित करीन। कार्यक्रम म पद्मश्री साबरमती संघरा कतकोन किसान मन ल सम्मानित करे गीस।
एखर पहिली, राज्यपाल ह प्रदर्सनी के अवलोकन करीन।
ट्राइबल बिजनेस कॉन्क्लेव
नई दिल्ली म काली ट्राइबल बिजनेस कॉन्क्लेव के आयोजन करे गीस। एमा देसभर ले आय उद्यमी, नीति बनइया अउ स्टार्टअप प्रतिनिधि मन ह भाग लीन। कॉन्क्लेव म छत्तीसगढ़ के स्टार्टअप्स करइया मन ह भाग लेके अपन आईडिया ल बतईन। ए मउका म केन्द्रीय वाणिज्य अउ उद्योग मंत्री पीयूष गोयल के संग केन्द्रीय जनजातीय कार्यमंत्री जुएल उरांव ह छत्तीसगढ़ पवेलियन के निरीक्षण करीन। ओमन ह सबो स्टार्टअप्स के स्टॉल मन म घूमके उद्यमी मन ले गोठबात करीन अउ उंखर उत्पाद के बारे म जानकारी लीन। ओमन ह छत्तीसगढ़ डहार ले प्रदर्सित उत्पाद ल जनजातीय अर्थव्यवस्था ल मजबूत बनाय के सुघ्घर उदाहरण किहीन।
ट्रेन परिचालन
दक्षिण पूर्व मध्य रेलवे के बिलासपुर मंडल के चांपा-खरसिया सेक्शन के सारागांव स्टेसन म चौथा लाइन कनेक्विविटी बर नॉन इंटरलॉकिंग के काम करे जाही, जेखर सेती आज ले सत्रह नवंबर तक कोनों-कोनों यात्री गाड़ी के अवई-जवई परभावित रइही। सत्रह नवंबर तक बिलासपुर-रायगढ़-बिलासपुर मेमू पैसेंजर रद्द रइही। उहें, गोंदिया ले चलइया गोंदिया-झारसुगुड़ा मेमू पैसेंजर बिलासपुर तक ही चलही। अइसने, झारसुगुड़ा के चलइया झारसुगुड़ा-गोंदिया मेमू पैसेंजर बिलासपुर स्टेसन ले सुरू होके गोंदिया तक जाही।
माओवादी-शिनाख्त
बीजापुर जिला के नेशनल पार्क इलाका म पाछु ग्यारह नवंबर के होय मुठभेड़ म मारे गे सबो छह झन माओवादी मनके शिनाख्त कर ले गेहे। ए माओवादी मन उपर कुल सत्ताईस लाख रूपिया के इनाम रिहीस।
जिला के पुलिस अधीक्षक डॉक्टर जितेन्द्र यादव ह बतईन कि डीवीसीएम सदस्य कन्ना उर्फ बुचन्ना कुड़ियम अउ डीवीसीएम उर्मिला उपर आठ-आठ लाख रूपिया के इनाम रिहीस। उहें, एसीएम सदस्य जगत तामो उर्फ मोटू उपर पांच लाख के पार्टी सदस्य देवे, भगत अउ मंगली उपर दो-दो लाख रूपिया के इनाम रिहीस। मउका ले सुरक्षा बल ल दू ठन इंसास रायफल, एक ठन नौ एमएम के कार्बाइन, एक थ्री नॉट थ्री रायफल संघरा दूसर हथियार, विस्फोटक सामग्री अउ नक्सल सामान मिले हे।
मुख्यमंत्री विष्णुदेव साय ह सुरक्षा बल के सफलता म किहीन कि ए उपलब्धि ह पुलिस बल के बढ़िया मेलजोल, साहस अउ सुघ्घर रणनीति के परिणाम हे।
अउ अब थोरकुन समाचार सार म –
– बिहार विधानसभा चुनाव बर वोट के गिनती काली बिहनिया आठ बजे सुरू होही। दू सौ तिरालीस निर्वाचन क्षेत्र बर दू चरण म मतदान होय रिहीस। इलेक्ट्रॉनिक वोटिंग मसीन ल स्ट्रांग रूम कड़ा सुरक्षा म राखे गे हवय।
– मुख्यमंत्री विष्णुदेव साय के अध्यक्षता म काली चौदह नवंबर के मंत्रालय म राज्य मंत्रिपरिषद के बइठका होही।
अउ
– नई दिल्ली के भारत मंडपम म काली ले भारत अंतर्राष्ट्रीय व्यापार मेला के आयोजन करे जाही। जेमा देस के सबो राज्य संघरा अंतर्राष्ट्रीय स्तर के उद्योगपति अउ निवेसक मन सामिल होही।